Ku Tiyisela Loku Tisaka Ku Hlula

“Swa fanela leswaku mi tiyisela, leswaku mi ta kota ku endla ku rhandza ka Xikwembu, mi ta amukela leswi xi nga mi tshembisa swona.”—VAHEVERU 10:36.

 1. Ha yini ku tiyisela ku fanerile eka un’wana ni un’wana loyi a tirhelaka Yehova Xikwembu namuntlha?

MISAVA leyi hinkwayo yi le mavokweni ya xikwembu xa mpfilumpfilu. Mufumi wa yona la nga vonakiki, Sathana Diyavulosi, u tirhisa matimba ya yena hinkwawo ku kaneta Yehova ni ku lwisana ni ku lweriwa ka vuhosi bya Yehova bya misava hinkwayo hi Mfumo wa Vumesiya. Leswi swi swi endla swi nga papalateki leswaku, un’wana ni un’wana la tinyiketelaka eka Xikwembu ivi a teka tlhelo ra xona ra mhaka ya vuhosi, u ta hambeta a kanetiwa hi misava leyi. (Yohane 15:18-20; 1 Yohane 5:19) Hikwalaho, un’wana ni un’wana wa hina u fanele a tilunghiselela ku tiyisela ku kondza misava leyi yi herisiwa hi ku helela eArmagedoni. Leswaku hi va exikarhi ka lava hluleke va Xikwembu, lava hlulaka misava hi ripfumelo ra vona ni vutshembeki, hi fanele hi khomelela hi ku tiyimisela ku kondza ku fika makumu. (1 Yohane 5:4) Xana hi nga swi endlisa ku yini sweswo?

 2, 3. Yehova Xikwembu na Yesu Kriste i swikombiso-nkulu swa ku tiyisela hi ndlela yihi?

² Hi xikombiso, hi nga languta eka swikombiso swimbirhi leswi xiyekaka swa ku tiyisela leswaku hi kuma xikhutazo. I vamani? Un’wana i Yesu Kriste, “mativula ya hinkwaswo leswi tumbuluxiweke,” loyi hi ku tshembeka a khomeleleke evutirhelini bya Xikwembu hi mpfhuka a vumbiwa khale, enkarhini lowu nga tiviwiki. Hi ku phikelela ka yena a tirhela Xikwembu hi ku tshembeka, Yesu u ve xikombiso xa swivumbiwa hinkwaswo swo tlhariha leswi endzhakunyana swi vumbiweke etilweni ni le misaveni. (Vakolosa 1:15, 16) Hambi swi ri tano, xikombiso lexikulu ngopfu xa ku tiyisela i Yehova Xikwembu, loyi a tiyiseleke ku xandzukeriwa ka vuhosi bya yena bya vuako hinkwabyo hi nkarhi wo leha naswona u ta hambeta a endla tano ku kondza a teka goza ro tlhantlha mphikamakaneta ya vuhosi hi ku helela.

³ Yehova u tiyisele hi ndlela leyi nga xikombiso, eka timhaka leti ku xiximeka ka yena ni mintlhaveko ya yena leyinene ya munhu hi xiyexe, swi khumbekaka eka tona. U tikhomile loko a langutane ni ku hlundzukisiwa lokukulu naswona u tikhomile, a nga va endli nchumu lava va n’wi rhuketeleke—ku katsa na Sathana Diyavulosi. Hi tlangela ku tiyisela ka Xikwembu ni tintswalo ta xona. Handle ka swona, a hi ta va hi nga hanyanga hambi ku ri swa nkarhinyana. Entiyisweni, Yehova Xikwembu u tihlawurile swinene hi ku tiyisela ka yena.

 4, 5. (a) Xana xikombiso xa Pawulo xa muvumbi xi kombisa ku tiyisela ni tintswalo ta Xikwembu hi ndlela yihi? (b) Tintswalo ta Xikwembu ti ta tikombisa njhani leswaku a ti tlangisiwangi?

⁴ Muapostola Pawulo u kombetela eka ku tiyisela ni le ka tintswalo ta Xikwembu loko a ku: “Hi tlhelo rin’wana, xana muvumbi a nga na matimba ehenhla ka vumba ra yena, ku endla, hi nkanyanga wun’we, xibya xin’wana xa nkoka ni xin’wanyana xo soleka xana? Kambe, ku yini ka swona ke, loko Xikwembu lexi a xi navela ku komba vukari bya xona ni ku endla leswaku ntamu wa xona wu tiviwa, xi vile ni mbilu leyo leha ngopfu, xi lehisela swibya leswi a swi vumberiwile ku kariheriwa ni ku fayeteriwa, xana? Kumbe, ku yini ka swona ke, loko xi endlele ku tivisa vukulu bya ku kwetsima ka xona, ehenhla ka swibya leswi a swi vumberiwile ku tsetseleriwa, swi nga swibya leswi xi swi lunghiseke ka ha ri ku sunguleni leswaku swi ta nyikiwa ku kwetsima ka xona, xana? Swibya leswi, hi hina lava xi hi vitaneke, hina hi humaka ku nga ri exikarhi ka Vayuda ntsena, kambe ni le xikarhi ka vamatiko.”—Varhoma 9:21-24.

⁵ Hi laha marito lawa ma kombaka ha kona, enkarhini lowu wa sweswi wa ku tiyisela ka yena, Yehova u ya emahlweni na xikongomelo xa yena lexi dzunekaka ni ku kombisa tintswalo ehenhla ka swibya swin’wana leswi nga vanhu. U lunghiselela ku dzuneka loku nga heriki ka swibya leswi naswona xisweswo xi herisa swikongomelo leswo biha swa mukaneti wa xona lonkulu, Sathana Diyavulosi, ni valandzeri va Sathana hinkwavo. A hi vanhu hinkwavo lava hundzukeke swibya swa ku kariheriwa, lava faneriwaka hi ndzoviso. Sweswo swi ku hlamusela kahle ku lehisa mbilu ka Xikwembu xa Matimba Hinkwawo. Tintswalo ta xona a ti nge vi ta hava. Ti ta tisa (1) ndyangu wa Mfumo lowu vangamaka ematilweni ehansi ka N’wana la rhandzekaka wa Yehova, Yesu Kriste, ni (2) rixaka ra swivumbiwa swa vanhu leswi vuyeteriweke ni leswi hetisekeke emisaveni ya paradeyisi, hinkwavo va ri vadyandzhaka va vutomi lebyi nga heriki.

Ku Tiyisela Ku Ya Fika Emakumu

 6. (a) Ha yini Vakriste va nga ta ka va nga wu balekeli ndzingo wa ku tiyisela? (b) Xana rito ra Xigriki ra ku “tiyisela” hakanyingi ri vula yini?

⁶ Hi ri karhi hi langutele ntshembo wo tano lowu hlamarisaka, hi fanele hi tshama hi ri karhi hi tsundzuka marito ya Yesu lama tiyisaka lama nge: “Kambe loyi a tiyiselaka ku fika emakumu, hi yena loyi a nga ta ponisiwa.” (Matewu 24:13) I swa nkoka ku sungula ku famba egondzweni ra Vukriste ra vudyondzisiwa. Kambe lexi ngopfu-ngopfu xi lavekaka i ndlela leyi hi tiyiselaka ha yona, ndlela leyi hi hetaka gondzo kahle ha yona. Muapostola Pawulo u kandziyise leswi loko a ku: “Swa fanela leswaku mi tiyisela, leswaku mi ta kota ku endla ku rhandza ka Xikwembu, mi ta amukela leswi xi nga mi tshembisa swona.” (Vaheveru 10:36) Rito ra Xigriki leri laha ri hundzuluxeriweke va ku ku “tiyisela” i hy·po·mo·neʹ. Leri hakanyingi ri vulaka vurhena, ku tiya, kumbe ku lehisa mbilu handle ko lahla ntshembo loko u langutane ni swihinga, minxaniso, maxangu ni miringo. Loko hi navela ku kuma ku ponisiwa ko hetelela, hi fanele hi amukela ndzingo wa ku tiyisela tanihi xiphemu xa ku lunghiselela loku fanelaka ka ku ponisiwa koloko.

 7. Xana hi fanele ku papalata ku kanakana kwihi, naswona i xikombiso xa mani lexi nga ta hi pfuna ku tiyisela?

⁷ A hi fanelanga hi tikanganyisa hi mianakanyo yo tixisa ya leswaku hi nga heta ndzingo hi ku hatlisa. Leswaku timhaka ta vuhosi bya misava hinkwayo, ni ta vutshembeki bya munhu, ti ta tlhantlhiwa hi ku helela, Yehova a nga khondlanga mavoko. U tiyisele swilo leswi nga tsakisiki hambi loko a a ta va a swi herisile xikan’we-kan’we. Yesu Kriste na yena a a ri xikombiso xa ku tiyisela swin’we ni Xikwembu. (1 Petro 2:21; ringanisa Varhoma 15:3-5.) Leswi hi nga na swikombiso leswi swo vangama emahlweni ka hina, entiyisweni na hina ha swi tsakela ku tiyisela ku ya fika emakumu.—Vaheveru 12:2, 3.

Mfanelo Leyi Lavekaka

 8. I mfanelo yihi leyi muapostola Pawulo a yi kombiseke leyi hinkwerhu hi yi lavaka?

⁸ Ku hava nandza wa Xikwembu, hambi ku sukela eminkarhini ya khale, loyi a tshunxiweke eka xilaveko xo kombisa vutshembeki bya yena hi ku tiyisela. Vanhu lava tivekaka swinene ematin’wini ya Bibele lava tshameke va tshembekile ku fikela eku feni naswona va fanelekeleke vutomi lebyi nga heriki etilweni a va boheka ku kombisa ku tiya ka vona. Hi xikombiso, khale ka Mufarisi, Sawulo wa Tarso, u byele Vakorinto a ku: “Hambiloko ndzi nga ri nchumu, a va ndzi tlulanga ha nchumu, vo lava va nge i ‘vaapostola lavakulu.’ Ndzi mi nyikile vumbhoni bya leswaku ndzi muapostola wa xiviri, hi ku mi lehisela mbilu swinene, ni ku endla mahlori, ni swihlamariso, ni mintirho ya matimba exikarhi ka n’wina.” (2 Vakorinto 12:11, 12) Ku nga khathariseki mindzhwalo ya ntirho, Pawulo u xiye vutirheli bya yena byi ri bya nkoka lerova a tiyisela swinene naswona a ringeta hi matimba leswaku a nga tisi ndzhukano ehenhla ka byona.—2 Vakorinto 6:3, 4, 9.

 9. (a) Xana masalela ya vatotiwa ma ku kombise njhani ku tiyisela naswona vuyelo byi ve byihi? (b) I yini lexi tirhaka eka hina tanihi nsusumeto wa ku hambeta hi ku tshembeka entirhweni wa Xikwembu?

⁹ Eminkarhini ya manguva lawa, Vakriste lava totiweke lava a va tirhela Xikwembu emahlweni ka nyimpi yo sungula ya misava a va swi tiva leswaku 1914 a a ri ta fungha makumu ya Minkarhi ya Vamatiko, naswona vo tala va vona a va langutele ku amukela hakelo ya vona ya le tilweni hi rona lembe rero leri nga rivalekiki. Kambe leswi a swi humelelanga. Hi laha mintiyiso sweswi yi kombisaka, va engeteleriwe makume ya malembe. Hi nkarhi lowu wa ku ndlandlamuka loku nga languteriwangiki ka vutomi bya vona bya le misaveni, va basisiwile hi voko ra Yehova Xikwembu. (Zakaria 13:9; Malakia 3:2, 3) Ku tiyisela loku hambetaka ku va antswisile. Tanihi malandza ya Yehova, va tsakele ku endliwa vanhu va vito ra yena. (Esaya 43:10-12; Mintirho 15:14) Namuntlha, leswi va humesiweke eka tinyimpi timbirhi ta misava ni mimpfilumpfilu yo tala leyitsongo, va tsakela ku pfuniwa eku hangalaseni ka mahungu lamanene hi ntshungu lowukulu lowu kulaka wa tinyimpfu tin’wana, lowu sweswi wu tlulaka mune wa timiliyoni hi nhlayo. Paradeyisi ya moya leyi va yi tsakelaka yi andlalekile emisaveni hinkwayo, ku fika ni le ka swihlala swa le kule swinene swa lwandle. Tintswalo leti, leti hi yaka hi ti tlangela hi laha ku engetelekeke loko hi ya hi hanya, ti hi nyike matimba yo endla ntirho wa Xikwembu hi ku tshembeka ku kondza ku rhandza ni xikongomelo xa Yehova swi hetiseka hi xitalo.

10. Leswaku hina hi nga tsani, i yini lexi lavekaka nkarhi na nkarhi?

¹⁰ Tanihi leswi hakelo ya hina yi titshegeke hi ku tiya ka hina, nkarhi na nkarhi hi lava xikhutazo emhakeni leyi ya nkoka. (1 Vakorinto 15:58; Vakolosa 1:23) Leswaku ku nga vi na ku tsana exikarhi ka vanhu va Yehova, nkarhi hinkwawo hi fanele hi khutazeka ku khomelela entiyisweni ni le ka lunghelo ra nkoka swinene ra ku hangalasa ntiyiso, hi laha mabandlha lama ha ku vumbiwaka hi lembe xidzana ro sungula ma tiyisiweke ha kona hi maendzo yo vuyelo ya Pawulo na Barnaba. (Mintirho 14:21, 22) A ku ve xikongomelo ni ku tiyimisela ka hina loku tiyeke hi laha muapostola Yohane a swi vekaka ha kona, leswaku ntiyiso wu ta tshama eka hina, “[naswona wu] ta va na hina hilaha ku nga heriki.”—2 Yohane 2.

Ku Langutela Hi Ku Tiyisela Loku Nga Tsekatsekiki

11. I yini lexi vonakaka xi ri fambiselo ra Xikwembu hi malandza ya xona, naswona leswi swi kombisiwe njhani emhakeni ya Yosefa?

¹¹ Swi teka nkarhi leswaku ndzingo lowu wu hi khumbaka wu hela. (Yakobo 1:2-4) Yima! Yima! Yima! ri tikomba ri ve fambiselo ra Xikwembu ni malandza ya xona ya khale loko va ringiwa mayelana ni ku tiyimisela ka vona ko hambeta eripfumelweni. Kambe ku yima koloko, eku heteleleni, minkarhi hinkwayo ku tikombe ku ri loku vuyerisaka, eka malandza wolawo lama tshembekaka. Hi xikombiso, Yosefa, a a fanele ku yima malembe ya 13 tanihi hlonga ni mubohiwa, kambe ntokoto lowu wu antswise vumunhu bya yena.—Psalma 105:17-19.

12, 13. (a) Abrahama a a ri xikombiso xa ku tiyisela hi ku tshembeka hi ndlela yihi? (b) Xana ripfumelo ni ku tiyisela ka Abrahama swi nyikeriwa tanihi xikombiso eka hina hi ndlela yihi?

¹² Abrahama ana a a ri na malembe ya 75 hi vukhale loko Xikwembu xi n’wi byele ku huma eUr wa Vakaldiya a ya eTikweni leri Tshembisiweke. A a ri na kwalomu ka 125 wa malembe hi vukhale loko a amukela xiboho xa xihlambanyo lexi tiyisaka xitshembiso xa Xikwembu—leswi humeleleke endzhakunyana ka loko Abrahama a kombise matimba ya ripfumelo ra yena lerova a kondza a lava ku nyikela n’wana wakwe Isaka, la rhandzekaka, a yima ntsena loko ntsumi ya Yehova yi sive voko ra yena kutani yi sivela gandzelo. (Genesa 22:1-18) Makume-ntlhanu wa malembe a a ku ri nkarhi wo leha eka Abraham leswaku a rindza tanihi muluveri etikweni rimbe, kambe u tiyisele malembe man’wana ya 50 nakambe ku kondza a fa a ri na malembe ya 175 hi vukhale. Enkarhini wolowo hinkwawo, Abrahama a a ri mbhoni yo tshembeka ni muprofeta wa Yehova Xikwembu.—Psalma 105:9-15.

¹³ Ripfumelo ni ku tiyisela ka Abrahama swi veka xikombiso eka malandza hinkwawo ya Xikwembu lama lavaka ku amukela mikateko leyi tshembisiweke ha Yesu Kriste, Mbewu ya Abrahama. (Vaheveru 11:8-10, 17-19) Malunghana na yena, ha hlaya eka Vaheveru 6:11-15: “Kutani hi navela ngopfu leswaku un’wana ni un’wana wa n’wina a komba ku chivirika koloko ku ya fika emakumu, ku kondza loko ku langutela ka n’wina ku hetiseka. A hi lavi leswaku mi va lavo loloha, kambe hi lava leswaku mi fana ni vanhu lava sweswi va kumaka leswi va tshembisiweke swona, hi mhaka ya ku pfumela ka vona ni ku lehisa timbilu. Loko Xikwembu xi tshembisa Abrahama, leswi a ku ri hava un’wana la nga nkulu eka xona loyi a xi ta hlambanya hi vito ra yena, xi lo tihlambanya hi xoxe, xi ku: ‘Hakunene ndzi ta ku katekisa, ndzi ku andzisa.’ Hi ndlela yoleyo, Abrahama, hi ku lehisa mbilu, u kumile leswi a tshembisiweke swona.”

14. Ha yini hi nga fanelanga ku anakanya leswaku ndzingo wa ku tiyisela a wu heli naswona hakelo ya kona a yi tshembisi?

¹⁴ Ana se masalela lama totiweke ma vone ku hundza ka malembe ya 77 hi mpfhuka ku hela Minkarhi ya Vamatiko hi 1914, loko van’wana va vona va langutele ku kwetsimisisiwa ka bandlha ra Vakriste va ntiyiso va yisiwa etilweni. Leswaku masalela ma fanele ku yima nkarhi wo leha ku fikela kwihi a hi swi tivi. Kutani ke xana hi fanele ku kanakana ivi hi anakanya leswaku ku rindza a ku heli naswona hakelo ya kona a yi tshembisi? Doo! Sweswo a swi nge byi lweli vuhosi bya Xikwembu kumbe ku tisa xichavo evitweni ra xona. A xi nge hlayiwi lexi lulameke emisaveni loko xi hi endla hi hlula ni ku hi nyika hakelo ya vutomi lebyi nga heriki. Ku nga khathariseki ku leha ka nkarhi lowu, masalela, swin’we ni vanghana va wona lavo tshembeka lava fanaka ni tinyimpfu, va tiyimiserile ku rindza ku kondza Yehova a teka goza hi nkarhi wa yena n’wini. Leswaku va kombisa ku leha mbilu ko tano loku xiyekaka, va landzela ndlela ya Abrahama.—Varhoma 8:23-25.

15. (a) I yini lexi hi tiyimiseleke xona, naswona Xikwembu xi hi hlayise hi ri lava hlulaka hi mintokoto yihi? (b) I xikhutazo xihi xa Pawulo lexi xa ha fanelaka siku ra hina?

¹⁵ Ni sweswi, ha ha tiyimisele ku yima hi nga tsekatseki eku endleni ka ku rhandza ka Xikwembu. (Varhoma 2:6, 7) Khale xi hi seketerile eka mahlomulo lamakulu, ku katsa ni ku khotsiwa ni minxaxa ya nxaniso, naswona xi hi humesile eka swona hi ri lava hluleke, ku kwetsimisa vito ni xikongomelo xa xona.a Hi nkarhi lowu wa ha saleke wa ku hela ka ndzingo wa hina, Yehova u ta hambeta a endla leswi fanaka. Xikhutazo xa Pawulo xa ha ri fanela siku ra hina. “Hikuva mi ni xilaveko xa ku leha mbilu loku tiyeke ni ku tiyisela, leswaku mi ta kota ku endla ni ku hetisisa ku rhandza ka Xikwembu hi xitalo, kutani xisweswo mi amukela ni ku tsakela ni ku tiphina hi leswi swi tshembisiweke hi xitalo.”—Vaheveru 10:36, The Amplified Bible; Varhoma 8:37.

16. Ha yini hi nga fanelanga hi languta ku tinyiketela ka hina eka Yehova hi ndlela leyi hikiweke kumbe hi swipimelo ntsena?

¹⁶ Ntsendze loko Yehova a ha ri na ntirho leswaku hina hi wu endla exikarhi ka misava leyi yo homboloka, kutani ke, hi ku landzelela xikombiso xa Yesu, hi lava ku hlanganyela entirhweni wolowo ku kondza wu hela. (Yohane 17:4) Ku tinyiketela ka hina eka Yehova a ku nga ri ka ntwanano wa leswaku hi ta n’wi tirhela swa xinkarhana kutani Armagedoni yi ta. Ku tinyiketela ka hina a ku ri loku ku nga heriki. Ntirho wa Xikwembu eka hina a wu nge heli na nyimpi ya Armagedoni. Hambi swi ri tano, hi ta vona swilo leswinene leswi nga ta ta endzhaku ka nyimpi yoleyo leyikulu, ntsena loko hi wu hetisisile ntirho lowu faneleke ku endliwa ku nga si fika Armagedoni. Kutani, ku engetela eka lunghelo rero ra ku hambeta hi endla ntirho wa xona, hi ta hakeriwa hi mikateko leyi xi yi tshembiseke leyi ku nga khale hi yi rindzerile.—Varhoma 8:32.

Ku Rhandza Xikwembu Ku Hi Pfuna Ku Tiyisela

17, 18. (a) Hi minkarhi yo nonon’hwa, i yini lexi nga ta hi pfuna ku tiyisela hi ri na ku amukeriwa hi Xikwembu? (b) I yini leswi nga ta hi pfuna ku hlula, naswona i yini lexi hi nga xi vuliki hi nkarhi lowu saleke?

¹⁷ Kumbexana, loko minkarhi yi nonon’hwa, hi nga ha vutisa: ‘Hi nga hambeta hi tiyisela hi ndlela yihi?’ Nhlamulo yi ri yini? Hi ku rhandza Xikwembu hi timbilu, mianakanyo, moya-xiviri ni matimba ya hina hinkwawo. “Rirhandzu ra tiyisela, naswona ri ni tintswalo; rirhandzu a ri na mavondzo, a ri tinyungubyisi, a ri tikurisi. Ri amukela hinkwaswo, ri pfumela hinkwaswo, ri langutela hinkwaswo, ri tiyisela eka hinkwaswo. Rirhandzu a ri heli, ni siku rin’we.” (1 Vakorinto 13:4, 7, 8) Handle ka loko hi tiyisela hi ku rhandza Xikwembu, ku tiyisela ka hina a ku vuli nchumu. Kambe loko hi tiyiselela mindzhwalo hikwalaho ka ku tinyiketela ka hina eka Yehova, kutani ke, ku tiyisela ka hina ku na mbuyelo wa ku kurisa rirhandzu ra hina eka yena. Ku rhandza ka yena Xikwembu, Tata wa yena, swi pfune Yesu ku tiyisela. (Yohane 14:30, 31; Vaheveru 12:2) Loko xikongomelo xa hina ku ri ku rhandza Xikwembu, Tata wa hina, xana i yini lexi hi nga tsandzekaka ku xi tiyiselela?

¹⁸ I rirhandzu ra hina leri nga tsekatsekiki eka Yehova Xikwembu leri nga hi pfuna leswaku hi tshama hi ri lava hlulaka misava enkarhini lowu wo nonon’hwa swinene wa ndzingo. Naswona Yehova, ha Yesu Kriste, u ta hambeta a hi nyika mpfuno lowu hi wu lavaka ku nga khathariseki ku leha ka nkarhi lowu mafambiselo lawa ya makumu ya swilo ma pfumeleriwaka ku wu teka. (1 Petro 5:10) Kavula, a hi vhumbi leswaku ka ha sele nkarhi wo tanihi kwihi, naswona a hi veki siku ro karhi leri kongomeke. Sweswo hinkwaswo hi swi veka eka Muhlayisi-nkulu wa Nkarhi, Yehova Xikwembu.—Psalma 31:15.

19, 20. (a) Siku rin’wana ni rin’wana leri hundzaka, leri hi ri tiyiselaka hi fanele hi ri languta hi ndlela yihi? (b) I vuhunguki byihi lebyi hi lavaka ku byi papalata, naswona ha yini?

¹⁹ Hambi swi ri tano, rixaka leri vhumberiweke ku vona ni ku tokota “ku hela ka minkarhi” sweswi ri kurile hi malembe. (Matewu 24:3, 32-35) Kutani ke hi nga tshuki hi rivala leswaku siku rin’wana ni rin’wana leri hundzaka leri hi ri tiyiselaka, i ku hungutiwa ka siku rin’we ra Sathana ni mademona yakwe ra ku va va thyakisa misava hi vukona bya vona naswona hi tshinela enkarhini lowu Yehova a nga ta ka a nga ha byi tiyiseleli vukona bya “swibya leswi a swi vumberiwile ku kariheriwa ni ku fayeteriwa.” (Varhoma 9:22) Hi ku hatlisa, loko ku leha mbilu ka Yehova ku hela, u ta tisa vukari bya yena ehenhla ka vavanuna ni vavasati lava nga chaviki Xikwembu. Xisweswo, u ta paluxa ku ala ka yena ndlela ya swiendlo swa vona, hambi leswi a va pfumeleleke ku hanya nkarhi lowu hinkwawo.

²⁰ Hi ta va hi hungukile swinene loko hi tshika matshalatshala ya hina ya rirhandzu leswaku hi kuma hakelo leyi dzunekaka leyi hi nyikiwaka yona ha Yesu Kriste. Ku ri na sweswo, hi tiyimisele ku ya emahlweni hi ku tshembeka tanihi Timbhoni ta Yehova enkarhini lowu wa nkoka swinene lowu ha wona Yehova a nga kusuhi ni ku tikombisa tanihi Hosi ya Hinkwako-nkwako.

[Nhlamuselo ya le hansi]

A Wu Ta Hlamurisa Ku Yini?

◻ Ha yini hi ta ka hi nga balekeli ku ringiwa ka ku tiyisela ka hina?

◻ I ku kanakana kwihi loku hi faneleke hi ku papalata?

◻ I yini lexi lavekaka leswaku hi papalata ku tsana?

◻ I yini lexi hi tiyimiseleke xona?

◻ Hi nkarhi wo nonon’hwa, i yini lexi nga ta hi pfuna ku tiyisela?

[Xifaniso lexi nga eka tluka 11]

Vanhu va Xikwembu, tanihi Timbhoni leti ePort of Spain, Trinidad, nkarhi hinkwawo a va tsakela ku rindzela Yehova