Misava Leyintshwa—Xana U Ta Va Kona Eka Yona?

“A ku na nchumu lexi antswaka eka vona ematshan’weni yo tsaka ni ku endla leswinene evuton’wini bya munhu; nileswaku munhu un’wana ni un’wana u fanele a dya, kunene a nwa, a kuma leswinene entirhweni wakwe hinkwawo wa matimba. I nyiko leyi humaka eka Xikwembu.”—EKLESIASTA 3:12, 13.

 1. Ha yini hi fanele hi va ni ntshembo hi vumundzuku?

VANHU vo tala va anakanya leswaku Xikwembu xa Matimba Hinkwawo xi sivela-sivela ngopfu naswona xi tirhisa voko ra nsimbhi. Kambe tsalwa leri nga laha henhla ri vula ntiyiso lowu kumekaka eRitweni ra xona leri huhuteriweke. Ri pfumelelana ni mhaka ya leswaku i “Xikwembu lexi tsakeke,” ri tlhela ri pfumelelana ni xikongomelo xa xona xa ku veka vatswari va hina vo sungula eparadeyisini ya laha misaveni. (1 Timotiya 1:11; Genesa 2:7-9) Loko hi ri karhi hi lava ku tiva hi ta vumundzuku lebyi Xikwembu xi byi tshembisaka vanhu va xona, a swi fanelanga swi hi hlamarisa ku dyondza hi ta swiyimo leswi nga ta hi tisela ntsako lowu nga heriki.

 2. Hi swihi swilo swin’wana leswi u swi languteleke?

² Eka xihloko lexi hundzeke, hi kambisise tindzima tinharhu eka ta mune, laha Bibele yi profetaka hi “matilo lamantshwa ni misava leyintshwa.” (Esaya 65:17) Byin’wana bya vuprofeta lebyi byi tshembekaka byi kumeka eka Nhlavutelo 21:1. Tindzimana leti tlhandlamaka ti vulavula hi nkarhi lowu Xikwembu xa Matimba Hinkwawo xi nga ta cinca swiyimo swa misava swi va leswinene. Xi ta sula mihloti ya gome. Vanhu a va nge he fi hikwalaho ka ku dyuhala, vuvabyi kumbe timhangu. Ku kolola, xirilo ni xitlhavi swi ta va swi nga ha ri kona. I ntshembo lowu tsakisaka hakunene! Kambe, xana ha tiyiseka leswaku ntshembo wo tano wu ta hetiseka hakunene, naswona xana wu hi khumbisa ku yini sweswi?

Swivangelo Swa Ku Tiyiseka

 3. Ha yini hi fanele hi tiyiseka hi switshembiso swa Bibele mayelana ni vumundzuku?

³ Xiya ndlela leyi Nhlavutelo 21:5 yi yaka emahlweni ha yona. Yi vulavula hi Xikwembu, lexi tshameke exiluvelweni xa xona etilweni, xi ri: “Waswivo, ndzi endla swilo hinkwaswo swi va leswintshwa.” Xitshembiso xexo xa Xikwembu i xinene ku tlula xitiviso xihi ni xihi xa ku kumiwa ka ntshunxeko etikweni, xi tlula milawu hinkwayo ya timfanelo ta vanhu namuntlha, ni milorho yihi ni yihi ya munhu hi vumundzuku. I xitiviso lexi tshembekaka hi ku helela lexi humaka enon’wini wa Loyi Bibele yi vulaka leswaku ‘a nga hembi.’ (Tito 1:2) Ina, u nga anakanya leswaku hi namba hi yima kwala, hi vulavula ntsena hi ntshembo lowu nyanyulaka kun’we ni ku titshega hi Xikwembu. Kambe a hi fanelanga hi yima. Ka ha ri ni swo tala leswi hi faneleke hi swi dyondza hi vumundzuku.

4, 5. Hi byihi vuprofeta bya Bibele lebyi ana se byi kambisisiweke, lebyi nga tiyisaka ntshembo lowu hi nga na wona malunghana ni leswi swi nga ta endleka enkarhini lowu taka?

⁴ Anakanyisisa hi leswi xihloko lexi hundzeke xi swi vuleke malunghana ni switshembiso swa Bibele swa matilo lamantshwa ni misava leyintshwa. Esaya u profete mafambiselo yo tano lamantshwa, naswona vuprofeta byakwe byi hetiseke loko Vayuda va vuyela eka rikwavo kutani va pfuxeta vugandzeri bya ntiyiso. (Ezra 1:1-3; 2:1, 2; 3:12, 13) Kambe, xana leswi vuprofeta bya Esaya byi swi vuleke a swi ta helela kwalaho? Doo! Swilo leswi a swi profeteke a swi ta hetiseka hi ndlela yo hlawuleka endzhaku ka nkarhi. Ha yini hi vula sweswo? Hikwalaho ka leswi hi swi hlayaka eka 2 Petro 3:13 ni le ka Nhlavutelo 21:1-5. Tindzimana teto ti vulavula hi matilo lamantshwa ni misava leyintshwa, leswi nga ta va nkateko eka Vakreste va misava hinkwayo.

⁵ Hilaha swi kombisiweke hakona eku sunguleni, xiga lexi nge “matilo lamantshwa ni misava leyintshwa,” xi humelela ka mune eBibeleni. Ana se hi xiye tindlela tinharhu leti swiga sweswo swi tirhaka ha tona, naswona hi fikelele makumu lama tiyisaka nhlana. Hi ku kongoma, Bibele yi profeta leswaku Xikwembu xi ta lovisa vuhomboloki ni swilo swin’wana leswi cinisaka vanhu gija, naswona xi ta katekisa vanhu emafambiselweni ya xona lamantshwa, lawa xi ma tshembiseke.

 6. Xana vuprofeta bya vumune malunghana ni “matilo lamantshwa ni misava leyintshwa” byi vulavula hi yini?

⁶ Sweswi a hi kambisiseni mhaka leyi saleke ya xiga lexi nge “matilo lamantshwa ni misava leyintshwa,” eka Esaya 66:22-24: “‘Tanihi leswi matilo lamantshwa ni misava leyintshwa leyi ndzi yi endlaka swi nga emahlweni ka mina,’ ku vula Yehovha, ‘hi ndlela yoleyo vana va n’wina ni vito ra n’wina swi ta tshama swi ri kona. Kunene ku suka eku thwaseni ka n’weti ku ya eku thwaseni ka n’weti ni ku suka eka savata ku ya eka savata, nyama hinkwayo yi ta nkhinsama emahlweni ka mina,’ ku vula Yehovha. ‘Entiyisweni va ta huma kutani va languta mintsumbu ya vanhu lava a va tlula nawu wa mina; hikuva swivungwana leswi nga eka vona a swi nge fi, ni ndzilo wa vona a wu nge timeki, va ta va nchumu lowu hlambisaka timbilu emahlweni ka nyama hinkwayo.’”

 7. Ha yini hi fanele hi fikelela makumu ya leswaku Esaya 66:22-24 yi ta hetiseka enkarhini lowu taka?

⁷ Vuprofeta lebyi byi hetisekile eka Vayuda loko va vuyela eka rikwavo, kambe a byi ta tlhela byi hetiseka hi ndlela yin’wana. A byi ta hetiseka endzhaku swinene ka ku tsariwa ka papila ra vumbirhi ra Petro ni buku ya Nhlavutelo, hikuva a byi kombetela eka ‘matilo ni misava leyintshwa’ ya nkarhi lowu taka. Hi nga langutela ku hetiseka ka byona ko hlawuleka ni loku heleleke, emafambiselweni lamantshwa. Xiya swiyimo swin’wana leswi hi nga langutelaka ku swi tsakela.

8, 9. (a) Vanhu va Xikwembu va ta ‘tshama va ri kona’ hi ndlela yihi? (b) Hi yihi nhlamuselo ya vuprofeta lebyi nge malandza ya Yehovha ma ta gandzela “ku suka eku thwaseni ka n’weti ku ya eku thwaseni ka n’weti ni ku suka eka savata ku ya eka savata”?

⁸ Nhlavutelo 21:4 yi vula leswaku rifu a ri nge he vi kona. Esaya ndzima 66 yi pfumelelana na swona. Eka ndzimana 22, hi kuma leswaku Yehovha wa swi tiva leswaku matilo lamantshwa ni misava leyintshwa a swi nge vi swa nkarhinyana. Ku tlula kwalaho, vanhu vakwe va ta hanya hi masiku; va ta ‘tshama va ri’ emahlweni ka yena. Swilo leswi Xikwembu xi swi endleleke vanhu lava xi tihlawuleleke vona swi hi nyika xivangelo xa ku tiyiseka. Vakreste va ntiyiso va langutane ni nxaniso wa tihanyi, hambi ku ri matshalatshala lamakulu ya ku va herisa. (Yohane 16:2; Mintirho 8:1) Kambe, hambi va ri valala va matimba swinene va vanhu va Xikwembu, vo tanihi Hosi Nero wa le Rhoma kun’we na Adolf Hitler, a va swi kotanga ku herisa vanhu va Xikwembu vo tshembeka, lava byarhaka vito ra xona. Yehovha u hlayise vandlha ra vanhu vakwe, naswona ha tiyiseka leswaku wa ha ta ri hlayisa.

⁹ Hilaha ku fanaka, lava va tshembekaka eka Xikwembu tanihi swirho swa misava leyintshwa, lava nga vandla ra vagandzeri va ntiyiso emisaveni leyintshwa, va ta tshama va ri kona, hikuva va ta va va gandzela Muvumbi wa swilo hinkwaswo hi ndlela leyi tengeke. A va nge n’wi gandzeli hi xiwelo kumbe leswaku va hetisisa nawu ntsena. Nawu lowu Xikwembu xi wu nyikeke Vaisrayele hi ku tirhisa Muxe, a wu lerisa swiendlo swo karhi swa vugandzeri n’hweti yin’wana ni yin’wana, leswi fambisanaka ni ku tshama ka n’weti, ni vhiki rin’wana ni rin’wana, leswi fambisanaka ni siku ra Savata. (Levhitika 24:5-9; Tinhlayo 10:10; 28:9, 10; 2 Tikronika 2:4) Kutani Esaya 66:23 yi vulavula hi ku gandzela Xikwembu minkarhi hinkwayo, vhiki na vhiki ni n’hweti yin’wana ni yin’wana. Lava va nga pfumeriki leswaku Xikwembu xi kona, ni vakanganyisi va vukhongeri, va ta va va nga ha ri kona hi nkarhi wolowo. “Nyama hinkwayo yi ta nkhinsama emahlweni ka” Yehovha.

 10. Ha yini u fanele u tiyiseka leswaku misava leyintshwa a yi nge onheriwi makumu hi vanhu vo homboloka?

¹⁰ Esaya 66:24 yi hi tiyisekisa leswaku ku rhula ni vululami a swi nge he kavanyetiwi emisaveni leyintshwa. Vanhu vo homboloka va nge swi onhi. U nga rivali leswaku 2 Petro 3:7 yi vula leswaku “siku ra vuavanyisi ni ra ndzoviso wa vanhu lava va nga xi xiximiki Xikwembu” ri le ndleleni. Lava va nga ta lovisiwa va ta va vanhu lava nga xi xiximiki Xikwembu. Lava va nga riki na nandzu a va nge karhatiwi hi munhu, ku hambana ni leswi swi talaka ku endleka etinyimpini ta vanhu, laha ku faka vaaki vo tala ku tlula masocha. Muavanyisi Lonkulu wa hi tiyisekisa leswaku hi siku rakwe ku ta lovisiwa vanhu lava nga xi xiximiki Xikwembu.

 11. Esaya u kombisa leswaku byi ta va byihi vumundzuku bya mani na mani loyi a xandzukelaka Xikwembu ni vugandzeri bya xona?

¹¹ Vanhu vo lulama lava nga ta pona va ta swi vona leswaku rito ra Xikwembu ra vuprofeta ri tiyisile. Vuprofeta bya ndzimana 24 byi vula leswaku “mintsumbu ya vanhu lava a va tlula nawu” wa Yehovha a yi ta va vumbhoni bya vuavanyisi byakwe. Marito lawa Esaya a ma tirhiseke ma nga twala ma tsema nhlana. Kambe ma pfumelelana ni leswi swi tshameke swi endleka. Ehandle ka marhangu ya muti wa khale wa Yerusalema, a ku ri ni tindhawu to lahlela thyaka eka tona, naswona minkarhi yin’wana a ku lahleriwa mintsumbu ya swigevenga leswi dlayiweke leswi voniweke swi nga ku fanelekeli ku lahliwa hi ndlela leyi xiximekaka.a Kwalaho, swivungu ni ndzilo wa malangavi a swi nga teki nkarhi swi nga si munya thyaka ni mintsumbu yoleyo. Swi le rivaleni leswaku nhlamuselo ya Esaya yi fanekisela makumu ya vuavanyisi bya Yehovha ehenhla ka vadyohi.

Leswi A Swi Tshembiseke

 12. Esaya u ya emahlweni a nyika nhlamuselo yihi malunghana ni vutomi emisaveni leyintshwa?

¹² Nhlavutelo 21:4 yi hi tivisa swilo swin’wana leswi nga ta ka swi nga vi kona emafambiselweni lamantshwa lama taka. Kambe, xana ku ta va na yini? Xana vutomi byi ta va njhani? Xana hi nga kuma vuthala lebyi tshembekaka? Ina. Esaya ndzima 65 yi profeta swiyimo leswi hi nga ta swi tsakela loko Yehovha a hi pfumelela ku hanya, hi nkarhi lowu a nga ta vumba matilo lamantshwa ni misava leyintshwa ro hetelela. Lava va nga ta kuma nkateko wa ku tshama emisaveni leyintshwa hilaha ku nga heriki a va nge dyuhali kumbe ku fa. Esaya 65:20 ya hi tiyisekisa yi ku: “A nge he vi kona la nga ta an’wa masiku ma nga ri mangani endhawini yoleyo, hambi ku ri munhu la kuleke loyi a nga ma hetisisiki masiku yakwe; hikuva munhu u ta fa a ha ri mufana, hambiloko a ri ni malembe ya 100 hi vukhale; kasi loko ku ri mudyohi, hambiloko a ri ni malembe ya 100 hi vukhale u ta rhuketeriwa.”

 13. Esaya 65:20 yi hi tiyisekisa njhani leswaku vanhu va Xikwembu va ta tshama va hlayisekile?

¹³ Loko vuprofeta lebyi byi hetiseka ro sungula ehenhla ka vanhu va ka va Esaya, a swi vula ku hlayiseka ka vana etikweni. A ku nga ri na valala lava a va ta ta va ta teka tincece kumbe va ta yayarhela vanhu lava a va ha titwa kahle, hilaha Vababilona va tshameke va endla hakona. (2 Tikronika 36:17, 20) Emisaveni leyintshwa leyi taka, vanhu va ta tshama va hlayisekile, va tsakela vutomi. Loko munhu a hlawula ku xandzukela Xikwembu, u ta khawula. Xikwembu xi ta n’wi susa. Ku vuriwa yini loko mudyohi la xandzukaka a ri ni malembe ya dzana hi vukhale? U ta fa “a ha ri mufana,” a nge hanyi hi masiku.—1 Timotiya 1:19, 20; 2 Timotiya 2:16-19.

14, 15. Hi ku ya hi Esaya 65:21, 22, i mintirho yihi leyinene, leyi u nga langutelaka ku yi endla?

¹⁴ Ematshan’weni yo nyikela vuxokoxoko bya ndlela leyi munhu la dyohaka hi vomu a nga ta susiwa ha yona, Esaya u hlamusela ta vutomi bya le misaveni leyintshwa. Ringeta ku tivona hi mahlo ya mianakanyo exivonweni lexi. Leswi u nga rhangaka u swi vona hi mahlo ya mianakanyo i swilo leswi u khumbekaka ngopfu ha swona. Esaya u hi xaxametela swona eka ndzimana 21 na 22: “Kunene va ta aka tindlu va tshama eka tona; kunene va ta rima masimu ya vhinya va dya mihandzu ya wona. A va nge aki kutani ku tshama un’wana; a va nge rimi kutani ku dya un’wana. Hikuva masiku ya vanhu va mina ma ta fana ni masiku ya murhi; ni ntirho wa mavoko ya vona, vahlawuriwa va mina va ta wu tirhisa hi xitalo.”

¹⁵ Loko u nga swi koti ku aka kumbe ku rima ntanga, vuprofeta bya Esaya byi kombisa leswaku u ta dyondzisiwa swona. Kambe, xana u nga swi tsakela ku dyondzisiwa swona hi vadyondzisi va vutshila, kumbe u pfuniwa hi vaakelani lava nga ni musa? Esaya a nga vulanga leswaku yindlu ya wena yi ta va ni mafasitere lamakulu lama nga nghenisiwangiki manghilazi, lama nga ni swifunengeto leswi nga ta pfumelela rimoyana ra le ndhawini yo hisa leswaku u tiphina ha rona, naswona a nga vulanga leswaku mafasitere ya kona ma ta va ma nghenisiwe manghilazi, lawa u nga ta languta ehandle ha wona, loko tinguva ti cinca. Xana yindlu ya wena yi ta va ni lwangu leri voyameke, leswaku mati ya mpfula ni gamboko ma halakela ehansi? Kumbe, xana maxelo ya kona ma ta lava leswaku yindlu ya wena yi va ni lwangu leri andlalekeke—ku fana ni malwangu ya le Vuxa Xikarhi—leri u nga tshamaka eka rona ni va ndyangu wa wena mi dya swakudya swo xawula kumbe mi tidyela mabulo?—Deteronoma 22:8; Nehemiya 8:16.

 16. Ha yini u fanele u langutela ku eneriseka hi ku helela emisaveni leyintshwa?

¹⁶ Lexi nga xa nkoka swinene ku tlula timhaka to tano i ku tiva leswaku u ta va ni kaya ra wena. Ri ta va kaya ra wena—hayi ku fana ni namuntlha, laha u nga dzukaka nyuku u aka yindlu, kambe ku ta tshama un’wana. Esaya 65:21 yi tlhela yi vula leswaku u ta byala mirhi ya mihandzu u dya yona. Ina, sweswo swi katsakanya xiyimo lexi nga ta va kona. U ta eneriseka swinene hi leswi u swi endleke, ku nga mihandzu ya mavoko ya wena. Sweswo u ta kota ku swi endla nkarhi wo leha—ku “fana ni masiku ya murhi.” Kunene, sweswo swi yi fanela kahle nhlamuselo leyi nge “swilo hinkwaswo swi va leswintshwa”!—Pisalema 92:12-14.

 17. Hi xihi xitshembiso lexi nga xikhutazo lexikulu eka vatswari?

¹⁷ Loko u ri mutswari, marito lama landzelaka ma ta khumba mbilu ya wena: “A va nge tirheli swa hava hi matimba, naswona a va nge he velekeli ku karhateka; hikuva i vana lava katekisiweke va Yehovha, swin’we ni vatukulu va vona. Entiyisweni mina ndzi ta va hlamula va nga si huwelela; loko va ha vulavula, mina ndzi ta va twa.” (Esaya 65:23, 24) Xana wena u tshame u swi twa leswaku swi njhani ‘ku velekela ku karhateka’? A swi kali swi lava ku xaxameta swiphiqo leswi vana va nga ha vaka va ri na swona, leswi karhataka vatswari ni van’wana. Emhakeni yoleyo, hinkwerhu hi tiva vatswari lava khomekeke swinene hi mintirho kumbe timhaka ta vuhungasi, lerova va dzumba nkarhi wutsongo ni vana va vona. Ku hambana ni sweswo, Yehovha wa hi tiyisekisa leswaku u ta hi yingisa, a enerisa swilaveko swa hina, naswona u ta tshama a rhiye ndleve.

 18. Ha yini u fanele u langutela ku tsakisiwa hi swiharhi emisaveni leyintshwa?

¹⁸ Loko wa ha anakanya hi leswi u nga tiphinaka ha swona emisaveni leyintshwa, hi mahlo ya mianakanyo vona xivono lexi rito ra Xikwembu ra vuprofeta ri xi kombisaka: “‘Mhisi ni xinyimpfana swi ta dya swin’we, nghala yi ta dya byanyi kukota nkunzi; kasi loko ku ri nyoka, swakudya swa yona ku ta va ntshuri. A va nge endli swo biha kumbe ku onha entshaveni ya mina hinkwayo yo kwetsima,’ ku vule Yehovha.” (Esaya 65:25) Vanhu lava nga ni vutshila va ringetile ku mpfampfarhuta xivono xo tano, kambe leswi a hi norho. Xi ta hetiseka hakunene. Ku ta va ni ku rhula exikarhi ka vanhu ni swiharhi. Vativi va mahanyelo ya swilo ni lava rhandzaka swiharhi va heta nkarhi wo tala evuton’wini bya vona va dyondza mixaka yi nga ri yingani ya swiharhi kumbe rixaka rin’we ntsena ra swivumbiwa swo karhi. Ku hambana ni sweswo, anakanya hi leswi u nga ta kota ku swi dyondza loko swiharhi swi nga ha va chavi vanhu. Kutani u ta kota ni ku tshinelela tinyenyana ni swihadyana leswi tshamaka eswihlahleni kumbe emakhwatini—ina, u ta swi xiyisisa, u swi dyondza ni ku swi tsakela. (Yobo 12:7-9) U ta kota ku endla tano hi ku ntshunxeka, u nga chavi ku vavisiwa hi munhu kumbe xiharhi. Yehovha u ri: “A va nge endli swo biha kumbe ku onha entshaveni ya mina hinkwayo yo kwetsima.” Sweswo swi ta va swi hambane hi ku helela ni leswi hi swi vonaka ni ku hlangavetana na swona namuntlha!

19, 20. Ha yini vanhu va Xikwembu va hambane swinene ni vanhu vo tala namuntlha?

¹⁹ Hilaha swi boxiweke hakona eku sunguleni, vanhu va pfa va ba ehansi loko va vhumbha swa nkarhi lowu taka, hambileswi vo tala va tivutisaka swo tala hi ta gidi ra malembe lerintshwa. Sweswo swi siya vo tala va hele matimba, va dungekile ni ku va ni gome. Peter Emberley, mukongomisi wa yunivhesiti yin’wana ya le Canada, u tsarile a ku: “Vanhu vo tala [lava kuleke] se va langutane ni swivutiso swa nkoka malunghana ni vukona bya vanhu. Xana ndzi mani? Xana ndzi tiyimisele ku fikelela pakani yihi? Xana ndzi ta xi siyela ndzhaka yihi xitukulwana lexi taka? Loko va fika emalembeni ya le xikarhi va lwela ku kuma ku rhula ni xikongomelo xa vutomi bya vona.”

²⁰ Swa twisiseka leswaku ha yini vo tala va ri exiyin’weni xexo. Va nga lava ku tiphina hi vutomi hi ku endla swintirhwana swo karhi kumbe vuhungasi lebyi tsakisaka. Kambe a va swi tivi leswi vumundzuku byi va khomeleke swona, hikwalaho va hanya vutomi lebyi nga riki na xikongomelo xa xiviri kumbe lebyi nga riki na ku rhula. Kutani, teka sweswo u swi ringanisa ni ndlela leyi wena u langutaka vutomi ha yona, hi ku ya hi leswi hi buleke ha swona. Wa swi tiva leswaku ematilweni lamantshwa ni le misaveni leyintshwa leyi Yehovha a yi tshembiseke, hi ta languta matlhelo hinkwawo kutani hi tibyela etimbilwini ta hina hi ku, ‘Hakunene Xikwembu xi endle swilo hinkwaswo swi va leswintshwa!’ Hi ta eneriseka hakunene!

 21. I yinhla yihi leyi kumekaka eka Esaya 65:25 ni le ka Esaya 11:9?

²¹ Ku anakanya hi ku hanya emisaveni leyintshwa ya Xikwembu a hi ku hundzeleta swilo. Hi xona xi hi rhambaka ni ku hi khutazela ku xi gandzela hi ntiyiso sweswi, kutani swa hi fanela ku kuma vutomi loko ‘vanhu va nga ha endli swo biha kumbe ku onha entshaveni hinkwayo leyo kwetsima.’ (Esaya 65:25) Kambe, xana wa swi tiva leswaku eku sunguleni Esaya u vule mhaka leyi fanaka na leyi ni leswaku u katse yinhla leyi nga ya nkoka swinene eka hina, leswaku hi yi tsakela hakunene misava leyintshwa? Esaya 11:9 yi ri: “A va nge endli swo biha kumbe ku onha entshaveni ya mina hinkwayo yo kwetsima; hikuva kunene misava yi ta tala hi ku tiva Yehovha kukota mati lama funengetaka lwandle.”

 22. Ku kambisisa ka hina vuprofeta bya mune bya Bibele swi fanele swi tiyisa ku tiyimisela ka hina ku endla yini?

²² “Ku tiva Yehovha.” Loko Xikwembu xi endla swilo hinkwaswo swi va leswintshwa, vaaki va misava va ta va ni vutivi lebyi kongomeke malunghana na xona ni ku rhandza ka xona. Sweswo a swi nge vuli ku dyondza hi swiharhi ntsena. Swi katsa ni ku dyondza Rito leri xi ri huhuteleke. Hi xikombiso, anakanya hi swilo swo tala swonghasi leswi hi swi kumeke hi ku kambisisa vuprofeta bya mune ntsena lebyi vulavulaka hi “matilo lamantshwa ni misava leyintshwa.” (Esaya 65:17; 66:22; 2 Petro 3:13; Nhlavutelo 21:1) U ni xivangelo lexi twalaka xa ku hlaya Bibele siku na siku. Xana wa swi endla sweswo? Loko swi nga ri tano, hi yihi mindzulamiso leyi u nga yi endlaka leswaku siku na siku u kota ku hlaya marito yo karhi lama humaka eka Xikwembu? Ematshan’weni yo langutela ku tsakela misava leyintshwa ntsena, u ta kuma ntsako lowu engetelekeke sweswi, ku fana ni mupisalema.—Pisalema 1:1, 2.

[Nhlamuselo ya le hansi]

A Wu Ta Hlamurisa Ku Yini?

• Ha yini hi fikelela makumu ya leswaku leswi profetiwaka hi Esaya 66:22-24 swa ha ta endleka?

• I yini leswi u swi languteleke hi mahlo-ngati eka swilo leswi boxiweke hi vuprofeta bya Esaya 66:22-24 ni bya Esaya 65:20-25?

• U ni swivangelo swihi swa ku tiyiseka hi vumundzuku bya wena?

[Swifaniso leswi nga eka tluka 15]

Esaya, Petro na Yohane va profete ta “matilo lamantshwa ni misava leyintshwa”