Esaya
60 “Pfuka wena wansati,+ voninga hikuva rivoni ra wena ri fikile.
Ku vangama ka Yehovha ka ku voningela.+
2 Hikuva waswivo, munyama wu ta funengeta misava
Matiko ma ta va emunyameni;
Kambe Yehovha u ta ku voningela,
Ku vangama ka yena ku ta vonaka eka wena.
3 Matiko ma ta ta eku vonakaleni ka wena+
Ni tihosi+ ti ta ta eku vangameni ka wena.+
4 Halahala!
Hinkwavo va hlengeletiwile; va ta eka wena.
Vana va wena va majaha lava humaka ekule va tama va ta,+
Kasi vana va wena va vanhwanyana va ta vuya va beburiwe kunene.+
5 Enkarhini wolowo u ta swi vona ivi u tsaka,+
Mbilu ya wena yi ta tsaka yi khana swinene,
Hikuva rifuwo leri nga elwandle ri ta ta eka wena;
Rifuwo ra matiko ri ta ta eka wena.+
6 Ku ta va ni tikamela to tala swinene etikweni ra wena,
Tikamela letitsongo leti humaka eMidiyani ni le Efa.+
Hinkwavo lava humaka eXeba va ta ta;
Va ta ta va rhwale nsuku ni mirhi ya risuna.
Va ta dzunisa Yehovha.+
7 Mitlhambi hinkwayo ya le Kedari+ yi ta hlengeletiwa yi tisiwa eka wena.
Makhuna ya le Nebayoto+ ma ta ku tirhela.
Ma ta amukeriwa ma va gandzelo ealtarini ya mina,+
8 I vamani lava, lava hahaka ku fana ni mapapa,
Ku fana ni matuva lama yaka eswisakeni swa wona?
9 Hikuva swihlala swi ta tshemba mina;+
Swikepe swa le Taraxixi swi le ku teni,
Swi tisa vana va wena lava humaka ekule,+
Va rhwale silivhere ya vona ni nsuku wa vona,
Leswaku va ta dzunisa vito ra Yehovha Xikwembu xa wena, Mukwetsimi wa Israyele,
Hikuva u ta ku vangamisa.+
10 Valuveri va ta aka makhumbi ya wena,
Tihosi ta vona ti ta ku tirhela,+
Ndzi ku xupule hikwalaho ka leswi a ndzi hlundzukile,
Kambe ndzi ta ku komba tintswalo hikwalaho ka vunene bya mina.+
11 Tigede ta wena ti ta tshama ti pfulekile;+
A ti nge pfariwi vusiku ninhlikanhi,
Leswaku u tiseriwa rifuwo ra matiko,
Tihosi ta wona hi tona ti nga ta rhanga ti ta.+
12 Hikuva matiko ni mifumo leyi nga ta ka yi nga ku tirheli swi ta lovisiwa,
Matiko ma ta sala ma ri marhumbi.+
13 Ku ta ta leswinene leswi humaka eLebanoni,+
Mirhi ya yunipa, ya nyamarhi ni ya kipresi,+
Leswaku u ta khavisa ndhawu ya mina yo kwetsima;
Ndzi ta vangamisa laha ndzi vekaka kona milenge ya mina.+
14 Vana va lava a va ku xanisa va ta fika va ku khinsamela;
Hinkwavo lava va nga ku xiximiki va ta boheka ku ku khinsamela,
Naswona va ta boheka ku ku vitana muti wa Yehovha,
Siyoni, muti wa Mukwetsimi wa Israyele.+
15 Ematshan’weni ya ku va u fularheriwa u tlhela u vengiwa, ku ri hava ni loyi a hundzaka hi le ka wena,+
Ndzi ta ku endla u va nchumu lowu vanhu va nga ta tibuma ha wona,
Lowu nga ta va tsakisa hilaha ku nga heriki.+
16 Kunene u ta nwa ntswamba wa matiko,+
U ta mama mavele ya tihosi;+
Hakunene u ta swi tiva leswaku mina Yehovha, ndzi Muponisi wa wena,
Loyi a nyikaka Yakobo Matimba i Mukutsuri wa wena.+
17 Ematshan’weni ya koporo ndzi ta tisa nsuku,
Naswona ematshan’weni ya nsimbhi ndzi ta tisa silivhere,
Ematshan’weni ya ntsandza, koporo,
Naswona ematshan’weni ya maribye, nsimbhi;
Ndzi ta endla leswaku ku rhula ku va mulanguteri wa wena
Ku lulama ku ta va ndhuna ya wena.+
Makhumbi ya wena u ta ma thya Ku Ponisiwa+ kasi tigede ta wena u ta ti thya Ku Dzunisa.
19 Ninhlikanhi a wu nge he voningeriwi hi dyambu,
Ni n’weti a wu nge he ku voningeli,
Hikuva Yehovha u ta ku voningela hilaha ku nga heriki,+
U ta saseka hikwalaho ka Xikwembu xa wena.+
20 Dyambu a ri nge he ku peleli,
Ni n’weti a wu nge he nyamalali,
Hikuva Yehovha u ta ku voningela hilaha ku nga heriki,+
Swirilo swa wena swi ta va swi herile.+
21 Vanhu va wena hinkwavo va ta va vo lulama;
Tiko ri ta va ra vona hilaha ku nga heriki.
22 Lontsongo u ta va gidi,
Kasi lontsongo ngopfu u ta va tiko ra matimba.
Mina Yehovha, ndzi ta swi hatlisisa hi nkarhi wa swona.”