Va Endle Ku Rhandza Ka Yehovha

Xikombiso Xa Ku Tinyiketa Ni Ku Tshembeka

EKA murimi lontsongo la vuriwaka Elixa, siku leri sunguleke tanihi leri tolovelekeke ra ntirho wa ku rima ri hundzuke siku ra nkoka swinene evuton’wini bya yena. Loko a ri karhi a tirha emasin’wini, Elixa u endzeriwe hi Eliya muprofeta wa le Israyele la nga ni ndhuma, a nga swi rindzelanga. ‘Ha yini a ndzi endzela?’ Elixa a nga ha va a tivutisile. A nga bohekanga ku rindza nkarhi wo leha leswaku a kuma nhlamulo. Eliya u lahlele jazi ra yena ehenhla ka Elixa, a kombisa leswaku siku rin’wana Elixa u ta va mutlhandlami wa yena. Elixa a nga xi tekelanga ehansi xirhambo lexi. Hi nkarhi wolowo, u siye nsimu ya yena leswaku a ya va nandza wa Eliya.—1 Tihosi 19:19-21.

Endzhaku ka malembe ya tsevu, ku fike nkarhi wa leswaku Eliya a famba. Mhaka ya ku famba ka yena yi vuriwe “yin’wana ya timhaka leti tsakisaka swinene” eMatsalweni ya Xiheveru.

Eliya A Tilunghisela Ku Famba

Eliya u navele ku endzela eBetele, Yeriko na Yordani ro hetelela. A ta famba tikhilomitara to tala, tin’wana ta tona etindhawini ta tintshava leti nga fambekiki hi ku olova. Eka mpfhuka wun’wana ni wun’wana wa riendzo, Eliya u khutaze Elixa ku sala endhawini yoleyo. Kambe Elixa u sindzise ku famba ni n’wini wa yena ku fika emakumu.—2 Tihosi 2:1, 2, 4, 6.

Loko a ri eBetele ni le Yeriko, “v̌ana v̌a v̌aprofeta” va ye eka Elixa.a Va n’wi vutisile va ku: “Šana wa ŝi tiv̌a leŝaku namuntlha Yehova o ta tlakusa hosi ya wena e henhla?” U hlamurile a ku: “Nḍa ŝi tiv̌a na mina: miyelani.”—2 Tihosi 2:3, 5.

Eliya na Elixa se va ya eNambyeni wa Yordani. Loko va fikile eYordani, Eliya u endle hlori vana va vaprofeta va kwalomu ka 50 va ri karhi va hlalerile va ri ekule. “Elia a teka džasi ra yena, a ri peṭa, a ba ha rona mati ya nambu, kutani ma av̌ana hala ni hala; v̌a pela ha v̌ambiri laha ku omeke.”—2 Tihosi 2:8.

Loko va tsemakanyile, Eliya u byele Elixa a ku: “Kombela leši u ši ranḍaka ku endleriwa hi mina, nḍi nga si tlakuriwa, nḍi hambana na wena.” Elixa u kombele ‘swiphemu swimbirhi’ swa moya wa Eliya—hi leswaku, xiphemu lexi andzisiweke kambirhi lexi hi ntolovelo a xi ta fanela n’wana wa mufana wa mativula. Hakunene, Elixa u xixime Eliya tanihi laha n’wana wa mufana wa mativula a a ta xixima tata wa yena hakona. Ku tlula kwalaho, u totiwe ku va mutlhandlami wa Eliya tanihi muprofeta wa Yehovha eIsrayele. Kutani xikombelo xa yena a xi nga ri xa vutianakanyi kumbe lexi nga fanelangiki. Hambiswiritano, hi ku tiva leswaku i Yehovha ntsena la nga hlamulaka xikombelo lexi, Eliya u hlamule hi ku titsongahata a ku: “U kombele šilo le’šikulu!” Kutani u engeterile a ku: “Kambe loko u nḍi v̌ona nḍi tlhandlukisiwa, u ta endleriwa ŝeŝo; kambe loko u nga nḍi v̌oni, ŝi nga ka ŝi nga v̌i tano.”—2 Tihosi 2:9, 10; Deteronoma 21:17.

A swi kanakanisi leswaku Elixa a tiyimisele swinene ku tlula rini na rini ku va ekusuhi swinene ni n’wini wa yena. Kutani ku humelela “golonyi ya nḍilo, ni mahantši ya nḍilo.” Eliya u tekeriwe exidzedzeni, kona emahlweni ka mahlo ya Elixa la hlamaleke—a rhurhiseriwa endhawini yin’wana hi singita.b Elixa u teke jazi ra Eliya ivi a tlhelela eribuweni ra Nambu wa Yordani. U be mati a ku: “Yehova, Šikwembu ša Elia o kwihi šana?” Mati ma avanile, ma nyikela vumbhoni lebyi nga erivaleni bya leswaku Elixa u seketeriwa hi Xikwembu tanihi mutlhandlami wa Eliya.—2 Tihosi 2:11-14.

Tidyondzo Eka Hina

Loko a rhamberiwe ntirho wo hlawuleka na Eliya, Elixa u siye nsimu ya yena hi ku hatlisa leswaku a ya tirhela muprofeta wa le Israyele la nga ni ndhuma. Entiyisweni, yin’wana ya mintirho ya yena a yi nga nyawuri, hikuva u tiviwe tanihi loyi a “tšhela mati e mav̌okweni ya Elia.”c (2 Tihosi 3:11) Hambiswiritano, Elixa u langute ntirho wa yena wu ri lunghelo, naswona u tirhele Eliya hi ku tshembeka.

Yo tala ya malandza ya Xikwembu namuntlha ya kombisa moya lowu fanaka wa ku tinyiketa. Van’wana va siye “masimu” ya vona, mintirho ya vona yo tihanyisa, leswaku va ya chumayela mahungu lamanene etindhawini ta le kule kumbe va tirha tanihi swirho swa ndyangu wa Bethele. Van’wana va ye ematikweni mambe leswaku va ya aka miako ya Sosayiti. Vo tala va amukele leswi nga langutiwaka tanihi mintirho ya le hansi. Kambe, ku hava la tirhelaka Yehovha, la endlaka ntirho lowu nga riki wa nkoka. Yehovha u tlangela hinkwavo lava n’wi tirhelaka hi ku swi rhandza, naswona u ta katekisa moya wa vona wa ku tinyiketa.—Marka 10:29, 30.

Elixa u tirhe na Eliya ku fika emakumu. U arile ku siya muprofeta la kuleke hambi loko a nyikiwe nkarhi wolowo. Handle ko kanakana, vuxaka bya le kusuhi lebyi a a ri na byona na Eliya byi endle rirhandzu rolero ro tshembeka ri va ntsako. Namuntlha, malandza ya Xikwembu ma lwela ku tiyisa vuxaka bya wona ni Xikwembu naswona ma titshineta ekusuhi ni vapfumeri-kulobye. Xiboho xa le kusuhi xa vun’we xi ta katekisiwa, hikuva Bibele yi vula leswi hi Yehovha: “Lo’nene, u ṅwi endlela v̌unene.”—2 Samuwele 22:26.

[Tinhlamuselo ta le hansi]