Hambeta U Ri Karhi U Fambisana Ni Nhlengeletano Ya Yehovha
“Onge Xikwembu xa ku rhula . . . xi nga mi hlomisa hi xilo xin’wana ni xin’wana lexinene leswaku mi endla ku rhandza ka xona.”—VAHEVERU 13:20, 21.
1. I vangani vaaka-tiko va misava hinkwayo naswona i vangani lava hlayiwaka tanihi swirho swa vukhongeri byin’wana?
HI LEMBE ra 1999, vaaka-tiko va misava hinkwayo va fikelele nhlayo ya tsevu wa magidi ya timiliyoni! The World Almanac yi kombisa leswaku eka nhlayo leyi, vanhu va kwalomu ka 1 165 000 000 i Mamoslem; 1 030 000 000 i Marhoma Khatoliki; 762 000 000 i Mahindu; 354 000 000 i Mabudha; 316 000 000 i Maprotestente; kasi 214 000 000 i Maorthodox.
2. Ku nga vuriwa yini hi xiyimo xa vukhongeri lexi nga kona namuntlha?
2 Leswi namuntlha ku nga ni ku avana ni mpfilumpfilu eka vukhongeri, xana swi nga endleka leswaku timiliyoni leti ti hanya hi ku pfumelelana ni ku rhandza ka Xikwembu? Doo, “hikuva Xikwembu a hi Xikwembu xa mpfilumpfilu, kambe i xa ku rhula.” (1 Vakorinto 14:33) Hi hala tlhelo, ku vuriwa yini hi vumakwerhu bya misava hinkwayo bya malandza ya Yehovha? (1 Petro 2:17) Nkambisiso wa vukheta wu kombisa leswaku ‘Xikwembu xa ku rhula xi va hlomisa hi xilo xin’wana ni xin’wana lexinene leswaku va endla ku rhandza ka xona.’—Vaheveru 13:20, 21.
3. Ku endleke yini eYerusalema hi Pentekosta ya 33 C.E., naswona hikwalaho ka yini?
3 Ina, nhlayo ya lava nga Timbhoni ta Yehovha a hi yona yi kombisaka loko va amukeleka eka Xikwembu; naswona Xikwembu a xi na mhaka na nhlayo. Vaisrayele a xi va hlawulanga hi mhaka ya ku va va ri “vanhu vo tala” ku tlula vanhu hinkwavo. Kahle-kahle a va ri “nhlayo leyitsongo” eka vanhu hinkwavo. (Deteronoma 7:7) Kambe leswi Vaisrayele va nga tshembekangiki, hi Pentekosta ya 33 C.E., Yehovha u teke tintswalo ta yena a ti kombisa vandlha lerintshwa leri a ri vumbiwa hi valandzeri va Yesu Kreste. A va totiwe hi moya lowo kwetsima wa Yehovha naswona hi ku hiseka va ye emahlweni va twarisa ntiyiso malunghana ni Xikwembu na Kreste eka van’wana.—Mintirho 2:41, 42.
Ku Hambeta Ri Ya eMahlweni
4. Ha yini u nga vulaka leswaku vandlha ro sungula ra Vukreste a ri hambeta ri ya emahlweni?
4 Eka lembe-xidzana ro sungula, vandlha ra Vukreste a ri hambeta ri ya emahlweni, ri sungula masimu lamantshwa, ri endla vadyondzisiwa ni ku ya emahlweni ri swi twisisa kahle swikongomelo swa Xikwembu. Vakreste vo sungula va fambisane ni ku voningeriwa hi tlhelo ra moya loku a ku ta hi mapapila lama huhuteriweke hi Xikwembu. Hi ku khutaziwa hi maendzo yo huma eka vaapostola ni van’wana, va hetisise vutirheli bya vona. Leswi swi andlariwe kahle eMatsalweni ya Vukreste ya Xigriki.—Mintirho 10:21, 22; 13:46, 47; 2 Timotiya 1:13; 4:5; Vaheveru 6:1-3; 2 Petro 3:17, 18.
5. Hikwalaho ka yini nhlengeletano ya Xikwembu yi ya emahlweni namuntlha, naswona ha yini hi fanele hi fambisana na yona?
5 Ku fana ni Vakreste vo sungula, Timbhoni ta Yehovha ta manguva lawa ti andzile ti suka eka masungulo lama nga nyawuriki. (Zakariya 4:8-10) Ku sukela eku heleni ka lembe-xidzana ra vu-19, a ku ri ni vumbhoni lebyi nga erivaleni bya leswaku moya wa Xikwembu wu le henhla ka nhlengeletano ya xona. Leswi hi nga titshegangiki hi matimba ya munhu kambe hi titshegeke hi nkongomiso wa moya lowo kwetsima, hi hambete hi endla nhluvuko eku twisiseni ka Matsalwa ni le ku endleni ka ku rhandza ka Xikwembu. (Zakariya 4:6) Leswi se hi nga “emasikwini yo hetelela,” i swa nkoka leswaku hi fambisana ni nhlengeletano ya Yehovha leyi yaka emahlweni. (2 Timotiya 3:1-5) Loko hi endla tano, ntshembo wa hina wu ta tshama wu ri karhi wu hanya naswona hi ta hlanganyela eku nyikeleni ka vumbhoni malunghana ni Mfumo wa Xikwembu lowu simekiweke, ku nga si fika makumu ya mafambiselo lawa ya swilo.—Matewu 24:3-14.
6, 7. Hi tihi tindhawu tinharhu leti hi nga ta ti kambisisa leti nhlengeletano ya Yehovha yi endleke nhluvuko eka tona?
6 Exikarhi ka hina ku ni lava va nga sungula ku hlanganyela ni nhlengeletano ya Yehovha hi va-1920, va-1930 na hi va-1940. Emalembeni wolawo ya khale, i mani eka hina loyi a a ehleketa leswaku nhlengeletano a yi ta andza ni ku hluvuka hi ndlela leyi yi hlamarisaka, ku ta fikela esikwini leri? Anakanya hi swiendlakalo leswi xiyekaka leswi fikeleriweke ematin’wini ya hina ya manguva lawa! Ina, swa fuwisa hi tlhelo ra moya ku anakanya hi leswi Yehovha a swi hetisiseke hi ku tirhisa vanhu vakwe lava hleriweke hi ndlela ya le tilweni.
7 Davhida wa khale a a tsaka swinene loko a anakanyisisa hi mintirho ya Yehovha yo hlamarisa. U te: “Loko a ndzi lava ku vulavula ha yona, yi tele swinene lerova a ndzi nge yi runguli.” (Pisalema 40:5) Na hina hi titwa hi ndlela leyi fanaka, a hi swi koti ku rungula swiendlo swa Yehovha swo tala, leswikulu ni leswi nkhensekaka esikwini ra hina. Kambe, a hi kambisiseni tindhawu tinharhu leti nhlengeletano ya Yehovha yi endleke nhluvuko eka tona: (1) ku voningeriwa loku yaka emahlweni hi tlhelo ra moya, (2) vutirheli lebyi antswisiweke ni ku ndlandlamuxiwa, ni (3) mindzulamiso leyi fikaka hi nkarhi ya mafambiselo ya nhlengeletano.
Ha Ku Tlangela Ku Voningeriwa Hi Tlhelo Ra Moya
8. Hi ku pfumelelana na Swivuriso 4:18, ku voningeriwa hi tlhelo ra moya ku hi endle leswaku hi twisisa yini malunghana ni Mfumo?
8 Malunghana ni ku voningeriwa loku yaka emahlweni hi tlhelo ra moya, Swivuriso 4:18 yi hetisekile. Yi ri: “Ndlela ya lavo lulama yi fana ni ku vonakala ko vangama loku vonakalaka hakatsongo-tsongo kukondza siku ri simekiwa ri tiya.” Ha tsaka swinene leswi hi kumaka ku voningeriwa loku yaka emahlweni hi tlhelo ra moya! Le ntsombanweni wa le Cedar Point, Ohio, hi 1919, a ku vulavuriwa swinene hi Mfumo wa Xikwembu. Yehovha u tirhisa Mfumo lowu leswaku a kwetsimisa vito rakwe ni ku lwela vuhosi bya yena. Kahle-kahle, ku voningeriwa hi tlhelo ra moya ku hi endle hi twisisa leswaku ku sukela eka Genesa ku ya eka Nhlavutelo, Bibele yi vulavula hi xikongomelo xa Yehovha xo kwetsimisa vito rakwe hi ku tirhisa Mfumo lowu lawuriwaka hi N’wana wakwe. Lowu hi wona ntshembo wa vanhu hinkwavo lava rhandzaka ku lulama.—Matewu 12:18, 21.
9, 10. Hi va-1920, i yini leswi twisisiweke malunghana ni Mfumo ni tinhlengeletano timbirhi leti lwisanaka naswona leswi swi ve mpfuno hi ndlela yihi?
9 Entsombanweni wa le Cedar Point, hi 1922, xivulavuri-nkulu, J. F. Rutherford, u khutaze vanhu va Xikwembu a ku “twarisani, twarisani, twarisani Hosi ni mfumo wa yona.” Eka xihloko lexi nge, “Ku Velekiwa Ka Rixaka,” lexi humesiweke eka Xihondzo xo Rindza (xa Xinghezi) xa March 1, 1925, ku hlamuseriwe ku twisisa ka moya loku khumbaka vuprofeta lebyi a byi vulavula hi ku simekiwa ka Mfumo wa Xikwembu hi 1914. Nakambe hi va-1920 ku twisisiwe leswaku ku ni tinhlengeletano timbirhi leti lwisanaka—ya Yehovha ni ya Sathana. Nyimpi yi ya emahlweni exikarhi ka tona, naswona hi ta va etlhelweni leri hlulaka loko ho fambisana ni nhlengeletano ya Yehovha ntsena.
10 Xana ku voningeriwa koloko hi tlhelo ra moya ku hi pfune njhani? Tanihi leswi Mfumo wa Xikwembu wu nga riki xiphemu xa misava na Hosi Yesu Kreste a nga riki xiphemu xa misava, na hina a hi fanelanga hi va xiphemu xa yona. Hi ku tihambanisa ni misava hi kombisa leswaku hi seketela ntiyiso. (Yohane 17:16; 18:37) Loko hi languta swiphiqo leswi rharhanganeke leswi funengeteke mafambiselo lawa yo biha, ha nkhensa swinene leswi hi nga riki xiphemu xa nhlengeletano ya Sathana! Naswona hi katekile swinene leswi hi sirhelelekeke hi tlhelo ra moya endzeni ka nhlengeletano ya Yehovha!
11. Hi rihi vito leri sekeriweke eMatsalweni leri amukeriweke hi vanhu va Xikwembu hi 1931?
11 Entsombanweni wa le Columbus, Ohio, hi 1931, ku hlamuseriwe Esaya 43:10-12 hi ndlela leyi fanelekaka. Swichudeni swa Bibele swi amukele vito leri swi hlawulaka ra Timbhoni ta Yehovha. I lunghelo lerikulu swinene ku tivisa vito ra Xikwembu leswaku ni van’wana va ta ri vitana leswaku va ponisiwa!—Pisalema 83:18; Varhoma 10:13.
12. Hi kwihi ku voningeriwa hi tlhelo ra moya loku nyikeriweke hi 1935 malunghana ni ntshungu lowukulu?
12 Emahlweni ka va-1930, vo tala va vanhu va Xikwembu a va nga tiyiseki hi ntshembo wa laha va nga ta hanya kona enkarhini lowu taka. Van’wana a va anakanya hi vutomi bya le tilweni kambe va tsakisiwe hi tidyondzo ta Bibele leti vulavulaka hi misava leyi nga paradeyisi. Entsombanweni, le Washington D.C., hi 1935, a swi nyanyula ku tiva leswaku vunyingi lebyikulu kumbe ntshungu lowukulu, wa le ka Nhlavutelo ndzima 7 i ntlawa wa vanhu lava nga ni ntshembo wa laha misaveni. Ku sukela kwalaho, ntirho wa ku hlengeleta ntshungu lowukulu wu ye emahlweni hi rivilo lerikulu. Xana a hi tsaki leswi hi tivaka nhlamuselo ya ntshungu lowukulu? Leswi vanhu va nga le ku hlengeletiweni hi vunyingi va huma eka matiko, swivongo ni tindzimi hinkwato, hi susumeteleka ku tshama hi ri karhi hi fambisana ni nhlengeletano ya Yehovha.
13. Hi yihi mhaka leyikulu leyi kandziyisiweke entsombanweni wa le St. Louis, hi 1941?
13 Mhaka leyikulu leyi faneleke yi karhata vanhu namuntlha yi kandziyisiwe entsombanweni wa le St. Louis, eMissouri, hi 1941. I vulawuri kumbe vuhosi bya vuako hinkwabyo. Leyi i mphikamakaneta leyi faneleke yi ololoxiwa hi ku hatlisa, naswona siku lerikulu leri chavisaka ra ku endla sweswo ri tshinela hi ku hatlisa! Nakambe hi 1941 ku hlamuseriwe mhaka ya vutshembeki, leyi hi endlaka hi kombisa laha ha un’we wa hina hi yimeke kona malunghana ni vuhosi bya Xikwembu.
14. Entsombanweni wa matiko hinkwawo hi 1950, i yini leswi dyondziweke malunghana ni tihosana leti boxiwaka eka Esaya 32:1, 2?
14 Entsombanweni wa matiko hinkwawo le Dorobeni ra New York, hi 1950, tihosana ta le ka Esaya 32:1, 2 ti vekiwe erivaleni. A swi nyanyula swinene loko Makwerhu Frederick Franz a vulavule hi mhaka leyi kutani a hlamusela leswaku tihosana ta misava leyintshwa ti le xikarhi ka hina. Entsombanweni lowu ni le ka yin’wana leyi landzeleke, ku vonakala ka moya ku ye ku voninga swinene. (Pisalema 97:11) Ha tsaka swinene leswi ndlela ya hina ‘yi fanaka ni rivoni leri yaka ri voninga swinene’!
Ku Ya eMahlweni Ni Vutirheli Bya Hina
15, 16. (a) Xana hi ye njhani emahlweni ni vutirheli bya hina hi va-1920 na va-1930? (b) Hi tihi tibuku leti hatlisiseke vutirheli bya Vukreste eka makume ya malembe ya sweswinyana?
15 Ndlela ya vumbirhi leyi nhlengeletano ya Yehovha yi yeke emahlweni ha yona yi khumba ntirho wa hina lowukulu—i ku chumayela hi Mfumo ni ku endla vadyondzisiwa. (Matewu 28:19, 20; Marka 13:10) Leswaku yi hetisisa ntirho lowu, minkarhi hinkwayo nhlengeletano yi hi pfune leswaku hi vona ntikelo wa ku ndlandlamuxa vutirheli bya hina. Hi 1922, Vakreste hinkwavo va khutaziwe leswaku va hlanganyela entirhweni wo chumayela. Munhu un’wana ni un’wana a a ri ni vutihlamuleri byo endla leswaku ku vonakala ka yena ku voninga kutani hi ndlela yoleyo a va ni xandla eku nyikeleni ka vumbhoni hi ntiyiso. (Matewu 5:14-16) Hi 1927 ku tekiwe magoza yo hlawula siku ra Sonto ri vekeriwa ntirho wa nsimu. Ku sukela hi February 1940, swi ve ntolovelo ku vona Timbhoni eswitarateni ni le tindhawini ta mabindzu ti fambisela vanhu Xihondzo xo Rindza ni Consolation (leyi sweswi ku nga Xalamuka!).
16 Hi 1937 ku humesiwe xibukwana lexi nge Model Study, lexi kandziyisaka xilaveko xa ku tlhelela eka vanhu leswaku va dyondzisiwa ntiyiso wa Bibele. Eka malembe lama landzeleke, mhaka ya ku fambisa tidyondzo ta Bibele yi kandziyisiwile swinene. Ntirho lowu wu hatlisisiwile hi ku humesiwa ka buku leyi nge “Let God Be True” hi 1946 ni leyi nge Ntiyiso Lowu Yisaka eVuton’wini Lebyi Nga Heriki hi 1968. Sweswi hi tirhisa buku leyi nge Vutivi Lebyi Yisaka eVuton’wini Lebyi Nga Heriki. Ku hlanganisa rungula leri swi veka xisekelo lexinene xa Matsalwa xa ku endla vadyondzisiwa.
Ku Ya eMahlweni Ni Ku Antswisa Mafambiselo Ya Nhlengeletano
17. Hi ku pfumelelana na Esaya 60:17, nhlengeletano ya Yehovha yi ye emahlweni hi ndlela yihi?
17 Ndlela ya vunharhu leyi nhlengeletano ya Yehovha yi yaka emahlweni ha yona i ya ku antswisa mafambiselo ya nhlengeletano. Hi ku ya hi Esaya 60:17, Yehovha u tshembisile: “Ematshan’weni ya koporo ndzi ta tisa nsuku, ematshan’weni ya nsimbi ndzi ta tisa silivhere, kasi ematshan’weni ya ntsandza, koporo, ematshan’weni ya maribye, nsimbi; naswona ndzi ta veka ku rhula ku va valanguteri va wena ni ku lulama ku va vaaveri va ntirho wa wena.” Hi ku pfumelelana ni vuprofeta lebyi, ku tekiwe magoza yo antswisa ku languteriwa ka ntirho wa ku chumayela hi Mfumo ni wa ku risa ntlhambi.
18, 19. Hi kwihi ku antswisiwa ka mafambiselo ya nhlengeletano loku veke kona hi ku famba ka malembe?
18 Hi 1919 ku vekiwe mukongomisi wa ntirho eka vandlha rin’wana ni rin’wana leri kombeleke leswaku ri hleleriwa ku huma nsimu. Leswi swi hatlisise vutirheli bya hina ensin’wini. Ku hlawuriwa ka vakulu ni vadiyakoni ku herisiwile hi 1932, ku sukela kwalaho hi hambane ni endlelo ra xidimokrati. Ku tekiwe goza rin’wana leri xiyekaka swinene hi 1938 loko malandza hinkwawo emavandlheni ma sungula ku vekiwa hi ku pfumelelana swinene ni lunghiselelo ra ku hlawula hi ndlela ya le tilweni ra vandlha ra Vukreste ro sungula. (Mintirho 14:23; 1 Timotiya 4:14) Hi 1972 valanguteri ni malandza ya vutirheli va sungule ku vekiwa leswaku va tirha hilaha vavanuna vo tano va tirheke hakona exikarhi ka Vakreste vo sungula. Ematshan’weni ya leswaku ku va ni wanuna un’we la nga mulanguteri wa vandlha, Vafilipiya 1:1 ni matsalwa man’wana ma kombisa leswaku lava va fikelelaka swilaveko swa Matsalwa leswaku va va valanguteri va vumba huvo ya vakulu.—Mintirho 20:28; Vaefesa 4:11, 12.
19 Hi 1975 ku sungule lunghiselelo ra leswaku tikomiti ta Huvo leyi Fumaka ya Timbhoni ta Yehovha ti langutela mintirho ya misava hinkwayo ya nhlengeletano ya Xikwembu. Ku vekiwe Tikomiti ta Rhavi leswaku ti langutela ntirho ematikweni ya tona. Ku sukela kwalaho, ku endliwe matshalatshala ya leswaku ku olovisiwa ntirho eyindlu-nkulu ni le marhavini ya Sosayiti ya Watch Tower leswaku ‘ku ta rhangisiwa swilo swa nkoka swinene.’ (Vafilipiya 1:9, 10) Vutihlamuleri lebyi nga emakatleni ya varisi lava nga ehansi ka Kreste, byi katsa ku rhangela entirhweni wo vula evhangeli, ku dyondzisa vandlha ni ku risa vandlha ra Xikwembu hi mfanelo.—1 Timotiya 4:16; Vaheveru 13:7, 17; 1 Petro 5:2, 3.
Vurhangeri Bya Yesu Lebyi Vonakaka
20. Ku fambisana ni nhlengeletano ya Yehovha swi lava leswaku hi xiya yini malunghana ni xikhundlha xa Yesu?
20 Leswaku hi fambisana ni nhlengeletano ya Yehovha leyi yaka emahlweni swi lava leswaku hi xiya ntirho lowu Xikwembu xi wu aveleke Yesu Kreste tanihi “nhloko ya vandlha.” (Vaefesa 5:22, 23) Nakambe tsalwa leri xiyekaka hi leriya ra Esaya 55:4, laha hi byeriwaka leswi: “Maswivo! [Mina Yehovha] ndzi n’wi veke a va mbhoni eka vanhu va matiko, a va murhangeri ni ndhuna ya vanhu va matiko.” Kunene Yesu wa swi tiva ku rhangela. Wa ti tiva tinyimpfu takwe ni mintirho ya tona. Kahle-kahle, loko a kambele mavandlha ya nkombo le Asia Minor, u vule ka ntlhanu a ku: “Ndzi tiva swiendlo swa wena.” (Nhlavutelo 2:2, 19; 3:1, 8, 15) Nakambe Yesu wa swi tiva swilaveko swa hina, ku fana ni Tata wakwe Yehovha. Loko a nga si vula Xikhongelo xa Xikombiso, Yesu u te: “Xikwembu Tata wa n’wina xa swi tiva swilo leswi mi swi lavaka mi nga si swi kombela eka xona.”—Matewu 6:8-13.
21. Xana vurhangeri bya Yesu byi vonaka njhani emavandlheni ya Vukreste?
21 Xana vurhangeri bya Yesu byi vonaka njhani? Ndlela yin’wana i ku tirhisiwa ka valanguteri lava nga Vakreste, “tinyiko leti nga vanhu.” (Vaefesa 4:8) Nhlavutelo 1:16 yi kombisa valanguteri lava totiweke va ri evokweni ra xinene ra Kreste, va lawuriwa hi yena. Namuntlha, Yesu u kongomisa lunghiselelo ra vakulu, ku nga khathariseki leswaku vavanuna volavo va ni ntshembo wa le tilweni kumbe wa laha misaveni. Hilaha swi hlamuseriweke hakona exihlokweni lexi hundzeke, va vekiwa hi moya lowo kwetsima hi ku pfumelelana ni swilaveko swa Matsalwa. (1 Timotiya 3:1-7; Tito 1:5-9) Eka lembe-xidzana ro sungula, ntlawa wa vakulukumba le Yerusalema a wu vumba huvo leyi fumaka leyi a yi langutela mavandlha ni ntirho wa ku chumayela hi Mfumo. Ku landzeleriwa endlelo rero exikarhi ka nhlengeletano ya Yehovha namuntlha.
Hambeta U Fambisana Na Yona!
22. Hi wihi mpfuno lowu nyikeriwaka hi Huvo leyi Fumaka?
22 Swilaveko swa Mfumo emisaveni swi vekiwe emakatleni ya “hlonga ro tshembeka ni ro tlhariha,” leri yimeriwaka hi Huvo leyi Fumaka ya Timbhoni ta Yehovha. (Matewu 24:45-47) Huvo leyi Fumaka yi yisa nyingiso lowukulu eku nyikeleni ka vuleteri ni nkongomiso wa swa moya evandlheni ra Vukreste. (Mintirho 6:1-6) Kambe, loko vagandzeri-kulorhi va hlaseriwe hi mhangu ya ntumbuluko, Huvo leyi Fumaka yi kombela vandla rin’we kumbe lama engetelekeke ya swa nawu leswaku ma phalala ni ku lunghisa kumbe ku aka makaya ni Tiholo ta Mfumo leti onhakeke. Loko Vakreste van’wana va khomiwa hi tihanyi kumbe va xanisiwa, ku tekiwa magoza ya ku aka vumoya bya vona. Naswona “hi nguva ya ku karhateka,” ku endliwa matshalatshala ya leswaku ntirho wa ku chumayela wu tshama wu ri karhi wu ya emahlweni.—2 Timotiya 4:1, 2.
23, 24. Ku nga khathariseki leswaku i yini leswi vanhu vakwe va weriwaka hi swona, i yini leswi Yehovha a hambetaka a swi nyika vanhu vakwe, naswona hi fanele hi tiyimisela ku endla yini?
23 Ku nga khathariseki leswaku vanhu va yena va weriwa hi yini, minkarhi hinkwayo Yehovha u va nyika swakudya swa moya ni nkongomiso lowu lavekaka. Xikwembu xi tlhela xi nyika vamakwerhu lava nga ni vutihlamuleri ku twisisa ni vutlhari leswaku va lunghiselela nhluvuko ni ku antswisa mafambiselo ya nhlengeletano ya swa le tilweni. (Deteronoma 34:9; Vaefesa 1:16, 17) Handle ko tsandzeka, Yehovha u hi nyika leswi hi swi pfumalaka leswaku hi hetisisa ntirho wa hina wo endla vadyondzisiwa ni ku hetisisa vutirheli bya hina emisaveni hinkwayo.—2 Timotiya 4:5.
24 Ha tiyiseka leswaku Yehovha a nge va tshiki vanhu vakwe lava tshembekaka; u ta va ponisa eka “nhlomulo lowukulu” lowu taka. (Nhlavutelo 7:9-14; Pisalema 94:14; 2 Petro 2:9) Hi ni xivangelo lexi twalaka xo hlayisa ku tiyiseka loku a hi ri na kona eku sunguleni, ku yisa emakumu. (Vaheveru 3:14) Kutani ke, a hi tiyimiseleni ku tshama hi ri karhi hi fambisana ni nhlengeletano ya Yehovha.
U Nga Hlamurisa Ku Yini?
• Ha yini hi nga vulaka leswaku nhlengeletano ya Yehovha yi hambeta yi ya emahlweni?
• Hi byihi vumbhoni lebyi kombisaka leswaku vanhu va Xikwembu va ya emahlweni va voningeriwa hi tlhelo ra moya?
• Ku ve ni nhluvuko evutirhelini bya Vukreste hi ndlela yihi?
• Hi yihi mindzulamiso leyi fikeke hi nkarhi leyi endliweke eka mafambiselo ya nhlengeletano exikarhi ka malandza ya Yehovha?
[Xifaniso eka tluka 17]
Ku fana na Davhida, a hi nge swi koti ku rungula mintirho hinkwayo yo hlamarisa ya Yehovha
[Xifaniso eka tluka 18]
Ntlhambi wa Xikwembu wu pfunekile hi mindzulamiso ya mafambiselo ya nhlengeletano leyi fikeke hi nkarhi mafambiselo ya nhlengeletano exikarhi ka malandza ya Yehovha?