Tshama U Tsakile eNtirhweni Wa Yehovha
“Nkarhi hinkwawo tsakani eHosini. Nakambe ndzi ri, Tsakani!”—VAFILIPIYA 4:4.
1, 2. Makwerhu un’wana swin’we ni ndyangu wa yena va swi kotise ku yini ku hlayisa ntsako wa vona hambileswi va lahlekeriweke hi nhundzu ya vona?
JAMES, Mukreste la nga ni malembe ya 70 hi vukhale wa le Sierra Leone, u kulule a n’watseka vutomi bya yena hinkwabyo. Wa nga anakanya ndlela leyi a a tsake ha yona loko a hetelele a kote ku hlengeleta mali leyi ringaneke ku xava yindlu ya kahle leyi nga ni tikamara ta mune! Hambiswiritano, endzhaku ka ku va James ni ndyangu wa yena va rhurhele eka yona, ku sungule nyimpi ya xin’wana-manana etikweni rolero, hiloko yindlu ya vona yi hisiwa yi va nkuma. Va lahlekeriwe hi yindlu ya vona, kambe a va lahlekeriwanga hi ntsako wa vona. Ha yini?
2 James ni ndyangu wa yena va dzikise mianakanyo ya vona eka leswi a va sele na swona, ku nga ri eka leswi va lahlekeriweke hi swona. James u ri: “Ni hi nkarhi wa mpfilumpfilu, a hi khoma minhlangano, hi hlaya Bibele, hi khongela swin’we hi tlhela hi avelana ni van’wana switsongo leswi a hi ri na swona. Hi swi kotile ku hlayisa ntsako wa hina hikuva a hi anakanyisisa hi vuxaka lebyinene lebyi hi nga na byona na Yehovha.” Hi ku anakanyisisa hi mikateko ya vona, nkateko lowukulu wa kona, ku nga ku va ni vuxaka lebyikulu bya munhu hi xiyexe na Yehovha, Vakreste lava va tshembekaka va swi kotile ku ‘ya emahlweni va tsakile.’ (2 Vakorinto 13:11) Ina, swiyimo swa vona leswi tshikilelaka a swi nga tiyiseleleki hi ku olova. Kambe a va tshikanga ku tsaka eka Yehovha.
3. Vakreste van’wana vo sungula va tshame va tsakile hi ndlela yihi?
3 Vakreste vo sungula va langutane ni miringo leyi fanaka ni leyi James ni ndyangu wa yena va langutaneke na yona. Kambe, muapostola Pawulo u tsale marito lama landzelaka a ma tsalela Vakreste va Vaheveru: “Hi ntsako mi amukele ku phangiwa ka swilo swa n’wina.” Endzhaku Pawulo u hlamusele xihlovo xa ntsako wa vona, a ku: “Hi ku tiva leswaku mi ni swilo swo antswa ni leswi tshamaka hi masiku.” (Vaheveru 10:34) Ina, Vakreste volavo va lembe-xidzana ro sungula a va ri ni ntshembo wa matimba. A va swi langutele hi ku tiyiseka ku kuma nchumu lowu nga taka wu nga phangiwi—ku nga “harhi ya vutomi” leyi nga onhakiki eMfun’weni wa Xikwembu wa le tilweni. (Nhlavutelo 2:10) Namuntlha, ntshembo wa hina wa Vukreste—ku nga ha va wa le tilweni kumbe wa laha misaveni—wu nga hi pfuna ku tshama hi tsakile hambiloko hi langutane ni maxangu.
“Tsakani Hi Ntshembo”
4, 5. (a) Ha yini xitsundzuxo xa Pawulo xa ku ‘tsaka hi ntshembo’ a xi ri enkarhini swinene eka Varhoma? (b) I yini lexi nga vangelaka Mukreste leswaku a rivala ntshembo wa yena?
4 Muapostola Pawulo u khutaze vapfumeri-kulobye le Rhoma leswaku va ‘tsaka hi ntshembo’ wa vutomi lebyi nga heriki. (Varhoma 12:12) Xexo a xi ri xitsundzuxo lexi fikeke hi nkarhi eka Varhoma. Ku nga si hela ni malembe ya khume Pawulo a va tsalerile, va xanisiwe swinene naswona van’wana va xanisiwe va kala va fa hikwalaho ka xileriso xa Mufumi Nero. Ku pfumela ka vona leswaku Xikwembu xi ta va nyika harhi ya vutomi leyi va tshembisiweke yona handle ko kanakana ku va tiyisile eku xanisekeni ka vona. Ku vuriwa yini hi hina namuntlha?
5 Leswi hi nga Vakreste, ha swi tiva leswaku hi ta xanisiwa. (2 Timotiya 3:12) Ku tlula kwalaho, ha swi xiya leswaku “nkarhi ni xiendlakalo lexi nga languteriwangiki” swa hi wela hinkwerhu. (Eklesiasta 9:11) Mhangu yi nga ha dlaya un’wana loyi hi n’wi rhandzaka. Vuvabyi lebyi nga tshungulekiki byi nga ha dlaya mutswari kumbe munghana lonkulu. Loko hi nga tshameli ku nyikela nyingiso lowukulu eka ntshembo wa Mfumo, vumoya bya hina byi nga ha va ekhombyeni loko miringo yo tano yi humelela. Hikwalaho, hi ta va hi endla kahle loko hi tivutisa swivutiso leswi, ‘Xana ndza “[tsaka] hi ntshembo”? Ndzi anakanyisisa ha wona kangani? Xana Paradeyisi leyi taka i ya xiviri eka mina? Xana ndza tivona ndzi ri eka yona? Xana ndza ha ku langutele hi mahlo-ngati ku herisiwa ka mafambiselo lawa ya swilo loku taka hilaha a ndzi ku langutele hakona loko ndzi dyondza ntiyiso ro sungula?’ Xivutiso lexi xo hetelela xi lava leswaku hi anakanyisisa swinene ha xona. Ha yini? Hikuva loko hi hanye kahle, hi ri ni timali ta hina naswona hi tshama etikweni leri nga riki na nyimpi, laha swakudya swi nga kayiveliki kumbe ku nga riki na makhombo ya ntumbuluko enkarhini lowu—hi nga ha rivala leswaku misava leyintshwa ya Xikwembu yi fanele yi ta hakunene.
6. (a) Loko Pawulo na Silasi va ri enhlomulweni, xana va anakanyisise hi yini? (b) Xikombiso xa Pawulo na Silasi xi nga hi khutaza njhani namuntlha?
6 Pawulo u ye emahlweni a tsundzuxa Varhoma ku “tiyisela nhlomulo.” (Varhoma 12:12) Pawulo a a wu toloverile nhlomulo. Nkarhi wun’wana u tshame a vona wanuna un’wana exivonweni loyi a a n’wi rhamba leswaku a “pelela eMakedoniya” leswaku a ta pfuna vanhu va kwalaho leswaku va dyondza hi Yehovha. (Mintirho 16:9) Hi wona nkarhi wolowo, Pawulo swin’we na Luka, Silasi na Timotiya va ye eYuropa. Xana varhumiwa volavo lava hisekaka a va ta langutana ni yini? Ni nhlomulo! Loko va ta va va chumayele emutini wa Makedoniya lowu vuriwaka Filipiya, Pawulo na Silasi va bukuteriwile ivi va hoxiwa ekhotsweni. Entiyisweni, vaaki van’wana va le Filipiya, a va nga vengi rungula ra Mfumo ntsena—kambe a va tlhela va kaneta swinene. Xana xiyimo lexi xi endle leswaku varhumiwa lava va hisekaka va lahlekeriwa hi ntsako wa vona? Doo! Loko va ta va va biwile naswona va hoxiwe ekhotsweni, “exikarhinyana ka vusiku Pawulo na Silasi a va khongela ni ku dzunisa Xikwembu hi risimu.” (Mintirho 16:25, 26) Ina, ku vava loku Pawulo na Silasi va ku tweke hikwalaho ka ku biwa a ku va tiselanga ntsako, kambe varhumiwa lavambirhi a va vekanga mianakanyo ya vona eka sweswo. Mianakanyo ya vona a yi anakanyisisa hi Yehovha ni tindlela leti a va katekisa ha tona. Hi ku ‘tiyisela nhlomulo’ hi ntsako, Pawulo na Silasi va ve swikombiso leswinene eka vamakwavo va le Filipiya ni le tindhawini tin’wana.
7. Ha yini swikhongelo swa hina swi fanele swi va ni marito yo nkhensa?
7 Pawulo u tsarile: “Mi phikelela exikhongelweni.” (Varhoma 12:12) Xana wa khongela loko u ri eku vileleni? Xana u khongela malunghana na yini? Kumbexana u boxa xiphiqo xa wena ivi u kombela mpfuno wa Yehovha. Kambe u nga ha nkhensa ni mikateko leyi u yi kumaka. Loko ku va ni swiphiqo, ku anakanyisisa hi vunene bya Yehovha eka swilo leswinene leswi a hi endlelaka swona swi hi pfuna leswaku hi ‘tsaka hi ntshembo.’ Davhida loyi a a ri ni swiphiqo swo tala, u tsarile: “U endle swilo swo tala, Oho Yehovha Xikwembu xanga, ni mintirho ya wena yo hlamarisa ni miehleketo ya wena eka hina; a nga kona la nga fanisiwaka na wena. Loko a ndzi lava ku vulavula ha yona, yi tele swinene lerova a ndzi nge yi runguli.” (Pisalema 40:5) Loko hi tshamela ku anakanyisisa hi mikateko leyi hi yi kumaka eka Yehovha ku fana na Davhida, hi ta tshama hi tsakile.
Vana Ni Langutelo Lerinene
8. I yini lexi pfunaka Mukreste ku tshama a tsakile loko a xanisiwa?
8 Yesu u khutaza valandzeri va yena leswaku va va ni langutelo lerinene loko va hlangavetana ni miringo yo hambana-hambana. U ri: “Ma tsaka n’wina loko vanhu va mi rhukana ni ku mi xanisa ni ku mi hembela hi swilo hinkwaswo swo homboloka hikwalaho ka mina.” (Matewu 5:11) Hi xihi xivangelo xo tsaka lexi hi nga na xona hambiloko hi ri ehansi ka swiyimo swo tano? Vuswikoti bya hina byo lwisana ni nkaneto i vumbhoni bya leswaku moya wa Yehovha wu na hina. Muapostola Petro u byele Vakreste-kulobye va le nkarhini wa yena a ku: “Ma tsaka, loko mi rhukaniwa hikwalaho ka vito ra Kreste, hikuva moya wa ku vangama, ku nga moya wa Xikwembu, wu le henhla ka n’wina.” (1 Petro 4:13, 14) Hi ku tirhisa moya wakwe, Yehovha u ta tlhela a hi pfuna leswaku hi tiyisela, xisweswo hi ta hlayisa ntsako wa hina.
9. I yini lexi pfuneke vamakwerhu van’wana leswaku va va ni swivangelo swo tsaka loko va pfaleriwile hikwalaho ka ripfumelo ra vona?
9 Hambiloko hi ri eswiyin’weni leswi nga tsakisiki nikatsongo, hi nga va ni swivangelo swo tsaka. Mukreste la vuriwaka Adolf u swi vonile sweswo. U tshama etikweni leri ntirho wa Timbhoni ta Yehovha se wu nga ni malembe wu yirisiwile. Adolf swin’we ni vanakulobye va yena vo hlayanyana va khomiwile ivi va gweviwa ku tshama ekhotsweni nkarhi wo leha hikwalaho ka leswi va aleke ku landzula ripfumelo ra vona leri sekeriweke eBibeleni. Vutomi bya le khotsweni a byi tika swinene, kambe, ku fana na Pawulo na Silasi, Adolf ni vanakulobye va ve ni swivangelo swo nkhensa Xikwembu. Va vule leswaku ntokoto wa vona wa le khotsweni wu tiyise ripfumelo ra vona ni ku va pfuna ku va ni timfanelo ta nkoka ta Vukreste, to tanihi ku hanana, ntwela-vusiwana ni rirhandzu ra vumakwerhu. Hi xikombiso, loko mubohiwa a kuma phasele leyi humaka ekaya, a a avelana yona ni vapfumeri-kulobye, lava a va teka phasele yoleyo tanihi nyiko leyi humaka eka Yehovha, Munyiki lonkulu wa “nyiko yin’wana ni yin’wana leyinene ni nyiko yin’wana ni yin’wana leyi hetisekeke.” Swiendlo swo tano swa tintswalo swi tise ntsako eka munhu loyi a nyikaka swin’we ni le ka lava amukelaka. Xisweswo, mhaka yoleyo a yi endleriwe ku tshova ripfumelo ra vona entiyisweni yi va tiyisile hi tlhelo ra moya!—Yakobo 1:17; Mintirho 20:35.
10, 11. Makwerhu un’wana wa xisati u langutane njhani ni ku konanisiwa hi tihanyi loku landzeriweke hi ku gweviwa ku tshama nkarhi wo leha ekhotsweni?
10 Ella, loyi na yena a tshamaka etikweni leri ntirho wa Mfumo se wu nga ni malembe wu yirisiwile, u khomiwile hikwalaho ko byela van’wana hi ntshembo wakwe wa Vukreste. U konanisiwe hi ndlela ya tihanyi ku ringana tin’hweti ta nhungu. Loko eku heteleleni a tengisiwile, u gweviwe malembe ya khume ekhotsweni leri a ku nga ri na vagandzeri van’wana va Yehovha eka rona. Ella a a ri ni malembe ya 24 ntsena hi nkarhi wolowo.
11 Ina, Ella a a nga swi tsakeli ku heta yo tala ya malembe yakwe ya vutswatsi a ri ekhotsweni. Kambe leswi a a nga ta cinca xiyimo xakwe, u bohe ku cinca langutelo ra yena. Hikwalaho, u sungule ku teka khotso ri ri nsimu leyi a nga chumayelaka eka yona. U ri: “Ntirho wo chumayela a wu ri wukulu lerova nkarhi wu fambe hi ku hatlisa.” Loko ku ta va ku hundze malembe lama tlulaka ntlhanu, Ella u tlhele a konanisiwa. Hi ku xiya leswaku khotso a ri ri dlayanga ripfumelo rakwe, vakonanisi va yena va te: “A hi nge ku ntshunxi; hikuva a wu hundzukanga.” Ella u hlamule hi xivindzi a ku: “Kambe se ndzi hundzukile! Se ndzi ni langutelo lerinene ku tlula loko ndza ha ku fika laha khotsweni, naswona ripfumelo ra mina se ri tiye ku tlula eku sunguleni!” Naswona u engeterile: “Loko mi nga lavi ku ndzi ntshunxa, ndzi ta tshama kukondza Yehovha a vona swi fanerile ku ndzi ntshunxa.” Malembe ya ntlhanu ni hafu a ri ekhotsweni a ma wu herisanga ntsako wa Ella! U dyondze ku eneriseka hi xiyimo xihi na xihi lexi a tikumaka a ri eka xona. Xana u nga dyondza swo karhi eka xikombiso xa yena?—Vaheveru 13:5.
12. I yini lexi nga tiselaka Mukreste ku rhula ka mianakanyo loko a ri eswiyin’weni swo nonon’hwa?
12 U nga ehleketi leswaku Ella u ni nyiko yo karhi leyi nga tolovelekangiki leyi n’wi pfunaka ku langutana ni mintlhontlho yo tano. Loko a vulavula hi nkarhi wa ku konanisiwa loku a langutaneke na kona loko a nga si gweviwa, Ella u ri: “Ndza ha yi tsundzuka ndlela leyi meno ya mina a ma getsela ha yona, a ndzi fana ni xindzingiri lexi tsandzekaka ku tiponisa.” Hambiswiritano, Ella u ni ripfumelo lerikulu eka Yehovha. U dyondze ku n’wi tshemba. (Swivuriso 3:5-7) Hikwalaho ka sweswo Xikwembu se i xa xiviri swinene eka yena ku tlula rini na rini. U ri: “Nkarhi hinkwawo loko ndzi nghena ekamareni ro konaniseriwa eka rona, a ndzi titwa ndzi fikeriwa hi ku rhula. . . . Loko xiyimo xi ya xi chavisa, ku rhula loku na kona a ku ya ku kula.” Yehovha a a ri xihlovo xa ku rhula koloko. Muapostola Pawulo u ri: “Mi nga vileli ha nchumu, kambe eka hinkwaswo tivisani Xikwembu swikombelo swa n’wina hi xikhongelo ni xikombelo swin’we ni ku nkhensa swikombelo swa n’wina; kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo ha Kreste Yesu.”—Vafilipiya 4:6, 7.
13. I yini lexi hi tiyisekisaka leswaku loko nhlomulo wu hi hlasela, hi ta va ni matimba yo tiyisela?
13 Ella, loyi se a ntshunxiweke u tshame a tsakile hambileswi a a langutane ni maxangu. Leswi a nga swi endlanga hi matimba ya yena, kambe u swi endle hi matimba lawa Yehovha a n’wi nyikeke wona. A swi ri tano ni hi muapostola Pawulo loyi a tsaleke a ku: “Hikokwalaho, hi ku tsaka lokukulu, swi nga antswa ndzi tibuma hi ku tsana ka mina, leswaku matimba ya Kreste ma tshama ehenhla ka mina ku fana ni ntsonga. . . . Hikuva loko ndzi tsanile, hi kona ndzi vaka ni matimba.”—2 Vakorinto 12:9, 10.
14. Kombisa ndlela leyi Mukreste a nga vaka ni langutelo lerinene ha yona loko a langutane ni ndzingo ni vuyelo bya kona.
14 Mintshikilelo leyi u langutanaka na yona namuntlha yi nga ha va yi hambanile ni leyi hi buleke ha yona laha. Kambe, swa nonon’hwa ku tiyisela ehansi ka mintshikilelo ku nga khathariseki leswaku i ya muxaka muni. Hi xikombiso, muthori wa wena a nga ha va a rhandza ku xopaxopa ntirho wa wena—kambe ya vatirhi lavan’wana lava nghenaka tikereke tin’wana a nga ri na mhaka na yona. Swi nga ha endleka leswaku a wu wu kumi ntirho wun’wana. U nga tshama njhani u tsakile? Tsundzuka Adolf ni vanakulobye va yena, lava ntokoto wa vona wa ku va ekhotsweni wu va dyondziseke ku va ni timfanelo tin’wana ta nkoka. Loko u endla matshalatshala lamakulu leswaku u tsakisa muthori wa wena—hambiloko ku ri loyi “swi nonon’hwaka ku [n’wi] tsakisa”—u ta va ni timfanelo ta Vukreste to tanihi ku tiyisela ni ku va ni mbilu yo leha. (1 Petro 2:18) Ku tlula kwalaho, u nga ha va mutirhi la nga wa nkoka swinene, leswi nga ha endlaka leswaku u kota ku kuma ntirho wun’wana lowunene siku rin’wana. Sweswi a hi buleni hi tindlela tin’wana leti hi nga hlayisaka ntsako wa hina ha tona entirhweni wa Yehovha.
Ku Olovisa Vutomi Bya Wena Swi Tisa Ntsako
15-17. I yini lexi mpatswa wun’wana wu voneke leswaku xi ta hunguta ntshikilelo wa wona, hambileswi a wu nga ta wu herisa hi ku helela?
15 Swi nga ha endleka yi nga talanga mintirho ya ku tihanyisa leyi u nga hlawulaka eka yona kumbe ndhawu leyi u nga tirhelaka eka yona, kambe swi nga ha va swi ri kona leswi u nga kotaka ku swi lawula evuton’wini bya wena. Xiya ntokoto lowu landzelaka.
16 Mpatswa lowu nga Vakreste wu rhambe nkulu leswaku a ta dya swakudya ekaya ra wona. Emadyambyini wolawo, makwerhu loyi ni nsati wakwe va phofule swa le mbilwini, va vula leswaku masiku lawa va titwa va ri ehansi ka mintshikilelo ya vutomi. Hambileswi mintirho ya vona havambirhi a yi va dyela nkarhi wo tala naswona a va tirha hi matimba, kambe a va nga ri exiyin’weni xo lava ntirho wun’wana. Va tivutisile leswaku va ta langutana ni xiyimo lexi ku fikela rini.
17 Loko va kombela nkulu loyi leswaku a va nyika xitsundzuxo, u te: “Olovisani vutomi bya n’wina.” Njhani? Nuna loyi ni nsati wa yena a va heta tiawara tinharhu siku ni siku loko va ya ni loko va vuya entirhweni. Nkulu loyi, loyi a a tiva mpatswa lowu swinene, u ringanyete leswaku va fanele va anakanya hi ku rhurhela ekusuhi ni laha va tirhelaka kona, leswaku va ta kota ku hunguta nkarhi lowu va wu hetaka loko va ya ni loko va vuya entirhweni siku ni siku. Nkarhi lowu hlayisiweke wu nga ha tirhisiwa eka swilo swin’wana swa nkoka—kumbe va wu tirhisela ku wisa. Loko mintshikilelo ya vutomi yi kavanyeta ntsako wa wena, ha yini u nga kambisisi xiyimo xa wena ku vona loko swi ta koteka ku endla mindzulamiso yo karhi?
18. Ha yini swi ri swa nkoka ku anakanya hi vukheta u nga si endla swiboho?
18 Ndlela yin’wana yo hunguta ntshikilelo i ku anakanya hi vukheta u nga si endla swiboho. Hi xikombiso, Mukreste un’wana u ehlekete ku aka yindlu. U hlawule pulani leyi rharhanganeke swinene, hambileswi a a nga si tshama a aka yindlu. Sweswi wa swi xiya leswaku a a ta va a papalate swiphiqo leswi nga fanelangiki loko a a lo “xiyisisa magoza yakwe” loko a nga si hlawula pulani ya yindlu yakwe. (Swivuriso 14:15) Mukreste un’wana u pfumele ku lunghekela ku pfuna mupfumeri-kulobye ku hakela mali leyi a yi lombeke loko o tshuka a tsandzeka ku yi hakela. Hi ku ya hi ntwanano wa kona, loko munhu la lombeke mali a nga swi koti ku yi tlherisela, loyi a lunghekeleke ku n’wi pfuna u ta boheka ku yi tlherisela. Eku sunguleni, swilo hinkwaswo swi fambe kahle, kambe hi ku famba ka nkarhi loyi a lombeke mali u sungule ku ka a nga ha hakeli. Mulombisi wa mali u sungule ku kariha ivi a sindzisa leswaku loyi a lunghekeleke ku n’wi pfuna a tlherisela mali hinkwayo leyi seleke. Sweswo swi veke ntshikilelo lowukulu eka loyi a a lunghekeleke ku n’wi pfuna. Xana a swi ta va swi papalatiwile loko a a lo anakanyisisa hi vukheta swinene hi mhaka leyi hinkwayo a nga si pfumela ku amukela vutihlamuleri bya ku hakela xikweleti?—Swivuriso 17:18.
19. Hi tihi tindlela tin’wana leti hi nga hungutaka ntshikilelo ha tona evuton’wini bya hina?
19 Loko hi karhala, hi nga tshuki hi ehleketa leswaku hi nga hunguta ntshikilelo wa hina hi tlhela hi kuma ntsako wa hina hi ku hunguta nkarhi wa dyondzo ya munhu hi xiyexe ya Bibele, ntirho wa nsimu ni ku va kona eminhlanganweni. Phela, leti i tindlela ta nkoka leti hi nga kumaka moya lowo kwetsima wa Yehovha ha tona, lowu mbhandzu wa wona ku nga ntsako. (Vagalatiya 5:22) Mintirho ya Vukreste minkarhi hinkwayo ya phyuphyisa naswona hi ntolovelo a yi karharisi swinene. (Matewu 11:28-30) Hakanyingi mintirho ya ku tihanyisa kumbe vuhungasi, ku nga ri mintirho ya moya, hi yona yi hi karharisaka. Ku ya lata rivambu ka ha ri na nkarhi swi nga hi pfuna leswaku hi tlhela hi kuma matimba. Ku wisa nkarhi wo lehanyana swi nga hi pfuna swinene. N. H. Knorr, loyi a veke xirho xa Huvo leyi Fumaka ya Timbhoni ta Yehovha ku fikela loko a fa, a a rhandza ku byela varhumiwa a ku: “Loko mi hela matimba, nchumu wo sungula lowu mi faneleke mi wu endla i ku wisanyana. Swi ta ku hlamarisa leswaku endzhaku ka ku etlela kahle, swi nga ha ku olovela ku tlhantlha xiphiqo xin’wana ni xin’wana!”
20. (a) Katsakanya tin’wana ta tindlela leti hi nga hlayisaka ntsako wa hina ha tona. (b) Hi swihi swivangelo leswi u swi ehleketaka leswi nga endlaka leswaku hi tshama hi tsakile? (Vona bokisi eka tluka 17.)
20 Vakreste va ni lunghelo ro tirhela “Xikwembu lexi tsakeke.” (1 Timotiya 1:11) Hilaha se hi voneke hakona, hi nga tshama hi tsakile hambiloko hi karhatiwa hi swiphiqo leswikulu. A hi rhangiseni ntshembo wa Mfumo, hi lulamisa langutelo ra hina loko swi fanerile ivi hi olovisa vutomi bya hina. Kutani, ku nga khathariseki leswaku hi tikuma hi ri exiyin’weni xihi, hi ta fambisana kahle ni marito ya muapostola Pawulo, lama nge: “Nkarhi hinkwawo tsakani eHosini. Nakambe ndzi ri, Tsakani!”—Vafilipiya 4:4.
Anakanyisisa Hi Swivutiso Leswi:
• Ha yini Vakreste va fanele va tshama va langute ntshembo wa Mfumo hi ku hiseka?
• I yini lexi nga hi pfunaka ku tshama hi tsakile loko hi ri eswiyin’weni leswi nonon’hwaka?
• Ha yini hi fanele hi ringeta ku olovisa vutomi bya hina?
• Van’wana va byi antswise njhani vutomi bya vona?
[Bokisi/Swifaniso eka tluka 17]
Swivangelo Swin’wana Leswi Endlaka Leswaku Hi Tshama Hi Tsakile
Leswi hi nga Vakreste, hi ni swivangelo swo tala swo tsaka. Xiya leswi landzelaka:
1. Hi tiva Yehovha.
2. Hi dyondze ntiyiso wa Rito ra Xikwembu.
3. Hi nga rivaleriwa swidyoho swa hina loko hi kombisa ripfumelo egandzelweni ra Yesu.
4. Mfumo wa Xikwembu wa fuma—misava leyintshwa yi ta fika ku nga ri khale!
5. Yehovha u hi tise eparadeyisini ya moya.
6. Hi tiphina hi vunakulobye lebyinene bya Vukreste.
7. Hi ni lunghelo ra ku hlanganyela entirhweni wo chumayela.
8. Ha hanya naswona hi ni mpimo wo karhi wa matimba.
Hi swihi swivangelo swin’wana swa ku tsaka leswi u nga swi boxaka?
[Xifaniso eka tluka 13]
Pawulo na Silasi a va tsakile hambiloko va ri ekhotsweni
[Swifaniso eka tluka 15]
Xana u anakanyisisa swinene hi ntshembo lowu tsakisaka wa misava leyintshwa ya Xikwembu?