Bulo Ni Muakelani​—Xana Vanhu Hinkwavo Vo Lulama Va Ya eTilweni?

TIMBHONI TA YEHOVHA ta swi rhandza ku bula ni vaakelani va tona hi Bibele. Xana ku ni mhaka yo karhi eBibeleni leyi u tshameke u tivutisa yona? Xana ku ni leswi u lavaka ku swi tiva hi tidyondzo to karhi nileswi Timbhoni ta Yehovha ti swi pfumelaka? Loko swi ri tano, u nga kanakani ku ti vutisa loko u hlangana na tona. Ti ta swi tsakela ku ku pfuna.

Bulo leri landzelaka ri kombisa ndlela leyi Mbhoni ya Yehovha yi nga bulaka ha yona ni muakelani. Hi xikombiso, Marcus la nga Mbhoni u endzele wanuna la vuriwaka Robert.

Xana Vanhu Lava Yaka eTilweni Va Ta Endla Yini Kwale?

Marcus: Loko u anakanya hi vumundzuku, xana u ehleketa onge xiyimo xi ta antswa, xi ta nyanya kumbe xi ta tshama hilaha xi nga hakona?

Robert: Ndzi anakanya leswaku swilo swi ta antswa. Ndzi swi langutele hi mahlo-ngati ku ya etilweni leswaku ndzi ta va na Hosi.

Marcus: Wolowo i ntshembo wo tsakisa. Bibele yi vulavula ko tala malunghana ni ndlela leyi tilo ri nga ha yona ni lunghelo ro ya kona. Xana u anakanyisise swinene hileswi lava yaka etilweni va nga ta swi endla kwale?

Robert: Hi ta va ni Xikwembu naswona hi ta xi dzunisa hilaha ku nga heriki.

Marcus: Wolowo i ntshembo wo tsakisa hakunene. Lexi tsakisaka, Bibele a yi vulavuli ntsena hi malunghelo lama nga ta kumiwa hi lava yaka etilweni kambe ni vutihlamuleri bya nkoka lebyi va nga na byona.

Robert: Hi byihi vutihlamuleri bya kona?

Marcus: I vutihlamuleri lebyi hlamuseriweke eka Nhlavutelo 5:10. Ndzimana yoleyo yi ri: “[Yesu] u va endle va va mfumo ni vaprista eka Xikwembu xa hina, va ta va tihosi emisaveni.” Xana u byi xiyile vutihlamuleri lebyi lava yaka etilweni va nga ta va na byona?

Robert: Ndzimana leyi yi vula leswaku va ta va tihosi emisaveni.

Marcus: Rolero i vonelo leri tsakisaka, a swi tano?

Xana Va Ta Fuma Vamani?

Marcus: Kutani xana a wu pfumelelani na mina leswaku loko ku ri leswaku lava yaka etilweni va ta fuma tanihi tihosi, ku fanele ku va ni vanhu lava nga ta va fuma? Phela, xana i yini nkoka wa leswaku ku va ni mfumo kambe ku ri hava leswi wu nga ta fuma swona?

Robert: Ndza yi vona yinhla ya wena.

Marcus: Xivutiso lexi nga erivaleni lexi u faneleke u tivutisa xona hi lexi nge, Xana va ta fuma vamani?

Robert: Ndzi ehleketa leswaku hi ta fuma vanhu emisaveni lava ha hanyaka ni lava nga si yaka etilweni.

Marcus: Sweswo swi nga vonaka swi twisiseka—loko ku ri leswaku vanhu hinkwavo vo lulama va ya etilweni. Kambe hi leyi mhaka yin’wana yo ehleketa ha yona. Xana ku nga va leswaku vanhu van’wana—vanhu van’wana vo lulama—a va nge yi etilweni?

Robert: A ndzi si tshama ndzi twa leswaku ku ni Vakreste van’wana lava tshembaka sweswo.

Marcus: Ndzi ku vutisa xivutiso lexi hikwalaho ka leswi hi swi hlayaka eka Pisalema 37:29. Xana u nga yi hlaya ndzimana leyi?

Robert: Ina. Yi ri: “Lavo lulama va ta dya ndzhaka ya misava, va ta tshama eka yona hi masiku.”

Marcus: Ndza nkhensa. Xana wa ku xiya laha vanhu vo tala vo lulama va nga ta tshama kona?

Robert: Ndzimana leyi yi vula leswaku va ta tshama emisaveni.

Marcus: U be kona—ku nga ri swa xinkarhana ntsena. Xiya leswaku ndzimana leyi yi ri: “Va ta tshama eka yona hi masiku.”

Robert: Kumbexana sweswo swi vula leswaku minkarhi hinkwayo ku ta va ni vanhu vo lulama laha misaveni. Loko hi fa kutani hi ya etilweni, hi siviwa hi vanhu van’wana vo lulama lava tswariwaka.

Marcus: Vanhu vo tala va nga twisisa ndzimana leyi hi ndlela yoleyo. Kambe xana swi nga endleka leswaku ndzimana leyi yi vula leswi hambaneke? Xana yi nga va yi vula leswaku vanhu vo lulama va ta tshama emisaveni hilaha ku nga heriki?

Robert: A ndzi si ku twisisa kahle.

Paradeyisi Ya Laha Misaveni Ya Nkarhi Lowu Taka

Marcus: Xisweswo, xiya leswi ndzimana yin’wana ya Bibele yi swi vulaka malunghana ni vutomi bya laha misaveni enkarhini lowu taka. A hi hlaye Nhlavutelo 21:4. Malunghana ni vanhu lava nga ta hanya enkarhini lowu taka, ndzimana leyi yi ri: “[Xikwembu] xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.” Xana mhaka leyi a yi tsakisi?

Robert: Ya tsakisa. Kambe ndzi ehleketa leswaku yi vulavula hi ndlela leyi vutomi byi nga ta va byi ri ha yona etilweni.

Marcus: I ntiyiso leswaku lava yaka etilweni va ta kuma mikateko leyi fanaka. Kambe languta ndzimana leyi nakambe. Xana yi vula leswaku ku ta endleka yini hi rifu?

Robert: Yi vula leswaku “rifu a ri nge he vi kona.”

Marcus: Wa vurisa. Kutani ndza tshemba leswaku u ta pfumelelana na mina leswaku loko nchumu wo karhi wu nga ha vi kona, wu fanele wu rhanga hi ku va kona.

Robert: Swi tano.

Marcus: Kambe a ku si tshama ku va ni rifu etilweni, kumbexana ri tshame ri va kona? Hi laha misaveni ntsena laha vanhu va faka.

Robert: Ndzi ta anakanya ha yona mhaka leyi.

Marcus: Robert, wa swi vona leswaku Bibele yi dyondzisa leswaku vanhu van’wana vo lulama va ta ya etilweni kambe lavan’wana vo tala va ta hanya hilaha ku nga heriki laha misaveni. Entiyisweni, ndza tiyiseka leswaku u tshame u twa marito yo duma lama nge: “Ku katekile lavo rhula, hikuva va ta dya ndzhaka ya misava.”—Matewu 5:5, Bibele—Mahungu Lamanene.

Robert: Ina, ndzi yi twile ndzimana yoleyo yi hlayiwa minkarhi yo tala ekerekeni.

Marcus: Loko lavo lulama va dya ndzhaka ya misava, xana a swi vuli leswaku vanhu va ta va va ri karhi va tshama emisaveni? Lava nga ta tshama emisaveni va ta tiphina hi mikateko leyi profetiweke eka Nhlavutelo. Va ta vona misava ya hina yi cince hi ku helela hikuva Xikwembu xi ta herisa swilo hinkwaswo swo biha—hambi ku ri rifu.

Robert: Se ndzi sungula ku twisisa leswi u swi vulaka, kambe a ndzi tiyiseki leswaku ndzimana yin’we kumbe timbirhi ta Bibele ti nga seketela yinhla ya wena.

Marcus: U tiyisile. Entiyisweni, ku ni matsalwa yo hlaya lama vulavulaka hi ndlela leyi vutomi byi nga ta va byi ri ha yona laha misaveni enkarhini lowu taka. Xana u ni nkarhi, kumbexana ndzi nga ku komba rin’wana ra matsalwa lawa ndzi ma rhandzaka?

Robert: Ina, ndzi na timinete ti nga ri tingani.

“Lowo Homboloka A Nge He Vi Kona”

Marcus: Eku sunguleni hi hlaye ndzimana 29 ya Pisalema 37. A hi yi hlaye nakambe. Sweswi hi ta hlaya ndzimana 10 na 11. Xana u nga swi kota ku ti hlaya tindzimana teto?

Robert: Ina. Yi ri: “Hi nkarhinyana, lowo homboloka a nge he vi kona; kunene u ta languta endhawini yakwe, u ta va a nga ri kona. Kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.”

Marcus: Ndza nkhensa. Loko u languta ndzimana 11, hi kwihi laha “lavo rhula” kumbe vanhu vo lulama va nga ta tshama kona?

Robert: Yi vula leswaku va “ta dya ndzhaka ya misava.” Hambiswiritano, ndzi vona onge ndzimana leyi yi tirha enkarhini wa sweswi; phela, vanhu vo lulama va tshama emisaveni namuntlha.

Marcus: U tiyisile. Hambiswiritano, xiya leswaku ndzimana leyi yi tlhela yi vula leswaku vanhu vo lulama va ta tiphina hi ku “[rhula] lokukulu.” A hi voni ku rhula lokukulu emisaveni namuntlha, a swi tano?

Robert: Swi tano, a ku kona.

Marcus: Kutani xana xitshembiso lexi xi ta hetisisiwa njhani? Kumbexana ndzi nga tirhisa xifananiso lexi: Anakanya u ri ni muako lowu u hirhisaka vanhu eka wona. Vanhu van’wana lava tshamaka eka wona i vanhu vo lulama—va wu khathalela muako wa vona naswona va ringeta ku va vaakelani lavanene. Wa tsaka leswi va hirheke eka wena. Kambe van’wana i vaaki vo biha; va onha nhundzu naswona va endla vutomi byi tika eka vaakelani lava tshamaka na vona. Loko vaaki lava va ala ku antswisa mahanyelo ya vona, xana a wu ta endla yini?

Robert: A ndzi ta va hlongola.

Marcus: Leswi hi swona leswi Xikwembu xi nga ta swi endla eka vanhu vo homboloka lava hi tshamaka na vona namuntlha. Nakambe languta ndzimana 10. Yi ri: “Lowo homboloka a nge he vi kona.” Hi marito man’wana Xikwembu xi ta “hlongola” vanhu lava karhataka van’wana. Kutani vanhu vo lulama va ta kota ku tiphina hi vutomi hi ku rhula emisaveni. Ndzi xiya leswaku dyondzo leyi ya leswaku vanhu vo lulama va ta tshama hilaha ku nga heriki emisaveni yi nga ha va yi ri leyi hambaneke ni leyi u dyondzisiweke yona enkarhini lowu nga hundza.

Robert: Wa vurisa, a ndzi si tshama ndzi twa dyondzo yoleyo ekerekeni ya mina.

Marcus: Hilaha u vuleke hakona eku sunguleni, a swi enelanga ku kambisisa tindzimana timbirhi ntsena eka mhaka yo karhi. Hakunene, hi fanele hi kambisisa leswi Bibele hinkwayo yi swi vulaka hi vumundzuku bya vanhu vo lulama. Kambe hi ku ya hi matsalwa lawa hi ma hlayeke namuntlha, xana u ehleketa leswaku swa koteka leswaku vanhu van’wana vo lulama va ya etilweni, loko vanhu van’wana vo tala vo lulama va ta tshama hilaha ku nga heriki laha misaveni?

Robert: A ndzi tiyiseki. Kambe ndzi fanele ndzi pfumela leswaku swi hlamuseriwa hi ndlela yoleyo eka Matsalwa lawa u ma hlayeke. Ndzi fanele ndzi ehleketisisa swinene hi mhaka leyi.

Marcus: Loko u ri karhi u kambisisa mhaka leyi hi vuenti, ku nga ha va ni swivutiso swin’wana leswi u swi ehleketaka. Hi xikombiso, ku vuriwa yini hi vanhu vo lulama lava hanyeke emahlweni ka hina? Xana hinkwavo va ye etilweni? Loko swi nga ri tano, sweswi va le kwihi?

Robert: Sweswo i swivutiso leswi tsakisaka.

Marcus: Kumbexana ndzi nga ku endlela swilo swimbirhi. Xo sungula, u nge ndzi tsala matsalwa ma nga ri mangani lama seketelaka mhaka leyi.a Xa vumbirhi, ndzi nga tsakela ku vuya kutani ndzi bula hi matsalwa wolawo endzhaku ka loko u kume nkarhi wo ma hlaya ivi u anakanya ha wona. Xana swi ta va swi lulamile?

Robert: Ina, swi lulamile. Ndza nkhensa.

[Nhlamuselo ya le hansi]