“Kahle-kahle I Mani Hlonga Ro Tshembeka Ni Ro Tlhariha?”

1, 2. Yesu u tirhisa vamani ku hi phamela namuntlha, naswona ha yini swi ri swa nkoka leswaku hi ri tiva hlonga rero?

“VAMAKWERHU, a ndzi nge swi koti ku hlayela minkarhi leyi mi lunghiseleleke swihloko leswi a swi vulavula hi swilo leswi a ndzi swi lava hi nkarhi lowu a ndzi swi lava ha wona ngopfu.” Yoleyo i ndlela leyi makwerhu un’wana wa xisati a phofuleke ndlela leyi a tlangelaka ha yona eka papila leri a ri tsaleleke vamakwerhu lava tirhaka eyindlu-nkulu ya hina ya misava hinkwayo. Xana na wena u tshame u titwa hi ndlela leyi fanaka? Vo tala va hina hi tshame hi titwa hi ndlela yoleyo. Xana leswi swi fanele swi hi hlamarisa? Nikatsongo.

² Leswi hi kumaka swakudya swa moya hi nkarhi lowu faneleke swi kombisa leswaku Yesu, Nhloko ya vandlha, u hetisisa xitshembiso xa yena xo hi phamela. U tirhisa vamani? Loko Yesu a nyikela xikombiso xa vukona bya yena, u vule leswaku a a ta tirhisa “hlonga ro tshembeka ni ro tlhariha” ku phamela va yindlu yakwe ‘swakudya hi nkarhi lowu faneleke.’a (Hlaya Matewu 24:45-47.) Enkarhini lowu wa makumu, Yesu u tirhisa hlonga rolero ro tshembeka ku phamela valandzeri va yena va ntiyiso. I swa nkoka leswaku hi ri tiva hlonga ro tshembeka. Vuxaka bya hina ni Xikwembu byi titshege hi ku kuma swakudya swoleswo swa moya leswi humaka eka hlonga leri ro tshembeka.—Mat. 4:4; Yoh. 17:3.

 3. Minkandziyiso ya hina yi vule yini malunghana ni xifaniso xa hlonga ro tshembeka?

³ Kutani, hi fanele hi xi twisisa njhani xifaniso xa Yesu xa hlonga ro tshembeka? Enkarhini lowu hundzeke, minkandziyiso ya hina yi vule leswi landzelaka: Hi Pentekosta ya 33 C.E., Yesu u veke hlonga ro tshembeka ehenhla ka va yindlu yakwe. Hlonga ri yimela Vakreste hinkwavo lava totiweke lava nga laha misaveni va ri ntlawa ku sukela hi nkarhi wolowo ku ya emahlweni. Va yindlu i xirho ha xin’we xa vatotiwa volavo. Hi 1919, Yesu u veke hlonga ro tshembeka “ehenhla ka hinkwaswo leswi nga swa yena,” ku nga swilo swa yena hinkwaswo swa laha misaveni leswi tirhiseriwaka ku seketela ntirho wo chumayela hi Mfumo. Hambiswiritano, endzhaku ko kambisisa mhaka leyi hi vukheta hi tlhela hi khongela ni ku anakanyisisa ha yona, hi xiye leswaku ndlela leyi hi ma twisisaka ha yona marito ya Yesu malunghana ni hlonga ro tshembeka ni ro tlhariha yi fanele yi antswisiwa. (Swiv. 4:18) A hi kambisiseni xifaniso lexi hi vona ndlela leyi xi hi khumbaka ha yona, ku nga khathariseki leswaku hi ni ntshembo wo ya hanya etilweni kumbe laha misaveni.

4-6. Ha yini hi nga gimetaka hileswaku xifaniso xa Yesu xa hlonga ro tshembeka xi sungule ku hetiseka endzhaku ka 1914?

⁴ Mongo wa xifaniso xa hlonga ro tshembeka ni ro tlhariha wu kombisa leswaku xi sungule ku hetiseka enkarhini lowu wa makumu ku nga ri hi Pentekosta ya 33 C.E. A hi voneni ndlela leyi Matsalwa ma hi endlaka hi fikelela xiboho xexo ha yona.

⁵ Xifaniso xa hlonga ro tshembeka i xiphemu xa vuprofeta bya Yesu lebyi vulavulaka hi “xikombiso xa vukona bya [yena] ni xa makumu ya mafambiselo ya swilo.” (Mat. 24:3) Xiyenge xo sungula xa vuprofeta lebyi, lexi kumekaka eka Matewu 24:4-22, xi hetiseka kambirhi—ro sungula, xi hetiseke ku sukela hi 33 C.E. ku fikela hi 70 C.E., naswona ra vumbirhi, xi hetiseka hi ndlela leyikulu swinene enkarhini wa hina. Xana leswi swi vula leswaku leswi Yesu a swi vuleke malunghana ni hlonga ro tshembeka na swona swi ta hetiseka kambirhi? Doo!

⁶ Ku sukela eka marito lama kumekaka eka Matewu 24:29, Yesu u vulavule swinene hi swiendlakalo leswi a swi ta humelela enkarhini wa hina. (Hlaya Matewu 24:30, 42, 44.) Loko a vulavula hi leswi nga ta humelela hi nkarhi wa nhlomulo lowukulu, u vule leswaku vanhu va “ta vona N’wana wa munhu a ta a ri emapapeni ya tilo.” Kutani, eka marito lawa a a ma kongomise eka vanhu lava hanyaka emasikwini yo hetelela, u va khutaze ku xalamuka a ku: “A mi ri tivi siku leri Hosi ya n’wina yi nga ta ta ha rona,” a tlhela a ku, “N’wana wa munhu u ta ta hi nkarhi lowu mi nga wu ehleketiki.”b Endzhaku ka loko Yesu a vulavule hi leswi a swi ta humelela emasikwini yo hetelela, u hlamusele xifaniso xa hlonga ro tshembeka. Hikwalaho, hi nga ha gimeta hileswaku leswi a swi vuleke malunghana ni hlonga ro tshembeka swi sungule ku hetiseka endzhaku ka loko masiku yo hetelela ma sungurile hi 1914. Xiboho xolexo xa twala. Ha yini hi vula tano?

 7. I xivutiso xihi xa nkoka lexi tlakukeke loko ku sungula nkarhi wa ntshovelo, naswona ha yini?

⁷ Anakanya swa xinkarhana hi xivutiso lexi: “Kahle-kahle i mani hlonga ro tshembeka ni ro tlhariha?” Hi lembe-xidzana ro sungula, a ku nga ri na xivangelo xo vutisa xivutiso xolexo. Hilaha hi swi voneke hakona exihlokweni lexi hundzeke, vaapostola a va endla masingita va tlhela va hundzisela tinyiko ta singita eka van’wana tanihi vumbhoni bya leswaku va seketeriwa hi Xikwembu. (Mint. 5:12) Hikwalaho, a ku nga ri na xivangelo xo vutisa leswaku kahle-kahle i mani la vekiweke hi Kreste ku rhangela. Kambe, hi 1914 xiyimo a xi cince swinene. Nkarhi wa ntshovelo wu sungule hi lembe rero. Nkarhi a wu fikile wo hambanisa mfava eka koroni. (Mat. 13:36-43) Hikwalaho loko nkarhi wo tshovela wu sungula, ku tlakuke xivutiso xa nkoka lexi nge: Leswi a ku ri ni Vakreste vo tala va mavunwa lava a va vula leswaku i valandzeri va Yesu va ntiyiso, xana koroni, ku nga Vakreste lava totiweke, a yi ta voniwa njhani? Xifaniso xa hlonga ro tshembeka xi nyikele nhlamulo. Valandzeri va Kreste lava totiweke hi vona lava a va ta phameriwa kahle hi tlhelo ra moya.

 8. Ha yini swi twala leswi hlonga ro tshembeka ri vumbiwaka hi Vakreste lava totiweke?

⁸ Hlonga ro tshembeka ri fanele ri vumbiwa hi Vakreste lava totiweke lava ha riki laha misaveni. Vakreste volavo va vuriwa “vaprista va vuhosi” naswona va lerisiwe ku “‘twarisa hinkwako-nkwako vunene’ bya loyi a [va] vitaneke [va] huma emunyameni [va] nghena eku vonakaleni kakwe loku hlamarisaka.” (1 Pet. 2:9) Swa twala leswaku swirho swa ‘vaprista volavo va vuhosi’ hi swona leswi a swi ta hlanganyela hi ku kongoma eku dyondziseni ka vapfumeri-kulobye ntiyiso.—Mal. 2:7; Nhlav. 12:17.

 9. Xana Vakreste hinkwavo lava totiweke va vumba hlonga ro tshembeka? Hlamusela.

⁹ Xana vatotiwa hinkwavo lava ha riki laha misaveni va vumba hlonga ro tshembeka? Doo! Ntiyiso wa mhaka hileswaku a hi vatotiwa hinkwavo lava hlanganyelaka eku phameleni ka vapfumeri-kulobye emisaveni hinkwayo swakudya swa moya. I ntiyiso leswaku vamakwerhu van’wana lava totiweke i malandza ya vutirheli kumbe vakulu emavandlheni ya vona. Va dyondzisa hi yindlu ni yindlu ni le mavandlheni ya vona naswona va seketela nkongomiso lowu humaka eyindlu-nkulu hi ku tshembeka. Kambe a va hlanganyeli eku phameleni ka vamakwavo emisaveni hinkwayo swakudya swa moya. Naswona exikarhi ka vatotiwa ku ni vamakwerhu va xisati lava titsongahataka, lava nga taka va nga ringeti ku endla ntirho wo dyondzisa evandlheni.—1 Kor. 11:3; 14:34.

10. I mani hlonga ro tshembeka ni ro tlhariha?

¹⁰ Kutani, i mani hlonga ro tshembeka ni ro tlhariha? Tanihi leswi Yesu a phameleke vo tala hi ku tirhisa vanhu vatsongo, hlonga rolero ri vumbiwa hi ntlawa wutsongo wa vamakwerhu lava totiweke lava katsekaka hi ku kongoma eku lunghiseleleni ni le ku phameleni ka swakudya swa moya hi nkarhi wa vukona bya Kreste. Emasikwini hinkwawo lawa yo hetelela, vamakwerhu lava totiweke lava vumbaka hlonga ro tshembeka va tirhe swin’we eyindlu-nkulu. Emalembeni ya sweswinyana, hlonga rolero i Huvo leyi Fumaka ya Timbhoni ta Yehovha. Hambiswiritano, xiya leswaku exifanisweni xa yena Yesu u vule leswaku ku ta va ni “hlonga” rin’we. Hikwalaho Huvo leyi Fumaka yi endla swiboho yi ri ntlawa.

11, 12. (a) Hi kwihi ku vekiwa kumbirhi loku hlonga ro tshembeka ni ro tlhariha ri ku amukelaka? (b) Yesu u ri veke rini hlonga ro tshembeka ehenhla ka va yindlu yakwe, naswona u hlawule vamani?

¹¹ Xiya leswaku exifanisweni xa Yesu, hlonga ro tshembeka ni ro tlhariha ri vekiwa kambirhi hi minkarhi leyi hambaneke. Ro sungula ri vekiwa ehenhla ka va yindlu; ra vumbirhi ri vekiwa ehenhla ka hinkwaswo leswi nga swa n’wini. Tanihi leswi xifaniso lexi xi hetisekaka enkarhini lowu wa makumu, ku vekiwa lokumbirhi a ku ta endleka endzhaku ka loko Yesu a ve Hosi hi 1914.

¹² Yesu u ri veke rini hlonga ro tshembeka ehenhla ka va yindlu ya yena? Leswaku hi hlamula xivutiso lexi, a hi vulavuleni ngopfu hi leswi humeleleke eku sunguleni ka nkarhi wa ntshovelo hi lembe ra 1914. Hilaha hi dyondzeke hakona, enkarhini wolowo mintlawa yo tala a yi tivula Vakreste. Yesu a a ta hlawula a tlhela a veka hlonga ro tshembeka eka ntlawa wihi? Xivutiso xexo xi hlamuriwe endzhaku ka loko yena ni Tata wa yena va tile va ta kambela tempele, kumbe lunghiselelo ra moya ra vugandzeri, ku sukela hi 1914 ku fikela eku sunguleni ka 1919.c (Mal. 3:1) Va tsakisiwe hi ntlawa lowutsongo wa Swichudeni swa Bibele swo tshembeka leswi kombiseke leswaku swi rhandza Yehovha ni Rito ra yena hakunene. I ntiyiso leswaku a va fanele va basisiwa kambe hi ku titsongahata va pfumele ku ringiwa ni ku tengisiwa ku ringana nkarhi wutsongo. (Mal. 3:2-4) Swichudeni swoleswo swa Bibele a swi ri Vakreste va ntiyiso lava fanaka ni koroni. Hi 1919, laha a ku ri nkarhi wo pfuxiwa hi tlhelo ra moya, Yesu u hlawule vamakwerhu lava totiweke lava fanelekaka exikarhi ka vona leswaku va va hlonga ro tshembeka ni ro tlhariha, a tlhela a va veka ehenhla ka va yindlu yakwe.

13. I vamani lava katsekaka eka va yindlu, naswona ha yini?

¹³ Kutani, i vamani va yindlu? I vanhu lava phameriwaka swakudya swa moya. Eku sunguleni ka masiku yo hetelela, va yindlu a ku ri vatotiwa hinkwavo. Endzhakunyana, va yindlu va katse ntshungu lowukulu wa tinyimpfu tin’wana. Lava tinyimpfu tin’wana va vumba vunyingi lebyikulu bya “ntlhambi wun’we” lowu nga ehansi ka vurhangeri bya Kreste. (Yoh. 10:16) Mintlawa hayimbirhi ya vuyeriwa eka swakudya swa moya leswi fanaka leswi fikaka hi nkarhi leswi phameriwaka hi hlonga ro tshembeka. Ku vuriwa yini hi swirho swa Huvo leyi Fumaka leswi namuntlha swi vumbaka hlonga ro tshembeka ni ro tlhariha? Vamakwerhu volavo na vona va fanele va phameriwa hi tlhelo ra moya. Hikwalaho, hi ku titsongahata xirho ha xin’we xa swi xiya leswaku loko xi ri xoxe i xiphemu xa va yindlu ku fana ni valandzeri hinkwavo va ntiyiso va Yesu.

14. (a) Hlonga ro tshembeka ri nyikiwe vutihlamuleri byihi naswona byi katsa yini? (b) Yesu u ri nyike xitsundzuxo xihi hlonga ro tshembeka ni ro tlhariha? (Vona bokisi leri nge “Loko Hlonga Lero Biha Ro Tshuka . . . ”)

¹⁴ Yesu u ri nyike vutihlamuleri lebyikulu hlonga ro tshembeka ni ro tlhariha. Eminkarhini ya ku tsariwa ka Bibele, hlonga kumbe mulanguteri la tshembiwaka a a langutela swilo hinkwaswo swa n’wini wa yena. (Luka 12:42) Hikwalaho hlonga ro tshembeka ni ro tlhariha ri nyikiwe vutihlamuleri byo langutela swilo hinkwaswo leswi nga swa Kreste emisaveni. Vutihlamuleri byebyo byi katsa ku khathalela mali, miako, ntirho wo chumayela, minongonoko ya tinhlengeletano ni ya mintsombano ni ku humesiwa ka minkandziyiso leyi sekeriweke eBibeleni leyi hi yi tirhisaka ensin’wini, hi munhu hi yexe ni le minhlanganweni ya vandlha. Va yindlu va titshege hi swakudya swa moya hinkwaswo leswi lunghiseleriwaka hi hlonga ro tshembeka.

15, 16. Yesu u ri veka rini hlonga ro tshembeka ehenhla ka hinkwaswo leswi nga swa yena?

¹⁵ Yesu u ku endla rini ku vekiwa ka vumbirhi—“ehenhla ka hinkwaswo leswi nga swa yena”? Yesu u te: “Ra tsaka hlonga rero loko n’wini wa rona a fika a nga ta ri kuma ri endla tano! Ndzi tiyisile ndzi ri eka n’wina, U ta ri veka ehenhla ka hinkwaswo leswi nga swa yena.” (Mat. 24:46, 47) Xiya leswaku ku vekiwa ka vumbirhi Yesu u ku endla endzhaku ka loko a fikile ivi a kuma leswaku hlonga ri “endla tano,” hileswaku, ri phamela swakudya swa moya hi ku tshembeka. Hikwalaho a ku ta hundza nkarhi exikarhi ka ku vekiwa ko sungula ni ka vumbirhi. Leswaku hi twisisa leswaku Yesu u ri veka njhani hlonga ra yena ehenhla ka hinkwaswo leswi nga swa yena ni leswaku u ri veka rini, hi fanele hi twisisa swilo swimbirhi: nkarhi lowu a fikaka ha wona nileswaku leswi nga swa yena swi katsa yini.

¹⁶ Yesu u fika rini? Nhlamulo yi kumeka eka mongo. Tsundzuka leswaku loko tindzimana leti hundzeke ti vulavula hi ku “ta” ka Yesu, rito rero ri kombetela eka nkarhi lowu a nga ta tela ku lovisa lavo homboloka emakumu ya mafambiselo lawa ya swilo.d (Mat. 24:30, 42, 44) Hikwalaho, ku “fika” kumbe ku “ta” ka Yesu loku ku vulavuriweke hakona exifanisweni xa hlonga ro tshembeka ku ta endleka hi nkarhi wa nhlomulo lowukulu.

17. Swilo swa Yesu swi katsa yini?

¹⁷ Swilo “hinkwaswo leswi nga swa [Yesu]” swi katsa yini? Ndlela leyi Yesu a ri tirhiseke ha yona rito leri nge “hinkwaswo” a ri kombisi leswaku swilo swa yena hi leswi nga emisaveni ntsena. Entiyisweni, Yesu u ni vulawuri lebyikulu etilweni. U te: “Ndzi nyikiwe vulawuri hinkwabyo etilweni ni le misaveni.” (Mat. 28:18; Efe. 1:20-23) Sweswi swilo swa yena swi katsa Mfumo wa Mesiya, lowu veke wa yena ku sukela hi 1914 naswona u ta fuma swin’we ni valandzeri va yena lava totiweke eka wona.—Nhlav. 11:15.

18. Ha yini Yesu a ta tsakela ku veka hlonga ro tshembeka ehenhla ka hinkwaswo leswi nga swa yena?

¹⁸ Hi ku pfumelelana ni mhaka leyi se hi buleke ha yona, hi nga gimeta hi ku yini? Loko Yesu a tela ku ta lovisa lavo homboloka hi nkarhi wa nhlomulo lowukulu, u ta kuma leswaku hlonga ro tshembeka ri karhi ri phamela swakudya swa moya leswi fikaka hi nkarhi eka va yindlu hi ku tshembeka. Hi nkarhi wolowo Yesu u ta ri veka ra vumbirhi—eka leswi nga swa yena hinkwaswo. Lava va vumbaka hlonga ro tshembeka va ta kuma ku vekiwa loku loko va kuma hakelo ya vona ya le tilweni kutani va fuma swin’we na Kreste.

19. Xana hlonga ro tshembeka ri ta kuma hakelo leyikulu etilweni ku tlula vatotiwa lavan’wana? Hlamusela.

¹⁹ Xana hlonga ro tshembeka ri ta kuma hakelo leyikulu etilweni ku tlula vatotiwa hinkwavo? Doo! Ntlawa lowutsongo wu nga ha tshembisiwa hakelo hi nkarhi wo karhi ivi eku heteleleni yi kumiwa ni hi van’wana. Hi xikombiso, xiya leswi Yesu a swi byeleke vaapostola va yena vo tshembeka va 11 hi vusiku bya le mahlweni ka ku fa ka yena. (Hlaya Luka 22:28-30.) Yesu u tshembise ntlawa wolowo lowutsongo wa vavanuna leswaku va ta kuma hakelo leyikulu hikwalaho ko tshembeka ka vona. Va ta fuma na yena etilweni. Kambe endzhaku ka malembe yo tala, u kombise leswaku hinkwavo lava 144 000 va ta tshama eswiluvelweni kutani va fuma na yena. (Nhlav. 1:1; 3:21) Hilaha ku fanaka, hilaha swi hlamuseriweke hakona eka Matewu 24:47, u tshembise leswaku ntlawa lowutsongo wa vavanuna, ku nga vamakwavo lava totiweke lava vumbaka hlonga ro tshembeka, wu ta vekiwa ehenhla ka hinkwaswo leswi nga swa yena. Entiyisweni, hinkwavo lava 144 000 va ta fuma na yena eka vulawuri bya yena lebyikulu bya le tilweni.—Nhlav. 20:4, 6.

20. Ha yini Yesu a veke hlonga ro tshembeka, naswona wena u tiyimisele yini?

²⁰ Hi ku tirhisa hlonga ro tshembeka ni ro tlhariha, Yesu u landzela ntila lowu a wu vekeke hi lembe-xidzana ro sungula—u phamela vanhu vo tala hi ku tirhisa vanhu vatsongo. Yesu u veke hlonga rolero ro tshembeka leswaku a tiyiseka leswaku valandzeri va yena va ntiyiso—ku nga khathariseki leswaku i vatotiwa kumbe i va tinyimpfu tin’wana—va tshama va ri ni swakudya swa moya leswi fikaka hi nkarhi emasikwini lawa yo hetelela. Hikwalaho minkarhi hinkwayo a hi kombiseni ku tlangela ka hina hi ku va seketela hi ku tshembeka vamakwerhu lava vo tshembeka lava vumbaka hlonga rolero ro tshembeka ni ro tlhariha.—Hev. 13:7, 17.