Mfumo Wu Hetisisa Ku Rhandza Ka Xikwembu eMisaveni

1, 2. (a) Ha yini minkarhi yin’wana swi nga ha tikaka ku teka Paradeyisi tanihi leyi yi nga ya xiviri? (b) I yini lexi nga hi pfunaka ku tiyisa ripfumelo ra hina eka switshembiso swa Xikwembu?

MAKWERHU loyi a tshembekeke u fika eminhlanganweni, a karhele endzhaku ka siku ro leha. U khomiwe hi ndlela ya tihanyi hi muthori wakwe la karhataka, u tshikilelekile hi swiphiqo swo khathalela ndyangu wakwe naswona u vilerisiwa hi nsati wakwe la vabyaka. Loko vuyimbeleri bya risimu ro pfula byi sungula, hiloko a ku hefu, a tsakile hileswi a fikeke eHolweni ya Mfumo laha ku nga ni vamakwerhu vakwe. Risimu rero i ra malunghana ni ntshembo wa vutomi eParadeyisini naswona marito ya rona ma n’wi endla a tivona hi tihlo ra mianakanyo a ri endhawini yoleyo. Minkarhi hinkwayo wa ri rhandza risimu leri naswona loko a ri karhi a ri yimbelela swin’we ni ndyangu wakwe, wa chaveleleka hi ntshembo wa vumundzuku.

² Xana u tshame u titwa hi ndlela yoleyo? Vo tala va hina hi tshame hi titwa hi ndlela yoleyo. Hakunene vutomi eka fambiselo leri ra khale ra swilo byi nga endla swi hi tikela swinene ku vona Paradeyisi tanihi leyi nga ya xiviri. Leyi i “minkarhi ya mangava leyi swi nonon’hwaka ku langutana na yona” naswona misava leyi hi hanyaka eka yona yi hambane ekule ni paradeyisi. (2 Tim. 3:1) I yini leswi nga hi pfunaka ku teka ntshembo wa hina tanihi lowu nga wa xiviri? Xana hi swi tivisa ku yini leswaku ku nga ri khale Mfumo wa Xikwembu wu ta fuma vanhu hinkwavo? A hi kambisiseni vuprofeta byi nga ri byingani lebyi humaka eka Yehovha lebyi vanhu vakwe va byi voneke byi hetiseka enkarhini lowu hundzeke. Kutani hi ta kambisisa ndlela leyi vuprofeta byebyo ni lebyi fanaka na byona byi nga eku hetisekeni ha yona sweswi. Xisweswo, loko ripfumelo ra hina ri tiyisiwile, hi ta kambisisa leswi vuprofeta byebyo byi vulaka swona hi vumundzuku bya hina.

 3. I xitshembiso xihi lexi chaveleleke Vayuda lava a va ri evukhumbini eBabilona?

³ Anakanya ndlela leyi vutomi a byi ri ha yona eka Vayuda lava a va ri evuhlongeni eBabilona hi lembe-xidzana ra vutsevu B.C.E. Vo tala va kulele evuhlongeni ku fana ni vatswari va vona naswona vutomi a byi tika. Vababilona a va va hlekula hileswi a va ri ni ripfumelo eka Yehovha. (Ps. 137:​1-3) Kambe eka makume ya malembe yo tala, Vayuda vo tshembeka va hambete va khomelela swi tiya eka ntshembo lowu wo tsakisa: Yehovha u tshembise ku hlengeleta vanhu vakwe leswaku va tlhelela etikweni ra rikwavo. Yehovha u vule leswaku swiyimo a swi ta tsakisa kwale. U tlhele a fanisa tiko leri vuyeteriweke ra Yuda ni ntanga wa le Edeni, ku nga paradeyisi! (Hlaya Esaya 51:3.) A swi ri erivaleni leswaku switshembiso swo tano a swi endleriwe ku tiyisekisa vanhu va Xikwembu, swi susa ku kanakana loku a va ri na kona. Njhani? Xiya vuprofeta byin’wana lebyi kongomeke.

 4. Xana Yehovha u va tiyisekise njhani Vayuda malunghana ni ndlela leyi makaya ya vona a ta ma sirhelela ha yona?

⁴ Nsirhelelo. Mahlonga wolawo a ma nga ta tlhelela eparadeyisini ya xiviri kambe etikweni ra le kule leri tshameke ri ri rhumbi ku ringana malembe ya 70, ku nga tiko leri van’wana va vona a va nga si tshama va ri vona. Hi nkarhi wolowo, tinghala a ti tolovelekile ematikweni ya le Bibeleni, hilaha a swi ri hakona eka timhisi, tiyingwe ni swiharhi swin’wana leswi hlotaka. Wanuna wa ndyangu a nga tivutisa leswi, ‘Xana ndzi nga swi endlisa ku yini leswaku nsati ni vana va mina va tshama va hlayisekile? Ku vuriwa yini hi tinyimpfu ni tihomu​—ndzi ta ti sirhelela njhani?’ Swi tolovelekile ku titwa hi ndlela yoleyo. Kutani anakanya hi xitshembiso xa Xikwembu lexi nga eka Esaya 11:​6-9 ni ndlela leyi xi faneleke xi va chavelele ha yona. (Hlaya.) Hi marito wolawo yo tsakisa ya xiphato, Yehovha u tiyisekise mahlonga wolawo leswaku wona ni mintlhambi ya wona a va ta sirheleleka. Nghala a yi ta dya byanyi leswi vulaka leswaku a yi nga ta dya tihomu ta Vayuda. Vanhu vo tshembeka a va nga fanelanga va chava swiharhi sweswo leswi hlotaka. Yehovha a a tshembise vanhu vakwe leswaku a va ta sirheleleka etikweni leri vuyeteriweke ra Yuda, hambi ku ri emananga kumbe emakhwatini.​—Ezek. 34:25.

 5. I switshembiso swihi leswi pfuneke mahlonga wolawo leswaku ma tiyiseka leswaku Yehovha a ta enerisa xilaveko xa wona hi ndzalo?

⁵ Ndzalo. U nga ha vilerisiwa hi swin’wana swo tanihi leswi. ‘Xana ndzi ta swi kota ku wundla ndyangu wa mina etikweni ra rikwavo leri vuyeteriweke? Hi ta tshama kwihi? Xana ku ta va ni ntirho naswona wu ta va lowu antswaka ku tlula ku tshikileriwa hi valawuri?’ Eka vuprofeta lebyi huhuteriweke, hi musa Yehovha u hlamule ni swivutiso sweswo. Yehovha a a tshembise leswaku vanhu vakwe lava yingisaka a va ta kuma mpfula; eku heteleleni, misava a yi ta humesa xinkwa xo ‘nona xi tlhela xi va ni mafurha.’ (Esa. 30:​23) Malunghana ni ndhawu ni ntirho wa kahle, Yehovha u tshembise vanhu vakwe a ku: “Va ta aka tindlu va tshama eka tona; kunene va ta rima masimu ya vhinya va dya mihandzu ya wona. A va nge aki kutani ku tshama un’wana; a va nge rimi kutani ku dya un’wana.” (Esa. 65:​21, 22) I ntiyiso leswaku vutomi a byi ta va lebyi tsakisaka hi tindlela to tala loko byi ringanisiwa ni bya le vuhlongeni bya vona etikweni ra vahedeni ra Babilona. Kambe ku vuriwa yini hi swiphiqo swa vona leswikulu​—leswi endleke leswaku va ya evuhlongeni?

 6. Xana vanhu va Xikwe­mbu i khale va xaniseka hi swiphiqo swihi swa rihanyo naswona Yehovha u tshembise mahlonga lama tlheleleke leswaku u ta ma endlela yini?

⁶ Ku va ni rihanyo lerinene hi tlhelo ra moya. Emahlweni ko va va ya evuhlongeni, vanhu va Xikwembu va sungule ku tsana hi tlhelo ra moya. Hi ku tirhisa muprofeta Esaya, Yehovha u byele vanhu vakwe a ku: “Nhloko hinkwayo ya vabya, ni mbilu hinkwayo yi tsanile.” (Esa. 1:5) Hi tlhelo ra moya, a va fe mahlo naswona a va nga twi, kutani va hambete va pfala tindleve ta vona leswaku ti nga yingisi ndzayo ya Yehovha ni ku pfala mahlo ya vona leswaku ma nga byi voni vutivi lebyi a va nyika byona. (Esa. 6:​10; Yer. 5:​21; Ezek. 12:2) Loko swiphiqo leswi fanaka swi humelela mahlonga lama vuyeke, hi wihi nsirhelelo lowu a ma ta va na wona? Xana a ma nga ta tlhela ma endla leswaku Yehovha a nga ha ma tsakeli? Mawaku ndlela leyi a xi chavelela ha yona xitshembiso xa Yehovha lexi nge: “Esikwini rero lava feke tindleve va ta twa marito ya buku, ni mahlo ya lava feke mahlo ma ta vona laha ku dzwihaleke ni le munyameni.” (Esa. 29:​18) I ntiyiso leswaku Yehovha a a ta vuyetela vuxaka lebyi a ri na byona ni vanhu vakwe lava xupuriweke, ku nga vanhu lava hundzukeke. Ntsena loko va hambeta va xalamukile ni ku yingisa, a a ta va nyika nkongomiso lowu nyikaka vutomi ni vutivi.

 7. Xana xitshembiso lexi Xikwembu xi xi tshembiseke vanhu va xona lava nga mahlonga xi hetiseke njhani naswona ha yini ku hetiseka ka xitshembiso xexo ku tiyisa ripfumelo?

⁷ Xana Yehovha u swi hetisisile switshembiso swakwe? Nhlamulo ya kona yi kumeka ematin’wini. Vayuda lava tlheleleke etikweni ra rikwavo va katekisiwe hi ku va ni nsirhelelo, ndzalo ni ku va ni vuxaka na Yehovha. Hi xikombiso, Yehovha u va sirhelele eka vanhu lava tshamaka na vona lava a va ri ni matimba ni ku tlhela va tala ku va tlula. Swiharhi leswi hlotaka a swi yi dyanga mintlhambi ya Vayuda. I ntiyiso leswaku Vayuda va vone ntsena ku hetiseka ka vuprofeta byi nga ri byingani bya paradeyisi lebyi vavanuna vo tanihi Esaya, Yeremiya na Ezekiyele va tsaleke ha byona​—kambe ku hetiseka loku vanhu va Xikwembu va ku voneke a ku tsakisa naswona hi kona ntsena loku a va ku lava hi nkarhi wolowo. Loko hi ri karhi hi anakanyisisa hileswi Yehovha a swi endleleke vanhu vakwe enkarhini lowu nga hundza, ripfumelo ra hina ri ta ya ri tiya swinene. Loko ku ri hileswaku ku hetiseka ka vuprofeta byebyo byi nga ri byingani a ku tsakisa, xana ku hetiseka lokukulu ka vuprofeta ku ta va njhani? Xiya leswi Yehovha a hi endleleke swona namuntlha.

 8. Vanhu va Xikwembu va tiphina hi “tiko” ra njhani namuntlha?

⁸ Sweswi vanhu va Yehovha a va vumbi tiko ra xiviri, kumbe ku tshama etikweni rin’we. Ematshan’weni ya sweswo, Vakreste lava totiweke va vumba tiko ra moya, ku nga “Israyele wa Xikwembu.” (Gal. 6:​16) Vanghana va vona va “tinyimpfu tin’wana,” va va joyina eka “tiko” ra moya, ku nga xivandla xa moya lexi eka xona va gandzelaka Yehovha Xikwembu hi vun’we. Ku gandzela ko tano a ku ta endla leswaku va kuma vutomi. (Yoh. 10:​16; Esa. 66:8) Nakambe i “tiko” ra njhani leri Yehovha a hi nyikeke rona? I paradeyisi ya moya. Laha switshembiso swa Xikwembu malunghana ni swiyimo swa le Edeni swi hetisekeke hi ndlela yo tsakisa hi tlhelo ra moya. Xiya swikombiso swin’wana.

9, 10. (a) Xana vuprofeta bya Esaya 11:​6-9 byi hetiseke hi ndlela yihi namu­ntlha? (b) Hi byihi vumbhoni bya ku rhula lebyi hi byi kumaka exikarhi ka vanhu va Xikwembu?

⁹ Nsirhelelo. Eka vuprofeta lebyi nga eka Esaya 11:​6-9, hi kuma mhaka yo tsakisa eka ku twanana ni ku rhula​—exikarhi ka swiharhi swa nhova ni vanhu ni swifuwo swa vona. Xana xifaniso xexo xa hetiseka hi tlhelo ra moya namuntlha? Ina! Eka ndzimana 9, hi kuma xivangelo xa leswaku ha yini swivumbiwa sweswo swi nga ta ka swi nga vavisi kumbe ku onha: “Hikuva kunene misava yi ta tala hi ku tiva Yehovha kukota mati lama funengetaka lwandle.” Xana “ku tiva Yehovha” swi cinca mahanyelo ya swiharhi? Doo, i vanhu lava cinciwaka hi ku tiva Xikwembu Lexi nge Henhla-henhla ni ku dyondza ku tekelela tindlela ta xona ta ku rhula. Hi yona mhaka leyi eparadeyisini ya hina ya moya namuntlha, hi nga vonaka ku hetiseka loku tsakisaka ka vuprofeta byebyo. Ehansi ka Mfumo, valandzeri va Kreste va le ku dyondzeni ku tshika madzolonga ni mahanyelo yo biha ni ku hanya hi ku rhula ni ku twanana ni vamakwerhu va vona va moya.

¹⁰ Hi xikombiso, ebukwini leyi hi vulavule hi mhaka yo va Vakreste va nga hlanganyeli enyimpini​—ku twisisa ka hina Matsalwa swi endle leswaku vanhu va Xikwembu va xanisiwa hileswi va tekeke goza rero ro ka va nga katseki enyimpini. Xana a hi mhaka leyi xiyekaka leswaku emisaveni leyi, leyi nga ni tihanyi, ku ni “tiko” lerikulu ra vanhu lava alaka ku hlanganyela eka swiendlo swa madzolonga hambiloko va xungetiwa ku dlayiwa? Mawaku xitiyisekiso lexi xiyekaka xa leswaku lava fumiwaka hi Hosi leyi nga Mesiya, va le ku tiphineni hi ku rhula loku fanaka ni loku hlamuseriweke hi Esaya! Yesu u vule leswaku valandzeri vakwe a va ta tiviwa hi ku va va rhandzana. (Yoh. 13:​34, 35) Evandlheni, Kreste u tirhisa ‘hlonga rakwe ro tshembeka ni ro tlhariha’ ku dyondzisa Vakreste hinkwavo va ntiyiso leswaku va va ni ku rhula, rirhandzu ni musa.​—Mat. 24:​45-47.

11, 12. I ndlala ya muxaka muni leyi misava ya namuntlha yi nga na yona, kambe xana Yehovha u nyike vanhu vakwe ndzalo hi ndlela yihi?

¹¹ Ndzalo. Misava yi ni ndlala hi tlhelo ra moya. Bibele yi tsundzuxe yi ku: “‘Waswivo! Masiku ma ta,’ ku vula Yehovha, Hosi leyi Lawulaka, ‘kutani ndzi ta rhumela ndlala etikweni, ndlala, ku nga ri ya xinkwa, ni torha, ku nga ri ra mati, kambe ra ku twa marito ya Yehovha.’” (Amo. 8:​11) Xana vaaka-tiko va Mfumo wa Xikwembu na vona va ni ndlala? Yehovha u profete hi ku hambana loku nga kona exikarhi ka vanhu vakwe ni valala vakwe: “Malandza ya mina ma ta dya, kambe n’wina mi ta va ni ndlala. Maswivo! Malandza ya mina ma ta nwa, kambe n’wina mi ta va ni torha. Maswivo! Malandza ya mina ma ta tsaka, kambe n’wina mi ta khomiwa hi tingana.” (Esa. 65:​13) Xana u ku xiyile ku hetiseka ka marito wolawo?

¹² Malunghiselelo ya swakudya swa moya eka hina ma fana ni nambu lowu enteke swinene. Minkandziyiso ya hina leyi sekeriweke eBibeleni, ni swilo leswi rhekhodiweke swin’we ni tivhidiyo, minhlangano ni mintsombano ya hina; ni swilo leswi nga eka Web site ya hina​—i nkongomiso wa moya lowu kanetiwaka hi vanhu lava kayivelaka nkongomiso wa ntiyiso emisaveni. (Ezek. 47:​1-12; Yuw. 3:​18) Xana a swi ku tsakisi ku vona ku hetiseka ka switshembiso swo tala swa Yehovha evuton’wini bya wena bya siku ni siku? Xana wa tiyiseka leswaku u tiwundla nkarhi na nkarhi etafuleni ra Yehovha?

13. Xana u ku vone hi ndlela yihi ku hetiseka ka xitshembiso xa Yehovha malunghana ni loko mahlo lama feke ma pfuriwa ni tindleve leti nga twiki ti twa?

¹³ Ku va ni rihanyo lerinene hi tlhelo ra moya. Namuntlha vanhu va fe mahlo ni tindleve hi tlhelo ra moya. (2 Kor. 4:4) Kambe Kreste u le ku hanyiseni ka vanhu lava tsaneke ni lava vabyaka emisaveni hinkwayo. Xana u tshame u vona mahlo lama feke ma pfuriwa ni tindleve leti nga twiki ti twa? Loko u tshame u vona vanhu va kuma vutivi lebyi kongomeke bya ntiyiso wa Rito ra Xikwembu, va tshika mavunwa ya vukhongeri lama tshameke ma va dlaya mahlo ni tindleve leswaku va nga wu twi ntiyiso, u vone xitshembiso lexi loko xi hetiseka: “Esikwini rero lava feke tindleve va ta twa marito ya buku, ni mahlo ya lava feke mahlo ma ta vona laha ku dzwihaleke ni le munyameni.” (Esa. 29:​18) Emisaveni hinkwayo, vanhu va madzana ya magidi lembe ni lembe va hanyisiwa hi tlhelo ra moya. Munhu un’wana ni un’wana loyi a humaka eBabilona Lonkulu kutani a ta gandzela na hina eparadeyisini ya moya i vumbhoni bya leswaku switshembiso swa Yehovha swa hetiseka!

14. I vumbhoni byihi lebyi loko hi anakanyisisa ha byona byi nga ta tiyisa ripfumelo ra hina?

¹⁴ Ndzima yin’wana ni yin’wana ya buku leyi yi ni vumbhoni lebyi tiyeke bya leswaku Kreste u tise valandzeri vakwe eparadeyisini ya xiviri ya moya enkarhini lowu wa makumu. A hi hambeteni hi anakanyisisa hi tindlela to tala leti hi katekisiweke ha tona eparadeyisini yoleyo ya moya namuntlha. Loko hi endla tano, ripfumelo ra hina eka switshembiso swa Yehovha swa nkarhi lowu taka ri ta hambeta ri tiya.

15. Ha yini hi tiyiseka leswaku misava yi ta va paradeyisi?

¹⁵ I khale xikongomelo xa Yehovha ku ri ku endla leswaku misava hinkwayo yi va paradeyisi. U veke Adamu na Evha eparadeyisini leyi nga ntanga naswona u va byele leswaku va ta ta misava hi vana va vona ni leswaku va khathalela swivumbiwa hinkwaswo swakwe. (Gen. 1:​28) Ematshan’weni ya sweswo, Adamu na Evha va landzele Sathana eka ku xandzuka kakwe kutani va endla leswaku vana va vona hinkwavo va nga hetiseki, va va ni xidyoho ni ku tlhela va fa. Kambe xikongomelo xa Xikwembu a xi cincanga. Loko xi kala xi vulavula, minkarhi hinkwayo marito ya xona ma hetiseka. (Hlaya Esaya 55:​10, 11.) Kutani hi nga tiyiseka leswaku vana Adamu na Evha a va ta ta ta misava leyi ivi va tshama eka yona, va khathalela swivumbiwa swa Yehovha hi rirhandzu emisaveni hinkwayo leyi nga paradeyisi. Hi nkarhi wolowo, vuprofeta byo sungula lebyi a byi nyikiwe Vayuda lava a va ri evuhlongeni malunghana ni swiyimo swa paradeyisi byi ta hetiseka hi ku helela! Xiya swikombiso leswi landzelaka.

16. Xana Bibele yi wu hlamusela njhani nsirhelelo lowu hi nga ta tiphina ha wona eParadeyisini?

¹⁶ Nsirhelelo. Eku heteleleni, hi ta ma vona marito lama khutazaka lama nga eka Esaya 11:​6-9 ma hetiseka hi ku helela. Vavanuna, vavasati ni vana va ta va hlayisekile ni ku tlhela va sirhelelaka kun’wana ni kun’wana laha va nga ta ya kona emisaveni. Ku hava xivumbiwa, ku nga khathariseki leswaku i munhu kumbe xiharhi, lexi nga ta tisa nxungeto. Anakanya hi nkarhi lowu u nga ta vona pulanete leyi hinkwayo yi ri kaya ra wena, laha u nga ta hlambela emilambyeni, emativeni ni le malwandle; u famba-famba entshaveni; ni ku teka maendzo u sirhelelekile hi ku helela. Loko ri pela, a wu nge vileli. Marito ya Ezekiyele 34:​25 ma ta hetiseka, leswaku vanhu va Xikwembu va kota ku ‘tshama emananga va sirhelelekile, ni ku etlela emakhwatini.’

17. Ha yini hi tiyiseka leswaku Yehovha u ta hi nyika ndzalo ya swilo leswi hi swi lavaka loko Mfumo wu fuma misava hinkwayo?

¹⁷ Ndzalo. Hi tihlo ra mianakanyo vona nkarhi lowu eka wona ku nga ta va ku ri hava swilo swo tanihi vusweti ni ndlala. Ndzalo ya swakudya swa moya leswi vanhu va Xikwembu namuntlha va tiphinaka ha swona i xitiyisekiso xa leswaku Hosi leyi nga Mesiya yi ta phamela vanhu lava fumiwaka hi yona nchumu wun’wana ni wun’wana. Loko Yesu a ri laha misaveni, u swi kombise hi mpimo wutsongo leswaku a nga swi hetisisa switshembiso swo tano, hikuva u phamele vanhu va magidi lava nga ni ndlala hi ku tirhisa swinkwa swi nga ri swingani ni nhlampfi. (Mat. 14:​17, 18; 15:​34-36; Mar. 8:​19, 20) Loko Mfumo wa Xikwembu wu fuma misava hinkwayo, vuprofeta byo fana ni lebyi byi ta hetiseka hi ku helela: “U ta nisa mpfula, a yi nisela mbewu ya wena leyi u yi byaleke emisaveni, ni xinkwa ku nga ntshovelo wa misava, lexi faneleke xi nona naswona xi va ni mafurha. Esikwini rero swifuwo swa wena swi ta dya emadyelweni yo pfuleka.”​—Esa. 30:23.

18, 19. (a) Xana vuprofeta lebyi nga eka Esaya 65:​20-22 byi vula yini eka wena? (b) Xana masiku ya hina “ma ta fana ni masiku ya murhi” hi ndlela yihi?

¹⁸ Vanhu vo tala namuntlha swa va tikela ku anakanya hi ku va ni kaya ra kahle kumbe ku va ni ntirho lowu enerisaka. Eka fambiselo leri, leri onhakeke, vanhu va titwa onge va tirha nkarhi wo leha naswona ku vava handle ko va va vuyeriwa vona swin’we ni mindyangu ya vona, loko swifumi ni vanhu va makwanga va ri karhi va vuyeriwa. Anakanya ndlela leyi swi nga ta va ha yona loko vuprofeta lebyi byi hetiseka emisaveni hinkwayo: “Va ta aka tindlu va tshama eka tona; kunene va ta rima masimu ya vhinya va dya mihandzu ya wona. A va nge aki kutani ku tshama un’wana; a va nge rimi kutani ku dya un’wana. Hikuva masiku ya vanhu va mina ma ta fana ni masiku ya murhi; ni ntirho wa mavoko ya vona, vahlawuriwa va mina va ta wu tirhisa hi xitalo.”​—Esa. 65:​20-22.

¹⁹ Xana swi vula yini leswaku masiku ya hina ma ta “fana ni masiku ya murhi”? Loko u yima ehansi ka murhi lowukulu, xana swa ku hlamarisa loko u anakanya hileswaku murhi wolowo wu ni nkarhi wo tanihi kwihi wu ri kwalaho​—kumbexana emahlweni ko va vakokwana-xinguwe va wena va velekiwa? Swi nga ha endleka leswaku loko wo hambeta u va eka xiyimo xa wena xa ku nga hetiseki, murhi wolowo wu ta hambeta wu hanya ku ku tlula, wu hambeta wu leha, wu va kona hambi ku ri endzhaku ka loko u file. Mawaku musa lowu Yehovha a nga na wona wa ku hi tiyisekisa leswaku eParadeyisini leyi taka, masiku ya hina ma ta va ma lehile ma tlhela ma va ni ku rhula! (Ps. 37:​11, 29) Wa ta nkarhi lowu laha hambi ku ri mirhi leyi nga ni malembe yo tala yi nga ta vonaka eka hina tanihi byanyi, lebyi humaka byi tlhela byi fa loko hina hi hambeta hi hanya hilaha ku nga heriki!

20. Xana vanhu vo tshembeka lava fumiwaka hi Mfumo va ta tiphina hi rihanyo leri hetisekeke hi ndlela yihi?

²⁰ Rihanyo leri hetisekeke. Namuntlha, vuvabyi ni rifu swi khumba un’wana ni un’wana. Hi marito man’wana, hinkwerhu ha vabya​—hi tluleriwe hi vuvabyi lebyi dlayaka lebyi vuriwaka xidyoho. Gandzelo ra nkutsulo ra Kreste hi rona ntsena leri nga kotaka ku byi tshungula. (Rhom. 3:​23; 6:​23) Hi nkarhi wa Mfumo wa Yesu wa Gidi ra Malembe, yena swin’we ni lava a nga ta fuma na vona va ta pfuna vanhu leswaku va vuyeriwa hi ku helela eka xitlhavelo xexo, hakatsongo-tsongo va herisa swilo hinkwaswo swa xidyoho eka vanhu vo tshembeka. Vuprofeta bya Esaya byi ta hetiseka hi ku helela: “Ku hava munhu la tshamaka kona la nga ta ku: ‘Ndza vabya.’ Vanhu lava tshamaka etikweni rero va ta va va rivaleriwe xidyoho xa vona.” (Esa. 33:​24) Anakanya hi nkarhi lowu eka wona ku nga ta va ku ri hava lava feke mahlo, lava nga twiki kumbe lava lamaleke. (Hlaya Esaya 35:​5, 6.) Ku hava vuvabyi lebyi nga ta tsandza Yesu leswaku a byi horisa​—ku nga khathariseki leswaku hi le mirini, emianakanyweni kumbe emintlhavekweni. Vanhu vo tshembeka lava fumiwaka hi Mfumo va ta tiphina hi rihanyo leri hetisekeke!

21. Ku ta endleka yini hi rifu naswona ha yini xitshembiso xexo xi ku chavelela?

²¹ Kambe xana ku vuriwa yini hi vuyelo lebyi tolovelekeke bya vuvabyi, nchumu lowu nga papalatekiki lowu eku heteleleni wu vangaka xidyoho, ku nga rifu? Yoloye i ‘nala wa hina wo hetelela,’ ku nga nala loyi a lwisanaka ni vanhu lava nga hetisekangiki loyi a nga ta herisiwa ku nga ri khale. (1 Vakorinto 15:​26) Kambe xana rifu i nala loyi Yehovha a n’wi chavaka? Xiya leswi Esaya a swi profeteke: “U ta mita rifu hi masiku, kunene Yehovha, Hosi leyi Lawulaka yi ta sula mihloti eswikandzeni hinkwaswo.” (Esa. 25:8) Xana u nga wu vona hi tihlo ra mianakanyo nkarhi wolowo? Ku ri hava minkosi, masirha, ku rila ni gome! Ku hambana ni sweswo​—ku ta va mihloti ya ntsako loko Yehovha a hetisisa switshembiso swakwe swo tsakisa swo pfuxa lava feke! (Hlaya Esaya 26:​19.) Eku heteleleni, timbanga ta ntsandza-vahlayi leti vangiweke hi rifu ti ta horisiwa.

22. Xana ku ta endleka yini loko Mfumo wa Mesiya wu hete ku hetisisa ku rhandza ka Xikwembu emisaveni?

²² Eku heleni ka Gidi ra Malembe, Mfumo wu ta va wu hetile ku endla ku rhandza ka Xikwembu emisaveni naswona Kreste u ta tlherisela vulawuri eka Tata wakwe. (1 Kor. 15:​25-28) Eku heteleleni vanhu va ta va lava hetisekeke, va lunghekela ku langutana ni ndzingo wo hetelela loko Sathana a ntshunxiwa ekheleni rakwe ro enta leri a nga kotiki ku endla nchumu. Endzhaku ka sweswo, eku heteleleni Kreste u ta pfotlosa nyoka yoleyo yo homboloka ni vaseketeri va yona. (Gen. 3:​15; Nhlav. 20:​3, 7-10) Kambe hinkwavo lava rhandzaka Yehovha hi timbilu ta vona hinkwato va ta va ni ntshembo lowu tsakisaka. Kumbexana ku hava marito yo antswa lama wu hlamuselaka hi ndlela leyinene ku tlula lama kumekaka eBibeleni. I xitshembiso lexi lavo tshembeka va nga ta va na xona, ku nga “ntshunxeko lowu vangamaka wa vana va Xikwembu.”​—Rhom. 8:21.

23, 24. (a) Ha yini hi tiyiseka leswaku switshembiso swa Xikwembu swi ta hetiseka? (b) Xana u tiyimisele ku endla yini?

²³ Switshembiso sweswo a swi sekeriwanga eka ntshembo lowu nga wa hava, ku navela kumbe milorho. Yehovha wa tiyiseka leswaku switshembiso swakwe swi ta hetiseka! Ha yini? Tsundzuka marito ya Yesu lawa hi buleke ha wona eku sunguleni ka ndzima ya buku leyi. U dyondzise valandzeri vakwe leswaku va khongela eka Yehovha va ku: “Mfumo wa wena a wu te. Ku rhandza ka wena a ku endleke emisaveni.” (Mat. 6:​9, 10) Mfumo wa Xikwembu a hi nchumu lowu endliweke hi mianakanyo ya munhu. I wa xiviri! Wa karhi wa fuma etilweni sweswi. Ku ringana lembe-xidzana, wu hetisise switshembiso swa Yehovha hi tindlela leti hi nga ti vonaka hi ku kongoma evandlheni ra Vukreste. Kutani, hi nga tiyiseka leswaku switshembiso hinkwaswo swa Yehovha swi ta hetiseka loko Mfumo wa Xikwembu wu ta leswaku wu ta kombisa matimba ya wona hi ku helela emisaveni!

²⁴ Ha swi tiva leswaku Mfumo wa Xikwembu wu ta ta. Ha swi tiva leswaku xitshembiso xin’wana ni xin’wana xa Yehovha xi ta hetiseka. Ha yini? Hikuva MFUMO WA XIKWEMBU WA FUMA! Un’wana ni un’wana wa hina u fanele a tivutisa xivutiso lexi, ‘Xana Mfumo wa ndzi fuma?’ Hinkwerhu ka hina a hi endleni hinkwaswo leswi hi nga swi kotaka ku hanya tanihi vanhu vo tshembeka lava fumiwaka hi Mfumo wolowo sweswi, leswaku hi ta kota ku vuyeriwa eka vulawuri bya wona lebyi hetisekeke ni lebyinene hilaha ku nga heriki!