Nkhuvulo I Xiboho Xa Nkoka Lexi U Nga Tiyimiselaka Ku Xi Endla!

Yesu u vule leswaku Vakreste va fanele va khuvuriwa. (Hlaya Matewu 28:19, 20.) Kambe i yini nkhuvulo? I yini leswi munhu a faneleke a swi endla leswaku a khuvuriwa?

1. I yini nkhuvulo?

Rito “khuvula” ri huma eka rito ra Xigriki leri vulaka “ku nyuperisa” ematini. Loko Yesu a khuvuriwa, u nyuperisiwe eNambyeni wa Yordani endzhaku ka sweswo “a huma ematini.” (Marka 1:9, 10) Hilaha ku fanaka, ni Vakreste va ntiyiso va nyuperisiwa ematini loko va khuvuriwa.

2. Loko munhu a khuvuriwa u va a kombisa yini?

Loko munhu a khuvuriwa u va a kombisa leswaku u tinyiketerile eka Yehovha Xikwembu. I yini leswi munhu a swi endlaka loko a tinyiketela? Loko a nga si khuvuriwa, u sungula a khongela eka Yehovha a n’wi byela leswaku u lava ku N’wi tirhela hilaha ku nga heriki. U tshembisa Yehovha leswaku u ta tirhela yena ntsena ni ku tlhela a rhangisa ku endla ku rhandza ka Yehovha evuton’wini byakwe. U hlawula ku ‘titshika ni ku landzela Yesu nkarhi hinkwawo’ hi ku yingisa tidyondzo takwe ni ku endla leswi Yesu a swi endleke. (Matewu 16:24) Ku tinyiketela ni ku khuvuriwa swi endla leswaku a va munghana wa Yehovha ni ku va munghana wa lava n’wi gandzelaka.

3. U nga endla yini leswaku u khuvuriwa?

Leswaku u kota ku khuvuriwa, u fanele u sungula u dyondza hi Yehovha ni ku va ni ripfumelo eka yena. (Hlaya Vaheveru 11:6.) Loko u ya u tiva swo tala hi Yehovha ni ku va ni ripfumelo eka yena, u ta ya u n’wi rhandza. A swi kanakanisi leswaku u ta lava ku byela van’wana hi yena ni ku hanya hi milawu yakwe. (2 Timotiya 4:2; 1 Yohane 5:3) Loko munhu a hanya hi ‘mukhuva lowu fanelaka eka Yehovha a n’wi tsakisa hilaha ku heleleke,’ a nga ha hlawula ku tinyiketela eka Yehovha ivi a khuvuriwa.—Vakolosa 1:9, 10.a

ANAKANYISISA

4. Ku ni leswi hi nga swi dyondzaka eka nkhuvulo wa Yesu

Hlaya Matewu 3:13-17 leswaku u dyondza leswi engetelekeke hi nkhuvulo wa Yesu. Endzhaku mi bula hi swivutiso leswi:

• Xana Yesu u khuvuriwe a ha ri ricece?

• U khuvuriwe njhani? Xana u lo phuphuteriwa hi mati?

Yesu u sungule ntirho wakwe wo hlawuleka lowu a nyikiweke hi Xikwembu endzhaku ko khuvuriwa. Hlaya Luka 3:21-23 na Yohane 6:38, ivi mi bula hi xivutiso lexi:

• Endzhaku ka loko Yesu a khuvuriwile, hi wihi ntirho lowu a a wu rhangisa evuton’wini byakwe?

5. Swi nga koteka leswaku u khuvuriwa

Loko u ehleketa hi ku tinyiketela ni ku khuvuriwa swi nga ha ku chavisanyana. Kambe loko u ya u endla nhluvuko, a wu nge he chavi ku teka xiboho lexi xa nkoka. Leswaku u vona van’wana lava koteke ku endla tano, tlanga VHIDIYO.

VHIDIYO: Aka Vuxaka Na Yehovha (1:11)

Hlaya Yohane 17:3 na Yakobo 1:5, ivi mi bula hi xivutiso lexi:

• I yini lexi nga pfunaka munhu leswaku a lunghekela ku khuvuriwa?

1. Hi tinyiketela eka Yehovha hi ku n’wi byela leswaku hi lava ku n’wi tirhela vutomi bya hina hinkwabyo

2. Loko hi khuvuriwa hi va hi komba vanhu lava nga kona leswaku hi tinyiketele eka Xikwembu

6. Loko u khuvuriwa swi ku endla u va xiphemu xa ndyangu wa Yehovha

Loko hi khuvuriwa hi va xiphemu xa ndyangu lowu nga ni vun’we emisaveni hinkwayo. Hambileswi hi humaka eka matiko ni mindhavuko yo hambanahambana, hinkwerhu hi pfumela eka nchumu wun’we naswona hi hanya hi milawu leyi fanaka. Hlaya Pisalema 25:14 na 1 Petro 2:17, ivi mi bula hi xivutiso lexi:

• Loko munhu a khuvuriwa u va ni vuxaka bya njhani na Yehovha ni lava N’wi gandzelaka?

NKATSAKANYO

Yesu u dyondzise leswaku Vakreste va fanele va khuvuriwa. Leswaku munhu a kota ku endla tano, u fanele a va ni ripfumelo leri tiyeke eka Yehovha, a hanya hi milawu Yakwe a tlhela a tinyiketela eka Yena.

Mpfuxeto

• I yini nkhuvulo naswona hikwalaho ka yini wu ri wa nkoka?

• Nkhuvulo ni ku tinyiketela swi fambisana njhani?

• I yini leswi u faneleke u swi endla leswaku u tinyiketela ni ku khuvuriwa?

KUMA LESWI ENGETELEKEKE

Twana leswi nkhuvulo wu vulaka swona ni leswi wu nga vuliki swona.

“I Yini Nkhuvulo?” (Nhlokomhaka leyi kumekaka eka website)

Vona leswi u nga swi endlaka leswaku u kota ku khuvuriwa.

“Ku Rhandza Yehovha Ni Ku Tlangela Swi Ta Endla Leswaku U Khuvuriwa” (Xihondzo xo Rindza, March 2020)

Twana leswaku i yini lexi endleke wanuna loyi a lava ku khuvuriwa.

“A Va Lava Leswaku Ndzi Tikumela Ntiyiso Hi Ndzexe” (Xihondzo xo Rindza, February 1, 2013)

Twana leswaku hikwalaho ka yini u fanele u tiyimisela ku khuvuriwa ni leswaku u nga tilunghiselela njhani ku khuvuriwa.

“Xana Ndzi Fanele Ndzi Khuvuriwa?” (Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 2, ndzima 37)