‘Vito Lerinene Ra Antswa Ku Tlula Rifuwo Ro Tala’

VITO lerinene kumbe ndhuma i swa nkoka swinene lerova ematikweni man’wana ku vekiwe ni milawu leyi swi sirhelelaka. Milawu leyi yi sirhelela munhu eka ku onhiwa vito eka swihaxamahungu kumbe kun’wana. Leswi swi hi tsundzuxa xivuriso xa khale lexi nge: ‘Ku fanele ku hlawuriwa vito lerinene ematshan’weni ya rifuwo ro tala; ku xiximiwa ka antswa ku tlula silivhere ni nsuku.’ (Swivuriso 22:1) Hi nga swi kotisa ku yini ku tiendlela vito lerinene ni ku tlhela hi xiximiwa hi vanhu van’wana? Bibele yi ni swiringanyeto leswi pfunaka emhakeni leyi.

Hi xikombiso, xiya leswi Bibele yi swi vulaka eka Pisalema ndzima 15. Leswaku mupisalema a hlamula xivutiso lexi nge: “I mani la nga ta va muendzi entsongeni wa [Xikwembu]?” u tsale a ku: “Hi loyi a . . . hanyaka hi ku lulamala vulavulaka ntiyiso embilwini ya yena. A nga hlevanga, . . . , nakulobye wakwe a nga n’wi endlanga nchumu xo biha, naswona ku hava ndzhukano lowu a wu vangeleke munghana wakwe lonkulu. Kunene wa n’wi bakanya ematihlweni yakwe un’wana ni un’wana la solekaka . . . Loko a hlambanyile, hambi o weriwa hi leswo biha, a nga hundzuki. . . . Naswona a nga xi amukelanga xifumbarheriso.” (Pisalema 15:1-5) Xana a wu nga ta n’wi xixima munhu loyi a hanyaka hi milawu yo tano?

Nakambe ku titsongahata swi endla leswaku munhu a xiximiwa. Swivuriso 15:33 yi ri: “Emahlweni ka ku vangama ku ni ku titsongahata.” Xiya: Vanhu lava titsongahataka va ku xiya laha va siyekaka kona naswona va tirha hi matimba leswaku va antswisa. Loko va khunguvanyise van’wana va tshama va tiyimisele ku kombela ku rivaleriwa. (Yakobo 3:2) Kambe lava tikukumuxaka a va tano, ematshan’weni ya sweswo va hatla va khunguvanyeka. Swivuriso 16:18 yi ri: “Ku tinyungubyisa ku le kusuhi ni ku wa, ni moya lowu titlakusaka wu le kusuhi ni ku khunguvanyeka.”

U nga endla yini loko munhu a ku onha vito? Xana u ta hatla u hlundzuka? Tivutise, ‘Loko ndzi ringeta ku tibasisa vito, xana ndzi to ya ndzi ri thyakisa?’ Hambileswi mikarhi yin’wana swi pfunaka ku lava mpfuno ehubyeni, Bibele yi hi tsundzuxa leswi: “U nga hatliseli ku ya tenga nandzu.” Ku ri na sweswo, “rivalelana ni munhu-kuloni.” (Swivuriso 25:8, 9)a Ku lulamisa timhaka hi ndlela leyi swi nga ku pfuna leswaku u hlayisa mali yo hakela magqweta.

Bibele a ko va buku leyi vulavulaka hi vukhongeri ntsena. I buku leyinene leyi kongomisaka. Hinkwavo lava tirhisaka vutlhari bya yona va va ni timfanelo leti endlaka leswaku va xiximiwa ni ku va ni vito lerinene.