Vutlhari Bya Tihlo

● Tihlo ra munhu ri endliwe hi ndlela yo hlamarisa. Ri saseke ngopfu ri tlhela ri va ni matimba. Buku leyi vuriwaka Visual Impact, Visual Teaching yi vula leswaku “misiha leyi endlaka tiphesente ta 40 leyi nga le byongweni yi hlangana na retina,” ku nga sele leyi nga endzeni ka tihlo.

Yesu Kreste u vule leswaku tihlo i “rivoni ra miri.” Loko a hlamusela leswi a a swi vula u engetele a ku: “Loko tihlo ra wena ri olova [ri languta swilo leswinene], miri wa wena hinkwawo wu ta vangama; kambe loko tihlo ra wena ri hombolokile, miri wa wena hinkwawo wu ta va ni munyama.” (Matewu 6:22, 23) Hi marito wolawo, Yesu a a hi tsundzuxa ndlela leyi tihlo kumbe leswi hi swi vonaka swi nga yi khumbaka ha yona ndlela leyi hi ehleketaka ha yona, ndlela leyi hi titwaka ha yona ni swiendlo swa hina. Mianakanyo leyinene yi endla leswaku munhu a va ni vutomi lebyinene; kambe mianakanyo yo biha ya byi onha.

Hi xikombiso, xiya marito ya Yesu lama kumekaka eka Matewu 5:28, 29: “Un’wana ni un’wana la tshamelaka ku languta wansati lerova a n’wi navela, ana se u endle vuoswi na yena embilwini yakwe. Kutani, loko tihlo rero ra wena ra xinene ri ku khunguvanyisa, ri xokole [hi ndlela yo fanekisela].” Hi yihi yinhla leyi a a yi kandziyisa? Tihlo leri yingayingaka ri nga endla leswaku munhu a va ni ku navela ko biha, leswi nga ha endlaka leswaku munhu a tikhoma hi ndlela yo biha kutani a nga ha tsakeriwi hi Xikwembu.—Yakobo 1:14, 15.

Xisweswo, i swinene ku tikhoma, hambi loko ku endla tano swi tika ku fana ni ku xokola tihlo! Tlhandlakambirhi, swa antswa ku kuma vutomi lebyi nga heriki ku ri ni ku lahlekeriwa ha byona hikwalaho ko lava ku titsakisa swa xinkarhana.

Nakambe, leswi hi swi langutaka swi nga endla leswaku hi va ni makwanga. Hikwalaho, Bibele ya hi lemukisa leswaku ‘ku navela ka mahlo a ku humi eka Tatana, kambe ku huma emisaveni. Ku tlula kwalaho, misava ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.’—1 Yohane 2:16, 17.

Xana Bibele yi hi sivela ku titlonya hi vutomi? Nikatsongo! Loko hi nga yi yingisi milawu ya Bibele a hi nge vi na ntsako naswona hi ta tivangela swiphiqo. (Vagalatiya 6:7, 8) Ku yingisa Rito ra Xikwembu ku katsa ni leswi ri swi vulaka malunghana ni tihlo ro fanekisela swi ta hi tisela ntsako. Yesu u te: “Va tsaka lava twaka rito ra Xikwembu va tlhela va ri hlayisa.” (Luka 11:28) Ku engetela kwalaho, va ni ntshembo wo hanya hilaha ku nga heriki laha misaveni, kasi lava nga ni mahanyelo yo biha kumbe makwanga a va nge kumi ntsako naswona va ta lahlekeriwa hi vutomi lebyi nga heriki.