I Vamani Lava Landzelaka Ku Vonakala Ka Misava?
‘Mi vangama tanihi mavoni emisaveni.’—VAFILIPIYA 2:15.
1. Xana Bibele yi ri yini hi mavoningo ya vukanganyisi ya vukhongeri?
BIBELE yi hlamusela Yesu kahle tanihi “ku v̌onakala lo’kukulu,” “ku vonakala ka misava.” (Esaya 9:2; Yohane 8:12) Hambi swi ri tano, i vatsongo lava n’wi landzeleke loko a ri emisaveni. Vunyingi byi landzele mavoningo ya vakanganyisi, lava kahle-kahle a va byarhe munyama. Malunghana na vona Rito ra Xikwembu ri ri: “Vanhu lavo tano, i vaapostola va mavunwa, i vatirhi lava xisaka, lava tiendlaka onge i vaapostola va Kriste. Kutani a swi hlamarisi, hikuva na yena Sathana, ú tiendla onge i ntsumi ya ku vonakala. Loko swi ri tano, a swi hlamarisi loko malandza ya yena na wona ma tiendla onge i malandza ya leswo lulama; kambe eku heteleleni, va ta kuma leswi yelanaka ni mintirho ya vona.”—2 Vakorinto 11:13-15.
2. I yini lexi Yesu a nga vula leswaku xi ta va xisekelo xo avanyisa vanhu?
2 Xisweswo, a hi hinkwavo vanhu lava lavaka ku vonakala hambi leswi ku vangamaka. Yesu u te: “Ku avanyisiwa ku ta hi mhaka leyi: Hileswaku ku vonakala ku tile emisaveni, kambe vanhu va rhandzile munyama ku tlula ku vonakala, hikuva mintirho ya vona a yi ri leyo biha. Un’wana ni un’wana la endlaka leswo biha, ú venga ku vonakala, kutani a nga ti eku vonakaleni, hi ku chava leswaku mintirho ya yena yi [nga ti ṭhuka yi tshinyiwa, BX].”—Yohane 3:19, 20.
Varhandzi Va Munyama
3, 4. Xana varhangeri va vukhongeri esikwini ra Yesu va kombise njhani leswaku a va nga swi lavi ku landzela ku vonakala?
3 Xiya ndlela leyi sweswo a swi ri xiswona loko Yesu a ri emisaveni. Xikwembu xi nyike Yesu matimba yo endla masingita yo hlamarisa tanihi ndlela yo kombisa leswaku a a ri Mesiya. Hi xikombiso, hi siku ra Savata, u hanyanyise mahlo ya wanuna loyi a tswariweke a ri bofu. Mayana ntirho wonghasi wa tintswalo! Wanuna loyi u tlangerile swinene! U kote ku vona ro sungula! Hambi swi ri tano, xana varhangeri va vukhongeri va endle yini? Yohane 9:16 ya rungula: “Vafarisi van’wana va ku: ‘La endleke swilo leswi a nga humi eka Xikwembu, hikuva a nga na mhaka ni siku ra Savata.’” Timbilu ta vona a ti onhakile hakunene! Laha, ku hanyisa ka masingita ku endlekile, kambe ematshan’wini yo tsakela munhu loyi a a nga voni khale ni ku nkhensa la n’wi hanyiseke, va sole Yesu! Hi ku endla tano, handle ko kanakana va dyohele ku kombisiwa ka moya wo kwetsima wa Xikwembu, xidyoho lexi nga rivalelekiki.—Matewu 12:31, 32.
4 Endzhaku, loko vakanganyisi volavo va vutise munhu loyi a a nga voni khale mayelana na Yesu, munhu loyi u te: “I mhaka le’yi hlamarisaka kunene loko mi nga ṅwi tiv̌i laha a humaka kona, kasi o nḍi hanyanyisile mahlo! Ha ŝi tiv̌a leŝaku Šikwembu a ši yingisi v̌adyohi; kambe kungaku loko munhu a tšhav̌a Šikwembu, a endla hi ku ranḍa ka šona, ša ṅwi yingisa. A hi si ŝi twa ni siku riṅwe, leŝaku munhu o hanyisile mahlo ya uṅwana l’a nga tŝariwa a fe mahlo. Loko loyi a nga ri wa Šikwembu, a nga ti endla ntšhumu.” Xana varhangeri va vukhongeri va endle njhani? “V̌a ṅwi hlamul[e] v̌a ku: Wena, u tŝariwile ŝiv̌ini wena hikwako, kasi [wa] hi dyonḍisa-ke? Kutani v̌a ṅwi hlongo[le]la handle.” A va pfumala ntsetselelo hakunene! A va ri ni timbilu to sihalala. Xisweswo, Yesu u va byele leswaku hambi leswi a va kota ku vona hi mahlo ya xiviri, a va ri mabofu hi tlhelo ra moya.—Yohane 9:30-41, BX.
5, 6. I yini leswi varhangeri va vukhongeri va lembe xidzana ro sungula va swi endleke leswi kombaka leswaku a va rhandza munyama?
5 Leswaku vakanganyisi lava va vukhongeri a va dyohela moya wo kwetsima wa Xikwembu swi vonake xikan’we eka xiendlakalo xin’wana, loko Yesu a pfuxe Lazaro eku feni. Hikwalaho ka singita rero, vanhu lavanyingi lava tolovelekeke va pfumele ka Yesu. Hambi swi ri tano, xiya leswi varhangeri va vukhongeri va swi endleke. “Kavaloko vaprista lavakulu ni Vafarisi va vitana Huvo ya Sanedri, va ku: ‘Hi ta endla yini xana, leswi munhu loyi a endlaka mahlori layo tala? Loko hi n’wi tshikisa sweswo, hinkwavo va ta pfumela ka yena, kutani Varhoma va ta ta va ta lovisa ndhawu leyi ya hina, ni ku hi heta hi rixaka.’” (Yohane 11:47, 48) A va karhatekela swikhundlha ni ndhuma ya vona. Handle ko lava ku tiva leswaku ku ta endleka yini, va lave ku tsakisa Varhoma, ku nga ri Xikwembu. Kutani, va endle yini? “Ku sukela siku rero, Vayuda va boha makungu ya ku dlaya Yesu.”—Yohane 11:53.
6 Xana swi helele kwalaho? Doo. Leswi va nga tlhela va swi endla swi kombise ndlela leyi a va rhandza munyama ha yona: “Kavaloko vaprista lavakulu va boha makungu ya ku dlaya na yena Lazaro; hikuva, hikwalaho ka yena, Vayuda lavo tala a va fularhela vaprista, va pfumela eka Yesu.” (Yohane 12:10, 11) Vona vuhomboloki byonghasi byo hlamarisa! Hambi leswi va nga endla leswi hinkwaswo leswaku va lwela swikhundlha swa vona, ku humelele yini ke? Rixaka rolero ri pfukele Varhoma, lava nga ri hlasela hi 70 C.E. ivi va herisa ndhawu ya rona, tiko ra rona, swin’we ni vutomi bya rona!—Esaya 5:20; Luka 19:41-44.
Ntsetselelo Wa Yesu
7. Hikwalaho ka yini varhandzi va ntiyiso va khitikanele ka Yesu?
7 Ni le nkarhini wa hina, a hi hinkwavo lava lavaka ku voningeriwa emoyeni. Kambe lava va rhandzaka ntiyiso va swi lava ku ta eku vonakaleni. Va lava Xikwembu tanihi Mulawuri wa vona, naswona va veka timbilu ta vona eka Yesu, loyi Xikwembu xi nga n’wi rhuma ku ta hlamusela leswaku ku vonakala i yini, va vuya va n’wi landzela. Sweswo hi leswi vanhu vo titsongahata va swi endleke loko Yesu a ri emisaveni. Va khitikanele ka yena. Hambi Vafarisi a va fanele ku swi pfumela sweswo. Va vilerile va ku: “Misava hinkwayo yi landza yena.” (Yohane 12:19) Vanhu vo fana ni tinyimpfu a va rhandza Yesu hikuva a nga fani ni varhangeri va vukhongeri lava nga ni vutitivi, manyunyu, ni ku lava ku fuma van’wana, lava Yesu a nga vulavula ha vona a ku: “Va boha mindzhwalo leyo tika, va yi rhwexa emakatleni ya vanhu, kasi vona a va lavi ni ku yi ninginisa hi ritiho. Mintirho ya vona hinkwayo, va yi tirha leswaku va ta voniwa hi vanhu.”—Matewu 23:4, 5.
8. Ku hambana ni vakanganyisi va vukhongeri, i moya wihi lowu Yesu a ri na wona?
8 Ku hambana ni sweswo, xiya moya wa Yesu wo tsetselela: “Loko a vona mintshungu ya vanhu, a va twela vusiwana, hikuva a va karhele, va tshamile ehansi, va fana ni tinyimpfu leti nga riki na murisi.” (Matewu 9:36) Kutani u endle yini ha vona ke? U byele lava a va ri mahlonga ya mafambiselo ya Sathana a ku: “Tanani ka mina, n’wina hinkwenu lava karheleke, ni lava tikeriwaka, ndzi ta mi wisisa. Rhwalani joko ra mina, mi dyondza ka mina, hikuva ndzi ni mbilu yo rhula ni ya tintswalo; kutani mimoya ya n’win[a] yi ta kuma ku wisa; hikuva joko ra mina ra olova, ni ndzhwalo wa mina wa vevuka.” (Matewu 11:28-30) Yesu u endle leswi a swi vhumbhiwile ha yena eka Esaya 61:1, 2, leyi nge: “Yehova . . . o nḍi totile ku byela ŝisiwana e mahungu ya ku saseka; o nḍi rumile ku horisa la’v̌a nga ni timbilu le’ti v̌av̌isekaka, ku tiv̌isa la’v̌a bohiweke leŝaku v̌a ta nṭhunšiwa, ni la’v̌a khoṭiweke leŝaku v̌a ta humesiwa; ni ku v̌ula lembe le’rinene ra Yehova, ni siku ra ku tirihisela ka Šikwembu ša hina; e ku tšhav̌elela hikwav̌o la’v̌a v̌av̌isekaka.”
Ku Hlengeleta Vabyarhi Va Ku Vonakala
9. Xana i swiendlakalo swihi swa nkoka leswi endlekeke hi 1914?
9 Loko Yesu a tlhandlukele ematilweni, a a fanele ku rindza ku kala ku fika nkarhi wa leswaku Xikwembu xi n’wi nyika matimba ya Mfumo. Kutani a a ta hlawula “tinyimpfu” eka “timbuti.” (Matewu 25:31-33; Pisalema 110:1, 2) Nkarhi wolowo wu fike loko ku sungula ‘minkarhi ya makumu’ hi 1914. (2 Timotiya 3:1-5) Yesu, loyi a nyikiweke matimba ya ku va Hosi ya Mfumo wa Xikwembu wa le matilweni, u sungule ku hlengeletela evokweni ra yena ra xinene ra tintswalo lava laveke ku landzela ku vonakala. Endzhaku ka Nyimpi yo Sungula ya Misava, ntirho wolowo wo hlengeleta wu ye emahlweni wu andza hi rivilo lerikulu.
10. I swivutiso swihi leswi nga vutisiwaka mayelana ni lava Yesu a va tirhisaka entirhweni wo hlengeleta?
10 Ehansi ka vurhangeri bya Kreste Yesu, ntirho wo hlengeleta wu hakeriwe hi ku va ni ndzima swinene. Ematin’wini hinkwawo a ku si tshama ku va ni vanhu lavanyingi swonghasi lava humaka etinxakeni hinkwato, va hlengeletiwa evugandzerini bya ntiyiso lebyi voningeriweke. Naswona i vamani namuntlha lava ku nga vona va landzelaka ku vonakala loku humaka eka Xikwembu na Kreste ke? I vamani lava endlaka leswi vuriwaka hi Vafilipiya 2:15 loko yi ku, ‘vangamani ku kotisa mavoni emisaveni,’ lava rhambaka van’wana leswaku va ‘ta, va ta nwa mati ya vutomi mahala’?—Nhlavutelo 22:17.
11. Xana xiyimo xa Vujagana hi xihi loko xi fanisiwa ni ku vonakala ka moya?
11 Xana Vujagana bya swi endla sweswo? Entiyisweni, Vujagana, swin’we ni vukhongeri bya byona bya mimpambukwa, a byi vangami tanihi rivoningo. Kahle-kahle, vafundhisi va fana ni varhangeri va vukhongeri va le sikwini ra Yesu. A va kombisi kona ku vonakala ka ntiyiso loku humaka eka Xikwembu na Kreste. Emalembeni ya makume-nharhu lama hundzeke, magazini lowu nge Theology Today wu te: “Swi twisa ku vava, naswona swi fanele ku pfumeriwa leswaku ku vonakala loku a ku vangami hi ku hatima lokukulu eTikerekeni. . . . Tikereke ti ye ti fana ngopfu ni miganga leyi yi tirhendzeleke. A ta ha ri ku vonakala ka misava kambe se to kombisa ku vonakala loku vangamaka emisaveni hi koxe.” Naswona xiyimo xa Vujagana xi ya xi biha ngopfu namuntlha. Ku vonakala loku byi ku kombisaka, loku ku humaka emisaveni, i munyama hakunene hikuva sweswo hi leswi Sathana ni misava yakwe va tameleke swona. A ku kona nikatsongo ku vonakala ka ntiyiso loku humaka evukhongerini bya Vujagana lebyi kanetanaka ni lebyi nga bya misava hi ku helela.
12. I vamani lava vumbaka nhlengeletano ya ntiyiso ya vabyarhi va ku vonakala namuntlha?
12 Hi ku tiyiseka ku nga vuriwa leswaku vandla ra misava leyintshwa ra Timbhoni ta Yehovha i nhlengeletano ya ntiyiso leyi byarheke ku vonakala namuntlha. Swirho swa yona hinkwaswo—vavanuna, vavasati, ni vana—swi endla hi vun’we leswaku ku vonakala ka swona loku humaka eka Yehovha na Kreste ku vangama emahlweni ka vanhu hinkwavo. N’wexemu, emavandlheni ya Timbhoni ta Yehovha ya kwalomu ka 70 000 emisaveni hinkwayo, vabyarhi va ku vonakala lava tlulaka mune wa timiliyoni a a va byela van’wana hi Xikwembu ni swikongomelo swa xona hi ku chivirika. Naswona sweswi, lembe ni lembe hi vona ku hlengeletiwa loku yaka emahlweni ka vanhu lava na vona va lavaka ku voningeriwa emoyeni. Madzana ya magidi ma khuvuriwa endzhaku ko dyondza Bibele ni ku kuma vutivi lebyi kongomeke bya ntiyiso. Kunene, Xikwembu xi ‘rhandza leswaku vanhu va mixaka hinkwayo va ponisiwa, va kuma vutivi lebyi kongomeke bya ntiyiso.’—1 Timotiya 2:4.
13. Xana ku vonakala loku humaka eka Yehovha hi nga ku fanisa na yini?
13 Hi nga ha fanisa ku voningeriwa loku sweswi ku taka ku huma eka Yehovha ni leswi humeleleke loko vanhu va Xikwembu va minkarhi ya khale va suka le Egipta: “Yehova a v̌a rangela e mahlweni hi ku nembelela ka papa ni hlekanhi, e ku v̌a komba ndlela, ni ku pfura ka nḍilo ni v̌usiku e ku v̌a v̌oningela leŝaku v̌a famba nhlekanhi ni v̌usiku.” (Eksoda 13:21, 22) Papa ni nhlikanhi, ni ndzilo ni vusiku, leswi humaka eka Xikwembu, a swi ri swikongomiso leswi tshembekeke. A swi tshembeka ku fana ni dyambu leri Xikwembu xi ri tumbuluxeke leswaku ri hi nyika ku vonakala ka ni nhlikanhi. Kutani, na hina, hi nga titshega hi Yehovha leswaku a hambeta a voninga ndlela ya valavi va ntiyiso hi tlhelo ra moya emasikwini lawa yo biha ya makumu. Swivuriso 4:18 ya hi tiyisekisa: “Ndlela ya la’v̌o lulama yi kotisa ku v̌onakala, ku hatima ka kona ku engeteleka ku fikela nhlekanhi lo’wukulu.”
Ku Kombisa Ku Vonakala Ka Mfumo
14. I yini lexi fanelaka ku va xikongomelo-nkulu xa vabyarhi va ku vonakala?
14 Leswi Yehovha a nga Xihlovo xa ku voningeriwa, naswona Kreste a nga Mukombisi Lonkulu wa ku vonakala koloko na vona valandzeri va Yesu va fanele va va ku vonakala koloko. U vule leswi ha vona: “N’wina mi ku vonakala ka misava. . . . Ku vonakala ka n’wina a ku voningele vanhu hi mukhuva wolowo, leswaku va ta vona mintirho ya n’wina leyo saseka, va dzunisa Tata wa n’wina la nge matilweni.” (Matewu 5:14, 16) Naswona a xi ri yini xikongomelo-nkulu xa ku vonakala loku, loku valandzeri vakwe a va ta ku vonakarisa emahlweni ka vanhu? Xana a a va ta dyondzisa yini eku chaputeni loku ka matimu ya misava? Yesu a nga vulanga leswaku valandzeri vakwe va ta chumayela hi ta mfumo wa mani na mani, mfumo wo tshikelela, vun’we bya Tikereke ni Mimfumo, kumbe dyondzo yihi na yihi ya misava. Ematshan’wini ya sweswo, eka Matewu 24:14 u vhumbhe leswaku emahlweni ka minkaneto ya misava hinkwayo, “Evhangeli leyi ya Mfumo [a] yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.” Xisweswo, namuntlha vabyarhi va ku vonakala va byela van’wana hi Mfumo wa Xikwembu, lowu nga ta herisa misava ya Sathana ivi wu tisa misava leyintshwa yo lulama.—1 Petro 2:9.
15. Xana lava lavaka ku vonakala va ta hundzukela kwihi?
15 Lava rhandzaka ku vonakala a va nge kokiwi hi swilo swa misava ni tipakani ta yona. Swilo sweswo ni tipakani ta yona hinkwato swi ta nyamalala sweswinyana, tanihi leswi misava leyi yi yaka yi tshinela eku heleni ka yona. Ku ri na sweswo, lava rhandzaka ku lulama va ta hundzukela eka mahungu lamanene lama huweleriwaka hi lava endlaka ku vonakala ka Mfumo wa Xikwembu ku vangama ku yisa emakun’wini ya misava. Lava hi lava vhumbhiweke eka Nhlavutelo 7:9, 10, leyi nge: “Ndzi languta, kutani ndzi vona ntshungu lowukulu wa vanhu; a ku nga ri na un’we la kotaka ku va hlaya. A va huma ematikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato. A va yimile emahlweni ka xiluvelo [xa Xikwembu] ni le mahlweni ka Xinyimpfana [Kreste] . . . A va huwelela hi rito leri tlakukeke va ku: ‘Ku ponisiwa ku huma eka Xikwembu xa hina lexi tshameke exiluvelweni, ni le ka Xinyimpfana!’” Ndzimana ya 14 yi ri: “Lava, hi lava humaka eku xanisekeni lokukulu.” Ee, va pona makumu ya misava leyi va nghena emisaveni leyintshwa leyi nga heriki ehansi ka Mfumo wa Xikwembu.
Misava Leyintshwa Leyi Voningeriweke
16. Xana ku ta humelela yini hi misava ya Sathana enhlomulweni lowukulu?
16 Misava leyintshwa yi ta funengetiwa hi rivoningo leri vangamaka ra ntiyiso. Kunene, ehleketa leswi xiyimo xi nga ta va xi ri xiswona hi xa mundzuku wa siku leri Xikwembu xi nga ta herisa mafambiselo lawa ya swilo. Sathana, ni mademona yakwe, swin’we ni mafambiselo yakwe ya tipolitiki, ni ya mabindzu, ni ya vukhongeri swi ta va swi nyamalarile—xin’wana ni xin’wana xa swona! Switirho hinkwaswo swa vukanganyisi bya Sathana swi ta va swi nyamalarile na swona. Xisweswo, endzhaku ka nhlomulo lowukulu, a ku nge he tshuki ku kandziyisiwe phepha-hungu, magazini, buku, xibukwana, kumbe phepha ni rin’we leri fambisanaka ni misava leyi yo homboloka. A ku nge he vi na minhlohlotelo leyi thyakeke leyi hangalasiwaka emisaveni hinkwayo hi switichi swa tithelevhixini kumbe swa swiya-ni-moya. Xiyimo hinkwaxo xa misava ya Sathana lexi nga chefu xi ta susiwa hi nhlaselo wun’we wa matimba!—Matewu 24:21; Nhlavutelo 7:14; 16:14-16; 19:11-21.
17, 18. Xana u nga xi hlamusela njhani xiyimo xa moya xa le ndzhaku ka ku herisiwa ka misava ya Sathana?
17 Wolowo wu ta va wu ri mpfuno lowukulu hakunene! Ku sukela esikwini rero ku ya emahlweni, i ku vonakala ka moya lokunene, loku pfunaka, loku humaka eka Yehovha ni Mfumo wa yena loku nga ta lawula vanhu ntsena. Esaya 54:13 yi vhumbha leswi: “V̌ana v̌a wena v̌a šinuna hikwav̌o v̌a ta v̌a v̌adyonḍisiwa v̌a Yehova, ku rula ka v̌ona ku ta v̌a lo’kukulu.” Tanihi laha Esaya 26:9 yi vulaka ha kona, loko ku fuma ka Xikwembu ku lawula misava hinkwayo, xi tshembisa leswaku “v̌anhu v̌a misav̌a v̌a [ta] dyonḍa ku lulama.”
18 Hi ku hatlisa, xiyimo hinkwaxo xa mianakanyo ni xa moya xi ta cinca xi va lexinene. Swilo leswi akaka swi ta tala swinene, ku nga ri swilo swo biha leswi hetaka mongo, leswi sweswi swi hangalakeke ngopfu. Un’wana ni un’wana la nga ta va a hanya hi nkarhi wolowo u ta dyondzisiwa ntiyiso mayelana ni Xikwembu ni swikongomelo swa xona. Vuprofeta bya Esaya 11:9, lebyi nge: “Ku tiv̌a Yehova ku ta eneta misav̌a, tani hi leŝi mati ma funengetaka v̌uento bya lwandle,” byi ta hetiseka hi mongo lowu heleleke.
I Swa Xihatla Leswaku U Landzela Ku Vonakala
19, 20. Ha yini lava lavaka ku landzela ku vonakala va fanele va tshama va hitekile?
19 Sweswi, emalembeni yo hetelela ya mafambiselo lawa yo biha, i swa xihatla ku landzela ku vonakala ka misava. Naswona hi fanele ku tivonela, hikuva ku ni nyimpi leyikulu leyi lwiwaka, leyi lavaka ku hi kendlusa hi nga fambi kona eku vonakaleni. Ku kanetiwa loku ku huma eka valawuri va munyama—eka Sathana, ni mademona yakwe, swin’we ni nhlengeletano yakwe ya laha misaveni. Hi yona mhaka leyi muapostola Petro a tsundzuxaka ha yona a ku: “Tikhomeni mi hiteka. Nala wa n’wina a nga Diyavulosi, wa rhendzeleka-rhendzeleka ku fana ni nghala leyi bongaka, yi lava loyi yi nga n’wi dyaka.”—1 Petro 5:8.
20 Sathana u ta veka swihingakanyo endleleni ya lava va taka eku vonakaleni, a ringeta ku va endla leswaku va tshama va ri emunyameni. Ku nga ha va hi ku tshikeleriwa hi maxaka kumbe vanghana va khale lava nga laviki ntiyiso. Ku nga ha va ku kanakana Bibele hikwalaho ko va munhu a pfariwe mahlo hi tidyondzo ta vukhongeri bya mavunwa kumbe vukanganyisi bya lavo pfumala ripfumelo, lava nge a ku na Xikwembu, ni lava nge a swi koteki ku tiva leswaku Xikwembu xi kona kumbe a xi kona. Ku nga ha va mimboyamelo ya munhu hi yexe ya vudyoho leyi endlaka swi nonon’hwa ku hanya hi ku ya hi leswi Xikwembu xi lavaka swona.
21. I goza rihi leri hinkwavo lava lavaka ku hanya emisaveni leyintshwa ya Xikwembu va faneleke va ri teka?
21 Ku nga khathariseki swihingakanyo leswi nga ha vaka kona, xana wa swi lava ku tiphina hi vutomi emisaveni leyintshwa leyi nga riki na vusweti, vugevenga, nsele, ni nyimpi? Xana wa swi lava ku tiphina hi rihanyo leri hetisekeke ni vutomi lebyi nga heriki emisaveni ya paradeyisi? Kutani, amukela Yesu tanihi ku vonakala ka misava u tlhela u n’wi landzela, u yingisa ni rungula ra lava namarhelaka “Rito ra vutomi” va tlhela va ‘vangama tanihi mavoni emisaveni.’—Vafilipiya 2:15, 16.
U Nga Hlamula Njhani?
◻ Xana varhangeri va vukhongeri va swi kombisise ku yini leswaku i varhandzi va munyama?
◻ Xana i moya wihi lowu Yesu a ri na wona eka vanhu?
◻ Xana ku hlengeletiwa ka vabyarhi va ku vonakala ku fambise ku yini?
◻ Xana i ku hundzuka kwihi ka nkoka loku nga ta endleka ku nga ri khale?
◻ Ha yini swi ri swa xihatla leswaku hi landzela ku vonakala ka misava namuntlha?
[Swifaniso leswi nga eka tluka 14, 15]
Vafarisi va timbilu to sihalala va hlongole munhu loyi mahlo yakwe a ma pfuriwile hi Yesu