“Ku Vonakala Ku Tile eMisaveni”

“Ku avanyisiwa ku ta hi mhaka leyi: Hileswaku ku vonakala ku tile emisaveni, kambe vanhu va rhandzile munyama ku tlula ku vonakala.”—YOHANE 3:19.

 1. Ha yini munhu un’wana ni un’wana a fanele ku khumbeka hi ku avanyisa ka Xikwembu?

VANHU vo tala namuntlha a va vileli ngopfu hi ku avanyisa ka Xikwembu. Van’wana va ehleketa leswaku Xikwembu xi ta va avanyisa hi tintswalo loko va ya ekerekeni nkarhi hinkwawo naswona va nga endleli vaakelani va vona swo biha. Eka vo tala, tidyondzo ta Vujagana ta ndzilo wa tihele ni pagatori ti onhe mianakanyo hinkwayo ya ku avanyisa ka Xikwembu. Kambe nkaneto lowu hangalakeke ni mavunwa ya Vujagana a swi nge wu hundzuli ntiyiso wa leswaku munhu un’wana ni un’wana eku heteleleni u ta avanyisiwa hi Xikwembu. (Varhoma 14:12; 2 Timotiya 4:1; Nhlavutelo 20:13) Kutani swo tala swi ta titshega hi ku avanyisa loku. Lava va avanyisiwaka hi tintswalo va ta amukela nyiko ya Xikwembu ya vutomi lebyi nga heriki, kasi lava va nga avanyisiwangiki hi tintswalo va ta amukela hakelo leyi heleleke ya xidyoho: rifu.—Varhoma 6:23.

 2. Hi xihi xisekelo xa ku avanyisa ka Xikwembu?

² Hikwalaho, Vakriste va ntiyiso va khumbeka hi ku avanyisa ka Xikwembu, naswona va navela ku xi tsakisa hi ku chivirika. Va nga swi endlisa ku yini leswi? Eka Yohane 3:19, Yesu u hi nyika xilotlelo. U ri: “Ku avanyisiwa ku ta hi mhaka leyi: Hileswaku ku vonakala ku tile emisaveni, kambe vanhu va rhandzile munyama ku tlula ku vonakala, hikuva mintirho ya vona a yi ri leyo biha.” Ina, ku avanyisa ka Xikwembu ku ta titshega hi loko hi rhandza ku vonakala ematshan’wini ya munyama.

“Xikwembu I Ku Vonakala”

 3. Xana munyama i yini, naswona i yini ku vonakala?

³ Hi mianakanyo ya moya, munyama wu hlangana ni ku pfumala vutivi ni ku pfumala ntshembo loku nga kona exivandleni xa Sathana—hambi leswi Sathana hakanyingi a tiendlaka onge i “ntsumi ya ku vonakala.” (2 Vakorinto 4:4; 11:14; Vaefesa 6:12) Hi tlhelo rin’wana, ku vonakala ku hlangana ni ku twisisa na ku voningeriwa loku humaka eka Yehova Xikwembu. Pawulo u vulavule hi ku vonakala loko a tsala a ku: “Hikuva xona Xikwembu, lexi nga te: ‘Ku vonakala a ku vangame emunyameni!’ hi xona lexi nga vangamisa ku vonakala etimbilwini ta hina, hi ta tiva ku kwetsima ka xona loku vangamaka enghoheni ya Kriste.” (2 Vakorinto 4:6) Ku vonakala ka moya ku fambelana swinene na Yehova Xikwembu lerova muapostola Yohane u tsarile a ku: “Xikwembu i ku vonakala.”—1 Yohane 1:5; Nhlavutelo 22:5.

 4. (a) Yehova u endle ku vonakala ku kumeka hi ndlela yihi? (b) Xana hi nga kombisa ku rhandza ku vonakala hi ndlela yihi?

⁴ Yehova u endle ku vonakala ku kumeka hi Rito ra yena, leri namuntlha ri kumekaka mahala hi xivumbeko xo tsariwa eBibeleni leyi Kwetsimaka. (Psalma 119:105; 2 Petro 1:19) Hikwalaho, mupisalema entiyisweni a a kombisa ku rhandza ka yena ku vonakala loko a tsala a ku: “E nawu wa wena nḍi wu ranḍisa ku yini! Nḍi wu anakanya hi siku hikwaro. Moya wa mina wu hlayisa ŝiṭunḍušo ŝa wena, kutani nḍa ŝi ranḍa e ku tlurisa.” (Psalma 119:97, 167) Xana u rhandza ku vonakala swinene hi laha mupisalema handle ko kanakana a endleke ha kona? Xana minkarhi hinkwayo wa ri hlaya Rito ra Xikwembu, u anakanyisisa hi rona, kutani u ringeta hi matimba ku tirhisa leswi ri swi vulaka? (Psalma 1:1-3) Loko swi ri tano, u hlakulela ku amukela ku avanyisa ka tintswalo loku humaka eka Yehova.

“Ndzi Ku Vonakala Ka Misava”

 5. Ku vonakala ka Xikwembu i mani?

⁵ Ku vonakala loku nyikaka vutomi loku humaka eka Yehova i Yesu Kriste hi yexe. Emasungulweni ya Evhangeli ya Yohane, ha hlaya: “Swi kumile vutomi eka [Yesu], kutani vutomi bya yena a byi ri ku vonakala eka vanhu. Ku vonakala ka ha vangama emunyameni, naswona munyama a wu kotanga ku ku hlula.” (Yohane 1:4, 5) Entiyisweni, Yesu u na ku hlangana lokukulu na ku vonakala lerova u vuriwa “ku vonakala ka xiviri loku voningaka munhu un’wana ni un’wana.” (Yohane 1:9) Yesu hi yexe u te: “Loko ndza ha ri laha misaveni, ndzi ku vonakala ka misava.”—Yohane 9:5.

 6. Xana munhu u fanele ku endla yini leswaku a ta kuma ku avanyisa ka tintswalo loku yisaka evuton’wini lebyi nga heriki?

⁶ Hikwalaho, lava va rhandzaka ku vonakala va rhandza Yesu naswona va na ripfumelo eka yena. A swi koteki ku kuma ku avanyisiwa ka tintswalo handle ko languta eka Yesu. Ina, hi nga kuma ku avanyisiwa lokunene hi ku languta eka yena tanihi ndlela leyi hlawuriweke ya Xikwembu ya ku ponisiwa ntsena. Yesu u te: “Loyi a pfumelaka eka N’wana, ú ni vutomi lebyi nga heriki; loyi a nga yingisiki N’wana, a nga ka a nga kumi vutomi, kambe vukari bya Xikwembu byi tshame henhla ka yena.” (Yohane 3:36) Kutani ke, swi vula yini ku kombisa ripfumelo eka Yesu?

 7. Ku va ni ripfumelo eka Yesu swi vula ku va ni ripfumelo ni le ka mani?

⁷ Xo sungula, Yesu hi yexe u te: “Loyi a pfumelaka eka mina, a nga pfumeri eka mina ntsena kambe ú pfumela ni le ka Loyi a ndzi rhumeke; naswona loyi a ndzi vonaka, ú vona Loyi a ndzi rhumeke. Mina ndzi ku vonakala, kutani ndzi tile emisaveni leswaku un’wana ni un’wana la pfumelaka eka mina, a nga tshami emunyameni.” (Yohane 12:44-46) Lava va rhandzaka Yesu kutani va kombisa ripfumelo eka yena nakambe va fanele ku va ni rirhandzu leri enteke ni ripfumelo eka Xikwembu ni Tata wa Yesu, Yehova. (Matewu 22:37; Yohane 20:17) Mani na mani la tirhisaka vito ra Yesu eku gandzeleni ka yena kambe a tsandzeka ku nyikela xichavo lexikulu eka Yehova a nga kombisi rirhandzu ra ntiyiso eku vonakaleni.—Psalma 22:27; Varhoma 14:7, 8; Vafilipiya 2:10, 11.

“Murhangeri Lonkulu” Wa Xikwembu

 8. Xana ku vonakala ka Xikwembu ku kombeteleke njhani eka Yesu hambi loko a nga si velekiwa tanihi munhu?

⁸ Ku kombisa ripfumelo eka Yesu nakambe swi vula ku amukela hi ku helela xiphemu xa yena eswikongomelweni swa Yehova. Nkoka wa xiphemu lexi wu kombisiwile loko ntsumi yi ku eka Yohane: “Vumbhoni lebyi humesiweke hi Yesu, hi wona mongo wa vuhlavuteli.” (Nhlavutelo 19:10; Mintirho 10:43; 2 Vakorinto 1:20) Ku sukela eka vuprofeta byo sungula le Edeni, vuprofeta hinkwabyo lebyi huhuteriweke hi Xikwembu eku heteleleni byi hlangana na Yesu ni xiphemu xa yena eku hetisiseni ka swikongomelo swa Xikwembu. Hi ku fanana, Pawulo u byele Vakriste va Vagalatiya leswaku ntwanano wa Nawu a a wu ri “murisi ku fikela loko Kriste a tile.” (Vagalatiya 3:24) Ntwanano wolowo wa Nawu wa khale a a wu endleriwe ku lunghiselela rixaka ra ku ta ka Yesu tanihi Mesiya. Kutani ke, hambi ku ri emahlweni ka ku velekiwa ka yena tanihi munhu, ku vonakala ka Yehova a a ku kombetela eka Yesu.

 9. Ku rhandza ku vonakala swi katse yini ku sukela hi 33 C.E.?

⁹ Hi 29 C.E., Yesu u titisile eku khuvuriweni kutani u totiwile hi moya lowo kwetsima, xisweswo a va Mesiya la tshembisiweke. Hi 33 C.E. u file a ri munhu la hetisekeke, u pfuxiwile, u tlhandlukele etilweni, kutani kwalaho a nyikela nkoka wa vutomi bya yena hikwalaho ka swidyoho swa hina. (Vaheveru 9:11-14, 24) Nongonoko lowu wa swiendlakalo wu funghe ku hundzuka ka swilo eku tirhisaneni ka Xikwembu ni vanhu. Yesu sweswi a a ri “Murhangeri lonkulu wa vutomi,” ‘Murhangeri lonkulu wa ku ponisiwa,’ “Murhangeri Lonkulu ni Muhetisisi wa ku pfumela ka hina.” (Mintirho 3:15, NW; Vaheveru 2:10; 12:2, NW; Varhoma 3:23, 24) Ku sukela hi 33 C.E. ku ya emahlweni, varhandzi va ku vonakala va xiyile, kutani va swi amukela, leswaku handle ka Yesu “ku ponisiwa a ku kumeki eka munhu un’wana, hikuva vanhu a va nyikiwanga vito rin’wana laha misaveni, . . . leri hi fanelaka ku ponisiwa ha rona.”—Mintirho 4:12.

10. Ha yini swi ri swa nkoka swinene ku yingisela marito ya Yesu ni ku ma hlayisa?

¹⁰ Nakambe ku kombisa ripfumelo eka Yesu swi vula ku n’wi amukela tanihi “Rito,” ni “Muṭunḍuši [la Hlamarisaka, NW].” (Yohane 1:1; Esaya 9:6) Leswi Yesu a swi vulaka minkarhi hinkwayo swi kombisa ntiyiso wa Xikwembu. (Yohane 8:28; Nhlavutelo 1:1, 2) Ku n’wi yingisa i mhaka ya vutomi ni rifu. Yesu u byele Vayuda va siku ra yena a ku: “La yingisaka rito ra mina, a va a pfumela eka Loyi a ndzi rhumeke, ú ni vutomi lebyi nga heriki; kutani a nga ka a nga avanyisiwi, kambe ú humile eku feni a ya nghena evutomini.” (Yohane 5:24) Eka lembe xidzana ro sungula C.E., lava va hanyeke hi marito ya Yesu va kutsuriwile eka munyama wa misava ya Satana kutani, hi ndlela yo fanekisela, va ta evuton’wini. Va vuriwe lava lulameke va ri ni ntshembo wa ku va vadyandzhaka swin’we na yena eMfun’weni wa yena wa le tilweni. (Vaefesa 1:1; 2:1, 4-7) Namuntlha, ku yingisa marito ya Yesu swi pfula ndlela eka vo tala leswaku va vuriwa lava lulameke va ri ni ntshembo wo pona Armagedoni ni ku kuma vutomi bya vumunhu lebyi hetisekeke emisaveni leyintshwa.—Nhlavutelo 21:1-4; ringanisa Yakobo 2:21, 25.

“Nhloko Ya Hinkwaswo”

11. I vuhosi byihi bya le henhla lebyi nyikiweke Yesu hi 33 C.E.?

¹¹ Endzhaku ka ku pfuxiwa ka yena, Yesu u hlavutele valandzeri va yena xivumbeko xin’wana xa ku vonakala. U te: “Ndzi nyikiwile vuhosi hinkwabyo etilweni ni la misaveni.” (Matewu 28:18) Xisweswo Yesu a a ri karhi a tlakuseriwa exitshan’wini xo rhanga enhlengeletanweni ya Yehova ya hinkwako-nkwako. Pawulo u nyikela vuxokoxoko lebyi engetelekeke loko a ku: “[Xikwembu] xi pfuxile Kriste eku feni, xi engeta xi n’wi veka evokweni ra xona ra xinene ehenhla matilweni. Kriste wa fuma kona, ehenhla ka hinkwaswo leswi nga ni vundhuna, ni ku fuma, ni matimba, ni vuhosi; naswona, ú le henhla ka mavito hinkwawo lama nga vuriwaka, ku nga ri enguveni leyi ntsena, kambe ni ka nguva leyi nga ta ta. Kutani Xikwembu xi vekile hinkwaswo ehansi ka minkondzo ya Kriste, xi tlhela xi n’wi nyika [bandlha, NW], a ri nhloko ya hinkwaswo. [Bandlha] i miri wa yena.” (Vaefesa 1:20-23; Vafilipiya 2:9-11) Ku sukela hi 33 C.E., ku rhandza ku vonakala swi katse ku titsongahatela xiyimo lexi xa Yesu, xa le henhla.

12. Xana Vakriste lava totiweke va amukele yini hi ku tsaka ku sukela emasungulweni, naswona va swi kombise njhani leswi hi ndlela ya xiviri?

¹² Eku heteleleni, vanhu hinkwavo va ta boheka ku titsongahatela vuhosi bya Yesu. (Matewu 24:30; Nhlavutelo 1:7) Hambi swi ri tano, varhandzi va ku vonakala, hi ku tsaka va xi xiyile ku sukela eku sunguleni. Swirho leswi totiweke swa bandlha ra Vukriste swi amukela Yesu tanihi “nhloko ya miri, hileswaku ya [Bandlha, NW].” (Vakolosa 1:18; Vaefesa 5:23) Loko va va xiphemu xa miri wolowo, va ‘humesiwa ematimbeni ya munyama, kutani va hundziseriwa eku fumeni ka N’wana wa Xikwembu loyi a rhandzekaka.’ (Vakolosa 1:13) Ku sukela kwalaho ku ya emahlweni, hi ku chivirika va landzela vurhangeri bya Yesu emhakeni yin’wana ni yin’wana ya vutomi bya vona, naswona enkarhini wa hina va dyondzise “tinyimpfu tin’wana” ku endla hi laha ku fanaka. (Yohane 10:16) Ku titsongahatela vunhloko bya Yesu i xilaveko lexikulu leswaku hi ta amukela ku avanyisa lokunene.

13. Yesu u sungule rini ku tirhisa vuhosi bya Mfumo, naswona ku landzele yini la misaveni?

¹³ Eku tlhandlukeni ka yena a ya etilweni hi 33 C.E., Yesu a nga tirhisanga vuhosi bya yena hi ku hatlisa ku fikela empin’weni lowu heleleke. Hambi leswi a a ri Nhloko ya bandlha ra Vukriste, u yimele nkarhi lowu faneleke wo tirhisa vuhosi lebyi heleleke ehenhla ka vanhu hinkwavo. (Psalma 110:1; Mintirho 2:33-35) Nkarhi wolowo wu te hi 1914, loko Yesu a vekiwe exitshan’wini tanihi Hosi ya Mfumo wa Xikwembu naswona ‘masiku ya makumu’ ya misava leyi ma sungurile. (2 Timotiya 3:1) Ku sukela hi 1919, ku hlengeletiwa ka vatotiwa lava va saleke ku hambete ku ya emakun’wini ya kona. Ku sukela hi 1935 hi laha ku hlawulekeke, Yesu a a ri eku hambaniseni ka vanhu va va “tinyimpfu,” lava nga ta dya ndzhaka ya ‘mfumo lowu nga lunghiseleriwa vona’, ni “timbuti”, ku nga lava nga ta “ya eku biweni loku nga heriki.”—Matewu 25:31-34, 41, 46.

14. Xana ntshungu lowukulu wu ku kombise njhani ku rhandza ku vonakala, naswona ku ta humelela yini eka vona?

¹⁴ Lexi tsakisaka, tinyimpfu ti tikombe ti tele emasikwini lawa ya makumu. Ntshungu lowukulu wa tona lowu hlayeriwaka eka timiliyoni wu humelerile exivonweni xa misava “va huma ematikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato.” Tanihi vanghana va vona, vatotiwa, vanhu lava va fanaka ni tinyimpfu va rhandza ku vonakala. Va “hlantswile tinguvu ta vona, va ti basisile hi ngati ya Xinyimpfana,” kutani va huwelela hi rito lerikulu va ku: “Ku ponisiwa ku huma eka Xikwembu xa hina lexi tshameke exiluvelweni, ni le ka Xinyimpfana.” Hikwalaho ka leswi, ntshungu lowukulu tanihi ntlawa wu ta amukela ku avanyisa lokunene. Swirho swa wona ‘swi huma eku xanisekeni lokukulu,’ swi pona ku lovisiwa ka lava va rhandzaka munyama eArmagedon.—Nhlavutelo 7:9, 10, 14.

“[Vana] Va Ku Vonakala”

15. Swiendlo swa hina swi ku kombisa njhani ku titsongahatela Hosi, Yesu Kriste?

¹⁵ Kutani ke, xana varhandzi va ku vonakala, hambi i vatotiwa kumbe va tinyimpfu tin’wana, va titsongahata njhani eka Yesu hi swiendlo tanihi loyi a vekiweke exitshan’wini hi Xikwembu tanihi Hosi ni Muavanyisi? Ndlela yin’wana i ku ringeta ku va muxaka wa vanhu lava Yesu a va amukelaka. Loko a ha ri emisaveni Yesu u kombise ku tlangela timfanelo to tanihi ku tshembeka, ku va ni mbilu leyi heleleke ni ku chivirika entiyisweni, naswona u kombise timfanelo leti hi yexe. (Marka 12:28-34, 41-44; Luka 10:17, 21) Loko hi navela ku kuma ku avanyisa lokunene, hi fanele ku vumba timfanelo to tano.

16. Ha yini swi ri swa nkoka ku cukumeta mintirho ya munyama?

¹⁶ Leswi i ntiyiso ngopfu-ngopfu leswi munyama wa misava ya Sathana wu yaka wu dzhwihala loko makumu ma tshinela. (Nhlavutelo 16:10) Hikwalaho marito lawa Pawulo a ma tsaleleke Varhoma ma faneleka swinene: “Vusiku byi hundzile, dyambu ri lava ku huma. Hikokwalaho, a hi cukumeteni mintirho ya munyama, kutani hi hakarha matlhari ya ku vonakala. A hi fambeni hi mukhuva lowu fanelaka, kukotisa vanhu lava fambaka ni nhlekanhi, ku nga ri hi makampfu ni ku pyopyiwa, ku nga ri hi swa manyala ni vuoswi, ku nga ri hi timholovo ni mavondzo.” (Varhoma 13:12, 13) Hambi leswi vutomi lebyi nga heriki ku nga nyiko leyi humaka eka Xikwembu, ntiyiso wa ripfumelo ni ku rhandza ka hina ku vonakala swi kombisiwa hi swiendlo swa hina. (Yakobo 2:26) Hikwalaho, ku avanyisa loku hi ku amukelaka ku ta titshega ngopfu-ngopfu hi mpimo lowu hi endlaka mintirho leyinene ni ku papalata mintirho leyo homboloka ha wona.

17. Xana swi vula yini ku “ambala Hosi Yesu Kriste”?

¹⁷ Endzhaku ko nyikela xitsundzuxo xa yena eka Varhoma 13:12, 13, muapostola Pawulo u hetelela hi ku vula leswi: “Mi ambala Hosi Yesu Kriste, kutani mi nga tsetseleri swa ntumbuluko wa n’wina wa laha misaveni.” (Varhoma 13:14) Xana swi vula yini ku “ambala Hosi Yesu Kriste”? Swi vula leswaku Vakriste va fanele ku landzelela Yesu swinene, hi ndlela yo fanekisela va ambala xikombiso na mboyamelo wa yena, va lwela ku va tanihi Kriste. Petro u te: “Mi vitaneriwe swona, hikuva Kriste na yena ú twile ku vaviseka hikwalaho ka n’wina, a mi boxela ntila leswaku mi ta n’wi landzelela.”—1 Petro 2:21.

18. I ku hundzuka kwihi lokukulu loku nga lavekaka loko hi navela ku amukela ku avanyisa ka tintswalo?

¹⁸ Leswi hakanyingi swi katse ku cinca lokukulu evuton’wini bya Mukriste. Pawulo u te: “Hikuva khale n’wina hi n’wexe a mi ri emunyameni, kambe sweswi, leswi mi nga hundzuka vanhu va Hosi, mi le ku vonakaleni. Hanyani ku fana ni [vana, NW] va ku vonakala, hikuva ku vonakala, hi kona loku vekaka mihandzu leyo tala, yi nga ya vunene ni ku lulama ni ntiyiso.” (Vaefesa 5:8, 9) Mani na mani la endlaka mintirho ya munyama a hi murhandzi wa ku vonakala naswona a nga ka a nga amukeli ku avanyisa ka tintswalo handle ka loko o hundzuka.

“Mi Ku Vonakala Ka Misava”

19. Mukriste a nga kombisa ku vonakala hi tindlela tihi to hambana-hambana?

¹⁹ Eku heteleleni, ku rhandza ku vonakala swi vula ku kombisa ku vonakala koloko leswaku van’wana va kota ku ku vona naswona va kokeriwa kona. Yesu u te: “N’wina mi ku vonakala ka misava.” Kutani u engetele a ku: “Ku vonakala ka n’wina a ku voningele vanhu hi mukhuva wolowo, leswaku va ta vona mintirho ya n’wina leyo saseka, va dzunisa Tata wa n’wina la nge matilweni.” (Matewu 5:14, 16) Mintirho leyo saseka ya Mukriste yi katsa ku kombisa tinxaka hinkwato ta vunene ni vululami ni ntiyiso, tanihi leswi ku tikhoma koloko lokunene ku nyikelaka vumbhoni bya matimba eka ntiyiso. (Vagalatiya 6:10; 1 Petro 3:1) Ngopfu-ngopfu yi katsa ku vulavula ni van’wana hi ntiyiso. Namuntlha, leswi swi vula ku hlanganyela eka tsima ra misava hinkwayo ra ku chumayela “Evhangeli leyi ya Mfumo . . . emisaveni hinkwayo, leswaku yi va vumbhoni eka vanhu va matiko hinkwawo.” Nakambe, swi vula leswaku hi ku lehisa mbilu hi tlhelela eka lava tsakelaka, hi dyondza na vona Bibele, ni ku va pfuna, leswaku na vona va humesa mintirho leyi nga ya ku vonakala.—Matewu 24:14; 28:19, 20.

20. (a) Xana ku vonakala ku vangama swinene namuntlha hi ndlela yihi? (b) I mikateko yihi leyi fuweke leyi tsakeriwaka hi lava va angulaka kahle eka ku vonakala?

²⁰ Esikwini ra hina, hikwalaho ka ntirho wa ku chumayela wa ku chivirika wa Vakriste vo tshembeka, mahungu lamanene ma twiwa ematikweni lama tlulaka 200, naswona ku vonakala ku hatima ku tlula rini na rini. Yesu u te: “Hi mina ku vonakala ka misava; loyi a ndzi landzelelaka a nga ka a nga fambi emunyameni ni siku ni rin’we, kambe ú ta va ni ku vonakala ka vutomi.” (Yohane 8:12) Mawaku ntsako lowu wu nga wona ku hlanganyela eku hetisekeni ka xitshembiso lexi! Vutomi bya hina byi fuwile swinene sweswi tanihi leswi hi nga ha karhatekiki emunyameni wa misava ya Sathana. Naswona ku langutela ka hina entiyisweni ka hlamarisa loko hi languta emahlweni eku avanyiseni lokunene loku humaka eka Muavanyisi la hlawuriweke wa Yehova. (2 Timotiya 4:8) Vona leswaku a ku ta va nchumu lowu vavisaka njhani loko, endzhaku ko kuma ku vonakala, hi tlhentlhela endzhaku emunyameni kutani hi amukela ku avanyisa loku nga riki ka tintswalo! Eka xihloko lexi landzelaka, hi ta bula hi ndlela leyi hi nga tshamaka hi tiyile eripfumelweni ha yona.

Xana U Nga Hlamusela?

◻ Hi xihi xisekelo xa ku avanyisa ka Xikwembu?

◻ I xiphemu-nkulu xihi lexi Yesu a nga na xona mayelana ni swikongomelo swa Xikwembu?

◻ Xana hi swi kombisisa ku yini leswaku hi titsongahatela Yesu tanihi loyi a vekiweke exitshan’wini hi Yehova tanihi Hosi?

◻ Xana hi nga tikombisa njhani tanihi “[vana] va ku vonakala”?

◻ Emunyameni wa misava leyi, xana ku vonakala ku vangama ku tlula rini na rini hi ndlela yihi?

[Xifaniso lexi nga eka tluka 10]

Eku heteleleni, vanhu hinkwavo va ta boheka ku titsonghatela vuhosi bya Yesu

[Xifaniso lexi nga eka tluka 12]

Hi kombisa leswaku hi rhandza ku vonakala loko hi ku kombisa eka van’wana