Yehovha I Vutumbelo Bya Hina

“Hikuva u te: ‘Yehovha i vutumbelo bya mina,’ . . . ku hava khombo leri nga ta ku wela.”—PISALEMA 91:9, 10.

 1. Ha yini hi nga vulaka leswaku Yehovha i vuchavelo bya hina?

YEHOVHA i vuchavelo bya ntiyiso bya vanhu vakwe. Loko hi tinyiketele hi ku helela eka yena, hi nga ha va ‘hi kamanyetiwile hi tindlela hinkwato, kambe hi nga manyiwanga lerova hi nga swi koti ni ku famba; hi pfilunganyekile, kambe hi nga yi pfumali hi ku helela ndlela yo huma; hi xanisiwa, kambe hi nga siyiwi eku kayakayeni; hi tlatlalatiwa ehansi kambe hi nga lovisiwi.’ Ha yini? Hikuva Yehovha u hi nyika “matimba lama tlulaka lama tolovelekeke.” (2 Vakorinto 4:7-9) Ina, Tata wa hina wa le tilweni wa hi pfuna leswaku hi hanya hi ndlela leyi amukelekaka eka yena, naswona hi nga yingisa marito ya mupisalema: “Hikuva u te: ‘Yehovha i vutumbelo bya mina,’ La nge Henhla-henhla u n’wi endle vutshamo bya wena; ku hava khombo leri nga ta ku wela.”—Pisalema 91:9, 10.

 2. Ku nga vuriwa yini hi Pisalema 91 ni leswi yi swi tshembisaka?

² Marito wolawo ya Pisalema 91 swi nga ha endleka ma tsariwe hi Muxe. Nhloko-mhaka yi komba leswaku hi yena a tsaleke Pisalema 90, naswona Pisalema 91 yi namba yi ya emahlweni ku nga ri na nhlamuselo leyi vulaka leswaku yi tsariwe hi un’wana. Kumbexana Pisalema 91 yi yimbeleriwe hi ku hlavelelana; sweswo swi vula leswaku munhu un’we a nga ha va a sume risimu (91:1, 2), kutani khwayere yi hlavelela (91:3-8). Kumbexana endzhaku a ku twala rito ra munhu un’we (91:9a) ivi ntlawa wu hlavelela (91:9b-13). Kutani xiyimbeleri xin’wana xi nga ha va xi yimbelele marito yo gimeta (91:14-16). Ntsena xa nkoka hileswaku Pisalema 91 yi tshembisa leswaku Vakreste lava totiweke a va ta sirheleriwa hi tlhelo ra moya yi tlhela yi tiyisekisa leswaku ni vapfuneti va vona lava tinyiketeleke a va ta sirheleriwa hi tlhelo ra moya.a A hi kambisiseni pisalema leyi hi ku ya hi vonelo ra malandza wolawo hinkwawo ya Yehovha.

Ku Sirheleleka ‘eNdhawini Ya Xikwembu Ya Xihundla’

 3. (a) I yini “[ndhawu] ya le xihundleni ya La nge Henhla-henhla”? (b) Hi pfuneka njhani loko hi kuma “vutshamo endzhutini wa Lowa Matimba Hinkwawo”?

³ Mupisalema u yimbelerile a ku: “Mani na mani la tshamaka endhawini ya le xihundleni ya La nge Henhla-henhla u ta kuma vutshamo endzhutini wa Lowa Matimba Hinkwawo. Ndzi ta vula eka Yehovha ndzi ku: ‘U vutumbelo bya mina ni khokholo ra mina, Xikwembu xanga, lexi ndzi nga ta tshembela eka xona.’” (Pisalema 91:1, 2) “[Ndhawu] ya le xihundleni ya La nge Henhla-henhla” i xivandla xo fanekisela lexi hi sirheleriwaka eka xona, laha ngopfu-ngopfu ku sirheleriwaka vatotiwa, tanihi leswi Diyavulosi a yaka ehenhla ni le hansi a lwisana na vona. (Nhlavutelo 12:15-17) Loko a hi nga sirheleriwi ku fana ni vaendzi va moya lava tshamaka na Xikwembu, a a ta hi lovisa hi hela hi ku bi! Leswi hi nga ni “vutshamo endzhutini wa Lowa Matimba Hinkwawo,” hi kuma nsirhelelo wa Xikwembu. (Pisalema 15:1, 2; 121:5) A ku na vutumbelo lebyi sirheleleke kumbe khokholo leri tiyeke ku tlula Yehovha, Hosi ya hina Leyi Lawulaka.—Swivuriso 18:10.

 4. I marhengu wahi lama tirhisiwaka hi Sathana, “muphasi wa tinyenyana,” naswona hina hi ponisa ku yini eka wona?

⁴ Mupisalema u ye emahlweni a ku: “Yena [Yehovha] u ta ku kutsula exirimbaneni xa muphasi wa tinyenyana, eka ntungu lowu vangaka maxangu.” (Pisalema 91:3) Muphasi wa tinyenyana wa le nkarhini wa Israyele wa khale hakanyingi a a ti phasa hi mintlhamu kumbe swirimbana. Yin’wana ya mintlhamu leyi tirhisiwaka hi Sathana, “muphasi wa tinyenyana,” i nhlengeletano yakwe yo homboloka ni “swiendlo swa vukanganyisi.” (Vaefesa 6:11, nhlamuselo ya le hansi ya NW) Ku ni swirimbana leswi hi rhiyeriweke swona leswaku swi hi phasa hi endla swilo swo homboloka kutani hi sala hi file emoyeni. (Pisalema 142:3) Kambe leswi hi fularheleke swilo swo homboloka, ‘mimoya-xiviri ya hina yi fana ni nyenyana leyi poneke xirimbana.’ (Pisalema 124:7, 8) Ha tsaka swinene hileswi Yehovha a hi ponisaka eka “muphasi wa tinyenyana” la hombolokeke!—Matewu 6:13.

5, 6. Hi wihi “ntungu” lowu vangeke “maxangu,” kambe ha yini vanhu va Yehovha va nga pfumeli leswaku wu va nghena?

⁵ Mupisalema u vulavula hi “ntungu lowu vangaka maxangu.” Ku fana ni ntungu lowu tlulelaka, ku ni nchumu wun’wana lowu vangaka “maxangu” exikarhi ka vanhu ni le xikarhi ka lava va seketelaka vuhosi bya Yehovha. Malunghana ni nchumu wa kona, n’wamatimu Arnold Toynbee u tsarile a ku: “Ku sukela loko ku hele Nyimpi ya Vumbirhi ya Misava, vutiko byi tinyike matimba swinene ematikweni lama tifumaka . . . Vanhu va ni moya lowu hangalakaka swinene wa ku avana.”

⁶ Hi madzana ya malembe, vafumi van’wana va pfurhetele malangavi ya madzolonga lama fambisanaka ni moya wa ku avana emisaveni hinkwayo. Va tlhele va sindzisa vanhu leswaku va va xixima hi nkani ya marahani, kumbe va xixima swifaniso swo hambana-hambana. Kambe Yehovha a nga si tshama a pfumelela vanhu vakwe vo tshembeka leswaku va ngheniwa hi “ntungu” wo tano. (Daniyele 3:1, 2, 20-27; 6:7-10, 16-22) Tanihi vamakwerhu lava rhandzanaka emisaveni hinkwayo, hi tinyiketele eka Yehovha ntsena, hi namarhela vukala-tlhelo bya Matsalwa, naswona hi pfumela hi mbilu hinkwayo leswaku “eka tiko rin’wana ni rin’wana munhu loyi a [chavaka Xikwembu] a tlhela a endla ku lulama wa amukeleka eka xona.” (Mintirho 10:34, 35; Eksoda 20:4-6; Yohane 13:34, 35; 17:16; 1 Petro 5:8, 9) Hambileswi hi vonaka “maxangu” hikwalaho ka leswi hi xanisiwaka tanihi Vakreste, ha tsaka naswona hi tshama hi sirhelelekile hi tlhelo ra moya “endhawini ya le xihundleni ya La nge Henhla-henhla.”

 7. Yehovha u hi sirhelela njhani hi “timpapa takwe”?

⁷ Loko Yehovha a ri vutumbelo bya hina, hi ta kuma nchavelelo eka marito lama nge: “U ta ku sirhelela hi timpapa takwe, u ta tumbela ehansi ka timpapa takwe. Ntiyiso wakwe wu ta va xitlhangu lexikulu ni khokholo.” (Pisalema 91:4) Xikwembu xa hi sirhelela, ku fana ni xinyenyana lexi hahaka ekusuhi ni vana va xona leswaku xi va sirhelela. (Esaya 31:5) ‘Xa hi sirhelela hi timpapa ta xona.’ Xinyenyana xi funengeta vana va xona hi timpapa, xi va sirhelela eka leswi nga ha va hlaselaka. Ku fana ni mavondlo, hi sirhelelekile ehansi ka timpapa ta Yehovha to fanekisela hikuva hi tumbele enhlengeletanweni ya yena ya Vukreste bya ntiyiso.—Rhuti 2:12; Pisalema 5:1, 11.

 8. “Ntiyiso” wa Yehovha i xitlhangu lexikulu ni khokholo hi ndlela yihi?

⁸ Hi tshembela eka “ntiyiso” wakwe kumbe eka ku tshembeka kakwe. Wu fana ni xitlhangu lexikulu xa le minkarhini ya khale, lexi hakanyingi xi nga ni xivumbeko lexi fanaka ni xa rivanti naswona xi nga xikulu hilaha ku ringaneleke leswaku xi tumbeta miri hinkwawo wa munhu. (Pisalema 5:12) Ku tshemba nsirhelelo wo tano swa hi ntshunxa leswaku hi nga chavi. (Genesa 15:1; Pisalema 84:11) Ku fana ni ripfumelo ra hina, ntiyiso wa Xikwembu i xitlhangu lexikulu lexi sirhelelaka lexi sivelaka miseve leyi pfurhaka ya Sathana xi tlhela xi sivela minhlaselo ya valala. (Vaefesa 6:16) Nakambe i khokholo, xisirhelelo lexi tiyeke lexi hi yimeke endzhaku ka xona hi nga chavi nchumu.

‘A Hi Nge Chavi’

 9. Ha yini vusiku byi nga vaka nkarhi lowu chavisaka swinene, kambe ha yini hi nga chavi nchumu?

⁹ Mupisalema u vula leswi landzelaka malunghana ni nsirhelelo wa Xikwembu: “A wu nge chavi nchumu lowu chavisaka nivusiku, hambi ku ri nseve lowu hahaka ninhlikanhi, hambi ku ri ntungu lowu fambaka eku dzwihaleni, hambi ku ri ndzoviso lowu lovisaka ninhlikanhi.” (Pisalema 91:5, 6) Tanihi leswi swiendlo swo tala swo homboloka swi endliwaka emunyameni, vusiku byi nga va nkarhi lowu chavisaka swinene. Valala va hina hakanyingi va endla swiendlo swa vukanganyisi exikarhi ka munyama wa moya lowu funengeteke misava sweswi, va ringeta ku dlaya vumoya bya hina ni ku yimisa ntirho wa hina wo chumayela. Kambe ‘a hi chavi nchumu lowu chavisaka nivusiku’ hikuva Yehovha wa hi sirhelela.—Pisalema 64:1, 2; 121:4; Esaya 60:2.

10. (a) “Nseve lowu hahaka ninhlikanhi” wu nga ha va wu yimela yini, naswona hi wu languta njhani? (b) “Ntungu lowu fambaka eku dzwihaleni” wu njhani, naswona ha yini hi nga wu chavi?

¹⁰ “Nseve lowu hahaka ninhlikanhi” swi vonaka wu fanekisela ku rhukaniwa. (Pisalema 64:3-5; 94:20) Loko hi phikelela eku nyikeleni ka rungula leri nga ntiyiso, ku kanetiwa hilaha ku kongomeke ka ntirho wa hina wo kwetsima ku ta va ka hava. Ku tlula kwalaho, a hi wu chavi “ntungu lowu fambaka eku dzwihaleni.” Lowu i ntungu wo fanekisela lowu sungulaka emunyameni wa misava ya vanhu lava nga riki na mahanyelo ni leyi hlanganisiwaka nhloko hi vukhongeri, leyi nga ematimbeni ya Sathana. (1 Yohane 5:19) Yi endla leswaku vanhu va va ni mianakanyo ni timbilu leti feke, va sala va nga tivi nchumu hi Yehovha, swikongomelo swa yena ni malunghiselelo ya yena ya rirhandzu. (1 Timotiya 6:4) A hi wu chavi munyama lowu hikuva hi ni ku vonakala lokukulu ka moya.—Pisalema 43:3.

11. Ku humelela yini hi lava va ‘lovisiwaka ninhlikanhi’?

¹¹ Ni “ndzoviso lowu lovisaka ninhlikanhi” a wu hi chavisi. Rito “ninhlikanhi” ri nga ha va ri vula leswi misava yi swi vitanaka ku vonakala ka yona. Lava va welaka eku hlongoriseni ka swilo leswi vonakaka va fa hi tlhelo ra moya. (1 Timotiya 6:20, 21) Loko hi ri karhi hi twarisa rungula ra Mfumo hi xivindzi, a hi va chavi valala va hina hikuva Yehovha i Musirheleri wa hina.—Pisalema 64:1; Swivuriso 3:25, 26.

12. Vanhu va magidi va ‘wela’ etlhelo ka mani, naswona hi ndlela yihi?

¹² Mupisalema u ye emahlweni a ku: “Vanhu va 1000 va ta wa etlhelo ka wena ni va 10000 evokweni ra wena ra xinene; a wu nge tshineli eka wena. U ta wu languta hi mahlo ya wena ntsena u vona ku rihisiwa ka lavo homboloka.” (Pisalema 91:7, 8) Hikwalaho ko tsandzeka ku endla Yehovha a va vutumbelo bya vona, vo tala va “wa,” va fa hi tlhelo ra moya “etlhelo” ka hina. Kahle-kahle, vanhu va “10000” va wile “evokweni ra xinene” ra Vaisrayele va moya va namuntlha. (Vagalatiya 6:16) Kambe ku nga khathariseki leswaku hi Vakreste lava totiweke kumbe vapfuneti va vona lava tinyiketeleke, hi sirhelelekile “endhawini ya le xihundleni” ya Xikwembu. Ho ‘languta ntsena kutani hi vona ku rihisiwa ka lavo homboloka,’ lava tshovelaka maxangu emabindzwini, evukhongerini ni le ka swin’wana.—Vagalatiya 6:7.

‘Ku Hava Khombo Leri Nga Ta Hi Wela’

13. I makhombo wahi lama nga hi weriki, naswona ha yini?

¹³ Hambileswi nsirhelelo wa misava leyi wu hohlokaka, hi rhangisa Xikwembu kutani hi amukela xikhutazo xa marito lawa ya mupisalema: “Hikuva u te: ‘Yehovha i vutumbelo bya mina,’ La nge Henhla-henhla u n’wi endle vutshamo bya wena; ku hava khombo leri nga ta ku wela, hambi ku ri [ntungu a wu] nge tshineli entsongeni wa wena.” (Pisalema 91:9, 10) Ina, Yehovha i vutumbelo bya hina. Hambiswiritano, hi tlhela hi endla La nge Henhla-henhla a va ‘vutshamo bya hina,’ laha hi sirheleriwaka kona. Hi dzunisa Yehovha tanihi Hosi ya Vuako Hinkwabyo, hi ‘tshama’ eka yena tanihi Xihlovo xa nsirhelelo wa hina, hi tlhela hi twarisa mahungu lamanene ya Mfumo wa yena. (Matewu 24:14) Hikwalaho, ‘ku hava khombo leri nga ta hi wela’—ni rin’we ra makhombo lama hlamuseriweke eku sunguleni ka pisalema leyi. Hambiloko na hina hi weriwa hi makhombo yo tanihi ku tsekatseka ka misava, swidzedze, tindhambhi, tindlala ni tinyimpi, leswi a swi ri dlayi ripfumelo ra hina kumbe nsirhelelo wa hina wa moya.

14. Tanihi malandza ya Yehovha, ha yini hi nga tluleriwi hi makhombo lama dlayaka?

¹⁴ Vakreste lava totiweke va fana ni valuveri lava tshamaka emintsongeni leyi nga riki ya mafambiselo lawa ya swilo. (1 Petro 2:11) ‘Hambi ku ri ku ntungu a wu tshineli entsongeni wa vona.’ Ku nga khathariseki leswaku ntshembo wa hina i wa ku hanya etilweni kumbe emisaveni, a hi xiphemu xa misava, naswona a hi tluleriwi hi ntungu wa moya lowu dlayaka wo tanihi mahanyelo layo biha, ku hlongorisa swilo leswi vonakaka, vukhongeri bya mavunwa ni ku gandzela “xivandzana” swin’we ni “xifaniso” xa xona, ku nga Nhlangano wa Matiko.—Nhlavutelo 9:20, 21; 13:1-18; Yohane 17:16.

15. Tintsumi ti hi pfuna hi tindlela tihi?

¹⁵ Mupisalema u engeterile malunghana ni nsirhelelo lowu hi nga na wona: “[Yehovha] u ta lerisa tintsumi takwe malunghana na wena, leswaku ti ku rindza etindleleni ta wena hinkwato. Ti ta ku rhwala hi mavoko ya tona, leswaku nenge wa wena wu nga tshuki wu hima ribye.” (Pisalema 91:11, 12) Tintsumi ti nyikiwe matimba ya ku hi sirhelela. (2 Tihosi 6:17; Pisalema 34:7-9; 104:4; Matewu 26:53; Luka 1:19) Ta hi rindza ‘etindleleni ta hina hinkwato.’ (Matewu 18:10) Hi kongomisiwa hi tintsumi hi tlhela hi rindziwa tanihi vahuweleri va Mfumo naswona a hi khunguvanyeki hi tlhelo ra moya. (Nhlavutelo 14:6, 7) Hambi ku ri ‘maribye’ yo tanihi ku siveriwa ka ntirho wa hina a ma hi wisanga hi nga ha tsakeriwi hi Xikwembu.

16. Minhlaselo ya “xinghalana” ni ya “xivatlankombe” yi hambana njhani, naswona hi langutana njhani na yona?

¹⁶ Mupisalema u ye emahlweni: “U ta kandziyela xinghalana ni xivatlankombe; u ta pyanya xinghalana xa ntshiva ni nyoka leyikulu.” (Pisalema 91:13) Ku fana ni xinghalana lexi hlaselaka hi ku kongoma, van’wana va valala va hina va hi kaneta erivaleni hi ku veka milawu leyi endleriweke ku yimisa ntirho wa hina wo chumayela. Kambe hi tlhela hi hlaseriwa hi minhlaselo leyi nga languteriwangiki ku fana ni ya ku lumiwa hi xivatlankombe lexi tumbeleke. Minkarhi yin’wana vafundhisi va nga ha hi hlasela hi ku tirhisa vanhu lava vekaka milawu, vaavanyisi ni van’wana. Kambe hi ku seketeriwa hi Yehovha, hi lava ntshunxeko hi ku rhula etihubyeni, xisweswo ‘hi lwela hi tlhela hi simeka mahungu lamanene hi nawu.’—Vafilipiya 1:7; Pisalema 94:14, 20-22.

17. Hi xi kandziyela njhani “xinghalana xa ntshiva”?

¹⁷ Mupisalema u vulavula hi ku kandziyela “xinghalana xa ntshiva ni nyoka leyikulu.” Xinghalana xa ntshiva xi nga ha leva, naswona nyoka leyikulu yi nga ha va xikokovi lexikulu. (Esaya 31:4) Kambe, ku nga khathariseki leswaku xinghalana xa ntshiva xi leva ku fikela kwihi loko xi hlasela, ha xi kandziyela hi ndlela yo fanekisela loko hi yingisa Xikwembu ku tlula vanhu kumbe minhlangano leyi fanaka ni nghala. (Mintirho 5:29) Hikwalaho ‘nghala’ leyi levaka a yi nge hi vavisi hi tlhelo ra moya.

18. “Nyoka leyikulu” yi nga hi tsundzuxa mani, naswona i yini leswi hi faneleke hi swi endla loko yi hi hlasela?

¹⁸ Eka Septuagint ya Xigriki, “nyoka leyikulu” yi vitaniwa “dragona.” Leswi swi nga ha hi tsundzuxa “dragona leyikulu . . . , nyoka ya khale, leyi vuriwaka Diyavulosi na Sathana.” (Nhlavutelo 12:7-9; Genesa 3:15) U fana ni xikokovi lexikulu lexi kotaka ku pyanyetela ni ku mita nchumu lowu xi wu hlaseleke. (Yeremiya 51:34) Loko Sathana a ringeta ku hi phasa, a hi pyanyetela hi mintshikilelo ya misava leyi ni ku hi mita, a hi lweni hi matimba hi tintshunxa kutani hi kandziyela “nyoka [leyi] leyikulu.” (1 Petro 5:8) Masalela lama totiweke ma fanele ma endla leswi loko ma lava ku hlanganyela eku hetisekeni ka Varhoma 16:20.

Yehovha—Xihlovo Xa Hina Xa Ku Ponisiwa

19. Ha yini hi tumbela eka Yehovha?

¹⁹ Mupisalema u vula leswaku Xikwembu xi vula leswi landzelaka malunghana ni mugandzeri wa ntiyiso: “Hikuva u veke xinakulobye xakwe eka mina, ndzi ta tlhela ndzi n’wi ponisa. Ndzi ta n’wi sirhelela hikuva u tiva vito ra mina.” (Pisalema 91:14) Xiga lexi nge “ndzi ta n’wi sirhelela,” hi ku kongoma xi vula leswaku “ndzi ta n’wi tlakusela ehenhla,” hileswaku laha a nga ta ka a nga fikeleriwi hi munhu. Hi tumbela eka Yehovha tanihi vagandzeri va yena ngopfu-ngopfu hileswi ‘hi veke ni xinakulobye na yena.’ (Marka 12:29, 30; 1 Yohane 4:19) Kutani Xikwembu ‘xa hi ponisa’ eka valala va hina. A hi nge pfuki hi lovisiwile emisaveni. Ku ri na sweswo, hi ta ponisiwa hikuva ha ri tiva vito ra Xikwembu naswona hi ri vitana hi ripfumelo. (Varhoma 10:11-13) Naswona hi tiyimisele ku ‘famba hi vito ra Yehovha hilaha ku nga riki na makumu.’—Mikiya 4:5; Esaya 43:10-12.

20. I yini lexi Yehovha a xi tshembisaka malandza ya yena lama tshembekaka eka marito yo gimeta ya Pisalema 91?

²⁰ Loko Pisalema 91 yi gimeta, Yehovha u vula leswi landzelaka hi malandza ya yena lama tshembekaka: “U ta ndzi vitana, ndzi ta n’wi hlamula. Ndzi ta va na yena emaxangwini. Ndzi ta n’wi ponisa, ndzi n’wi vangamisa. Ndzi ta n’wi enerisa hi ku leha ka masiku, ndzi ta n’wi ponisa.” (Pisalema 91:15, 16) Loko hi vitana Xikwembu hi xikhongelo naswona hi pfumelelana ni ku rhandza ka xona, xa hi hlamula. (1 Yohane 5:13-15) Se hi vone maxangu yo tala hikwalaho ka ku vengiwa hi Sathana. Kambe marito lama nge “ndzi ta va na yena emaxangwini” ma hi endla hi lunghekela miringo leya ha taka naswona ma hi tiyisekisa leswaku Xikwembu xi ta hi hlayisa loko ku lovisiwa mafambiselo lawa yo homboloka.

21. Vatotiwa ana se va fundzhiwe njhani?

²¹ Ku nga khathariseki nkaneto lowukulu wa Sathana, vatotiwa hinkwavo lava nga exikarhi ka hina va ta fundzhiwa etilweni hi nkarhi lowu faneleke wa Yehovha—endzhaku ka “ku leha ka masiku” emisaveni. Kambe, ku ponisa ka Xikwembu ko hlawuleka se ku tise ku dzuneka ka moya eka vatotiwa. Naswona mawaku lunghelo leri va nga na rona ro rhangela tanihi Timbhoni ta Yehovha emisaveni, emasikwini lawa ya makumu! (Esaya 43:10-12) Yehovha u ta va ponisa hi ndlela leyikulu vanhu va yena enyimpini ya yena leyikulu ya Armagedoni loko a lwela vuhosi bya yena naswona a hlawulekisa vito rakwe ro kwetsima.—Pisalema 83:18; Ezekiyele 38:23; Nhlavutelo 16:14, 16.

22. I vamani lava nga ta ‘ponisiwa hi Yehovha’?

²² Ku nga khathariseki leswaku hi Vakreste lava totiweke kumbe vapfuneti va vona lava tinyiketeleke, hinkwerhu hi langutele ku ponisiwa hi Xikwembu. Hi nkarhi wa “siku lerikulu ni leri chavisaka ra Yehovha,” lava va tshembaka Xikwembu hi mbilu hinkwayo va ta ponisiwa. (Yuwele 2:30-32) Lava va nga ta va swirho swa “ntshungu lowukulu” lowu nga ta ponela emisaveni leyintshwa ya Xikwembu lava hi hala tlhelo va nga ta tshama va tshembekile hi nkarhi wa ndzingo wa makumu, ‘xi ta va enerisa hi ku leha ka masiku’—va hanya hilaha ku nga heriki. Nakambe xi ta pfuxa vanhu vo tala. (Nhlavutelo 7:9; 20:7-15) Kunene Yehovha u ta swi tsakela swinene ‘ku hi ponisa’ hi ku tirhisa Yesu Kreste. (Pisalema 3:8) Leswi hi nga ni ntshembo wo tano lowu hlawulekeke, a hi hambeteni hi titshega hi Xikwembu leswaku xi hi pfuna ku hlayela masiku ya hina hi ndlela leyi nga ta dzunisa xona. Onge hi nga hambeta hi kombisa hi marito ni swiendlo swa hina leswaku Yehovha i vutumbelo bya hina.

[Nhlamuselo ya le hansi]

A Wu Ta Hlamurisa Ku Yini?

• I yini “[ndhawu] ya le xihundleni ya La nge Henhla-henhla”?

• Ha yini hi nga chavi nchumu?

• Xana ‘swi nge koteki hi ndlela yihi leswaku hi weriwa hi khombo’?

• Ha yini hi nga vulaka leswaku Yehovha i xihlovo xa hina xa ku ponisiwa?

[Xifaniso eka tluka 17]

Xana wa swi tiva leswaku ntiyiso wa Yehovha wu ta va xitlhangu xa hina lexikulu hi ndlela yihi?

[Swifaniso eka tluka 18]

Yehovha u pfuna malandza yakwe ku endla vutirheli bya wona hambi loko ma hlaseriwa ma nga swi rindzelanga kumbe ma kanetiwa hi ku kongoma

[Swifaniso]

Cobra: A. N. Jagannatha Rao, Trustee, Madras Snake Park Trust