Tsakani Hikwalaho Ka Nkhuvo Wa Vukati Bya Xinyimpfana!

1, 2. (a) I nkhuvo wa vukati wa mani lowu nga ta endla leswaku ku va ni ntsako etilweni? (b) Hi ta tlhuvutsa swivutiso swihi?

MINKARHI hinkwayo swi teka nkarhi wo leha ku lunghiselela nkhuvo wa vukati. Kambe hi ta vulavula hi nkhuvo wa vukati wo hlawuleka swinene—wa hosi. Wa nga anakanya! Wu ni malembe ya kwalomu ka 2 000 wu ri karhi wu lunghiseleriwa. Ku nga ri khale muteki u ta hlanganisiwa ni mutekiwa wakwe. Endlwini ya Hosi ku ta twala vuyimbeleri lebyi tsakisaka naswona mintshungu ya le tilweni yi ta yimbelela yi ku: “Dzunisani Yah, hikuva Yehovha Xikwembu xa hina, xa Matimba Hinkwawo, se i hosi. A hi tsakeni hi tsakisisa, hi n’wi vangamisa, hikuva nkhuvo wa vukati bya Xinyimpfana wu fikile naswona nsati wa xona u tilunghisile.”—Nhlav. 19:6, 7.

² “Xinyimpfana” lexi nkhuvo wa xona wa vukati wu nga ta endla leswaku ku va ni ntsako etilweni i Yesu Kreste. (Yoh. 1:29) Xana u ambale njhani? U tekana na mani? Mutekiwa wakwe u tilunghiselele njhani nkhuvo lowu wa vukati? Nkhuvo lowu wa vukati wu ta endleka rini? Nkhuvo lowu wa vukati wu ta endla leswaku ku va ni ntsako etilweni, kambe xana lava nga ni ntshembo wo hanya hilaha ku nga heriki laha misaveni na vona va ta tsaka hikwalaho ka nkhuvo wolowo? Hi swi langutele hi mahlo-ngati ku kuma tinhlamulo ta swivutiso swoleswo, hikwalaho a hi yeni emahlweni hi tlhuvutsa Pisalema 45.

3, 4. (a) Ku vuriwa yini malunghana ni tinguvu ta nkhuvo wa vukati ta Muteki, naswona i yini lexi endlaka yi tsaka swinene? (b) I vamani “vana va tihosi” ni “nsati wa hosi” lava tsakaka swin’we ni Muteki?

³ Hlaya Pisalema 45:8, 9. Muteki, ku nga Yesu Kreste u ambale tinguvu takwe to vangama ta vuhosi ta nkhuvo wa vukati. Swa fanela leswi tinguvu takwe ti nun’hwelaka kahle ku fana ni “swinun’hweriso swo hlawuleka,” swo tanihi mira ni khasiya, ku nga swin’wana swa swilo leswi a swi tirhisiwa loko ku endliwa mafurha yo kwetsima ya ku tota lawa a ma tirhisiwa eIsrayele.—Eks. 30:23-25.

⁴ Vuyimbeleri bya le tilweni lebyi twalaka endlwini ya hosi byi endla Muteki a tsaka swinene loko nkhuvo wa yena wa vukati wu tshinela. Ni “nsati wa hosi” u tsakile, loyi a nga xiphemu xa le tilweni xa nhlengeletano ya Xikwembu lexi katsaka “vana va tihosi,” ku nga tintsumi to kwetsima. Swi tsakisa swinene ku twa marito ya le tilweni ma ku: “A hi tsakeni hi tsakisisa . . . hikuva nkhuvo wa vukati bya Xinyimpfana wu fikile.”

 5. I mani “nsati wa Xinyimpfana”?

⁵ Hlaya Pisalema 45:10, 11. Muteki se ha n’wi tiva, kambe i mani mutekiwa? I swirho swa vandlha leri rhangeriwaka hi Yesu Kreste. (Hlaya Vaefesa 5:23, 24.) Swi ta fuma na Kreste eMfun’weni wa yena wa Mesiya. (Luka 12:32) Vakreste lava lava totiweke hi moya lava 144 000 va “[hambeta] va landzela Xinyimpfana ku nga khathariseki leswaku xi ya kwihi.” (Nhlav. 14:1-4) Va va “nsati wa Xinyimpfana,” naswona va ta tshama na xona ekaya ra xona ra le tilweni.—Nhlav. 21:9; Yoh. 14:2, 3.

 6. Ha yini vatotiwa va vitaniwa “nhwanyana wa hosi” naswona ha yini va byeriwa leswaku va ‘rivala vanhu va ka vona’?

⁶ Mutekiwa loyi u vitaniwa “Wena nhwanyana” a tlhela a vitaniwa “nhwanyana wa hosi.” (Ps. 45:13) I mani “hosi” leyi? Vakreste lava totiweke va tekiwa tanihi “vana” va Yehovha. (Rhom. 8:15-17) Tanihi leswi vatotiwa va nga ta va mutekiwa wa le tilweni, va byeriwa leswi: “Rivala vanhu va wena ni yindlu ya tata wa wena [wa nyama].” Va fanele va hlayisa mianakanyo ya vona “yi ri eka swilo swa le henhla, ku nga ri eka swilo swa la misaveni.”—Kol. 3:1-4.

 7. (a) Kreste a a n’wi lunghiselela njhani mutekiwa wakwe wa le nkarhini lowu taka? (b) Mutekiwa u n’wi teka njhani Muteki wakwe wa le nkarhini lowu taka?

⁷ Ku ringana madzana yo tala ya malembe, Kreste a a ri karhi a lunghiselela mutekiwa wakwe wa le nkarhini lowu taka leswaku a lunghekela nkhuvo wa vukati wa le tilweni. Muapostola Pawulo u vule leswaku Kreste “[u rhandze] vandlha . . . kutani a tinyiketa hikwalaho ka rona, leswaku a ri kwetsimisa, a ri basisa hi ku ri hlantswa hi mati a tirhisa rito, leswaku a ta tisa vandlha emahlweni ka yena n’wini ri ri leri vangamaka, ri nga ri na xivati kumbe ku khwanyana kumbe xin’wana xa swilo swo tano, kambe leswaku ri kwetsima naswona ri nga vi na xisolo.” (Efe. 5:25-27) Pawulo u byele Vakreste lava totiweke va le Korinto wa khale a ku: “Ndzi ni mavondzo eka n’wina hi mavondzo ya vukwembu, hikuva mina hi xiviri ndzi mi vutele eka nuna un’we leswaku ndzi ta mi nyiketa mi ri nhwana la tengeke eka Kreste.” (2 Kor. 11:2) Hosi Yesu Kreste loyi a nga Muteki u tlangela “ku saseka” ka moya ka mutekiwa wakwe wa le nkarhini lowu taka. Kutani mutekiwa u n’wi teka tanihi “hosi” ya yena naswona u “nkhinsama eka [yena]” tanihi nuna wakwe wa le nkarhini lowu taka.

 8. Ha yini swi fanela leswi mutekiwa a hlamuseriwaka tanihi loyi a ‘vangamaka swinene’?

⁸ Hlaya Pisalema 45:13, 14a. Mutekiwa u tisiwa a “vangama swinene” enkhubyeni wa vukati wa hosi. Eka Nhlavutelo 21:2, mutekiwa u fanisiwa ni muti, ku nga Yerusalema Lowuntshwa, naswona u “tisasekisele nuna wa yena.” Muti lowu wa le tilweni wu ni “ku vangama ka Xikwembu” naswona wa vangama, “ku fana ni ribye ra risima ngopfu, kukotisa ribye ra yaspere leri hatimaka ku fana ni kristala yo tenga.” (Nhlav. 21:10, 11) Ku vangama ka muti wa Yerusalema Lowuntshwa ku hlamuseriwe hi ndlela yo saseka ebukwini ya Nhlavutelo. (Nhlav. 21:18-21) A swi hlamarisi leswi mupisalema a hlamuselaka mutekiwa tanihi loyi a ‘vangamaka swinene’! Phela, nkhuvo wa vukati wa hosi wu endleka etilweni.

 9. I mani “hosi” leyi mutekiwa a tisiwaka eka yona, naswona u ambale njhani?

⁹ Mutekiwa u tisiwa eka Muteki—Hosi leyi nga Mesiya. A a ri karhi a n’wi lunghiselela, ‘a n’wi basisa hi ku n’wi hlantswa hi mati a tirhisa rito.’ Wa ‘kwetsima naswona a nga na xisolo.’ (Efe. 5:26, 27) Mutekiwa wakwe na yena u fanele a ambala a fanelekela xiendlakalo lexi. Ndlela leyi a nga ambala ha yona ya xi fanelekela xiendlakalo lexi. “Swiambalo swakwe swi khavisiwe hi nsuku,” naswona “u ta tisiwa eka hosi hi nguvu leyi lukiweke.” Eka nkhuvo wa vukati bya Xinyimpfana, “u pfumeleriwe ku ambala nguvu ya ntsembyana wa risima, yo vangama, leyi baseke, hikuva nguvu ya ntsembyana wa risima yi yimela swiendlo swo lulama swa vakwetsimi.”—Nhlav. 19:8.

10. Nkhuvo wa vukati bya Xinyimpfana wu ta endleka rini?

¹⁰ Hlaya Nhlavutelo 19:7. Nkhuvo wa vukati bya Xinyimpfana wu ta endleka rini? Hambileswi ‘nsati wa xona a tilunghiseleke’ nkhuvo wa vukati, leswi vuriwaka endzhaku ka sweswo a swi hlamuseli nkhuvo wa vukati. Ku ri na sweswo, swi hlamusela xiyenge xo hetelela xa nhlomulo lowukulu. (Nhlav. 19:11-21) Xana leswi swi vula leswaku nkhuvo wa vukati wu endleka emahlweni ka ku va Hosi leyi nga Muteki yi hetisa ku hlula ka yona? Doo! Swiendlakalo leswi nga ebukwini ya Nhlavutelo a swi hlamuseriwi hi ku landzelelana ka swona. Eka Pisalema ya vu-45, nkhuvo wa hosi wu va kona endzhaku ka loko Hosi, ku nga Yesu Kreste a khame banga rakwe kutani a ‘ya hlula’ valala vakwe.—Ps. 45:3, 4.

11. Kreste u ta ku hetisa njhani ku hlula kakwe?

¹¹ Hikwalaho, hi nga gimeta hileswaku swiendlakalo sweswo swi ta endleka hi ndlela leyi: Xo sungula, ku ta lovisiwa “nghwavava leyikulu,” ku nga Babilona Lonkulu loyi a nga mfumo wa misava wa vukhongeri bya mavunwa. (Nhlav. 17:1, 5, 16, 17; 19:1, 2) Endzhaku ka sweswo, Kreste u ta lovisa mafambiselo yo homboloka ya Sathana eArmagedoni, ku nga “nyimpi ya siku lerikulu ra Xikwembu xa Matimba Hinkwawo.” (Nhlav. 16:14-16; 19:19-21) Eku heteleleni, Hosi leyi nga Nhenha yi ta hetisa ku hlula ka yona hi ku hoxa Sathana ni madimona yakwe ekheleni ro enta, laha va nga ta tsandzeka ku vavisa vanhu, onge hiloko va lo fa.—Nhlav. 20:1-3.

12, 13. (a) Nkhuvo wa vukati bya Xinyimpfana wu ta endleka rini? (b) I vamani lava nga ta tsaka etilweni hikwalaho ka nkhuvo wa vukati bya Xinyimpfana?

¹² Loko Vakreste lava totiweke va heta pfhumba ra vona ra laha misaveni hi nkarhi wa vukona bya Kreste, va pfuxeriwa ku ya hanya etilweni. Loko Babilona Lonkulu a ta va a lovisiwile, Yesu u ta hlengeleta masalela ya swirho swa ntlawa wa mutekiwa leswaku ma va na yena. (1 Tes. 4:16, 17) Hikwalaho, swirho hinkwaswo swa “mutekiwa” swi ta va swi ri etilweni emahlweni ka ku va nyimpi ya Armagedoni yi sungula. Endzhaku ka nyimpi yoleyo, nkhuvo wa vukati bya Xinyimpfana wu nga sungula. Nkhuvo wolowo wa vukati wu ta va wu tsakisa swinene. Nhlavutelo 19:9 yi ri: “Va tsaka lava rhambiweke exilalelweni xa nkhuvo wa vukati bya Xinyimpfana.” Swirho swa ntlawa wa mutekiwa swa 144 000 swi ta va swi tsakile hakunene. Hosi leyi nga Muteki na yona yi ta tsaka swinene ku va swin’we ni vanakulobye va yona lava totiweke etilweni, va ‘dya ni ku nwa hi ndlela yo fanekisela etafuleni ra yona eMfun’weni wa yona.’ (Luka 22:18, 28-30) Kambe, nkhuvo wa vukati bya Xinyimpfana a wu nge tsakeriwi hi Muteki ni mutekiwa ntsena.

¹³ Hilaha hi swi xiyeke hakona eku sunguleni, mintshungu ya le tilweni yi ta yimbelela hi vun’we yi ku: “A hi tsakeni hi tsakisisa, hi . . . vangamisa [Yehovha], hikuva nkhuvo wa vukati bya Xinyimpfana wu fikile naswona nsati wa xona u tilunghisile.” (Nhlav. 19:6, 7) Kambe ku vuriwa yini hi malandza ya Yehovha ya laha misaveni? Xana na wona ma ta hlanganyela enkhubyeni wolowo?

14. Hilaha swi boxiweke hakona eka Pisalema 45, i vamani ‘vanhwana lava nga vanakulobye’ va mutekiwa?

¹⁴ Hlaya Pisalema 45:12, 14b, 15. Muprofeta Zakariya u profete leswaku enkarhini wa makumu, vanhu lava humaka ematikweni hinkwawo va ta tsakela ku tirhela Yehovha swin’we ni masalela ya Israyele wa moya. U tsarile: “Emasikwini wolawo vavanuna va khume lava humaka eka tindzimi hinkwato ta matiko va ta khoma, ina, entiyisweni va ta khoma nguvu ya wanuna la nga Muyuda, va ku: ‘Hi ta famba na n’wina, hikuva hi swi twile leswaku Xikwembu xi na n’wina.’” (Zak. 8:23) Eka Pisalema 45:12, “vavanuna va khume” lava vo fanekisela ku vuriwa leswaku i “nhwanyana wa le Tiri” tlhelo “lava fuweke exikarhi ka vanhu.” Va ta eka masalela lama totiweke leswaku va ta ma seketela ivi masalela ma pfuna vavanuna lava va khume ku tirhela Yehovha. Ku sukela hi 1935, vanhu va timiliyoni va pfumelele masalela ku ‘va tisa eku lulameni.’ (Dan. 12:3) Vanakulobye lava vo tshembeka va Vakreste lava totiweke va basise vutomi bya vona, va va vanhwana hi tlhelo ra moya. ‘Vanhwana lava nga vanakulobye’ va mutekiwa va tinyiketele eka Yehovha naswona va tikombise va ri malandza yo tshembeka ya Hosi leyi nga Muteki.

15. ‘Vanhwana lava nga vanakulobye’ va tirhisane njhani ni lava va ntlawa wa mutekiwa lava ha riki laha misaveni?

¹⁵ Masalela ya ntlawa wa mutekiwa ma va tlangela swinene ‘vanhwana lava lava nga vanakulobye’ hikwalaho ka mpfuno wa vona wo hisekela ku chumayela “mahungu lamanene lawa ya mfumo” emisaveni hinkwayo leyi akiweke. (Mat. 24:14) A hi “moya [ntsena] ni mutekiwa va [hambetaka] va ku: ‘Tana!’” kambe ni lava swi twaka va ri: “Tana!” (Nhlav. 22:17) “Tinyimpfu tin’wana” ti twe swirho swa ntlawa lowu totiweke wa mutekiwa swi ku “Tana!” kutani na tona ti joyine mutekiwa eku vuleni leswaku “Tana!” eka vaaki va laha misaveni.—Yoh. 10:16.

16. Hi rihi lunghelo leri Yehovha a ri nyikeke tinyimpfu tin’wana?

¹⁶ Masalela ya vatotiwa ma rhandza vanakulobye va wona naswona ma tsaka leswi Yehovha, Tata wa Muteki a nyikeke tinyimpfu leti tin’wana leti nga laha misaveni lunghelo ro va joyina eku tsakeleni ka nkhuvo wa le tilweni wa vukati bya Xinyimpfana. Ku profetiwile leswaku ‘vanhwana lava lava nga vanakulobye’ “va ta tisiwa hi ku tsaka ni ku khana.” Lava tinyimpfu tin’wana, lava nga ni ntshembo wo hanya hilaha ku nga heriki laha misaveni, va ta hlanganyela eka ntsako lowu nga ta va wu ri evuakweni hinkwabyo loko nkhuvo wa vukati bya Xinyimpfana wu endleka etilweni. Swi fanerile leswi buku ya Nhlavutelo yi hlamuselaka swirho swa “ntshungu lowukulu” tanihi leswi “[yimeke] emahlweni ka xiluvelo ni le mahlweni ka Xinyimpfana.” Swi endlela Yehovha ntirho wo kwetsima exivaveni xa laha misaveni xa tempele ya yena ya moya.—Nhlav. 7:9, 15.

17, 18. Nkhuvo wa vukati bya Xinyimpfana wu ta va vuyerisa njhani lava nga ta va va ri emisaveni leyintshwa, naswona Kreste u ta va tatana eka vamani hi nkarhi wa Mfumo wakwe wa Gidi ra Malembe?

¹⁷ Hlaya Pisalema 45:16. ‘Vanhwana lava nga vanakulobye’ va ntlawa wa mutekiwa wa le tilweni wa Kreste va ta va ni xivangelo lexi engetelekeke xo tsaka loko va vona nkhuvo wa vukati wu tisa vuyelo lebyinene emisaveni leyintshwa. Hosi leyi nga Muteki yi ta pfuxa ‘vatata wa yona’ va laha misaveni eku feni ivi vona va va “vana” va yona va laha misaveni. (Yoh. 5:25-29; Hev. 11:35) Yi ta hlawula van’wana va vona yi va veka ku va “tihosana emisaveni hinkwayo.” A swi kanakanisi leswaku Kreste u ta hlawula van’wana exikarhi ka vakulu lava tshembekaka va namuntlha leswaku va rhangela emisaveni leyintshwa.—Esa. 32:1.

¹⁸ Hi nkarhi wa Mfumo wakwe wa Gidi ra Malembe, Kreste u ta tlhela a va tatana ni le ka vanhu van’wana. Entiyisweni, vaaki hinkwavo va laha misaveni lava nga ta kuma vutomi lebyi nga heriki va ta byi kuma hikwalaho ka leswi va nga ta va va kombise ripfumelo eka gandzelo ra nkutsulo ra Yesu. (Yoh. 3:16) Hikwalaho u ta va “Tatana La Nga Riki Na Makumu” wa vona.—Esa. 9:6, 7.

19, 20. Swiendlakalo swo tsakisa leswi hlamuseriweke eka Pisalema 45 swi va khumba njhani Vakreste hinkwavo va ntiyiso namuntlha?

¹⁹ Hlaya Pisalema 45:1, 17. Swiendlakalo leswi tsariweke eka Pisalema 45 swi khumba Vakreste hinkwavo. Masalela ya vatotiwa lama ha riki laha misaveni ma tsakisiwa hi ku tiva leswaku ku nga ri khale ma ta va swin’we ni vamakwavo va vona swin’we ni Muteki wa vona. Tinyimpfu tin’wana ti susumeteleka ku ya emahlweni ti titsongahata swinene eka Hosi ya tona leyi vangamaka, naswona ti tlangela lunghelo ra ku va vanakulobye va swirho leswi saleke swa mutekiwa wakwe leswi nga laha misaveni. Endzhaku ka nkhuvo wa vona wa vukati, Kreste ni vanakulobye vakwe lava a nga ta fuma na vona eMfun’weni va ta tisela vaaki va laha misaveni mikateko yo tala swinene.—Nhlav. 7:17; 21:1-4.

²⁰ Loko ha ha langutele ku hetiseka ka “mhaka leyinene ngopfu” malunghana ni Hosi leyi nga Mesiya, xana a hi susumeteleki ku ‘vula vito ra yona’? A hi ‘dzuniseni Hosi hilaha ku nga riki na makumu, hi masiku.’