Ku Tsutsuma Mphikizano Hi Ku Tiyisela

“Hi tsutsuma hi ri ni ku tiyimisela eku tsutsumeni ka [mphikizano, “NW”] lowu hi vekeriweke wona.”—VAHEVERU 12:1.

 1. (a) I yini lexi vekiwaka emahlweni ka hina loko hi tinyiketa eka Yehova Xikwembu? (b) Xana Mukriste u fanele a tilunghiselela mphikizano wa muxaka muni?

LOKO hi tinyiketela eka Yehova ha Yesu Kriste, hi ndlela yo fanekisela Xikwembu xi veka mphikizano emahlweni ka hina. Emakumu ka mphikizano lowu, hakelo yi ta nyikiwa hinkwavo lava hetaka hi laha ku humelelaka. I hakelo muni? Vutomi lebyi nga heriki! Leswaku xi kuma hakelo leyi ya kahle ngopfu, xitsutsumi xa Mukriste xi fanele xi tilunghiselela ku tsutsuma mpfhuka wo leha, hayi ku tsutsuma mpfhukanyana hi ku hatlisa. Kutani xi ta fanela ku tiyisela. Xi ta fanela ku tiyiselela ku nonon’hwa ko leha ka mphikizano hi woxe ni swihinga leswi humelelaka hi nkarhi wa mphikizano.

 2, 3. (a) I yini lexi nga ta hi pfuna leswaku hi tsutsuma mphikizano ku ya fika emakumu? (b) Xana ntsako wu n’wi pfunise ku yini Yesu leswaku a tsutsuma mphikizano hi ku tiyisela?

² I yini lexi nga ta hi pfuna ku tsutsuma mphikizano wo tano ku ya fika emakumu? Entiyisweni, i yini lexi pfuneke Yesu ku tiyisela loko a ha ri munhu wa nyama emisaveni? U kume matimba ya le ndzeni lama humaka eka mfanelo ya ntsako. Vaheveru 12:1-3 yi ri: “Hikwalaho, leswi hi rhendzeriweke hi vunyingi lebyikulu lebyi bya timbhoni, na hina a hi tshikeni hinkwaswo leswi swi hi sivelaka ku ya emahlweni, ni vudyoho lebyi hatlaka ku hi namarhela, hi tsutsuma hi ri ni ku tiyisela eku tsutsumeni ka [mphikizano, NW] lowu hi vekeriweke wona. A hi languteni eka Yesu, musunguri ni muhetisisi wa ku pfumela ka hina, loyi a nga chavangiki ku byarha [mhandzi ya nxaniso, NW] a nga vuli nchumu hi tingana ta kona, hikwalaho ka ku tsaka loku vekiweke emahlweni ka yena; kutani sweswi ú tshamile evokweni ra xinene exiluvelweni xa Xikwembu. Anakanyani yena loyi a nga tiyisela hi ndlela leyo tano, loko vadyohi va lwa na yena, leswaku mi nga karhali kumbe ku hela mbilu.”

³ Evutirhelini bya yena bya le rivaleni hinkwabyo, Yesu u swi kotile ku hambeta a tsutsuma emphikizanweni hikwalaho ka ntsako wa Yehova. (Ringanisa Nehemia 8:10.) Ntsako wa yena wu n’wi pfune ku tiyisela hambi ku ri rifu leri khomisaka tingana emhandzini ya nxaniso, leri endzhaku ka rona a tokoteke ntsako lowu nga hlamuselekiki wa ku pfuxiwa eka vafi ni ku tlhandlukela evokweni ra Tata wa yena ra xinene, kwalaho laha a nga ta vona kona ntirho wa Xikwembu ku fika emakumu ya wona. Hi ku tiyisela ka yena tanihi munhu etlhelo ka Xikwembu, u hambetile evokweni ra xona ra xinene ku ya fika evuton’wini lebyi nga heriki. Ina, hi laha Luka 21:19 yi vulaka ha kona: “Hi ku tiyisela ka n’wina, mi ta tikumela vutomi.”

 4. Yesu u vekele switsutsumi-kulobye xikombiso xihi, naswona hi fanele hi tshama hi ri karhi hi tsundzuka yini?

⁴ Yesu Kriste u veke xikombiso lexinene ngopfu eka switsutsumi-kulobye, naswona xikombiso xa yena xi hi tiyisekisa leswaku na hina hi nga va vahluri. (1 Petro 2:21) Leswi Yesu a hi kombelaka ku swi endla, hi nga swi endla. Leswi a tiyiseleke, na hina hi nga tiyisela. Naswona loko hi ri karhi hi khomelela eku n’wi tekeleleni, hi fanele hi tsundzuka swivangelo swa ntsako wa hina. (Yohane 15:11, 20, 21) Ntsako wu ta hi tiyisa leswaku hi hambeta hi tsutsuma mphikizano evutirhelini bya Yehova ku kondza hi kuma hakelo leyi vangamaka ya vutomi lebyi nga heriki.—Vakolosa 1:10, 11.

 5. Xana hi nga tsaka ni ku tiyisela mphikizano lowu nga emahlweni ka hina hi ndlela yihi?

⁵ Yehova u nyikela matimba lama tlulaka ya ntolovelo, leswaku a hi pfuna ku phikelela emphikizanweni. Loko hi xanisiwa, matimba wolawo ni vutivi bya xivangelo xa leswi hi nga na lunghelo ro xanisiwa swa hi tiyisa. (2 Vakorinto 4:7-9) Xin’wana ni xin’wana lexi hi hundzaka eka xona leswaku hi xixima vito ra Xikwembu ni ku tlakusa vuhosi bya xona i xivangelo xa ntsako lowu ku nga riki na munhu la nga hi tekelaka wona. (Yohane 16:22) Leswi swi hlamusela leswaku ha yini vaapostola va tsakile, endzhaku ko biwa hi ku lerisa ka Sanedri ya Xiyuda hikwalaho ko vula vumbhoni bya swilo leswi hlamarisaka leswi Yehova Xikwembu a swi hetisiseke mayelana na Yesu, “hikuva a va kumiwile va ri lava fanelaka ku soriwa hikwalaho ka vito ra Yesu.” (Mintirho 5:41, 42) Ntsako wa vona a wu humanga eka nxaniso hi woxe kambe eka ku aneriseka loku enteke ka le ndzeni hi ku tiva leswaku a va tsakisa Yehova na Yesu.

 6, 7. Ha yini xitsutsumi xa Mukriste xi nga ha tsakaka hambi loko xi ri na mahlomulo, naswona vuyelo byi ta va byihi?

⁶ Matimba man’wana lama tiyisaka evuton’wini bya hina i ntshembo lowu Xikwembu xi wu vekeke emahlweni ka hina. Hi laha Pawulo a swi vekaka ha kona: “Hi ni ku rhula ni Xikwembu, hi Hosi ya hina Yesu Kriste; naswona hi ku pfumela, hi kotile ku kuma ha yena tintswalo leti hi yimeke ka tona sweswi, kutani hi tidzunisa eku languteleni ka hina ka ku averiwa ku kwetsima ka Xikwembu. Ku nga ri sweswo ntsena, kambe hi tidzunisa ni le maxangwini ya hina, hi ku tiva leswaku maxangu ma tswala ku tiyisela, ku tiyisela ku tswala ku hlula miringo, ni ku hlula miringo ku tswala ku langutela; kutani ku langutela a ku hi khomisi tingana.”—Varhoma 5:1-5.

⁷ Mahlomulo hi woxe a ma tsakisi, kambe mihandzu ya ku rhula leyi endzhaku ma yi humesaka ya tsakisa. Mihandzu leyi i ku tiyisela, xiyimo xa ku amukeriwa, ntshembo ni ku hetiseka ka ntshembo wolowo. Ku tiyisela ka hina ku ta endla leswaku hi amukeriwa hi Xikwembu. Loko hi amukeriwa hi Xikwembu, hi ku tiyiseka hi nga langutela ku hetiseka ka switshembiso leswi a swi endleke. Ntshembo lowu wu hi hlayisa hi ri endleleni ya ntiyiso naswona wa hi khutaza ehansi ka mahlomulo ku kondza ntshembo wu hetisisiwa.—2 Vakorinto 4:16-18.

Ku Tsaka Lava Tiyiselaka!

 8. Ha yini nkarhi lowu wa ku rindza ku nga ri ku tlanga hi nkarhi eka hina?

⁸ Loko ha ha rindzele nkarhi lowu vekiweke hi Xikwembu wa ku avela tihakelo eka switsutsumi, ku na ku hundzuka loku hi ku tokotaka. Leyi i minhluvuko ya hina ya moya leyi humelelaka hi ku hlangavetana ni miringo hi laha ku humelelaka, kutani yi hi pfuna ku amukeriwa hi Xikwembu. Yi kombisa leswi hi nga swona naswona yi hi nyika nkarhi wa ku kombisa timfanelo letinene leti fanaka ni leti vanhu lavo tshembeka va khale va ti kombiseke, ngopfu-ngopfu Xikombiso xa hina, Yesu Kriste. Mudyondzisiwa Yakobo u ri: “Yi tekeni yi ri mhaka ya ku tsakisa swinene, vamakwerhu, loko mi hlangana ni miringo ya tinxaka-xaka, hikuva ma swi tiva leswaku loko ku pfumela ka n’wina ku tiya eku ringiweni, swi humesa ku tiyisela. Kambe ku tiyisela ka n’wina ku fanele ku tirha ntirho lowu hetisekeke, leswaku mi va lavo hetiseka ni ku lulama hi matlhelo hinkwawo, mi nga pfumali nchumu.” (Yakobo 1:2-4) Ina, hi nga ha langutela ku kuma miringo yo hambana-hambana, kambe leswi swi ta tirha ku hi hlayisa hi ri karhi hi hlakulela timfanelo leti faneleke. Xisweswo hi kombisa leswaku hi ta hambeta emphikizanweni lowu ku kondza hakelo yi kumiwa, ku nga khathariseki leswaku hi hlangana ni swihinga swihi.

 9, 10. (a) Ha yini lava tiyiselaka miringo va katekile, naswona hi nga langutana njhani ni miringo? (b) I vamani vanhu va khale lava a a va katekile, naswona xana hi nga katsiwa exikarhi ka vona hi ndlela yihi?

⁹ Kutani ke, a swi hlamarisi loko Yakobo a te: “Ku katekile munhu loyi a tiyiselaka eku ringiweni, hikuva loko a hlurile miringo, ú ta nyikiwa harhi ya vutomi leyi Xikwembu xi yi tshembiseke lava va xi rhandzaka!” (Yakobo 1:12) A hi hambeteni hi langutana ni miringo, hi hlomile hi timfanelo ta Xikwembu leti nga ta hi tiyisa leswaku hi yi hlula.—2 Petro 1:5-8.

¹⁰ Tsundzuka leswaku ndlela leyi Xikwembu xi tirhisanaka na hina ha yona a hi yintshwa kumbe leyi nga tolovelekangiki. “Timbhoni” leti tshembekeke ta minkarhi ya khale a xi tirhisana na tona hi ndlela leyi fanaka loko ti ri karhi ti kombisa ku tiya ka tona eka Xikwembu. (Vaheveru 12:1) Ku amukeriwa ka vona hi Xikwembu ku rhekhodiwile eRitweni ra xona, naswona hinkwavo ka vona hi va xiya va ri lava tsakeke hikuva va tiyiserile ehansi ka miringo. Yakobo u ri: “Vamakwerhu, landzani ntila wa vaprofeta lava vulavuleke hi vito ra [Yehova, NW]. Langutani, lava hi vulaka leswaku va katekile, hi lava va tiyiseleke. Mi twile ta ku tiyisela ka Yobo, nakona mi vonile leswi [Yehova a a, NW] kongomile swona, ni hilaha [Yehova a, NW] taleke musa ni tintswalo hakona.” (Yakobo 5:10, 11) Swi vhumbiwile leswaku emasikwini lawa yo nonon’hwa ya makumu, van’wana lava nga ta tirhela Yehova hi vutshembeki a va ta humelela emisaveni, hi laha vaprofeta lavaya va malembe xidzana ya khale va endleke ha kona. Xana a swi hi tsakisi ku va lava endlaka tano?—Daniel 12:3; Nhlavutelo 7:9.

Ku Kuma Nseketelo Eka Rito Ra Yehova Leri Khutazaka

11. Xana Rito ra Xikwembu ri nga hi pfuna njhani leswaku hi tiyisela, naswona ha yini hi nga fanelanga hi fana ni tindhawu ta maribye ta xifaniso xa Yesu?

¹¹ Pawulo u kombetele eka mpfuno wun’wana wa ku tiyisela loko a vule leswaku “hi ku tiyisela ko lehisa mbilu, na hi xikhutazo lexi kumiwaka eMatsalweni, hi nga khomelela swi tiya eka ntshembo wa hina.” (Varhoma 15:4, The Twentieth Century New Testament) Ntiyiso, lowu wu nga Rito ra Xikwembu, wu fanele wu mila hi ku enta endzeni ka hina leswaku wu humesa angulo lowu faneleke minkarhi hinkwayo. A hi pfuneki nikatsongo hi ku fana ni misava liya ya maribye leyi hlamuseriwaka eka xifaniso xa Yesu xa muhaxi lexi nge: “Timbewu leti haxiweke emaribyeni i vanhu lava, loko va twa Rito, va hatlisaka ku ri amukela hi ku tsaka; kambe a va ri nyiki nkarhi wo veka timitsu, va tiyisela nkarhinyana ntsena; kutani loko khombo kumbe ku xaniseka swi humelela hikwalaho ka Rito, va hatlisa va khunguvanyeka.” (Marka 4:16, 17) Ntiyiso lowu humaka eka Rito ra Xikwembu a wu dzimi timitsu ngopfu eka vanhu vo tano; hikwalaho, hi nkarhi wa mahlomulo, va tsandzeka ku amukela nseketelo wa rona tanihi xihlovo xa ntiyiso xa matimba ni ntshembo.

12. Xana i yini lexi nga fanelangiki xi hi kanganyisa loko hi amukela mahungu lamanene?

¹² Mani na mani la amukelaka mahungu lamanene ya Mfumo a nga fanelanga ku tikanganyisa hi leswi swi nga ta landzela. U sungula ndlela ya vutomi leyi nga ta katsa mahlomulo kumbe nxaniso. (2 Timotiya 3:12) Kambe u fanele ku swi teka swi “tsakisa swinene” ku va ni lunghelo ra ku tokota miringo yo hambana-hambana hikwalaho ko khomelela swi tiya eka Rito ra Xikwembu ni ku ri byela van’wana.—Yakobo 1:2, 3.

13. Pawulo u va tsakele njhani Vakriste va le Tesalonika, naswona ha yini?

¹³ Eka lembe xidzana ro sungula, vakaneti le Tesalonika va endle mpfilumpfilu hikwalaho ka ku chumayela ka Pawulo. Loko Pawulo a ya le Beriya, vaxanisi lava va n’wi landzerile kwale leswaku va ta pfuxa swiphiqo leswi engetelekeke. Muapostola la xanisiweke u tsalele lava vo tshembeka lava saleke le Tesalonika, a ku: “Swa hi fanela ku nkhensa Xikwembu masiku hinkwawo hikwalaho ka n’wina, vamakwerhu. Hakunene swa fanela sweswo, hikuva ku pfumela ka n’wina ku karhi ka kula ngopfu, ni ku rhandzana ka n’wina hinkwenu ku ya ku engeteleka. Hikokwalaho, hina hi xiviri xa hina, hi tikurisa ha n’wina [emabandlheni ya, NW] Xikwembu hi mhaka ya ku tiyisela ka n’wina ni ya ku pfumela ka n’wina, exikarhi ka maxangu ni mahlomulo hinkwawo lawa mi ma vonaka. Leswi i xikombiso xa ku lulama ka Xikwembu loko xi avanyisa, hikuva swi ta endla leswaku mi va lava lulameriweke hi Mfumo wa xona, lowu mi twisiwaka ku vaviseka hikwalaho ka wona.” (2 Vatesalonika 1:3-5) Ku nga khathariseki ku xaniseka ka vona emavokweni ya nala, Vakriste va le Tesalonika va kurile hi ku fana na Kriste na hi nhlayo. Xana sweswo a swi kotekisa ku yini? Hikuva a va amukela matimba eka Rito ra Yehova leri khutazaka. Va yingise swiletelo swa Hosi kutani va tsutsuma mphikizano hi ku tiyisela.—2 Vatesalonika 2:13-17.

Leswaku Van’wana Va Ponisiwa

14. (a) Ku nga khathariseki ku nonon’hweriwa, hi hambeta evutirhelini hi ntsako hikwalaho ka swivangelo swihi? (b) Xana hi khongelela yini, naswona ha yini?

¹⁴ Hi ku tshembeka naswona handle ko vilela hi tiyiselela ku nonon’hwa ni minxaniso, ngopfu-ngopfu leswaku Xikwembu xi tlakusiwa. Kambe ku ni xivangelo xin’wana lexinene xa mhaka leyi ha yona hi tinyiketelaka eka swilo swo tano: hi leswaku hi ta kota ku hundzisela mahungu ya Mfumo eka van’wana leswaku vahuweleri vo tala va Mfumo wa Xikwembu va kota ku ‘vula erivaleni leswaku va ponisiwa.’ (Varhoma 10:10) Lava va tirhaka entirhweni wa Xikwembu va fanele va khongelela leswaku N’wini wa ntshovelo a katekisa ntirho wa vona hi ku rhumela vahuweleri va Mfumo lava engetelekeke. (Matewu 9:38) Pawulo u tsalele Timotiya a ku: “Kutani leswi u swi tweke eka mina emahlweni ka timbhoni leto tala, swi hundzisele eka vanhu lavo tshembeka, lava na vona va nga ta kota ku dyondzisa van’wana. Na wena, amukela ku xaniseka ku fana ni nhenha leyinene ya Kriste Yesu.”—2 Timotiya 2:2, 3.

15. Ha yini hi fanele hi tikhoma tanihi masocha ni vatlangi “emintlangwini”?

¹⁵ Socha ra tihambanisa ni vutomi lebyi hikiweke katsongo bya muaka-tiko loyi a nga riki wa vuthu. Hi ku fanana, a hi fanelanga ku tihlanganisa ni timhaka ta lava va nga riki va vuthu ra Hosi, kambe lava entiyisweni va nga etlhelweni leri kanetaka. Xisweswo Pawulo u ye emahlweni a tsalela Timotiya a ku: “Ku hava nhenha leyi pfaka yi ya tirha swa le kaya, hikuva ku navela ka yona lokukulu i ku tsakisa loyi a yi rhambeke ku ya lwa nyimpi ya kona. Mutlangi wa mintlangu a nga tlhomiwi risiva, loko a nga landzi milawu ya kona.” (2 Timotiya 2:4, 5) Loko swi lwela ku hlula emphikizanweni wa “harhi ya vutomi,” switsutsumi swi fanele swi tikhoma, swi papalata mindzhwalo leyi nga pfuniki nchumu ni ku tiboha. Hi ndlela leyi swi nga tinyiketela eku tiseni ka mahungu lamanene ya ku ponisiwa eka van’wana.—Yakobo 1:12; ringanisa 1 Vakorinto 9:24, 25.

16. I yini lexi nga ta ka xi nga bohiwi, naswona ku pfuneka vamani loko hi tiyisela?

¹⁶ Hi ku va hi rhandza Xikwembu ni lava va fanaka ni tinyimpfu lava va xi lavaka, hi ntsako hi tiyisela eka leswo tala leswaku hi fikelela van’wana hi mahungu lamanene ya ku ponisiwa. Valala va nga ha hi sivela ku chumayela Rito ra Xikwembu. Kambe Rito ra Xikwembu a ri siveleki, naswona ku vuriwa ka rona leswaku van’wana va ponisiwa a ku nge bohiwi. Pawulo u hlamusele Timotiya leswaku ha yini a a tsakela ku tokota ndzingo, a ku: “Tsundzuka Yesu Kriste, wa rixaka ra Davhida, loyi a pfuxiweke eku feni, hilaha Evhangeli leyi ndzi yi twarisaka yi vulaka hakona. Evhangeli ya kona yi ndzi vangele maxangu, ndzi ko ndzi bohiwa hi tinketani kukota xigevenga, kambe Rito ra Xikwembu rona a ri bohiwanga, kutani, etimhakeni hinkwato, ndzi tiyisela hikwalaho ka vahlawuriwa va Xikwembu, leswaku na vona va ta kuma ku ponisiwa loku humaka eka Kriste Yesu, va kuma ni ku kwetsima loku nga heriki.” (2 Timotiya 2:8-10) Namuntlha a hi ehleketi hi masalela lama nga enxaxamelweni wa Mfumo wa le tilweni ntsena kambe na hi ntshungu lowukulu wa tinyimpfu tin’wana ta Murisi Lonene, Yesu Kriste, ntshungu lowukulu lowu kumaka Paradeyisi ya la misaveni ehansi ka Mfumo wa Kriste.—Nhlavutelo 7:9-17.

17. Ha yini hi nga fanelanga hi tshika mphikizano, naswona vuyelo ku ta va byihi loko hi hambeta emphikizanweni ku ya fika emakumu?

¹⁷ Loko a ho tshika, a hi nga ta tipfuna hina hambi ku ri ku pfuna mani na mani leswaku a ponisiwa. Hi ku tiyisela emphikizanweni wa Vukriste, ku nga khathariseki swihinga leswi hi hlangavetanaka na swona, nkarhi na nkarhi hi tihlayisa hi rindzele hakelo naswona hi ku kongoma hi nga pfuna van’wana leswaku va ta ponisiwa, loko hi ri xikombiso lexi nyikaka matimba eka van’wana. Ku nga khathariseki leswaku ntshembo wa hina i wa le tilweni kumbe wa la misaveni, langutelo ra Pawulo ra ku ‘kongoma emahlweni epakanini leswaku a kuma hakelo’ i rinene leswaku hi ri tekelela.—Vafilipiya 3:14, 15.

Ku Hambeta Hi Ku Tiya eMphikizanweni

18. Ku kuma hakelo swi titshege hi yini, kambe leswaku hi tiyisela ku fika emakumu hi fanele hi papalata yini?

¹⁸ Ku heta ndlela ya hina ya Vukriste hi hlurile leswaku ku tlakusiwa Yehova ni ku kuma hakelo leyi a hi vekeleke yona swi titshege hi ku hambeta hi tiyile eka mpfhuka hinkwawo wa mphikizano. Hikwalaho, a hi nge tiyiseli ku ya fika emakumu loko hi tirhwexa swilo leswi nga tirheliki ndlela ya vunene. Hambi loko hi swi susile swilo leswo tano, ka ha laveka hi lwa hi matimba swinene hi laha hi nga kotaka ha kona. Hikwalaho Pawulo wa tsundzuxa a ku: “Na hina a hi tshikeni hinkwaswo leswi swi hi sivelaka ku ya emahlweni, ni vudyoho lebyi hatlaka ku hi namarhela, hi tsutsuma hi ri ni ku tiyisela eku tsutsumeni ka [mphikizano, NW] lowu hi vekeriweke wona.” (Vaheveru 12:1) Ku fana na Yesu a hi fanelanga hi kandziyisa ngopfu ku karhateka loku faneleke ku byarhiwa, kambe hi fanele hi ku xiya ku ri nchumu wutsongo leswaku hi ta kuma ni hakelo leyi tsakisaka.—Ringanisa Varhoma 8:18.

19. (a) Xana i ntshembo wihi lowu Pawulo a wu vuleke loko a ri kusuhi ni makumu ya vutomi bya yena? (b) Loko hi ri karhi hi tshinelela makumu ya mphikizano wa ku tiyisela, i ntshembo wihi lowu hi faneleke hi va na wona mayelana ni hakelo leyi tshembisiweke?

¹⁹ Ekusuhi ni makumu ya vutomi bya yena, Pawulo u swi kotile ku vula leswi: “Ndzi lwile nyimpi leyinene, ndzi hetile mpfhuka wa mina wa ku tsutsuma, ndzi hlayisile ku pfumela. Leswi saleke, hileswaku harhi ya vahluri yi ndzi yimerile, ku nga ku lulama.” (2 Timotiya 4:7, 8) Hi le mphikizanweni lowu wa ku tiyisela leswaku hi kuma hakelo ya vutomi lebyi nga heriki. Loko ku tiyisela ka hina ku hela hikwalaho ka leswi mphikizano wu leheke ku tlula leswi a hi swi languterile loko hi wu sungula, hi ta tsandzeka loko hi ri ekusuhi ni ku kuma hakelo leyi tshembisiweke. Tiyiseka. A swi kanakanisi leswaku hakelo yi kona.

20. Ku tiyimisela ka hina ku fanele ku va kwihi ku kondza hi fikelela makumu ya mphikizano?

²⁰ Kutani onge mahlo ya hina ma nga ka ma nga karhali hi ku hlalela ku sungula ka nhlomulo lowukulu, lowu sungulaka hi ku lovisa Babilona Lonkulu ivi wu ya lovisa nhlengeletano ya Diyavulosi hinkwayo. (2 Petro 3:11, 12) Hi ku vona swikombiso hinkwaswo swa nkoka leswi swi hi rhendzeleke, onge hi nga languta emahlweni hi ripfumelo. Onge hi nga tiyisa matimba ya hina ya ku tiyisela, naswona onge hi nga hambeta hi tiyile emphikizanweni lowu Yehova Xikwembu a wu vekeke emahlweni ka hina, ku kondza hi fikelela makumu ni ku kuma hakelo leyi tsakisaka, leswaku hi tlakusa Yehova ha Yesu Kriste.

A Wu Ta Hlamula Njhani?

◻ Xana Mukriste u fanele a tilunghiselela mphikizano wa muxaka muni?

◻ Ha yini ntsako wu ri wa nkoka swinene eku tsutsumeni ka mphikizano?

◻ Ku nga khathariseki ku nonon’hweriwa hi hambeta hi ri evutirhelini hikwalaho ka swivangelo swihi leswikulu?

◻ Ha yini hi nga fanelanga hi tshika mpfhuka lowu Xikwembu xi wu vekeke emahlweni ka hina?

[Xifaniso lexi nga eka tluka 15]

Vakriste va fanele va tiyisela tanihi loko va ri emphikizanweni wa mpfhuka wo leha

[Xifaniso lexi nga eka tluka 17]

Leswaku switsutsumi swi fikelela “harhi ya vutomi” swi fanele swi tikhoma