Swivutiso Swa Vahlayi

Eka xikombiso xakwe xa xikhongelo, xana Yesu a a vula leswaku ku rhandza ka Xikwembu se a ku endleka etilweni hambileswi tintsumi leto homboloka a ti nga si hlongoriwa?

Hilaha swi vikiweke hakona eka Matewu 6:10, Yesu u te: “Ku rhandza ka wena a ku endleke emisaveni, hilaha ku endlekaka hakona etilweni.” Xikombelo lexi xi nga twisisiwa hi tindlela timbirhi. Yo sungula, i xikombelo xa leswaku ku rhandza ka Xikwembu ku endleka emisaveni hilaha ana se a ku endleka hakona etilweni, kumbe, ya vumbirhi, i xikombelo xa leswaku ku endleka etilweni ni le misaveni hi ku helela.a Nhlamuselo ya marito yo rhanga ya Yesu lama nge, “mfumo wa wena a wu te,” yi kombisa leswaku ndlela ya vumbirhi hi yona yi pfumelelanaka ngopfu ni Matsalwa. Naswona yi vulavula hi xiyimo lexi a xi ri kona loko Yesu a ha ri laha emisaveni, lexi a xi ta tama xa ha ri kona ni le ndzhaku swinene ka nkarhi wolowo. Njhani?

Buku ya Nhlavutelo yi kombetela eka vuyelo byo hlawuleka bya matlhelo mambirhi lebyi a byi ta va kona endzhaku ka ku simekiwa ka Mfumo wa Xikwembu etilweni. Byo sungula byi khumba matilo, kutani bya vumbirhi byi khumba misava. Nhlavutelo 12:7-9, 12 yi ri: “Kutani ku tlhekeka nyimpi etilweni: Mikayele ni tintsumi ta yena va lwa ni dragona, dragona yona yi lwa yi ri ni tintsumi ta yona kambe a yi hlulanga, naswona ndhawu ya vona a ya ha kumekanga etilweni. Hiloko dragona leyikulu yi lahleriwa ehansi, nyoka ya khale, leyi vuriwaka Diyavulosi na Sathana, leyi xisaka misava hinkwayo leyi akiweke; yi lahleriwa ehansi emisaveni, ni tintsumi ta yona ti lahleriwa ehansi na yona. Tsakani hikwalaho ka swona, n’wina matilo na n’wina lava tshamaka eka wona! Khombo eka misava ni lwandle, hikuva Diyavulosi u xikele eka n’wina, a hlundzukile swinene, hi ku tiva leswaku u ni nkarhi wo koma.”

Loko Sathana a hlongoriwe etilweni kun’we ni madimona yakwe endzhaku ka 1914, a ka ha vanga ni vaxandzuki etilweni, naswona sweswo swi tise ntsako lowukulu eka vana vo tshembeka va Yehovha lava nga tintsumi, lava saleke va tele swinene ku tlula lava xandzukeke. (Yobo 1:6-12; 2:1-7; Nhlavutelo 12:10) Xisweswo, ku hetiseke xikombelo lexi nga exikhongelweni xa xikombiso xa Yesu, lexi khumbaka timhaka ta le tilweni. Hinkwavo lava saleke etilweni a va tshembekile eka Yehovha naswona a va titsongahata swinene ehansi ka vuhosi bya yena.

Ku fanele ku kandziyisiwa leswaku hambi ku ri emahlweni ka nkarhi wolowo, loko tintsumi leto homboloka ta ha pfumeleriwa ku ya etilweni, se a ti hlongoleriwe makumu enhlengeletanweni ya Xikwembu. Hi xikombiso, Yudha 6 yi paluxa leswaku ana se hi lembe-xidzana ro sungula C.E., a ti ‘bohiwe hi timpecana leti nga riki na makumu emunyameni lowukulu wa moya, ti vekeriwa vuavanyisi bya siku lerikulu.’ Hilaha ku fanaka, 2 Petro 2:4 yi ri: “Xikwembu [a xi] tshikanga ku xupula tintsumi leti dyoheke, kambe, hi ku ti hoxa eThatharasi [xiyimo lexi nga xiximekiki], xi ti nyiketa emigodini ya munyama lowukulu [wa moya] leswaku ti hlayiseriwa vuavanyisi.”b

Hambileswi tintsumi leto homboloka a ti nga ri na matimba ngopfu loko ta ha ri etilweni, laha misaveni ti fike ti va ni matimba lamakulu. Entiyisweni, Rito ra Xikwembu ri vula leswaku Sathana i “mufumi wa misava leyi” naswona madimona yi ma vula “vafumi va misava va munyama lowu.” (Yohane 12:31; Vaefesa 6:11, 12; 1 Yohane 5:19) Leswi a a ri ni vulawuri, Diyavulosi u tshembise ku nyika Yesu “mimfumo hinkwayo ya misava ni ku vangama ka yona” loko a n’wi gandzela hi ndlela yo karhi. (Matewu 4:8, 9) Kutani, swi le rivaleni leswaku Mfumo wa Xikwembu wu ta tisa ku hundzuka lokukulu loko wu ‘fika’emisaveni.

Mfumo wa Xikwembu wu ta tisa mafambiselo lamantshwa hi ku helela laha misaveni loko wu ‘fika.’ Mfumo lowu wu ta herisa mimfumo hinkwayo ya vanhu naswona hi wona wu nga ta fuma misava hinkwayo. Hi nkarhi wolowo, vanhu lava chavaka Xikwembu lava nga ehansi ka wona va ta va “misava leyintshwa.” (2 Petro 3:13; Daniyele 2:44) Mfumo lowu wu ta herisa ni xidyoho eka vanhu lava yingisaka naswona eku heteleleni wu ta endla leswaku misava hinkwayo yi va paradeyisi, hi ndlela yoleyo wu ta herisa vuthala hinkwabyo bya mfumo wa Sathana.—Varhoma 8:20, 21; Nhlavutelo 19:17-21.

Eku heleni ka Gidi ra Malembe loko Mfumo wa Mesiya wu hetisise ku rhandza ka Xikwembu, “N’wana na yena u ta tiveka ehansi ka [Loyi a] vekeke swilo hinkwaswo ehansi ka yena, leswaku Xikwembu xi va swilo hinkwaswo eka vanhu hinkwavo.” (1 Vakorinto 15:28) Kutani ku ta va ni ndzingo wo hetelela, ivi endzhaku ka wona Sathana ni madimona yakwe swin’we ni vaxandzuki hinkwavo lava a va kanganyiseke va heriseriwa makumu eka “rifu ra vumbirhi.” (Nhlavutelo 20:7-15) Endzhaku ka sweswo, swivumbiwa hinkwaswo swa le tilweni ni le misaveni swi ta hambeta swi tiveka ehansi ka vulawuri bya Yehovha bya rirhandzu, hilaha ku nga heriki. Sweswo swi ta vula ku hetiseka loku heleleke ka marito ya Yesu ya xikhongelo xa xikombiso.—1 Yohane 4:8.

[Tinhlamuselo ta le hansi]