Ku Rhandza Yehovha Ni Ku Tlangela Swi Ta Endla Leswaku U Khuvuriwa

1-2. Hi ku ya hi Mintirho 8:27-31, 35-38, i yini lexi susumeteleke mutsheniwa wa Muetiyopiya leswaku a khuvuriwa?

XANA wa swi lava ku khuvuriwa u va mudyondzisiwa wa Kreste? Vo tala va endle tano hikwalaho ko susumetiwa hi rirhandzu ni ku tlangela. Xiya xikombiso xa ndhuna leyi a yi tirhela hosikati ya le Etiyopiya.

² Muetiyopiya yoloye u teke goza hi ku hatlisa, a endla leswi a swi dyondzeke eMatsalweni. (Hlaya Mintirho 8:27-31, 35-38.) I yini lexi n’wi susumeteleke ku endla tano? Swi le rivaleni leswaku a a rhandza Rito ra Xikwembu hikuva a ri eku hlayeni ka tindzimana to karhi ebukwini ya Esaya loko a ri karhi a famba hi kalichi. Loko Filipi a ri karhi a vulavula na yena, wanuna yoloye u sungule ku tlangela leswi Yesu a n’wi endleleke swona. Hikwalaho ka yini ndhuna yoleyo yi teke riendzo ro ya eYerusalema? A yi rhandza Yehovha. Hi swi tiva njhani leswi? A yi gandzela Yehovha eYerusalema. Wanuna loyi a a tshike vukhongeri byakwe kutani a joyina tiko leri a ri tinyiketele eka Xikwembu xa ntiyiso. Ku rhandza Yehovha, hi swona leswi n’wi susumeteleke ku teka goza leri ra nkoka swinene, ku nga ku khuvuriwa a va un’wana wa vadyondzisiwa va Kreste.—Mat. 28:19.

 3. I yini lexi nga sivelaka munhu ku khuvuriwa? (Vona bokisi leri nge “I Yini Leswi Nga eMbilwini Ya Wena?”)

³ Ku rhandza Yehovha swi ta endla leswaku u khuvuriwa. Hi hala tlhelo, rirhandzu ri nga ku sivela ku khuvuriwa. Njhani? Xiya swikombiso swi nga ri swingani. Swi nga endleka leswaku u ma rhandza ngopfu maxaka ni vanghana va wena lava nga riki Timbhoni kutani u ehleketa leswaku loko wo khuvuriwa va ta ku venga. (Mat. 10:37) Kumbe u rhandza mikhuva leyi u swi tivaka kahle leswaku Xikwembu xa yi venga naswona swa ku tikela ku yi tshika. (Ps. 97:10) Kumbexana u kule u tlangela masiku lawa ma fambisanaka ni vukhongeri bya mavunwa. Swi nga endleka leswaku wa tsaka loko u tsundzuka mikarhi yo tsakisa leyi u veke na yona loko u ri karhi u tlangela masiku wolawo. Hikwalaho, swi nga ku tikela ku tshika ku tlangela masiku lawa ma nga n’wi tsakisiki Yehovha. (1 Kor. 10:20, 21) Xivutiso lexi u faneleke u tivutisa xona hi lexi, “I yini kumbe i mani loyi ndzi n’wi rhandzaka ngopfu?”

 4. Hi wihi nchumu wa nkoka lowu nga endlaka leswaku u khuvuriwa?

⁴ Ku ni swilo swo tala leswinene leswi hi nga swi rhandzaka ni ku swi tlangela. Hi xikombiso, swi nga endleka leswaku ni loko u nga si sungula ku dyondza Bibele ni Timbhoni ta Yehovha, a wu yi rhandza Bibele. Nakambe a wu n’wi rhandza Yesu. Sweswi u tivaka Timbhoni ta Yehovha, wa swi rhandza ku heta nkarhi wo tala na tona. Kambe ku rhandza swilo sweswo leswinene a swi nge endli leswaku u tinyiketela eka Yehovha u tlhela u khuvuriwa. Nchumu wa nkoka lowu nga endlaka leswaku u khuvuriwa, i ku rhandza Yehovha Xikwembu. Loko u rhandza Yehovha ku tlula swilo hinkwaswo, a ku na nchumu kumbe munhu ni un’we loyi a nga ku sivelaka ku tirhela Yehovha. Ku rhandza Yehovha hi swona leswi nga ta ku susumetela ku khuvuriwa ni ku n’wi tirhela hi ku tshembeka loko se u khuvuriwile.

 5. Hi ta kambisisa yini eka nhlokomhaka leyi?

⁵ Yesu u vule leswaku hi fanele hi rhandza Yehovha hi mbilu hinkwayo, moyaxiviri hinkwawo, mianakanyo hinkwayo ni hi ntamu wa hina hinkwawo. (Mar. 12:30) I yini leswi nga ku pfunaka u rhandza Yehovha hi mbilu hinkwayo u tlhela u n’wi xixima? Ndlela leyi Yehovha a hi rhandzaka ha yona, yi endla leswaku na hina hi n’wi rhandza. (1 Yoh. 4:19) Hi swihi swin’wana leswi u nga ta swi endla loko se u rhandza Yehovha hi mbilu hinkwayo?b

 6. Hi ku ya hi Varhoma 1:20, hi yihi ndlela yin’wana leyi hi nga dyondzaka hi Yehovha ha yona?

⁶ Dyondza hi Yehovha eka swilo leswi a swi tumbuluxeke. (Hlaya Varhoma 1:20; Nhlav. 4:11) Anakanyisisa hi vutlhari lebyi a byi tirhiseke loko a tumbuluxa swimilana ni swiharhi. Ehleketa hi ndlela yo hlamarisa leyi miri wa wena wu endliweke ha yona. (Ps. 139:14) Nakambe, ehleketa hi matimba lawa Yehovha a ma tirhiseke eka dyambu, tsundzuka leswaku dyambu ko va yin’wana ya tinyeleti ta ntsandzavahlayi leti nga kona.c (Esa. 40:26) Loko u endla tano, ndlela leyi u xiximaka Yehovha ha yona yi ta ya yi kula swinene. Kambe ku tiva leswaku Yehovha u tlharihile naswona u ni matimba, ko va masungulo yo aka vuxaka na yena. Leswaku u va ni vuxaka lebyi tiyeke na Yehovha, u fanele u tiva swo tala hi yena.  

 7. Leswaku u kota ku rhandza Yehovha hi mbilu hinkwayo u fanele u tiyiseka hi yini?

⁷ U fanele u tiyiseka leswaku Yehovha wa ku rhandza. Xana swa ku tikela ku tshemba leswaku Muvumbi wa tilo ni misava wa ku tiva naswona wa ku rhandza? Loko swi ri tano, tsundzuka leswaku Yehovha a nga le “kule ngopfu ni un’wana ni un’wana wa hina.” (Mint. 17:26-28) U “kambisisa timbilu hinkwato” naswona u ku tshembisa leswi, “loko u n’wi lavisisa, u ta endla leswaku u n’wi kuma.” (1 Tikr. 28:9) Lexi endlaka u dyondza Bibele sweswi, hi leswi Yehovha a nge, ‘ndzi ku kokele eka mina.’ (Yer. 31:3) Loko u tlangela leswi Yehovha a ku endlelaka swona, ndlela leyi u n’wi rhandzaka ha yona yi ta ya yi kula swinene.  

 8. U nga swi kombisa njhani leswaku wa n’wi rhandza Yehovha?

⁸ Ndlela yin’wana yo kombisa leswaku wa n’wi rhandza Yehovha, i ku vulavula na yena hi xikhongelo. Ndlela leyi u n’wi rhandzaka ha yona yi ta kula loko u n’wi byela swiphiqo swa wena ni ku khensa leswi a ku endlelaka swona. Vuxaka bya wena na Yehovha byi ta tiya loko u vona ndlela leyi a hlamulaka swikhongelo swa wena ha yona. (Ps. 116:1) U ta swi xiya leswaku wa ku rhandza hakunene. Kambe leswaku u va ni vuxaka na Yehovha, u fanele u tiva swilo leswi a swi rhandzaka ni leswi a swi vengaka. U fanele u tlhela u tiva leswi a swi languteleke eka wena. U ta tiva sweswo ntsena loko u dyondza Rito rakwe, ku nga Bibele.

 9. U nga swi kombisa njhani leswaku wa yi tlangela Bibele?

⁹ Tlangela Rito ra Xikwembu, ku nga Bibele. I Bibele ntsena leyi tameleke ntiyiso mayelana na Yehovha ni xikongomelo xakwe hi wena. U kombisa leswaku wa yi tlangela Bibele hi ku yi hlaya siku ni siku, hi ku lunghiselela leswaku u ta hlamula loko u dyondzisiwa Bibele ni hi ku tirhisa leswi u swi dyondzaka. (Ps. 119:97, 99; Yoh. 17:17) Xana u tivekele nkarhi etlhelo wo hlaya Bibele? Loko nkarhi wolowo wu fika, xana wa yi hlaya u tiyiseka leswaku siku a ri heli u nga yi hlayanga?

10. Hi xihi xin’wana lexi tsakisaka hi Bibele?

¹⁰ Xin’wana lexi tsakisaka hi Bibele hileswaku yi tamele rungula ra vanhu lava voneke Yesu. Hi yona ntsena leyi swi hlamuselaka kahle leswi Yesu a ku endleleke swona. Loko u ri karhi u dyondza hi leswi Yesu a swi vuleke ni ku swi endla, u ta susumeteleka ku endla xinghana na yena.

11. I yini lexi nga ku pfunaka leswaku u rhandza Yehovha?

¹¹ Rhandza Yesu kutani ndlela leyi u rhandzaka Yehovha ha yona yi ta kula. Hikwalaho ka yini? Hikuva Yesu u tekelele Tata wakwe hi ku helela. (Yoh. 14:9) Loko u dyondza hi Yesu, ndlela leyi u rhandzaka ni ku tlangela Yehovha ha yona yi ta kula. Ehleketa hi ntwelavusiwana lowu Yesu a wu kombeke vanhu lava a va tekiwa va nga pfuni nchumu, ku nga swisiwana ni vanhu lava a va vabya. Nakambe, ehleketa hi switsundzuxo leswi a ku nyikaka swona ni ndlela leyi u vuyeriwaka ha yona loko u n’wi yingisa.—Mat. 5:1-11; 7:24-27.

12. Loko u dyondza hi Yesu, u ta susumeteleka ku endla yini?

¹² Ndlela leyi u rhandzaka Yesu ha yona yi ta kula loko u anakanyisisa hi swilo leswi a hi endleleke swona leswaku hi rivaleriwa swidyoho swa hina. (Mat. 20:28) Ku tiva leswaku Yesu a tiyimiserile ku ku fela, swi ta endla leswaku u hundzuka kutani u kombela ku rivaleriwa eka Yehovha. (Mint. 3:19, 20; 1 Yoh. 1:9) Loko u rhandza Yesu na Yehovha, u ta susumeteleka ku rhandza vanhu van’wana lava rhandzaka Yesu na Yehovha.

13. Yehovha u ta ku pfuna hi ku tirhisa yini?

¹³ Rhandza ndyangu wa Yehovha. Ndyangu wa ka n’wina ni vanghana va wena va khale lava nga riki Timbhoni, a va nge swi twisisi leswaku hikwalaho ka yini u lava ku tinyiketela eka Yehovha. Va nga ku kaneta. Yehovha u ta ku pfuna hi ku tirhisa ndyangu wakwe. Loko u tshama endyangwini wolowo, u ta titwa u ri ekaya. (Mar. 10:29, 30; Hev. 10:24, 25) Siku rin’wana, swirho swa ndyangu wa ka n’wina swi nga ku landzela swi tirhela Yehovha ni ku hanya hi milawu yakwe.—1 Pet. 2:12.

14. Hilaha 1 Yohane 5:3 yi vulaka hakona, i yini leswi u swi xiyeke hi milawu ya Yehovha?

¹⁴ Xixima milawu ya Yehovha u tlhela u hanya ha yona. Swi nga endleka leswaku loko u nga si dyondza hi Yehovha, a wu tihanyela hi milawu ya wena kambe sweswi wa swi vona leswaku milawu ya Yehovha yi kahle ngopfu. (Ps. 1:1-3; hlaya 1 Yohane. 5:3.) Ehleketa hi xitsundzuxo lexi Bibele yi xi nyikaka vavanuna lava tekeke, vavasati lava tekiweke, vatswari ni vana. (Efe. 5:22–6:4) Loko u ri karhi u tirhisa xitsundzuxo xexo, xana xiyimo xa ndyangu wa wena xi antswile? Loko u ri karhi u yingisa nkongomiso wa Yehovha mayelana ni ku hlawula vanghana hi vutlhari, xana vumunhu bya wena byi cincile? Xana u tsakile? (Swiv. 13:20; 1 Kor. 15:33) Swi le rivaleni leswaku nhlamulo ya swivutiso leswi i ina.

15. U fanele u endla yini loko u lava ku tiva ndlela leyi misinya ya milawu ya le Bibeleni u nga yi tirhisaka ha yona?

¹⁵ Mikarhi yin’wana, swi nga ku tikela ku tiva ndlela leyi nsinya wa nawu wa le Bibeleni u nga wu tirhisaka ha yona. Hi yona mhaka leyi Yehovha a tirhisaka nhlangano wakwe leswaku a ku nyika tibuku leti nga ku pfunaka u tiva swilo leswinene ni swo biha. (Hev. 5:13, 14) Loko u hlaya tibuku leti, u ta yi vona ndlela leyi ti pfunaka ha yona naswona u ta tsakela ku va xiphemu xa nhlangano wa Yehovha.

16. Yehovha u va hlele njhani vanhu vakwe?

¹⁶ Rhandza u tlhela u seketela nhlangano wa Yehovha. Yehovha u hlele vanhu vakwe tanihi vandlha naswona N’wana wakwe Yesu, hi yena nhloko ya vandlha rero. (Efe. 1:22; 5:23) Yesu u hlawule ntlawa lowutsongo wa vavanuna lava totiweke leswaku wu rhangela eku hleleni ka ntirho lowu a lavaka wu endliwa namuntlha. Ntlawa lowu wa vavanuna, Yesu u wu vitana “hlonga ro tshembeka ni ro tlhariha” naswona wu byi teka byi ri bya nkoka vutihlamuleri lebyi wu nyikiweke byona bya ku ku phamela ni ku ku sirhelela hi tlhelo ra moya. (Mat. 24:45-47) Ndlela yin’wana leyi hlonga ro tshembeka ri ku khathalelaka ha yona, i ku veka vakulu lava nga ta ku pfuna. (Esa. 32:1, 2; Hev. 13:17; 1 Pet. 5:2, 3) Vakulu va tiyimiserile ku endla hinkwaswo leswi va nga swi kotaka leswaku va ku pfuna u va ni vuxaka na Yehovha. Nchumu wun’wana wa nkoka lowu va nga ku pfunaka ha wona, i ku ku pfuna leswaku u dyondzisa van’wana hi Yehovha.—Efe. 4:11-13.

17. Hi ku ya hi Varhoma 10:10, 13, 14, hikwalaho ka yini hi vulavula ni vanhu van’wana hi Yehovha?

¹⁷ Pfuna van’wana leswaku va rhandza Yehovha. Yesu u byele valandzeri vakwe leswaku va dyondzisa van’wana hi Yehovha. (Mat. 28:19, 20) Swa olova ku yingisa xileriso xexo hi leswi hi bohekaka ku endla tano. Kambe loko ndlela leyi u rhandzaka Yehovha ha yona yi ya yi kula, u ta titwa ku fana na muapostola Petro na muapostola Yohane lava nga te: “A hi nge tshiki ku vulavula hi swilo leswi hi swi voneke ni leswi hi swi tweke.” (Mint. 4:20) A swi talanga swilo leswi endlaka munhu a tsaka ku tlula ku pfuna munhu un’wana leswaku a rhandza Yehovha. Ehleketa hi ndlela leyi Filipi a tsake ha yona loko a pfuna Muetiyopiya a twisisa Matsalwa kutani a khuvuriwa! Loko u tekelela Filipi naswona u yingisa xileriso xa Yesu xo chumayela, u kombisa leswaku u lava ku va Mbhoni ya Yehovha. (Hlaya Varhoma 10:10, 13, 14.) Loko u ri karhi u endla tano, u ta tivutisa ku fana ni Muetiyopiya loyi a nga te: “I yini lexi ndzi sivelaka ku khuvuriwa?”—Mint. 8:36.

18. Hi swihi swivutiso leswi nga ta hlamuriwa eka nhlokomhaka leyi landzelaka?

¹⁸ U ta va u endla xiboho xa nkoka ku tlula hinkwaswo loko u ehleketa hi ku khuvuriwa. Leswi xiboho lexi xi nga xa nkoka ngopfu, u fanele u ehleketisisa kahle hi xona. I yini leswi u faneleke u swi tiva hi ku khuvuriwa? U fanele u endla yini loko u nga si khuvuriwa ni loko se u khuvuriwile? Swivutiso leswi swi ta hlamuriwa eka nhlokomhaka leyi landzelaka.