Moya Wa Ku Tinyiketela Wu Tisa Mikateko

 1. Xana Davhida na Nehemiya va swi kombise njhani leswaku va ni moya wa ku tinyiketela?

¹ Loko Goliyadi a tlhontlha vuthu ra Vaisrayele, ku hava ni socha ni rin’we leri veke ni xivindzi xa ku tinyiketela ku lwa na yena. Kambe, jaha leri nga murisi, leri nga tiviki nchumu hi nyimpi hi rona ri tinyiketeleke ku lwa na yena. (1 Sam. 17:32) Loko Vayuda lava a va ri evuhlongeni va tlhelela eYerusalema ivi va tsandzeka ku pfuxa marhangu, ku hava ni un’we eka vona la koteke ku hlela ntirho wolowo handle ka mucheri wa vhinyo ya hosi ya le Peresiya, la tinyiketeleke ku ya eYerusalema a ya hlela ntirho wolowo. (Neh. 2:5) Yehovha u katekise Davhida na Nehemiya hikwalaho ka moya lowu va veke na wona.—1 Sam. 17:45, 50; Neh. 6:15, 16.

 2. Ha yini Vakreste va fanele va va ni moya wa ku tinyiketela?

² Namuntlha vanhu a va na wona moya wa ku tinyiketela. ‘Emasikwini lawa yo hetelela,’ vanhu va tshama va khomekile naswona vo tala va vona va ‘rhandza mali.’ (2 Tim. 3:1, 2) Swa olova ku va munhu a tikuma a khomeke ngopfu hi swilo swa yena n’wini kutani a tsandzeka ku pfuna van’wana loko swi laveka. Hambiswiritano, tanihi Vakreste, hi navela ku tekelela Yesu, loyi a tiyimiseleke ku pfuna van’wana. (Yoh. 5:5-9; 13:12-15; 1 Pet. 2:21) Xana hi nga swi kombisa hi ndlela yihi leswaku hi ni moya wa ku tinyiketela naswona hi yihi mikateko leyi hi nga ta yi kuma?

 3. Xana moya wa ku tinyiketela wu pfuna njhani eminhlanganweni ya vandlha?

³ Ku Pfuna Vamakwerhu: Hi nga nyika van’wana ‘nyiko ya moya’ hi ku tinyiketela ku hlamula eminhlanganweni loko ku ri ni nkulumo ya swivutiso ni tinhlamulo. (Rhom. 1:11) Ku hlamula swi dzunisa Yehovha, swi byala ntiyiso wu dzika emianakanyweni ni le mbilwini ya hina naswona swi endla leswaku hi ya hi tiphina hi minhlangano. (Ps. 26:12) Nakambe, hi nga tinyiketela ku nyikela tinkulumo eXikolweni xa Vutirheli bya le Tilweni loko vini va tona va nga ri kona. Leswi swi ta hi pfuna leswaku hi antswisa vuswikoti bya hina byo dyondzisa.

 4. Hi tihi tindlela tin’wana leti hi nga vonakaka ha tona leswaku hi ni moya wa ku tinyiketela?

⁴ Vamakwerhu va xinuna va nga kombisa moya wa ku tinyiketela hi ku tiendla va faneleka ku byarhisiwa vutihlamuleri evandlheni. (Esa. 32:2; 1 Tim. 3:1) Hinkwerhu hi nga ha hoxa xandla leswaku swilo swi famba kahle etinhlengeletanweni ni le mintsombanweni, hi ku va hi tinyiketela ku tirha eka tindzawulo to hambana-hambana. Loko hi tinyiketela ku tirha ni mulanguteri wa xifundzha ensin’wini kumbe hi n’wi rhamba a ta dya na hina, ha ‘khutazeka.’ (Rhom. 1:12) Loko hi tinyiketela ku pfuna vana lava nga riki na vatatana, tinoni, lava vabyaka ni lava lamaleke, hi kuma ntsako naswona hi va lava amukelekaka eka Yehovha.—Swiv. 19:17; Mint. 20:35.

 5. Hi swihi swilo leswi lavaka moya wa ku tinyiketela eHolweni ya Mfumo?

⁵ Ndlela yin’wana leyi hi nga nyikelaka hi nkarhi wa hina ni matimba ya hina ha yona i ku va hi pfuna ku basisa Holo ya Mfumo ni ku yi lunghisa. Ku engetela kwalaho, xilaveko xa Tiholo ta Mfumo letintshwa ni xa vatirhi va ku tirhandzela xi ya xi va xikulu, hikwalaho ka vanhu vo tala lava hundzukelaka entiyisweni. Mpatswa wun’wana wu tinyiketele ku pfuna Komiti yo Aka ya Xifundzha ya le mugangeni lowu wu tshamaka eka wona hambileswi a wu nga tivi nchumu hi ku aka. Hi ku famba ka nkarhi, wu leteriwile kutani sweswi wu kota ku pfuna hi ku aka hi switina. Nsati wa kona u ri: “Ku tirha swin’we ni vamakwerhu swi endle leswaku hi va ni vuxaka lebyikulu na vona. Loko hi heta ntirho hi va hi karhele kambe hi va hi phyuphyile emoyeni.”

 6. Ha yini ntirho wo chumayela wu ri ntirho wa nkoka lowu hi nga tinyiketelaka ku wu endla?

⁶ Hi Ku Chumayela: Ntirho wa nkoka lowu hi nga tinyiketelaka eka wona namuntlha i ku chumayela hi Mfumo. Loko vanhu va ri karhi va pfuniwa ku twisisa ni ku tirhisa ndzayo ya Bibele, va sungula ku hanya vutomi lebyi nga ni xikongomelo naswona va kuma matimba yo hlula mikhuva yo biha. Va dyondza hi ta ntshembo wa Bibele lowu tiyisaka nhlana malunghana ni vumundzuku. Loko hi dyondzisa vanhu Bibele, hi va hi tinyiketele entirhweni lowu nga ta va vuyerisa hilaha ku nga heriki. (Yoh. 17:3; 1 Tim. 4:16) Kumbexana swiyimo swa hina swi nga hi pfumelela leswaku hi hlanganyela hi xitalo entirhweni lowu, hi ku va maphayona ya nkarhinyana kumbe ya nkarhi hinkwawo, hi ku rhurhela laha ku nga ni xilaveko lexikulu kumbe hi ku dyondza ririmi rimbe.

 7. Ha yini swi ri swa nkoka ku tinyiketela, ngopfu-ngopfu namuntlha?

⁷ Hosi Davhida u profete leswaku loko Mesiya a sungula ku fuma, vanhu va Xikwembu va ta “tinyiketela hi ku tirhandzela.” (Ps. 110:3) Leswi Yehovha a hatlisisaka ntirho wo hetelela wa ntshovelo hi tlhelo ra moya, ku ni ntirho wo tala lowu hi nga tinyiketelaka ku wu endla. (Esa. 60:22) Xana wena u vurile u ku: “Hi mina loyi! Ndzi rhume”? (Esa. 6:8) Hakunene, hi ku va ni moya wa ku tinyiketela, hi tsakisa Yehovha naswona hi ta vuyeriwa hilaha ku fuweke.