Ntshungu Lowukulu Wa Vagandzeri Va Ntiyiso—Wu Huma Kwihi?

“Ndzi vona ntshungu lowukulu wa vanhu; . . . a va huma ematikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato. A va yimile emahlweni ka xiluvelo ni le mahlweni ka Xinyimpfana.”—NHLAVUTELO 7:9.

 1. Ha yini swivono swa vuprofeta swa Nhlavutelo swi ri swa nkoka eka hina namuntlha?

EKUSUHI ni ku hela ka lembe-xidzana ro sungula C.E., muapostola Yohane u vone swivono swa swiendlakalo leswi hlamarisaka malunghana ni swikongomelo swa Yehovha. Swin’wana swa swilo leswi a swi voneke exivonweni swi karhi swa hetiseka sweswi. Swin’wana swi ta hetiseka ku nga ri khale. Leswi hinkwaswo swi fambisana ni ku chaputa loku hlamarisaka ka xikongomelo lexikulu xa Yehovha xo kwetsimisa vito ra yena emahlweni ka swivumbiwa hinkwaswo. (Ezekiyele 38:23; Nhlavutelo 4:11; 5:13) Tlhandla-kambirhi, swi katsa ku langutela ka vutomi ka un’wana ni un’wana wa hina. Hi ndlela yihi?

 2. (a) Muapostola Yohane u vone yini exivonweni xakwe xa vumune? (b) Hi swihi swivutiso leswi hi nga ta swi kambisisa malunghana ni xivono lexi?

² Exivonweni xa vumune xa leswi landzelanaka swa Nhlavutelo, Yohane u vone tintsumi ti sivela timheho ta ndzoviso ku fikela loko “malandza ya Xikwembu xa hina” ma funghiwile emimombyeni ya wona. Kutani u vone xiendlakalo lexi nyanyulaka swinene—“ntshungu lowukulu wa vanhu; [lowu] a ku nga ri na un’we la kotaka ku va hlaya. A va huma ematikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato,” wu hlanganile wu gandzela Yehovha ni ku dzunisa N’wana wa yena. Yohane u byeriwe leswaku lava a ku ri vanhu lava a va ta huma enhlomulweni lowukulu. (Nhlavutelo 7:1-17) Xana i vamani lava hlamuseriwaka tanihi “malandza ya Xikwembu xa hina”? Naswona i vamani lava nga ta vumba “ntshungu lowukulu” wa lava nga ta pona nhlomulo? Xana u ta va un’wana wa vona?

“Malandza Ya Xikwembu Xa Hina” I Vamani?

 3. (a) Eka Yohane 10:1-18, Yesu u byi hlamusele njhani vuxaka byakwe ni valandzeri va yena? (b) Xana Yesu u endle leswaku tinyimpfu takwe ti kuma yini hi rifu rakwe ra gandzelo?

³ Kwalomu ka tin’hweti ta mune emahlweni ka rifu rakwe, Yesu u tivitane “murisi lonene” naswona valandzeri vakwe u va vitane “tinyimpfu” leti a a ta ti fela. U vulavule hi tinyimpfu leti kumiweke hi yena eka ntlhambi wa tinyimpfu wo fanekisela kutani endzhaku ka sweswo a ti hlayisa hi laha ku hlawulekeke. (Yohane 10:1-18)a Hi rirhandzu, Yesu u nyiketele moya-xiviri wakwe hikwalaho ka tinyimpfu, a nyikela ntsengo wa nkutsulo lowu a wu laveka leswaku ti ntshunxiwa exidyohweni ni rifu.

 4. I vamani lava rhangelaka va hlengeletiwa tanihi tinyimpfu hi ku ya hi leswi Yesu a swi vuleke laha?

⁴ Hambi swi ri tano, a nga si swi endla sweswo Yesu tanihi Murisi Lonene u tihlengeletele vadyondzisiwa. Vo sungula va tisiwe eka yena hi Yohane Mukhuvuri, “mulanguteri wa nyangwa” exifanisweni xa Yesu. Yesu a a lava vanhu lava a va ta amukela vutihlamuleri bya ku va xiphemu xa ‘mbewu ya Abrahama’ leyi katsaka vanhu vo tala. (Genesa 22:18; Vagalatiya 3:16, 29) Etimbilwini ta vona u hlakulele ku tlangela Mfumo wa matilo, naswona u va tiyisekise leswaku u ta va lunghiselela ndhawu endlwini ya Tata wakwe wa le tilweni. (Matewu 13:44-46; Yohane 14:2, 3) Hi laha ku faneleke u te: “Ku sukela enkarhini wa Yohane Mukhuvuri ku fikela enkarhini wa sweswi, ku ngheniwa eMfun’weni wa matilo hi ku tirhisa matimba, kutani va matimba hi vona lava titekelaka wona.” (Matewu 11:12) Lava va n’wi landzeleke leswaku va kuma pakani yoleyo va ve entlhambini lowu Yesu a vulavuleke ha wona.

 5. (a) “Malandza ya Xikwembu xa hina” lawa ku vulavuriwaka ha wona eka Nhlavutelo 7:3-8 i vamani? (b) I yini lexi kombisaka leswaku van’wana vo tala va ta hlanganyela ni Vaisrayele va moya evugandzerini?

⁵ Eka Nhlavutelo 7:3-8, lava yaka emahlweni hi laha ku humelelaka eka pakani yoleyo ya le tilweni va tlhele va vuriwa “malandza ya Xikwembu xa hina.” (Vona 1 Petro 2:9, 16.) Xana lava 144 000 lava boxiwaka i Vayuda va ntumbuluko ntsena? Xana lava nga entlhambini wo fanekisela wa xifaniso xa Yesu i Vayuda ntsena? Nikatsongo; i swirho swa Israyele wa Xikwembu wa moya, hinkwavo va hlanganyela na Kreste eka mbewu ya moya ya Abrahama. (Vagalatiya 3:28, 29; 6:16; Nhlavutelo 14:1, 3) Kavula, a wu ta fika nkarhi lowu nhlayo leyi vekiweke a yi ta hetiseka ha wona. Kutani a ku ta humelela yini? Hi laha Bibele yi vhumbheke ha kona, van’wana—ku nga ntshungu lowukulu wa vona—a va ta hlanganyela ni Vaisrayele lava va moya va gandzela Yehovha.—Zakariya 8:23.

“Tinyimpfu Tin’wana”—Xana I Vakreste Va Vamatiko?

 6. Xana Yohane 10:16 yi kombetela eka xiendlakalo xihi?

⁶ Endzhaku ko vulavula hi ntlhambi wun’we wa tinyimpfu eka Yohane 10:7-15, Yesu u katse ni ntlawa wun’wana, a ku: “Ndzi ni tinyimpfu tin’wana leti nga riki ta tshanga leri; na tona ndzi fanele ku ti vuyisa; ti ta yingisa rito ra mina, kutani ti ta endla ntlhambi wun’we, ti va ni murisi un’we.” (Yohane 10:16) “Tinyimpfu tin’wana” i vamani?

 7, 8. (a) Ha yini mianakanyo ya leswaku tinyimpfu tin’wana i Vakreste va Vamatiko yi hoxile? (b) Hi tihi tinhla ta xikongomelo xa Xikwembu hi misava leti faneleke ti khumba ku twisisa ka hina lava nga tinyimpfu tin’wana?

⁷ Vahlamuseri va Vujagana hakanyingi va swi teka onge tinyimpfu leti tin’wana i Vakreste Vamatiko ni leswaku lava nga entlhambini wa tinyimpfu lava ku vulavuriweke ha vona eku sunguleni i Vayuda, lava a va ri ehansi ka ntwanano wa Nawu, ni leswaku mintlawa leyi hayimbirhi yi ya etilweni. Kambe Yesu u velekiwe a ri Muyuda naswona u tswaleriwe ehansi ka ntwanano wa Nawu. (Vagalatiya 4:4) Ku tlula kwalaho, lava langutaka tinyimpfu tin’wana tanihi Vakreste va Vamatiko lava nga ta nyikiwa vutomi bya le tilweni va tsandzeka ku xiya mhaka ya nkoka ya xikongomelo xa Xikwembu. Loko Yehovha a vumba vanhu vo sungula a va veka entangeni wa Edeni, u swi veke erivaleni leswaku xikongomelo a ku ri leswaku misava yi akiwa hi vanhu, leswaku hinkwayo ka yona yi va paradeyisi, ni leswaku vanhu lava yi hlayisaka va tiphina hi vutomi lebyi nga heriki—loko ntsena va xixima ni ku yingisa Muvumbi wa vona.—Genesa 1:26-28; 2:15-17; Esaya 45:18.

⁸ Loko Adamu a dyoha, xikongomelo xa Yehovha a xi herisiwanga. Xikwembu hi rirhandzu xi endle lunghiselelo ra vatukulu va Adamu leswaku va kota ku tsakela leswi Adamu a tsandzekeke ku swi tlangela. Yehovha u vhumbhe leswaku a a ta pfuxa mukutsuri, mbewu, loyi matiko hinkwawo a ma ta kuma mikateko ha yena. (Genesa 3:15; 22:18) Xitshembiso xexo a xi nga vuli swona leswaku vanhu hinkwavo lavanene a va ta yisiwa etilweni. Yesu u dyondzise valandzeri vakwe ku khongela va ku: “A ku te ku fuma ka wena; ku rhandza ka wena a ku endliwe misaveni, tanihi loko ku endliwa tilweni.” (Xiitaliki i xerhu.) (Matewu 6:9, 10) Emahlweninyana ka ku va a vule xifaniso lexi tsariweke eka Yohane 10:1-16, Yesu a a byele vadyondzisiwa vakwe leswaku Tata wakwe wa le tilweni u tsakele ku nyika “ntlhambinyana” Mfumo wa le tilweni. (Luka 12:32, 33) Kutani loko hi hlaya xifaniso xa Yesu laha a tivulaka Murisi Lonene loyi a nyikelaka moya-xiviri wakwe hikwalaho ka tinyimpfu ta yena, ku nga va xihoxo loko hi honisa vunyingi lebyi Yesu a byi tisaka ehansi ka nkhathalelo wakwe wa rirhandzu, lava vaka vafumiwa va laha misaveni va Mfumo wakwe wa le tilweni.—Yohane 3:16.

 9. Le ndzhaku hi 1884, xana Swichudeni swa Bibele a swi wu twisisa njhani mfungho wa tinyimpfu tin’wana?

⁹ Le ndzhaku hi 1884, Watch Tower yi hlamusele tinyimpfu tin’wana tanihi vanhu lava a va ta nyikiwa lunghelo ro hanya emisaveni leyi ehansi ka swiyimo leswi a swi ta hetisisa xikongomelo xa Xikwembu xo sungula. Swichudeni sweswo swa Bibele swo sungula swi xiye leswaku van’wana va tinyimpfu tin’wana a ku ta va vanhu lava hanyeke va tlhela va fa emahlweni ka vutirheli bya Yesu bya laha misaveni. Hambi swi ri tano, a ku ri ni vuxokoxoko byin’wana lebyi a va nga byi twisisi kahle. Hi xikombiso, a va anakanya leswaku ku hlengeletiwa ka tinyimpfu tin’wana a ku ta endleka endzhaku ka loko vatotiwa hinkwavo va amukele hakelo ya vona ya le tilweni. Naswona, a va nga swi lemuki kahle leswaku tinyimpfu tin’wana a ku nga ri Vakreste va Vamatiko ntsena. Lunghelo ra ku va wa tinyimpfu tin’wana ri nga kumiwa hi Vayuda ni Vamatiko, hi vanhu va matiko ni tinxaka hinkwato.—Ringanisa Mintirho 10:34, 35.

10. Leswaku hi va vanhu lava Yesu a va tekaka tanihi tinyimpfu tin’wana ta yena, hi fanele hi va njhani?

¹⁰ Leswaku va kota ku faneriwa hi nhlamuselo leyi nyikeriweke hi Yesu, tinyimpfu tin’wana ku fanele ku va vanhu lava tekaka Yesu Kreste tanihi Murisi Lonene, ku nga khathariseki leswaku i va tiko kumbe rixaka rihi. Xana sweswo swi hlanganisa yini? Va fanele va kombisa vunene ni ku tiyimisela ku kongomisiwa, ku nga timfanelo leti nga swihlawulekisi swa nyimpfu. (Pisalema 37:11) Ku fana ni ntlhambinyana, va fanele va “tiva rito [ra murisi lonene]” naswona va nga pfumeli ku kongomisiwa hi van’wana lava va nga lavaka ku va kucetela. (Yohane 10:4; 2 Yohane 9, 10) Va fanele va twisisa nkoka wa leswi Yesu a swi endleke hi ku nyikela moya-xiviri wa yena hikwalaho ka tinyimpfu ni ku kombisa ripfumelo leri heleleke elunghiselelweni rero. (Mintirho 4:12) Va fanele va “yingisa” rito ra Murisi Lonene loko a va byela leswaku va endlela Yehovha ntsena ntirho wo kwetsima, va hambeta va lava Mfumo ku sungula, va tshama va nga ri va misava, ni ku kombisa rirhandzu ra ku tinyiketelela van’wana. (Matewu 4:10; 6:31-33; Yohane 15:12, 13, 19) Xana u faneriwa hi nhlamuselo yoleyo ya lava Yesu a va tekaka tanihi tinyimpfu tin’wana ta yena? Xana wa swi rhandza? Mawaku vuxaka bya risima swonghasi lebyi byi nga kumiwaka hi lava vaka tinyimpfu tin’wana ta Yesu hakunene!

Ku Xixima Vulawuri Bya Mfumo

11. (a) Exikombisweni xa vukona byakwe, Yesu u vule yini hi tinyimpfu ni timbuti? (b) Vamakwavo lava Yesu a vulavulaka ha vona i vamani?

¹¹ Endzhaku ka tin’hweti ti nga ri tingani a nyike xifaniso lexi, Yesu u tlhelele eYerusalema. Loko a tshamile eNtshaveni ya Mitlhwari leyi nga le henhla ka xivandla xa tempele, u rungulele vadyondzisiwa vakwe vuxokoxoko bya ‘xikombiso xa vukona byakwe ni ku hela ka mafambiselo ya swilo.’ (Matewu 24:3, ringanisa NW.) U tlhele a vulavula hi ku hlengeletiwa ka tinyimpfu. Swin’wana leswi a swi vuleke hi leswi: “Siku N’wana-wa-Munhu a taka hi ku kwetsima ka yena, ni tintsumi hinkwato ti ri na yena, ú ta tshamisa exiluvelweni xa yena xo kwetsima. Kutani vanhu va matiko hinkwawo va ta hlengeletiwa emahlweni ka yena; ú ta hlawula van’wana a siya van’wana, kukotisa murisi loko a hlawula tinyimpfu exikarhi ka timbuti. U ta yisa tinyimpfu evokweni ra yena ra xinene, timbuti tona eka lera ximatsi.” Eka xifaniso lexi, Yesu u kombise leswaku lava taka emahlweni ka Hosi hi ndlela yoleyo va ta avanyisiwa hi ndlela leyi va hanyisaneke ha yona ni ‘vamakwavo.’ (Matewu 25:31-46) Xana vamakwavo lava i vamani? I Vakreste lava tswariweke hi moya lava hi ndlela yoleyo va nga “vana va Xikwembu.” Yesu i N’wana wa mativula wa Xikwembu. Hikwalaho, i vamakwavo va Kreste. I “malandza ya Xikwembu xa hina” lava ku vulavuriwaka ha vona eka Nhlavutelo 7:3, lava hlawuriweke exikarhi ka vanhu leswaku va hlanganyela na Kreste eMfun’weni wa le tilweni.—Varhoma 8:14-17.

12. Ha yini yi ri ya nkoka swinene ndlela leyi vanhu va hanyisanaka ha yona ni vamakwavo va Kreste?

¹² Ndlela leyi vanhu van’wana va hanyisanaka ha yona ni vadyandzhaka lava va Mfumo i ya nkoka swinene. Xana u va languta hi laha Yesu Kreste na Yehovha va va langutaka ha kona? (Matewu 24:45-47; 2 Vatesalonika 2:13) Langutelo ra munhu eka vatotiwa lava ri kombisa langutelo leri a nga na rona hi Yesu Kreste hi byakwe ni Tata wakwe, Mufumi wa Vuako Hinkwabyo.—Matewu 10:40; 25:34-46.

13. Xana Swichudeni swa Bibele hi 1884 swi xi twisise ku fikela kwihi xifaniso xa tinyimpfu ni timbuti?

¹³ Enkandziyisweni wa yona wa August 1884, Watch Tower yi swi kombise kahle leswaku “tinyimpfu” exifanisweni lexi i vanhu lava nga ni ntshembo wa vutomi lebyi hetisekeke emisaveni. Nakambe ku kombisiwe leswaku xifaniso lexi xi fanele xi tirha enkarhini lowu Kreste a fumaka exiluvelweni xakwe lexi kwetsimaka xa le tilweni. Kambe, enkarhini wolowo a swi nga twisisiwi kahle leswaku ntirho wo avanyisa lowu hlamuseriweke a wu ta sungula rini kumbe a wu ta teka nkarhi wo fikela kwihi.

14. Xana nkulumo ya ntsombano hi 1923 yi swi pfune njhani Swichudeni swa Bibele leswaku swi twisisa nkarhi wa ku hetiseka ka xifaniso xa Yesu xa vuprofeta?

¹⁴ Hambi swi ri tano, hi 1923, enkulumeni ya le ntsombanweni, J. F. Rutherford, muungameri wa nkarhi wolowo wa Sosayiti ya Watch Tower, u hlamusele nkarhi wa ku hetiseka ka xifaniso xa tinyimpfu ni timbuti. Ha yini? Hi ku komisa, hi leswi xifaniso lexi xi kombisaka leswaku vamakwavo va Hosi—van’wana va vona—va ta va va ha ri emisaveni. Exikarhi ka vanhu, valandzeri vakwe lava tswariweke hi moya hi vona ntsena lava va nga vitaniwaka vamakwavo va yena. (Vaheveru 2:10-12) Lava a va nge vi emisaveni eka Gidi ra Malembe hinkwaro, va nyika vanhu nkarhi wa ku va endlela leswinene hi tindlela leti Yesu a ti hlamuseleke.—Nhlavutelo 20:6.

15. (a) Hi swihi swiendlakalo leswi pfuneke Swichudeni swa Bibele leswaku swi kota ku ti vona kahle tinyimpfu ta xifaniso xa Yesu? (b) Xana tinyimpfu ti swi kombise njhani leswaku ti tlangela Mfumo?

¹⁵ Enkulumeni yoleyo hi 1923, ku endliwe matshalatshala yo kombisa lava faneriwaka hi nhlamuselo ya Hosi ya tinyimpfu ni timbuti, kambe a ku fanele ku twisisiwa timhaka tin’wana ku nga kona nhlamuselo leyi heleleke ya xifaniso yi nga ta va erivaleni. Emalembeni lama landzeleke, Yehovha u hambete a paluxa vuxokoxoko lebyi bya nkoka eka malandza yakwe. Leswi swi katse ku twisisa kahle, hi 1927, leswaku “nandza la tshembekaka, wo tlhariha” i huvo hinkwayo ya Vakreste lava totiweke hi moya emisaveni; ni ku twisisa, hi 1932, xilaveko xo tihlanganisa ni malandza lama totiweke ya Yehovha handle ko chava, hi laha Yonadabu a endleke ha kona eka Yehu. (Matewu 24:45; 2 Tihosi 10:15) Enkarhini wolowo, hi ku ya hi Nhlavutelo 22:17, vanhu lava vo fana ni tinyimpfu va khutaziwe swinene leswaku va hlanganyela eku twariseni ka rungula ra Mfumo eka van’wana. Ku tlangela ka vona Mfumo wa Vumesiya a ku ta va susumetela ku kombisa musa wa vumunhu eka vatotiwa va Hosi ni ku tlhela va nyiketela vutomi bya vona eka Yehovha ha Kreste ni ku hlanganyela swinene ni vatotiwa va yena, va hlanganyela hi ku hiseka entirhweni lowu va wu endlaka. Xana wena wa swi endla sweswo? Eka lava swi endlaka, Hosi yi ta ku: “Tanani n’wina lava katekisiweke hi Tata wa mina, amukelani Mfumo lowu nga lunghiseriwa n’wina hi mpfhuka misava yi tumbuluka.” Va ta va va ri ni ku langutela lokukulu ka vutomi lebyi nga heriki, va ri lava hetisekeke, exivandleni xa la misaveni xa Mfumo.—Matewu 25:34, 46.

“Ntshungu Lowukulu”—Wu Ya Kwihi?

16. (a) Hi kwihi ku twisisa loku hoxeke ka Swichudeni swa Bibele malunghana ni nhlamuselo ya vunyingi lebyi kumbe ntshungu lowukulu, wa Nhlavutelo 7:9? (b) Xana mavonelo ya vona ma lulamisiwe rini naswona hi xisekelo xihi?

¹⁶ Ku ringana nkarhinyana malandza ya Yehovha a ma pfumela leswaku vunyingi lebyikulu (kumbe, ntshungu lowukulu) bya le ka Nhlavutelo 7:9, 10 a byi hambanile ni tinyimpfu tin’wana ta le ka Yohane 10:16 swin’we ni tinyimpfu ta le ka Matewu 25:33. Hikwalaho ka leswi Bibele yi vulaka leswaku “va yimile emahlweni ka xiluvelo,” a ku ehleketiwa leswaku va ta va va ri etilweni, hayi eswiluvelweni, va fuma tanihi vadyandzhaka swin’we na Kreste, kambe va ri exivandleni xa le hansi emahlweni ka xiluvelo. A va tekiwa tanihi Vakreste lava nga tshembekangiki ngopfu, lava nga wu kombisangiki moya wa ku tinyiketela. Hi 1935 mavonelo wolawo ma lulamisiwile.b Ku kambisisiwa ka Nhlavutelo 7:9 hi ku landza tindzimana to tanihi Matewu 25:31, 32 ku swi veke erivaleni leswaku vanhu lava nga laha misaveni va nga ha va “emahlweni ka xiluvelo.” Nakambe ku kombisiwe leswaku Xikwembu a xi na mimpimanyeto yimbirhi ya ku tshembeka. Hinkwavo lava xi nga ta va amukela va fanele ku hlayisa vutshembeki eka xona.—Matewu 22:37, 38; Luka 16:10.

17, 18. (a) Ku sukela hi 1935, i yini lexi vangeke ku andza lokukulu ka nhlayo ya lava languteleke vutomi lebyi nga heriki emisaveni? (b) Xana ntshungu lowukulu wu hlanganyela entirhweni wihi wa nkoka?

¹⁷ Ku hundze malembe yo tala vanhu va Yehovha va ri karhi va vulavula hi switshembiso swa Xikwembu malunghana ni misava. Hikwalaho ka leswi a va langutele leswaku swi humelela le ndzhaku hi va 1920, va twarise leswaku “Timiliyoni Leti Hanyaka Sweswi Ti Nga Ka Ti Nga Fi.” Enkarhini wolowo lava a va amukele malunghiselelo ya Xikwembu ya vutomi a va nga fiki eka timiliyoni. Vunyingi lebyi amukeleke ntiyiso, moya lowo kwetsima wu byi nyike ntshembo wa vutomi bya le tilweni. Hambi swi ri tano, ngopfu-ngopfu endzhaku ka 1935 ku ve ni ku hundzuka lokukulu. A ku nga ri swona leswaku Xihondzo xo Rindza a xi honise ntshembo wa vutomi lebyi nga heriki emisaveni. Eka makume ya malembe, malandza ya Yehovha ma vulavule ha wona naswona a ma lava lava faneriwaka hi nhlamuselo leyi ya Bibele. Kambe, hi nkarhi wa Yehovha lowu faneleke u endle leswaku va humela erivaleni.

¹⁸ Tirhekhodo leti nga kona ti kombisa leswaku emalembeni yo tala vunyingi bya lava a va ta eXitsundzuxweni a byi dya swifanekiselo. Kambe ku nga si hela malembe ya 25 endzhaku ka 1935, nhlayo ya lava vaka kona eXitsundzuxweni xa rifu ra Kreste lembe na lembe, yi yi tlule hi madzana ya lava a va dya. Lavan’wana a ku ri vamani? A ku ri lava a va ta va swirho swa ntshungu lowukulu. Kunene, a ku fike nkarhi wa Yehovha wa ku va hlengeleta ni ku va lunghiselela ku pona nhlomulo lowukulu lowu tshineleke. Hi laha swi vhumbhiweke ha kona, va huma “ematikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato.” (Nhlavutelo 7:9) Va hlanganyela hi ku hiseka entirhweni lowu Yesu a wu vhumbheke loko a ku: “Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.”—Matewu 24:14.

[Tinhlamuselo ta le hansi]

Hi Yihi Nhlamulo Ya Wena?

◻ Ha yini xivono xa Nhlavutelo ndzima 7 xi ri xa nkoka swinene?

◻ Ha yini tinyimpfu tin’wana ta le ka Yohane 10:16 ku nga ri Vakreste va Vamatiko ntsena?

◻ Lava faneriwaka hi nhlamuselo ya Bibele ya tinyimpfu tin’wana va fanele va va njhani?

◻ Xifaniso xa tinyimpfu ni timbuti xi ku kombisa njhani ku xixima vulawuri bya Mfumo?

◻ I yini lexi kombisaka nkarhi wa ku sungula ka Yehovha ku hlengeleta ntshungu lowukulu wa Nhlavutelo 7:9?