‘Ku Katekisiwa Kukondza Ku Nga Ha Pfumaleki Nchumu’

1, 2. (a) I yini leswi ha un’we wa hina a faneleke a hlawula swona leswaku a ta vuyeriwa? (b) I ku hetiseka ka vuprofeta byihi loku nga ta hi tisela mikateko?

HI HANYA enkarhini wa vuavanyisi ni mikateko naswona lowu i nkarhi wa ku hohloka ka vukhongeri ni wa ku pfuxetiwa ka vukhongeri bya ntiyiso. A swi kanakanisi leswaku u langutele ku katekisiwa naswona u tsakela ku vona swilo leswinene leswi ku pfuxetiwa ka vukhongeri bya ntiyiso ku swi endlaka sweswi ni leswi ku nga ta swi endla enkarhini lowu taka! Kambe u nga tiyiseka njhani leswaku swilo leswi swi ta endleka? Nhlamulo ya kona yi katsa vuprofeta lebyi hetisekeke hi xitalo endzhakunyana ka ku sungula ka “masiku ya makumu” lama sunguleke hi 1914. (2 Timotiya 3:1) Malakiya u profete a ku: “‘Hi xitshuketa ku ta ta Hosi ya ntiyiso [Yehovha] etempeleni ya Yena, leyi n’wina mi yi lavaka, ni murhumiwa wa ntwanano, loyi mi n’wi tsakelaka. Maswivo! Kunene u ta ta,’ Yehovha wa mavuthu u vurile.”—Malakiya 3:1.

² Vuprofeta lebyi byi nga bya nkoka evuton’wini bya wena byi kumeka ebukwini yo hetelela ya tibuku ta vaprofeta lava 12. Tanihi leswi hi gimetaka bulo ra hina ra vaprofeta lava, leswi Malakiya a swi tsaleke i swa nkoka ngopfu. Buku yakwe yi tamele ndzetelo wa nkoka lowu pfunaka wena swin’we ni malandza laman’wana ya Yehovha leswaku mi ‘katekisiwa, kukondza ku nga ha pfumaleki nchumu.’ (Malakiya 3:10) A hi kambisiseni ndzima 3 ya buku ya Malakiya.

 3. Ku humelele yini hi vanhu va Xikwembu va khale leswi endleke leswaku xi hetelela xi hlawula “Israyele wa Xikwembu”?

³ Kwalomu ka malembe-xidzana ya ntlhanu endzhaku ka ku fa ka Malakiya, Yehovha u nghene etempeleni ya xiviri eYerusalema a ya avanyisa vanhu lava A endleke ntwanano na vona, a yimeriwe hi Kreste (la nga “murhumiwa wa ntwanano [wa Abrahama]”). Vunyingi bya vaaki va tiko a va nga ha faneleki emahlweni ka Yehovha, kutani u va fularherile. (Matewu 23:37, 38) Vumbhoni bya sweswo byi vonaka eka leswi humeleleke hi 70 C.E. A swi kanakanisi leswaku wa xi tiva xivangelo xa ku va Xikwembu xi hlawule “Israyele wa Xikwembu,” ku nga tiko ra moya ra lava 144 000 lava hlawuriweke ematikweni hinkwawo. (Vagalatiya 6:16; Varhoma 3:25, 26) Hambiswiritano, koloko a ku nga ri ku hetiseka ko hetelela ka vuprofeta bya Malakiya. Byi tlhela byi vulavula hi minkarhi ya sweswi ni hi ntshembo wa wena wa nkarhi lowu taka wa ku ‘katekisiwa kukondza ku nga ha pfumaleki nchumu.’

 4. Hi xihi xivutiso lexi a xi fanele xi hlamuriwa endzhaku ka loko Yesu a vekiwe exiluvelweni hi 1914?

⁴ Ku hetiseka ka vuprofeta bya Bibele ku tiyisekisa leswaku hi lembe ra 1914, Yesu Kreste u vekiwe ku va Hosi ya Mfumo wa Yehovha etilweni. Hiloko ku fika nkarhi wa leswaku Yesu a swi veka erivaleni leswaku i ntlawa wihi wa Vakreste lowu amukelekaka eka Xikwembu. I mani loyi a a ta faneleka loko ku kambisisiwa lava tengeke emoyeni? Nhlamulo u nga yi kuma eka leswi vuriweke hi Malakiya loko a ku: “I mani loyi a nga ta tiyiselela siku ra ku ta ka yena, naswona i mani loyi a nga ta yima loko a humelela? Hikuva u ta fana ni ndzilo wa loyi a tengisaka.” (Malakiya 3:2) Yehovha u te rini “etempeleni” ya yena a ta avanyisa, naswona u te hi ndlela yihi?

5, 6. (a) Loko Yehovha a nghena etempeleni yakwe ya moya leswaku a yi kambela, xana u va kume va ri njhani lava va tivulaka vagandzeri va yena? (b) Xana malandza ya Xikwembu lama totiweke hi moya a ma fanele ma endliwa yini?

⁵ Handle ko kanakana, Xikwembu a xi nghenanga etempeleni leyi akiweke hi maribye ni ndzhope. Tempele yo hetelela ya vugandzeri bya ntiyiso yi lovisiwe hi 70 C.E. Kambe, Yehovha u nghene etempeleni ya moya, ku nga lunghiselelo ro pfuna vanhu leswaku va kota ku n’wi tshinelela ni ku n’wi gandzela exisekelweni xa gandzelo ra Yesu ra nkutsulo. (Vaheveru 9:2-10, 23-28) Entiyisweni, tikereke ta Vujagana a ti nga faneleki etempeleni yoleyo ya moya, hikuva a ti ri xiphemu xa mafambiselo ya vukhongeri lebyi nga ni nandzu wa ngati tlhelo byi nga nghwavava ya moya, leyi dyondzisaka tidyondzo ta mavunwa ematshan’weni yo yisa vugandzeri lebyi tengeke emahlweni. Yehovha u ve “mbhoni ya xihatla” leyi lwisanaka na byona, na wena wa swi tiva leswaku vuavanyisi byakwe a byi ri byo lulama. (Malakiya 3:5) Hambiswiritano, endzhaku ka ku simekiwa ka Mfumo wa Xikwembu, ku ve ni ntlawa wa Vakreste lava tirhaka eswivaveni swa tempele ya Xikwembu ya moya lava kombiseke leswaku va tshembekile eka Xikwembu hi ku tiyisela miringo yo tika. Nilokoswiritano, hambi ku ri vatotiwa a va fanele va basisiwa. Matsalwa ya vaprofeta lava 12 ma vulavule hi ku basisiwa koloko, hikuva ma tamele switshembiso swo tsakisa swa ku vuyeteriwa ka malandza ya Xikwembu hi tlhelo ra moya ni ra nyama. Malakiya u profete leswaku a va ta va vanhu lava Yehovha a nga ta va “tengisa ku fana ni nsuku ni silivhere.” “Kunene eka Yehovha [a] va ta va vanhu lava va endlaka gandzelo ra nyiko hi ku lulama.”—Malakiya 3:3.

⁶ Hi ku ya hi vumbhoni byo tala, ku sukela hi 1918 ku ya emahlweni Yehovha u basise Vakreste lava totiweke, a tlhela a tengisa vugandzeri bya vona, mahanyelo ya vona ni tidyondzo ta vona.a Vona swin’we ni “ntshungu lowukulu” lowu hi ku famba ka nkarhi wu va joyineke, va vuyeriwe swinene eku basisiweni loku. (Nhlavutelo 7:9) Tanihi ntlawa lowu nga ni vun’we va hambeta va nyikela “gandzelo ra nyiko hi ku lulama” ku nga ku “tsakisa Yehovha.”—Malakiya 3:3, 4.

 7. I yini leswi ha un’we wa hina a faneleke a tivutisa swona ku vona loko a faneleka emahlweni ka Xikwembu?

⁷ Hinkwavo vanhu va Xikwembu va tano, kambe ku vuriwa yini ha un’we wa hina? U nga ha tivutisa leswi: ‘Xana ku ni laha langutelo ni swiendlo swa mina swi lavaka ku hlutiwa kona? Xana ndza ha fanele ndzi basisa mahanyelo ya mina, hilaha Yehovha a basiseke vatotiwa vakwe hakona?’ Eka tindzima to sungula ta buku leyi, hi swi vonile leswaku vaprofeta lava 12 va kandziyise malangutelo ni mahanyelo yo biha swin’we ni tindlela letinene ni swiendlo leswinene. Sweswo swi ku pfunile leswaku u tiva leswi Yehovha a ‘kombelaka leswaku u n’wi tlherisela swona.’ (Mikiya 6:8) Xiya marito lama nge “u n’wi.” Ma kandziyisa leswaku un’wana ni un’wana wa hina u fanele a tikambisisa ku vona loko a titengisile kumbe ku tibasisa hilaha ku heleleke.

 8. Yehovha u rhamba vanhu va yena leswaku va endla yini?

⁸ Xiya leswi Yehovha a hambetaka a swi vula hi nomu wa Malakiya eka ndzima 3, ndzimana 10. Kwalaho u kuma xirhambo lexi xo tsakisa lexi nge: “‘Tisani swiphemu hinkwaswo swa vukhume exitlatini, leswaku ku va ni swakudya endlwini ya mina; ndzi kombela mi ndzi ringa, emhakeni leyi,’ Yehovha wa mavuthu u vurile, ‘mi vona loko ndzi ta ka ndzi nga mi pfuleli tinyangwa ta ndhambhi ya matilo kutani ndzi mi chululela nkateko, kukondza ku nga ha pfumaleki nchumu.’” Ku rhambiwa vanhu va Xikwembu hinkwavo. Xana xirhambo lexi u xi vona xi kongome wena hi wexe?

 9. I vukhume bya muxaka muni lebyi u nga byi nyikelaka eka Yehovha?

⁹ U nga n’wi nyika njhani Yehovha “vukhume”? Phela a wu boheki ku nyikela vukhume bya xitlhavelo xa xiviri xo kota lexi a xi nyikeriwa hi ku ya hi Nawu. Sweswi Xikwembu xi langutele leswaku hi xi nyika switlhavelo swa moya. Hilaha swi hlamuseriweke hakona eka ndzima leyi hundzeke, Pawulo u vula leswaku xitlhavelo xa wena i ntirho wa wena wo chumayela. (Hosiya 14:2) Kutani muapostola u boxe xitlhavelo xa muxaka wun’wana, loko a ku: “Mi nga rivali ku endla leswinene ni ku avelana swilo ni van’wana, hikuva Xikwembu xi tsakisiwa swinene hi switlhavelo swo tano.” (Vaheveru 13:15, 16) Swi le rivaleni leswaku “vukhume” lebyi ku vulavuriwaka ha byona eka Malakiya 3:10, byi vula switlhavelo swa moya ni ku nyikela hi swilo swa nyama. Leswi u nga Mukreste la khuvuriweke, u tinyiketele eka Yehovha hilaha ku heleleke, kambe vukhume bya wena byi yimela leswi u kotaka ku swi nyika Yehovha, kumbe leswi u swi endlaka entirhweni wa yena. Byi katsa nkarhi, matimba, mali ni ku nyikela hi swilo swo karhi leswaku swi tirhisiwa entirhweni wa Yehovha.

10. Xana hi nga n’wi “ringa” njhani Yehovha hi ndlela leyi faneleke?

¹⁰ Swi fanerile leswaku u nyika Yehovha vukhume byo fanekisela, u ri karhi u susumetiwa hi rirhandzu ra xiviri ni hi ku tinyiketela! Ku hiteka na kona ka laveka! Wa swi vona leswaku siku lerikulu ra Yehovha ra karhi ra tshinela hi ku hatlisa, naswona ri “chavisa ngopfu.” (Yuwele 2:1, 2, 11) Vutomi bya vanhu byi le khombyeni. Yehovha wa ku rhamba naswona u nga xi amukela xirhambo xa yena. U kombela leswaku u n’wi “ringa.” A nga kona munhu la nga xinyataka a ringa Yehovha onge hiloko A nga tshembeki. (Vaheveru 3:8-10) Kambe u nga n’wi ringa hi ndlela leyinene hi ku titsongahata. Njhani? U ku tshembise mikateko. Loko u yingisa Xikwembu, u va u ri eku xi ringeni, swi fana niloko u tivutisa leswaku ‘Xana xi ta ndzi katekisa?’ Xona xi ku angula hi ku endla leswi xi swi tshembiseke. Xisweswo, leswi Xikwembu xi ku pfumelelaka leswaku u xi “ringa,” xi endlela leswaku u tiyiseka leswaku hakunene xi ta ku katekisa hi ndlela leyi fuweke.

11, 12. Hi yihi mikateko leyi u yi voneke leyi Yehovha a katekiseke vanhu va yena ha yona, leyi na wena u nga yi kumaka?

¹¹ Wa swi xiya leswaku vanhu va Yehovha va nyikele hi swilo swa vona swa nyama ni hi switlhavelo swa moya hi xandla lexi pfulekeke. Kutani Yehovha u va chululele “nkateko, kukondza ku nga ha pfumaleki nchumu.” U nga ha va u swi xiyile leswaku mikateko yo tano yi kumiwa hi vanhu va Xikwembu, hilaha swi vonakaka hakona eka nhlayo leyi andzaka ya Timbhoni ta Yehovha emisaveni hinkwayo ku sukela eku sunguleni ka lembe-xidzana ra vu-20 ku fikela namuntlha. Nakambe u vone “swilo [swo tala] leswi enteke swa Xikwembu” swi ya swi twisiseka. (1 Vakorinto 2:10; Swivuriso 4:18) Tivutise: Xana mina hi ndzexe swi ndzi khumbhe njhani?

¹² Swi nga ha endleka leswaku khale a wu nghena kereke, kumbe u nga ha va wa ha ku sungula ku ya eminhlanganweni ya Timbhoni ta Yehovha. Enkarhini wolowo, hi tihi tidyondzo leti sekeriweke eBibeleni leti u ti twisiseke? Kutani ringanisa leswi u swi dyondzeke ku sukela enkarhini wolowo ku fikela sweswi u vona loko u swi kota ku swi sekela hi Matsalwa. Kumbe anakanyisisa hi swilo swo enta leswi u swi dyondzeke, ku katsa ni vuprofeta lebyi nga le ku hetisekeni sweswi. Kutani u vona nhluvuko lowu u wu endleke evuton’wini bya wena hikwalaho ka leswi u tirhisaka matsalwa yo karhi ya Bibele. Kunene u endle nhluvuko lowukulu! Na wena u nga vula hilaha muapostola Petro a vuleke hakona, a ku: “Hi ni rito ra vuprofeta leri tiyisekisiweke swinene.” (2 Petro 1:19) Ntiyiso wa mhaka hileswaku: U ‘dyondzisiwe hi Yehovha’ hi byakwe naswona u le xikarhi ka Vakreste va ntiyiso, nakambe u lava ku tirhela Yehovha hilaha ku nga heriki. (Esaya 54:13) U nga vula hi ku tiyiseka leswaku u ku katekise ngopfu.

13. Swi tisa ku yini leswaku vito ra munhu ri tsariwa ebukwini ya Xikwembu ya xitsundzuxo?

¹³ Mikateko yin’wana ya Yehovha leyi boxiweke eka Malakiya 3:16, hi leyi: “Enkarhini wolowo lava va chavaka Yehovha va vulavurisanile, un’wana ni un’wana ni nakulobye, Yehovha a hambeta a rhiya ndleve, a yingisa. Kutani buku ya xitsundzuxo yi sungula ku tsariwa emahlweni ka yena yi tsaleriwa lava va chavaka Yehovha ni lava va anakanyaka hi vito ra yena.” Vatotiwa swin’we ni ntshungu lowukulu va ‘chava Yehovha’ hi ndlela leyinene. A swi kanakanisi leswaku na wena u swi teka swi ri lunghelo ku va Mbhoni ya Yehovha ni ku va la tsakeke, la anakanyaka hi vito ra yena ni ku ri tlakusa emisaveni hinkwayo? Hakunene wena hi wexe wa enerisaka hileswi u nga ni xitiyisekiso xa leswaku Yehovha a nga ku rivali ku tshembeka ka wena!—Vaheveru 6:10.

14. Xana vaprofeta lava 12 va ku pfune njhani leswaku u tiva swiendlo ni malangutelo lawa Yehovha a ma vengaka?

¹⁴ Xana wena hi wexe u nga endla njhani leswaku vito ra wena ri tsariwa eka “buku ya xitsundzuxo” leyi Yehovha a nga le ku tsaleni ka mavito ya vanhu eka yona? Tsundzuka ndzayo yin’wana ya vutlhari leyi hi yi dyondzeke etibukwini ta vaprofeta lava 12. Hi dyondze hi mahanyelo, timfanelo ni hi malangutelo lama nga n’wi tsakisiki Yehovha. Hi xikombiso, vaprofeta va hi lemukise hi mikhuva leyi Xikwembu xi vulaka leswaku yi lwisana ni milawu ya xona yo lulama, leyi nga onhaka vutomi bya hina, yo fana ni “ku tikhoma ko biha” ni “moya wa vumbhisa.” (Hosiya 4:12; 6:9) Xikwembu xa n’wi nyenya loyi a kanganyisaka munghana wakwe wa vukati kumbe swirho swin’wana swa ndyangu. (Malakiya 2:15, 16) Yehovha u huhutele vaprofeta va yena leswaku va kandziyisa yinhla ya leswaku u venga madzolonga wahi ni wahi. (Amosi 3:10) U tlhele a va huhutela ku kandziyisa mhaka yo papalata vukanganyisi etimhakeni ta mabindzu. (Amosi 5:24; Malakiya 3:5) Tibuku leta 12 ti kandziyisa ndlela leyi swi nga swa nkoka ha yona leswaku vavanuna lava va byarhisiweke vutihlamuleri va nga avanyisi hi ku ya hi nghohe kumbe hi ku ya hi ku navela ka vona vini.—Mikiya 7:3, 4. 

15. Hi byihi vuyelo byin’wana lebyinene lebyi u nga ta byi kuma loko u landzela switsundzuxo swa vaprofeta lava 12?

¹⁵ Hambiswiritano, vaprofeta a va vulavulanga ntsena hi swilo leswi hi faneleke hi swi papalata. Va yi veke erivaleni ndlela leyi hi nga ta vuyeriwa ha yona loko hi namarhela milawu ya Xikwembu. Vuxaka bya hina na Yehovha byi ta ya byi tiya. (Mikiya 4:5) Loko ku ri ni vululami evandlheni, vandlha ri ta tiya ri tlhela ri hiseka. Vukati bya hina na byona byi ta tiya, naswona ndyangu wa hina wu ta va ni vun’we ni ku hisekela timhaka ta moya. (Hosiya 2:19; 11:4) Loko hi tshembeka naswona hi nga yi hi nghohe vanhu va ta hi xixima. Loko hi tekelela tintswalo ta Yehovha, hi ta va ni ntwela-vusiwana ni musa eka vamakwerhu kutani na vona va ta endla tano eka hina. (Mikiya 7:18, 19) Kunene, hi ta va hi ri exikarhi ka vamakwerhu lava rhangisaka timhaka ta moya, lava va rhandzaka ntiyiso ni ku rhula, naswona xa nkoka ngopfu hi ta va vanghana va Yehovha. (Zakariya 8:16, 19) Na wena u karhi wa tiphina hi mikateko yoleyo!

16. Hi kwihi ku hambana loku vonakaka namuntlha, naswona ku ta vula yini esikwini ra Yehovha?

¹⁶ Eka leswi ha ha ku swi dyondzaka “ku hambana exikarhi ka lowo lulama ni lowo homboloka” ka vonaka swinene—hileswaku exikarhi ka Vakreste va ntiyiso ni va mavunwa. (Malakiya 3:18) Hi tikarhatela ku namarhela milawu ya Yehovha, loko hi hala tlhelo misava hinkwayo yi ri karhi yi mbombomela emikhuveni leyi kombisaka ku delela Xikwembu. Nakambe wa swi tiva leswaku swiendlo sweswo swi ta va tisela vuyelo byo vava loko “siku lerikulu ra Yehovha” ri fika.—Sofaniya 1:14; Matewu 25:46.

17. Rungula leri nga ebukwini leyi u ta ri tirhisa njhani enkarhini lowu taka?

¹⁷ Swi le rivaleni leswaku rungula ra vaprofeta lava 12 ra ha tirha ninamuntlha. Loko u langutana ni swiphiqo swo karhi kumbe loko u lava ku endla swiboho swo karhi, u fanele u tlhela u kambisisa rungula leri andlariweke eka tindzima ta buku leyi ya Malakiya. Xisweswo u ta tikombisa u ri la tsakelaka ku ya emahlweni u leteriwa hi tindlela ta Yehovha swin’we ni ku “famba emintileni ya yena.” (Mikiya 4:2) Hambiswiritano, u nga endli tano sweswi ntsena, kambe hambeta ku ya fika emakumu. Lexi u xi navelaka hi mbilu hinkwayo i ku va vito ra wena ri tsariwa hilaha ku nga heriki ebukwini ya Yehovha ya xitsundzuxo, a swi tano ke? Tibuku ta vaprofeta lava 12 ti ta ku pfuna ku fikelela pakani yoleyo.

18. Hi yihi yinhla ya nkoka leyi u yi kumaka eka Yuwele 2:32, naswona muapostola Pawulo u engetele xilaveko xihi eka yona?

¹⁸ Loko Yuwele a kandziyisa yinhla-nkulu leyi nga ta ku endla leswaku u amukeleka eka Xikwembu hilaha ku nga heriki, u te: “Un’wana ni un’wana loyi a vitanaka vito ra Yehovha u ta pona.” (Yuwele 2:32) Vaapostola vambirhi ku nga Petro na Pawulo, va tshahe mhaka leyi ya nkoka. (Mintirho 2:21; Varhoma 10:13) Pawulo u engetele yinhla yin’wana eka xikhutazo xexo a ku: “Va ta n’wi vitanisa ku yini loyi va nga pfumelangiki eka yena?” (Varhoma 10:14) A swi kanakanisi leswaku wa swi lava ku vitana vito ra Yehovha ni ku va ni ripfumelo eka yena sweswi ni hilaha ku nga heriki!

19. Ku vitana vito ra Yehovha swi katsa yini?

¹⁹ Ku vitana vito ra Yehovha a swi vuli ku ri tiva ni ku ri tirhisa ntsena. (Esaya 1:15) Mongo wa Yuwele 2:32 wu kandziyisa mhaka ya ku hundzuka hi mbilu hinkwayo ni ku tshemba ku rivaleriwa hi Yehovha. (Yuwele 2:12, 13) Ku vitana vito ra Xikwembu swi vula ku xi tiva, ku xi tshemba, ku xi yingisa ni ku rhangisa xona evuton’wini bya hina. Ina, ku tirhela Yehovha ku fanele ku va nchumu wa nkoka evuton’wini bya hina. Hikwalaho, sweswo swi endla leswaku munhu a hanya vutomi lebyi enerisaka hilaha ku nga heriki, ku nga nkateko lowu humaka eka Xikwembu.—Matewu 6:33.

20. Loko u ri karhi u kombisa ripfumelo, hi byihi vuyelo byo hlamarisa lebyi u nga ta byi kuma?

²⁰ Yehovha u vule hi nomu wa Habakuku a ku: “Loyi a lulameke, u ta hambeta a hanya hikwalaho ka vutshembeki byakwe.” (Habakuku 2:4) U nga ma rivali marito lawa, hikuva i tin’wana ta tidyondzo ta nkoka ta Bibele. Pawulo u tirhise tsalwa rero kanharhu ematsalweni yakwe yo kwetsima.b (Varhoma 1:16, 17; Vagalatiya 3:11, 14; Vaheveru 10:38) Leswaku u kota ku tlangela ntiyiso wa Rito ra Xikwembu swi lava leswaku u va ni ripfumelo egandzelweni ra Yesu Kreste, leri a ri nyikeleke hikwalaho ka swidyoho swa hina. Yesu u te: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a . . . va ni vutomi lebyi nga heriki.” Nakambe hi hlaya leswi: “Un’wana ni un’wana loyi a kombisaka ripfumelo eka N’wana u ni vutomi lebyi nga heriki.” (Yohane 3:16, 36) Gandzelo rero ri susa xidyoho lexi nga susiwaka ntsena hi Mukutsuri wa hina. Endzhaku ko tsala marito ya Yehovha lama hlamuselaka leswi siku ra Yena lerikulu ri nga ta swi endla emisaveni leyo homboloka ya Sathana, Malakiya u ye emahlweni a ku: “N’wina lava va chavaka vito ra mina, kunene dyambu ra ku lulama ri ta mi voningela, ri ri ni matimba yo tshungula etimpapeni ta rona.” Ina, Yesu u ta voninga a ri ni matimba yo tshungula. Sweswo swi katsa ndlela leyi hi tshunguriwaka ha yona hi tlhelo ra moya namuntlha. Kambe, lexi tsakisaka hi leswaku hi ta hanyisiwa hilaha ku heleleke enyameni emisaveni leyintshwa!—Malakiya 4:2.

21. Ha yini u fanele u va ni ntshembo wa leswaku Yehovha u ta xi hetisisa xikongomelo xakwe?

²¹ Nakambe i swa nkoka ku va ni ripfumelo eka vuswikoti bya Xikwembu byo hetisisa ku rhandza ka xona. Enkarhini wa Mikiya, a swi tika leswaku vanhu va tshembana. Muprofeta loyi u te: “U nga veki ripfumelo ra wena eka nakuloni. U nga tshembi munghana wa le xihundleni.” Hambiswiritano, Mikiya a a tshembe Yehovha; na wena u fanele U n’wi tshemba. Mikiya u te: “Kambe loko ku ri mina, ndzi ta tshama ndzi rindzele Yehovha.” (Mikiya 7:5, 7) Yehovha u ni matimba yo hetisisa xikongomelo xa yena xa ku lwela vuhosi bya yena ni ku ponisa vanhu lava nga ni ripfumelo, a nga fani ni vanhu lava cinca-cincaka.

22. Lava va vitanaka vito ra Yehovha hi ripfumelo va ta vuyeriwa hi yini?

²² Na wena u nga vula leswi vuriweke hi Habakuku loko a ku: “Ndzi ta khana eka Yehovha; ndzi ta tsakela Xikwembu xa ku ponisiwa ka mina.” (Habakuku 3:18) Muprofeta Yuwele u xi veka erivaleni xivangelo xa ku tsaka ka lava vitanaka vito ra Yehovha hi ripfumelo, u ri: Va ta “pona” kumbe va ta “ponisiwa” hilaha Pawulo a swi vekeke hakona. (Yuwele 2:32; Varhoma 10:13) Va ta pona kumbe va ta ponisiwa hi ndlela yihi? Ku va ni ripfumelo ana se swi ku ponisile eka vuxisi bya Sathana ni maxangu yo tala lama nga ta wela lavo homboloka. (1 Petro 1:18) Ku tlula kwalaho, languta emahlweni u ri ni ntshembo wo pona makumu ya mafambiselo lawa yo biha ya swilo. Endzhaku ka sweswo u ta kuma mikateko yo tala leyi boxiweke hi vaprofeta lava 12.

23, 24. (a) Hi swihi swin’wana leswi vaprofeta lava 12 va hi chumbutelaka swona mayelana ni Paradeyisi? (b) Xana rungula ra vaprofeta lava 12 ri ri khumba njhani langutelo ra wena hi vumundzuku?

²³ Ku ni mikateko yo tala leyi hlayiseriweke lava “chavaka Yehovha.” (Malakiya 3:16) Van’wana va vaprofeta lava 12 va boxe xikombiso xa leswi Paradeyisi leyi taka yi nga ta va xiswona, va yi hlamusele hi ndlela leyi nga ta ku tsakisa ni ku endla leswaku u yi langutela hi mahlo-ngati. Hi xikombiso, Mikiya u tsale a ku: “Entiyisweni va ta tshama, un’wana ni un’wana ehansi ka murhi wakwe wa vhinya ni le hansi ka nkuwa wakwe, a ku nge vi na munhu loyi a va chavisaka.” (Mikiya 4:4) Entiyisweni, eMfun’weni wa Xikwembu, u ta titwa u hlayisekile naswona u ta tiphina hi ntirho wa mavoko ya wena!

²⁴ A hi norho ku langutela ku herisiwa ka mavabyi, gome ni rifu. Anakanya hi ntsako lowu nga ta va kona eka lava pfuxiwaka va ri ni ntshembo wo endliwa lava hetisekeke! Va ta vona ku hetiseka ka xiviri ka leswi Hosiya 13:14 yi vulavuleke ha swona loko yi ku: “Ndzi ta va kutsula evokweni ra Sheol; ndzi ta va kutsula eku feni. Mindzhombo ya wena yi kwihi, wena Rifu? Ku kwihi ku lovisa ka wena, wena Sheol?” Pawulo u tirhise ndzimana leyi loko a vulavula hi lava nga ta pfuxeriwa etilweni.—1 Vakorinto 15:55-57.

25. Xana u ta titwa njhani emisaveni leyintshwa?

²⁵ A swi kanakanisi nikatsongo leswaku vanhu va ta pfuxiwa laha misaveni. (Zakariya 8:6) Loko Amosi na Mikiya va profeta leswaku vanhu va Xikwembu va ta huma evuhlongeni, swi nga endleka leswaku a swi tika ku swi kholwa. Kambe sweswo swi humelerile. (Amosi 9:14, 15; Mikiya 2:12; 4:1-7) Lava vuyeke hi le vuhlongeni va angule va ku: “Hi fane ni vanhu lava va lorhaka. Enkarhini wolowo nomu wa hina wu tale ku hleka, ni ririmi ra hina ri tale ku huwelela ka ku tsaka. . . . Yehovha u endle nchumu lowukulu hi leswi a hi endleke swona. Hi tsakile.” (Pisalema 126:1-3) Yoleyo i ndlela leyi u nga ta titwa ha yona emisaveni leyintshwa loko u ri karhi u ‘katekisiwa kukondza ku nga ha pfumaleki nchumu.’

26. Xana lava va tshamaka va ri karhi va ehleketa hi siku ra Yehovha va ta vuyeriwa hi yini?

²⁶ Loko “siku ra Yehovha” se ri suse vubihi emisaveni, “vuhosi byi fanele byi va bya Yehovha,” yena ntsena. (Obadiya 15, 21) Wolowo wu ta va nkateko lowukulu eka vanhu va yena hinkwavo lava nga emisaveni. Na wena u nga va un’wana wa lava ndzima 3 ya Malakiya yi vulavulaka ha vona, loko yi ku: “‘Kunene va ta va va mina,’ Yehovha wa mavuthu u vurile, . . . ‘Ndzi ta va komba ntsetselelo, ku fana ni loko munhu a komba ntsetselelo eka n’wana wakwe loyi a n’wi tirhelaka.’” (Malakiya 3:17) Swi le rivaleni, leswaku ku tshembeka ka wena, loku ku ku endlaka u fanelekela ku ponisiwa, ku ta ku pfulela ndlela yo ‘katekisiwa kukondza ku nga ha pfumaleki nchumu.’ Hakunene wa tsakisa ntshembo lowu!