Ntirho Wa Ku Tirhandzela Lowu Pfunaka Hilaha Ku Nga Heriki

YESU KRESTE a a hamba a pfuna lava xanisekaka. Hi xikombiso, u phamele lava nga ni ndlala ni ku tshungula lava vabyaka. (Matewu 14:14-21) Kambe, hi wihi ntirho lowu a wu tekeke wu ri wa nkoka ngopfu? Xiendlakalo lexi endlekeke loko Yesu a ha ku sungula vutirheli byakwe xi nyikela nhlamulo. Xi rhekhodiwe eka ndzima yo sungula ya Evhangeli ya Marka.

Loko Yesu a ri eKapernawume, ekusuhi ni Lwandle ra Galeliya, u yisiwe ekaya ra Simoni, kumbe Petro. Kwalaho “mana wa nsati wa Simoni a a etlele ehansi a karhatiwa hi ku hisa ka miri,” kutani Yesu u n’wi tshungurile. (Marka 1:29-31) Endzhaku ka nkarhi ntshungu wun’wana lowu exikarhi ka wona a ku ri ni vanhu vo tala lava “a va khomiwe hi mavabyi yo hambana-hambana” wu sungule ku hlengeletana enyangweni wa yindlu ya Petro, kutani Yesu a wu tshungula na wona. (Marka 1:32-34) Kutani loko ri perile, un’wana ni un’wana u fambile a ya lata rivambu.

Hi siku leri tlhandlamaka “loko ka ha ri ni munyama,” Yesu u pfuke kahle handle ko ba huwa, kutani a huma endlwini “a ya enhoveni,” laha a fikeke “a sungula ku khongela.” Ku nga ri kungani, vadyondzisiwa na vona va pfukile, va languta ehandle ka yindlu, kutani va vona ntshungu lowukulu wu yime enyangweni. Kambe a va ta endla yini? Yesu a a nga ri kona! Hi ku hatlisa Petro ni lava a a ri na vona va sale Yesu endzhaku kutani va ku: “Hinkwavo va lava wena.” (Marka 1:35-37; Luka 4:42) Swi vonaka onge a va byela Yesu va ku: ‘Xana u endla yini laha? Tolo nimadyambu u tirhile hi ku tshungula vavabyi. Namuntlha wa ha langutane ni ntirho wun’wana lowukulu!’

Kambe, sweswi lemuka ndlela leyi Yesu a angulaka ha yona: “A hi yeni kun’wanyana, emadorobeni ya muti lowu nga ekusuhinyana, leswaku ndzi ta chumayela na kona.” Nhlamulo leyi i ya nkoka. Yesu a nga tlhelelanga endlwini ya Petro ku ya tshungula van’wana. U hlamusele xivangelo xa kona loko a ku: “Hikuva ndzi hume hi xikongomelo xexo [hileswaku, ku ta chumayela].” (Marka 1:38, 39; Luka 4:43) Yesu a a va byela yini vadyondzisiwa vakwe? A a va byela leswaku a swi ri swa nkoka leswaku a endla mintirho ya musa, kambe ntirho lowukulu wa Yesu a ku ri ku chumayela ni ku dyondzisa rito ra Xikwembu.—Marka 1:14.

Tanihi leswi Bibele yi khutazaka Vakreste “leswaku [va] landzelerisisa mikondzo yakwe,” Vakreste va ntiyiso namuntlha va ni nkongomiso lowu nga lo dla erivaleni, loko swi ta emhakeni ya ku tiva nchumu lowu nga wa nkoka entirhweni wa ku tirhandzela. (1 Petro 2:21) Ku fana na Yesu, va pfuna vanhu lava xanisekaka—hilaha xihloko lexi hundzeke xi kombiseke hakona. Nakambe, ku fana na Yesu, va rhangisa ntirho wa ku chumayela rungula ra Bibele leri vulavulaka hi mahungu lamanene ya Mfumo wa Xikwembu.a (Matewu 5:14-16; 24:14; 28:19, 20) Kutani, ha yini ku endla ntirho wa ku tirhandzela wa ku dyondzisa vanhu rungula ra Bibele wu ri wa nkoka ku tlula mintirho yin’wana ya ku tirhandzela?

Xivangelo Lexi Endlaka Leswaku Dyondzo Ya Bibele Yi Pfuna Ni Ndlela Leyi Yi Pfunaka Ha Yona

Xivuriso xa le Asiya xi nyika nhlamulo. Xi ri: “Loko u kunguhatela lembe, byala mbewu. Loko u kunguhatela malembe ya khume, byala mirhi. Loko u kunguhatela malembe ya dzana, dyondzisa vanhu.” Kunene, loko swi ta eku nyikeleni ka mintlhantlho leyi nga heriki, dyondzo i ya nkoka hikuva yi pfuna munhu leswaku a va ni vuswikoti byo endla swiboho leswi nga ta antswisa vutomi byakwe. Hi yona mhaka leyi namuntlha vatirhi va ku tirhandzela va nkarhi hinkwawo ni lava pfunaka hi minkarhi yin’wana va tirhisaka nkarhi wa vona, va endlaka matshalatshala ni ku tirhisa leswi va nga na swona leswaku va dyondzisa vanhu Bibele mahala. Nongonoko lowu wu tikombeke wu humelela, lowu fambisiwaka hi Timbhoni ta Yehovha wa va pfuna vanhu emisaveni hinkwayo. Njhani?

Loko vanhu va ri karhi va pfuniwa ku twisisa ni ku landzela ndzayo leyi pfunaka ya Bibele, va lungheka kahle leswaku va langutana ni swiphiqo swa vutomi. Va va ni matimba lama lavekaka ya ku hlula mikhuva yo biha. Nelson, muntshwa wa le Brazil, u kandziyisa mpfuno wun’wana wa dyondzo ya Bibele: “Ku sukela loko ndzi sungule ku dyondza Bibele ni Timbhoni ta Yehovha, se ndzi tsakile hikuva sweswi ndzi ni xikongomelo evuton’wini.” (Eklesiasta 12:13) Vanhu van’wana vo tala ngopfu—lavatsongo ni lavakulu—lava ha ku sungulaka ku dyondza Rito ra Xikwembu va titwa hi ndlela leyi fanaka ni ya Nelson. Ku tlhandlekela eku pfuneni ka swichudeni leswaku swi kuma xikongomelo lexi enerisaka evuton’wini, rungula ra Mfumo wa Xikwembu ri nyikela ntshembo lowu tsakisaka mayelana ni vumundzuku—ntshembo lowu endlaka leswaku vutomi byi va bya nkoka, hambi ku ri ehansi ka swiyimo swo nonon’hwa swinene. (1 Timotiya 4:8)—Vona Bokisi leri nge “Ndlela Leyi Mfumo Wa Xikwembu Wu Nga Ta Pfuna Ha Yona.”

Hi ku dyondzisa Bibele, Timbhoni ta Yehovha ti endla ntirho lowu pfunaka tiko, lowu nga ni mimbuyelo leyi nga ta tshama nkarhi wo leha. Xana yi ta tshama nkarhi wo lehisa ku yini? Rito ra Xikwembu ri ri: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.” (Yohane 17:3) Ehleketa u ri karhi u hlanganyela entirhweni lowu nga ni mimbuyelo leyi nga heriki—lowu hi wona ntirho wa ku tirhandzela lowu pfunaka swinene! Xana lowu a hi wona ntirho lowu u nga lavaka ku tiva swo tala ha wona? Loko swi ri tano, tihlanganise ni Timbhoni ta Yehovha ta le ndhawini ya ka n’wina. A wu nge tisoli hi xiboho xa wena xa ku amukela xirhambo lexi.

[Nhlamuselo ya le hansi]

[Marito lama tshahiweke exihlokweni lama nga eka tluka 21]

“Loko u kunguhatela lembe, byala mbewu. Loko u kunguhatela malembe ya khume, byala mirhi. Loko u kunguhatela malembe ya dzana, dyondzisa vanhu”

[Bokisi/Swifaniso leswi nga eka tluka 20]

Wansati Loyi U Tisa Mpfuno Ni Ntshembo

Nadine, muongori wa Mufurwa la nga ni malembe ya 43 hi vukhale la swi thwaseleke ku tshungula mavabyi lama vangiwaka hi ku hisa, hi wun’wana wa vatirhi va ku tirhandzela lava tirheke eAfrika Xikarhi. Eka mbulavurisano wa sweswinyana u te: “Vanhu va ndzi vutisa leswaku ha yini ndzi endla ntirho lowu. Ndzi mupfumeri eka Xikwembu; ndzi rhandza vanhu, naswona ndzi lava ku pfuna. Naswona leswi ndzi nga Mbhoni ya Yehovha, swa ndzi khutaza leswaku ndzi tshungula ni ku nyika vanhu lava xanisekaka ntshembo.” Loko a ri karhi a endla ntirho wa ku tirhandzela eAfrika, Nadine u tirhisa nkarhi wun’wana leswaku a endla ntirho wo phalala, kasi nkarhi wun’wana u wu tirhisela ku hlanganyela entirhweni wa ku dyondzisa vanhu Bibele, ku nga ntirho lowu endliwaka hi Timbhoni ta kwalaho.

[Swifaniso]

Nadine a ri eAfrika

[Bokisi leri nga eka tluka 22]

Ndlela Leyi Mfumo Wa Xikwembu Wu Nga Ta Pfuna Ha Yona

Hi kombela u hlaya matsalwa lama landzelaka eBibeleni ya wena, u vona ndlela leyi switshembiso swa Xikwembu swa ku enerisa swilaveko swa vanhu swi nga ta tirha ha yona etimhakeni leti landzelaka:

Rihanyo “Xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Nhlavutelo 21:4; Esaya 33:24; 35:5, 6.

Dyondzo “A va nge endli swo biha kumbe ku onha entshaveni ya mina hinkwayo yo kwetsima; hikuva kunene misava yi ta tala hi ku tiva Yehovha kukota mati lama funengetaka lwandle.”—Esaya 11:9; Habakuku 2:14.

Ntirho “Kunene va ta aka tindlu va tshama eka tona; kunene va ta rima masimu ya vhinya va dya mihandzu ya wona. A va nge aki kutani ku tshama un’wana; a va nge rimi kutani ku dya un’wana. . . A va nge tirheli swa hava.”—Esaya 65:21-23.

Swakudya “Misava yi ta humesa swimila swa yona; Xikwembu, Xikwembu xa hina xi ta hi katekisa.”—Pisalema 67:6; 72:16; Esaya 25:6.

Swiyimo eMisaveni “Yehovha u tshove nhonga ya lavo homboloka. . . . Misava hinkwayo yi wisile, a yi kavanyeteki.”—Esaya 14:5, 7.

Vululami “Waswivo! Hosi yi ta fuma hi ku tshembeka; kasi tihosana, ti ta va tihosana hi vululami.”—Esaya 11:3-5; 32:1, 2.