Xana Madimona I Ya Xiviri?

Ina. Madimona i “tintsumi leti dyoheke,” swivumbiwa swa moya leswi xandzukeleke Xikwembu. (2 Petro 2:4) Ntsumi yo sungula leyi tiendleke dimona i Sathana Diyavulosi, loyi Bibele yi n’wi vulaka “mufumi wa madimona.”—Matewu 12:24, 26.

Vaxandzuki va le nkarhini wa Nowa

Bibele yi boxa ku xandzuka loku endliweke hi tintsumi emahlweni ka Ndhambi ya le nkarhini wa Nowa: “Kutani vana va Xikwembu xa ntiyiso va sungula ku vona leswaku vana va vanhwanyana va vanhu va sasekile; hiloko va ya teka vasati eka vona, ku nga hinkwavo lava va va hlawuleke.” (Genesa 6:2) Tintsumi teto to homboloka ‘ti fularhele vutshamo bya tona lebyi faneleke’ etilweni ivi ti ambala mimiri ya vanhu leswaku ti va ni vuxaka bya rimbewu ni vavasati.—Yudha 6.

Loko Ndhambi yi fika, tintsumi leto xandzuka ti hluvule mimiri ya tona ya nyama kutani ti tlhelela etilweni. Kambe, Xikwembu xi ti hlongorile endyangwini wa xona. Tanihi xiphemu xa nxupulo wa tona, madimona ma siveriwe ku va ma nga ha swi koti ku ambala xivumbeko xa vanhu.—Vaefesa 6:11, 12.