Ntshungu Lowukulu Wu Endla Ntirho Wo Kwetsima
“Va xi tirhela [ntirho wo kwetsima, NW] vusiku ni nhlekanhi eTempeleni ya xona.”—NHLAVUTELO 7:15.
1. Hi yihi yinhla-nkulu ya ku twisisa ka moya leyi fikeleriweke hi 1935?
HI May 31, 1935, ku ve ni ntsako lowukulu exikarhi ka vapfhumba entsombanweni wa Timbhoni ta Yehovha eWashington, D.C. Ro sungula, vunyingi lebyikulu (kumbe, ntshungu lowukulu) bya le ka Nhlavutelo 7:9 byi hlamuseriwe kahle hi ku pfumelelana ni Bibele hinkwayo ni hi ku fambisana ni swiendlakalo leswi a swi sungule ku humelela.
2. I yini lexi kombisaka leswaku nhlayo leyikulu yi xiye leswaku Xikwembu a xi yi vitanelanga evuton’wini bya le tilweni?
2 Emavhikini ya kwalomu ka tsevu emahlweni ka leswi, enkhubyeni wa Xilalelo xa Hosi emavandlheni ya Timbhoni ta Yehovha, lava a va ri kona va 10 681 (kwalomu ka un’we eka tsevu) a va dyanga xinkwa ni vhinyo yo fanekisela, naswona 3 688 wa vona a va ri vahuweleri va Mfumo wa Xikwembu lava gingiritekaka. Ha yini va nga swi dyanga swifanekiselo? Hikuva hi ku landza leswi va swi dyondzeke eBibeleni, va lemuke leswaku Xikwembu a xi va vitanelanga vutomi bya le tilweni kambe a va ta hlanganyela emalunghiselelweni ya Yehovha ya rirhandzu hi ndlela yin’wana. Kutani entsombanweni wolowo, loko xivulavuri xi kombela xi ku: “Hi kombela hinkwavo lava nga ni ntshembo wa ku hanya hi laha ku nga heriki emisaveni va yima hi milenge,” ku endleke yini? Magidi ya vanhu ma yime hi milenge, ku landzela ku phokotela ka vayingiseri ka nkarhi wo lehanyana.
3. Ha yini ku hlamuseriwa ka vunyingi lebyikulu ku nyika matimba lamantshwa ya vutirheli bya nsimu, naswona Timbhoni ti titwe njhani hi leswi?
3 Leswi vapfhumba va swi dyondzeke entsombanweni wolowo swi va nyike matimba lamantshwa ya vutirheli bya vona. Va kote ku twisisa leswaku sweswi, ku nga si hela mafambiselo ya khale, a hi magidi ma nga ri mangani ntsena kambe i vunyingi lebyikulu bya vanhu lebyi nga ta kuma nkarhi wo ta elunghiselelweni ra Yehovha ra ku hlayiseriwa vutomi, hi ntshembo wo hanya hi masiku emisaveni ya paradeyisi. Varhandzi va ntiyiso va nyikiwe rungula leri kufumetaka mbilu hakunene! Timbhoni ta Yehovha ti xiye leswaku a ku fanele ku endliwa ntirho lowukulu—ntirho lowu tsakisaka. Endzhaku ka malembe, John Booth, loyi a veke xirho xa Huvo leyi Fumaka, u tsundzuke leswi: “Nhlengeletano yoleyo yi hi nyike swo tala swa ku hi endla hi tsaka.”
4. (a) Xana ku hlengeletiwa ka ntshungu lowukulu ku sukela hi 1935 ku endliwe ku fikela kwihi? (b) Xana ntshungu lowukulu wu swi kombisa njhani leswaku wu ni ripfumelo leri hanyaka?
4 Emalembeni lama landzeleke, nhlayo ya Timbhoni ta Yehovha yi andze hi laha ku hlamarisaka. Ku nga khathariseki nxaniso lowukulu wa tihanyi lowu a va langutana na wona enkarhini wa Nyimpi ya Vumbirhi ya Misava, nhlayo ya vona yi lave ku kula hi laha ku andzisiweke kanharhu ku nga si hela khume ra malembe. Naswona vahuweleri va 56 153 lava a va nyikela vumbhoni bya le rivaleni hi 1935 va engetelekile, hi 1994, va tlula vahuweleri va Mfumo va 4 900 000 lava kumekaka ematikweni yo tlula 230. Vunyingi bya vona byi langutele hi mahlo-ngati ku katsiwa exikarhi ka lava Yehovha a nga ta va nyika vutomi lebyi hetisekeke emisaveni ya paradeyisi. Loko va ringanisiwa ni ntlhambinyana, va ve ntshungu lowukulu hakunene. A hi vanhu lava vulaka leswaku va ni ripfumelo kambe va nga ri kombisi. (Yakobo 1:22; 2:14-17) Hinkwavo va byela van’wana mahungu lamanene ya Mfumo wa Xikwembu. Xana u wun’wana wa ntshungu wolowo lowu tsakeke? Ku va Mbhoni leyi gingiritekaka hi wona mfungho wa nkoka wa sweswo, kambe ku na swin’wana leswi katsekaka.
“Va Yimile eMahlweni Ka Xiluvelo”
5. Xana mhaka ya leswaku ntshungu lowukulu wu “yimile emahlweni ka xiluvelo” yi kombisa yini?
5 Exivonweni lexi muapostola Yohane a nyikiweke xona, u va vone “va yimile emahlweni ka xiluvelo ni le mahlweni ka Xinyimpfana.” (Nhlavutelo 7:9) Ku yima ka vona emahlweni ka xiluvelo xa Xikwembu, hi laha swi hlamuseriweke ha kona emhakeni leyi, swi kombisa leswaku va byi xiya kahle vuhosi bya Yehovha. Leswi swi katsa swo tala. Hi xikombiso: (1) Va amukela mfanelo ya Yehovha ya ku endlela malandza yakwe swiboho malunghana ni swilo leswinene ni leswo biha. (Genesa 2:16, 17; Esaya 5:20, 21) (2) Va yingisa Yehovha loko a vulavula na vona hi Rito rakwe. (Deteronoma 6:1-3; 2 Petro 1:19-21) (3) Va twisisa nkoka wa ku titsongahata eka lava Yehovha a va nyikeke vulanguteri. (1 Vakorinto 11:3; Vaefesa 5:22, 23; 6:1-3; Vaheveru 13:17) (4) Hambi leswi va nga hetisekangiki, hi matimba va tikarhatela ku landzelela nkongomiso wa Xikwembu, ku nga ri hi ku vilela, kambe hi ku swi rhandza, hi mbilu hinkwayo. (Swivuriso 3:1; Yakobo 3:17, 18) Va le mahlweni ka xiluvelo leswaku va endlela Yehovha ntirho wo kwetsima, loyi va n’wi xiximaka swinene ni ku n’wi rhandza hi vuenti. Mayelana ni ntshungu lowu lowukulu, ‘ku yima’ ka wona emahlweni ka xiluvelo ku kombisa ku amukeriwa ka wona hi Loyi a tshameke exiluvelweni. (Ringanisa Nhlavutelo 6:16, 17.) Xana ku amukeriwa ka wona ku sekeriwe kwihi?
“Va Ambele Tinguvu To Leha Leto Basa”
6. (a) Xana swi vula yini leswaku ntshungu lowukulu wu “ambale tinguvu to leha to basa”? (b) Xana ntshungu lowukulu wu xi kuma njhani xiyimo lexinene emahlweni ka Yehovha? (c) Xana ku kombisa ripfumelo engatini ya Kreste leyi halatiweke ku ma khumba ku fikela kwihi mahanyelo ya ntshungu lowukulu?
6 Nhlamuselo ya muapostola Yohane ya leswi a swi voneke yi vula leswaku swirho swa ntshungu lowukulu swi “ambele tinguvu to leha leto basa.” Lava nga ni tinguvu to basa va kombisa xiyimo xa vona lexi baseke, lexi lulameke emahlweni ka Yehovha. Va xi kumise ku yini xiyimo xexo? Ana se hi swi vonile leswaku exivonweni xa Yohane a va yime “mahlweni ka Xinyimpfana.” Va teka Yesu Kreste tanihi “Xinyimpfana xa Xikwembu lexi susaka swidyoho swa misava.” (Yohane 1:29) Exivonweni, Yohane u twe un’wana wa vakulukumba lava a va ri kona exiluvelweni xa Xikwembu a hlamusela a ku: “Va hlantswile tinguvu ta vona, va ti basisile hi ngati ya Xinyimpfana. ‘Hikokwalaho, va le mahlweni ka xiluvelo xa Xikwembu.’” (Nhlavutelo 7:14, 15) Hi ndlela yo fanekisela, va hlantswe tinguvu ta vona hi ku kombisa ripfumelo engatini ya Kreste leyi kutsulaka. A va pfumeli hi nomu ntsena edyondzweni ya Bibele ya nkutsulo. Ku wu tlangela swi khumba vumunhu bya vona bya le ndzeni; xisweswo, va kombisa ripfumelo “embilwini.” (Varhoma 10:9, 10) Leswi swi fambisana swinene ni leswi va swi endlaka hi vutomi bya vona. Hi ripfumelo, va tinyiketela eka Yehovha hikwalaho ka gandzelo ra Kreste, va kombisa ku tinyiketela koloko hi ku nyuperisiwa ematini, hakunene va hanya hi ku fambisana ni ku tinyiketela ka vona, xisweswo va kuma vuxaka lebyi amukeriwaka hi Xikwembu. Mawaku lunghelo ro saseka swonghasi—leri faneleke ku hlayisiwa khwatsi!—2 Vakorinto 5:14, 15.
7, 8. Nhlengeletano ya Yehovha yi wu pfune njhani ntshungu lowukulu leswaku wu hlayisa tinguvu ta wona ti basile?
7 Hi ku karhatekela vuhlayiseki bya vona, nhlengeletano ya Yehovha hi ku phindha-phindha yi paluxe mavonelo ni mahanyelo lawa ma nga thyakisaka tinguvu ta munhu lerova, hambi a tivula ripfumelo, a nga faneriwi hi nhlamuselo ya vuprofeta leyi nga eka Nhlavutelo 7:9, 10. (1 Petro 1:15, 16) Hi ku tiyisa leswi a swi tsariwe emahlweni, The Watchtower, hi 1941 ni le ndzhaku ka kwalaho, hi ku phindha-phindha yi kombise leswaku swi ta va swi nga fanelanga nikatsongo ku chumayela van’wana, ivi nkarhi wun’wana u endla swilo swo tanihi vuoswi kumbe vumbhisa. (1 Vatesalonika 4:3; Vaheveru 13:4) Hi 1947 ku kandziyisiwe leswaku mimpimanyeto ya Yehovha ya vukati bya Vukreste yi tirha ematikweni hinkwawo; ku nga khathariseki leswaku mikhuva ya ndhawu yi pfumelela yini, lava a va ya emahlweni va teka tshengwe a va nga ta va Timbhoni ta Yehovha.—Matewu 19:4-6; Tito 1:5, 6.
8 Hi 1973, Timbhoni ta Yehovha emisaveni hinkwayo ti kombisiwe leswaku hinkwato ti fanele ku papalata swiendlo leswi nyamisaka swo tanihi ku tirhisiwa loko biha ka fole, ku nga khathariseki leswaku ti kwihi—hayi eHolweni ya Mfumo ntsena kumbe entirhweni wa nsimu kambe ni le ntirhweni wa ku tihanyisa kumbe endhawini leyi tumbeleke laha ti nga voniwiki hi munhu. (2 Vakorinto 7:1) Hi 1987 emintsombanweni ya muganga ya Timbhoni ta Yehovha, vantshwa va Vakreste va tshinyiwile leswaku loko va ta hlayisa xiyimo lexi tengeke emahlweni ka Xikwembu, va fanele va tivonela ku hanya vutomi byimbirhi. (Pisalema 26:1, 4) Nkarhi na nkarhi, Xihondzo xo Rindza xi tsundzuxe hi swilo swo hambana-hambana swa moya wa misava hikuva “vukhongeri lebyi tengeke, lebyi nga solekiki emahlweni ka Xikwembu Tatana” byi katsa ku tshama ‘u ri hava xivati xa misava.’—Yakobo 1:27.
9. I vamani lava nga ta amukeriwa emahlweni ka xiluvelo xa Xikwembu endzhaku ka nhlomulo lowukulu?
9 Lava ripfumelo ra vona ri va susumetelaka ku hanya hi ndlela leyi yi va pfunaka ku tshama va basile emoyeni ni le mahanyelweni hi vona lava nga ta va va ha “yimile emahlweni ka xiluvelo” tanihi malandza lama amukelekaka ya Xikwembu endzhaku ka nhlomulo lowukulu lowu taka. Lava i vanhu lava sungulaka vutomi bya Vukreste va tlhela va phikelela eka byona hi ku tshembeka.—Vaefesa 4:24.
“Va Tamele Mincindzu eMandleni Ya Vona”
10. Xana mincindzu leyi voniweke hi Yohane emandleni ya ntshungu lowukulu yi vula yini?
10 Exikarhi ka swilo leswi xiyekaka swa ntshungu lowukulu, hi laha muapostola Yohane a swi voneke ha kona, hi leswaku “va tamele mincindzu emandleni ya vona.” Xana sweswo swi vula yini? A swi kanakanisi leswaku mincindzu yoleyo yi tsundzuxe Yohane hi nkhuvo wa Vayuda wa titabernakele, ku nga nkhuvo wa ntsako swinene ekhalendarini ya Xiheveru, lowu a wu endliwa endzhaku ka ntshovelo wa ximumu. Hi ku pfumelelana ni Nawu, mincindzu, swin’we ni marhavi ya misinya yin’wana, a yi tirhiseriwa ku endla mintsonga yo tshama ka yona hi nkarhi wa nkhuvo. (Levhitika 23:39-40; Nehemiya 8:14-18) Nakambe a yi ndzulutiwa hi vagandzeri etempeleni hi nkarhi wa ku yimbeleriwa ka Tipisalema ta ku Dzunisa. (Pisalema 113-118) Ku ndzulutiwa ka mincindzu ka ntshungu lowukulu handle ko kanakana ku tlhele ku tsundzuxa Yohane hi nkarhi lowu Yesu a fambeke eYerusalema loko ntshungu wa vagandzeri wu ri karhi wu ndzuluta mincindzu hi ntsako ni ku huwelela wu ku: “A ku dzunisiwe la taka hi vito ra Hosi! A ku dzunisiwe yena Mufumi wa lsraele!” (Yohane 12:12, 13) Kutani ku ndzulutiwa ka mincindzu ku kombisa leswaku ntshungu lowukulu hi ntsako wu dzunisa Mfumo wa Yehovha ni Hosi yakwe leyi totiweke.
11. Ha yini malandza ya Xikwembu ma kuma ntsako hakunene entirhweni wa Yehovha?
11 Moya wo tano wa ntsako hi wona lowu ntshungu lowukulu wu wu kombisaka ni sweswi loko wu tirhela Yehovha. Leswi a swi vuli leswaku a wu langutani ni maxangu kumbe leswaku a wu ku twi ku vaviseka kumbe switlhavi. Kambe ku eneriseka loku tisiwaka hi ku tirhela ni ku tsakisa Yehovha ku va pfuna leswaku va langutana ni swilo sweswo. Hi xikombiso, murhumiwa loyi a tirheke ni nuna wakwe ku ringana malembe ya 45 eGuatemala u vulavule hi swiyimo swa khale leswi a hanya eka swona, ntirho wa matimba ni ku famba loku nga ni makhombo loku a va hanya ha kona loko va lava ku fikelela miti ya Maindiya hi rungula ra Mfumo. U gimete hi leswi: “A ku ri nkarhi lowu a hi tsakile swinene evuton’wini bya hina.” Hambi leswi a a nga tiphini kahle hikwalaho ka ku dyuhala ni ku vabya, eku gimeteni ka leswi a swi tsala a ku ri ni marito lawa: “A ku ri vutomi lebyinene, lebyi vuyerisaka swinene.” Emisaveni hinkwayo, Timbhoni ta Yehovha ti titwa hi ndlela leyi fanaka hi vutirheli bya tona.
‘Ntirho Wo Kwetsima Vusiku Ni Nhlikanhi’
12. Hambi ku ri ni nhlikanhi kumbe ni vusiku, xana Yehovha u vona yini laha misaveni?
12 Vagandzeri lava lava tsakeke va endlela Yehovha ‘ntirho wo kwetsima vusiku ni nhlikanhi.’ (Nhlavutelo 7:15) Exirhendzevutaneni hinkwaxo, timiliyoni ti endla ntirho lowu wo kwetsima. Loko ku ri vusiku ematikweni man’wana ni vanhu va etlele, ematikweni man’wana dyambu ri tlhavile naswona Timbhoni ta Yehovha ti khomekile hi ku nyikela vumbhoni. Loko xirhendzevutana xi rhendzeleka nkarhi na nkarhi, vusiku ni nhlikanhi, va yimbelela swidzuniso swa Yehovha. (Pisalema 86:9) Kambe ntirho wa vusiku ni nhlikanhi lowu boxiwaka eka Nhlavutelo 7:15 wu tlhela wu khumba munhu un’wana ni un’wana.
13. Xana Matsalwa ma swi kombisa njhani leswi vuriwaka hi ku tirha ‘vusiku ni nhlikanhi’?
13 Vanhu lava vumbaka ntshungu lowukulu va endla ntirho wo kwetsima vusiku ni nhlikanhi. Xana leswi swi vula leswaku xin’wana ni xin’wana lexi va xi endlaka xi tekiwa tanihi ntirho wo kwetsima? I ntiyiso leswaku eka xin’wana ni xin’wana lexi va xi endlaka, va dyondza ku xi endla hi ndlela leyi dzunisaka Yehovha. (1 Vakorinto 10:31; Vakolosa 3:23) Hambi swi ri tano, ‘ntirho wo kwetsima’ wu vula ntsena leswi khumbaka vugandzeri bya munhu eka Xikwembu. Ku endla ntirho “vusiku ni nhlekanhi” swi vula ku wu tirha nkarhi na nkarhi kumbe ku ka u nga hundzuki ni ku endla matshalatshala lamakulu.—Ringanisa Yoxuwa 1:8; Luka 2:37; Mintirho 20:31; 2 Vatesalonika 3:8.
14. I yini lexi nga endlaka ntirho wa hina vini wa nsimu wu faneriwa hi nhlamuselo ya ku tirha ‘vusiku ni nhlikanhi’?
14 Loko va tirha eswivaveni swa la misaveni swa tempele leyikulu ya Yehovha ya moya, lava vumbaka ntshungu lowukulu va tikarhatela ku hlanganyela nkarhi na nkarhi evutirhelini bya nsimu. Vo tala va tiendlele pakani ya ku va kona evutirhelini bya nsimu vhiki na vhiki. Van’wana va tikarhata tanihi maphayona ya nkarhi hinkwawo kumbe maphayona ya nkarhinyana. Hakanyingi va nyikela vumbhoni eswitarateni ni le switolo ni mpundzu swinene. Leswaku ti pfuna lava tsakelaka, Timbhoni tin’wana ti fambisa tidyondzo ta Bibele ni vusiku. Va nyikela vumbhoni loko va ya eku xaveni, loko va famba, hi nkarhi wa swakudya swa ni nhlikanhi ni hi riqingho.
15. Handle ka vutirheli bya nsimu, i yini lexi katsekaka entirhweni wo kwetsima?
15 Ku hlanganyela eminhlanganweni ya vandlha na swona i xiphemu xa ntirho wa hina wo kwetsima; swin’we ni ntirho wo aka ni ku hlayisa tindhawu ta tinhlengeletano ta Vukreste. Matshalatshala lama endliwaka yo khutaza vamakwenu va Vakreste va xinuna ni va xisati, emoyeni ni swilo leswi vonakaka, leswaku va ya emahlweni ni ntirho wa Yehovha na wona ma katseka. Leswi swi katsa ntirho wa Tikomiti ta hina to Vulavurisana ni Swibedlhele. Ntirho wa le Bethele ni swiphemu swa wona swo hambana-hambana, swin’we ni ntirho wo tirhandzela emintsombanweni ya hina, hinkwaswo i ntirho wo kwetsima. Hakunene, loko vutomi bya hina byi lawuriwa hi vuxaka bya hina na Yehovha, byi tala hi ntirho wo kwetsima. Hi laha tsalwa ri vulaka ha kona, vanhu va Yehovha va endla ‘ntirho wo kwetsima vusiku ni nhlikanhi,’ naswona va kuma ntsako lowukulu hi ku endla tano.—Mintirho 20:35; 1 Timotiya 1:11.
‘Va Huma Eka Matiko, Swivongo, Tinxaka Ni Tindzimi Hinkwato’
16. Xana ku huma ka ntshungu lowukulu “ematikweni hinkwawo” ku hetiseka njhani?
16 Ntshungu lowukulu wu huma ematikweni hinkwawo. Xikwembu a xi yi hi nghohe, naswona lunghiselelo ra nkutsulo leri endliweke hi Yesu Kreste ri kota ku va hlanganisa hinkwavo. Loko ntshungu lowukulu wu hlamuseriwa ro sungula hi Matsalwa, hi 1935, Timbhoni ta Yehovha a ti tirha ematikweni ya 115. Hi va 1990, ku lavisisa lava fanaka ni tinyimpfu ku fikelele matiko yo tlula lawa hakambirhi.—Marka 13:10.
17. I yini lexi endliwaka leswaku ku pfuniwa vanhu va ‘swivongo, tinxaka ni tindzimi hinkwato’ va hlanganisiwa ni ntshungu lowukulu?
17 Loko ti lavisisa lava nga vaka swirho swa ntshungu lowukulu, Timbhoni ta Yehovha ti ya eka mintlawa ya matiko swin’we ni mintlawa ya swivongo ni ya tinxaka ni ya tindzimi ematikweni wolawo. Leswaku ti kota ku fikelela vanhu lava, Timbhoni ti humesa tibuku ta Bibele hi tindzimi to tlula 300. Leswi swi katsa ku letela ni ku hlayisa mintlawa ya vahundzuluxeri lava fanelekaka, ku lunghiselela michini ya tikhompyuta leyi kotaka ku tirha hi tindzimi leti hinkwato, swin’we ni ku kandziyisa hi koxe. Emalembeni ya ntlhanu ntsena lama hundzeke, tindzimi ta 36, leti vulavuriwaka hi vanhu va kwalomu ka 98 000 000, ti nghenisiwile enxaxamelweni lowu. Ku engetela kwalaho, Timbhoni ti lwela ku ya eka vanhu lava hi xiviri leswaku ti va pfuna ku twisisa Rito ra Xikwembu.—Matewu 28:19, 20.
“Lava Humaka Eku Xanisekeni Lokukulu”
18. (a) Loko nhlomulo lowukulu wu sungula, i vamani lava nga ta sirheleriwa? (b) Hi kwihi ku huwelela ka ntsako lowu nga ta endliwa enkarhini wolowo?
18 Loko tintsumi ti tshika timheho ta ndzoviso leti ku vulavuriwaka ha tona eka Nhlavutelo 7:1, “malandza ya Xikwembu xa hina” lama totiweke swin’we ni ntshungu lowukulu lowu hlanganyeleke na wona evugandzerini bya ntiyiso va ta kuma nsirhelelo wa rirhandzu wa Yehovha. Hi laha muapostola Yohane a byeriweke ha kona, ntshungu lowukulu wu ta ‘huma enhlomulweni lowukulu’ tanihi vaponi. Va ta huwelela hi marito yo nkhensa ni ku dzunisa enkarhini wolowo va ku: “Ku ponisiwa ku huma eka Xikwembu xa hina lexi tshameke exiluvelweni, ni le ka Xinyimpfana!” Kutani malandza yo tshembeka hinkwawo ya Xikwembu ematilweni ma ta huwelela na wona ma ku: “Amen! Ku vongiwa, ni ku twala, ni vutlhari, ni ku nkhensiwa, ni ku dzuneka, ni matimba, ni ntamu, a swi ve eka Xikwembu xa hina hilaha ku nga heriki! Amen.”—Nhlavutelo 7:10-14.
19. Xana lava poneke va ta hisekela ku endla ntirho wihi lowu tsakisaka?
19 Wolowo ku ta va nkarhi wa ntsako hakunene! Hinkwavo lava hanyaka va ta va malandza ya Xikwembu xi ri xin’we xa ntiyiso! Ntsako lowukulu wa hinkwaswo leswi wu ta va wa ku tirhela Yehovha. Ku ta va ni ntirho lowukulu lowu nga ta endliwa—ntirho lowu tsakisaka! Misava yi ta hundzuriwa yi va Paradeyisi. Magidi ya timiliyoni ta vafi ma ta pfuxiwa kutani ma dyondzisiwa tindlela ta Yehovha. Ku ta va lunghelo leri tsakisaka hakunene ku hlanganyela eka wona!
Hi Yihi Nhlamulo Ya Wena?
◻ Xana swiendlakalo swa 1935 swi byi khumbe njhani vutirheli bya nsimu bya Timbhoni ta Yehovha?
◻ I yini lexi kombisiwaka hi mhaka ya leswaku ntshungu lowukulu wu kombisiwe wu “yimile emahlweni ka xiluvelo”?
◻ Xana ku tlangela ngati ya Xinyimpfana ku fanele ku byi khumba njhani vutomi bya hina?
◻ I yini lexi kombisiwaka hi ku ndzuluta ka vona mincindzu?
◻ Xana ntshungu lowukulu wu wu endla njhani ntirho wo kwetsima vusiku ni nhlikanhi?
[Swifaniso leswi nga eka tluka 16, 17]
Ntirho wa vona wo kwetsima wu kombisa ku phikelela, ku gingiriteka ni matshalatshala lamakulu