Va Va Ni Matimba Ya Vuntshwa Hilaha Ku Nga Heriki!

WANUNA loyi a a ri etlhelo ka Yesu a a ri kusuhi ni ku fa. U kombele a ku: “Yesu, u ndzi tsundzuka loko u nghena emfun’weni wa wena.” Yesu u hlamule a ku: “Ndzi tiyisile namuntlha ndzi ri eka wena, U ta va na mina eParadeyisini.” (Luka 23:42, 43) Entiyisweni, wanuna loyi vito ra yena ri nga boxiwangiki a a nga ta dlayiwa hi vuvabyi lebyi khomaka vadyuhari; a a ta dlayiwa hikwalaho ka vugevenga byakwe. Hambiswiritano, vanhu lava kuleke va nga kuma xikhutazo lexikulu eka xiyimo xo tika swinene lexi a a ri eka xona.

Onge na hina hi nga va ni ntshembo lowukulu lowu wanuna luya a a ri na wona! Hambileswi Yesu a a ri eku feni emhandzini ya nxaniso leyi a yi ri etlhelo ka yena, wanuna luya a a ri ni ntshembo wa leswaku Yesu u ta fuma tanihi Hosi eMfun’weni wa Xikwembu. Naswona a a anakanya leswaku siku rin’wana Yesu u ta n’wi tsundzuka. Ehleketa—wanuna la gweviweke u ta pfuxeriwa eparadeyisini yo saseka, laha Yesu a nga ta va a ri Hosi!

Vanhu va le ka xiyimo lexi fanaka ni xa mudyohi loyi a a ri eku feni. Hi ndlela yihi? Ku nga khathariseki malembe ya hina, hinkwerhu hi kuma hakelo ya xidyoho naswona hi lava ku ponisiwa. (Varhoma 5:12) Ku fana ni xigevenga lexiya na hina hi nga kuma ntshembo eka Kreste Yesu—hambi ku ri ntshembo wo ntshunxiwa eka swiphiqo leswi hi vaka na swona loko hi dyuhala! Ha tiyiseka hikuva Yesu u nyike vanhu ntshembo wo hanya hilaha ku nga heriki va ri ni miri ni mianakanyo leyi hetisekeke eparadeyisini emisaveni.—Yohane 3:16, 36.

Swilo Hinkwaswo Swi Va Leswintshwa Eka Lavakulu Ni Lavatsongo

Ehansi ka Mfumo wa Kreste vanhu hinkwavo emisaveni “va ta kuma ntsako lowu heleleke eku rhuleni lokukulu.” (Pisalema 37:11) Ku hava munhu la nga ta ku: “Ndza vabya.” (Esaya 33:24) Ku tsana loku hi nga ha vaka hi ri na kona ku ta herisiwa, hikuva “la khutaka u ta tlula kukota mhunti, ni ririmi ra la nga vulavuriki ri ta huwelela hi ku tsaka.” (Esaya 35:6) Lava dyuhaleke va ta tlhela va kuma matimba ya vuntshwa bya vona; nyama ya vona yi ta va “yintshwa ku tlula evuntshweni.”—Yobo 33:25.

Hambiswiritano, xana swa twala ku va ni ntshembo wo tano? Anakanya hi Loyi a nyikeke wanuna loyi a a ri eku feni ntshembo wo hanya eParadeyisini. Minkarhi yo tala mintshungu a yi yisa vanhu lava khutaka, lava lamaleke, lava feke mahlo ni lava nga twiki eka Yesu. A a horisa “swifo swa mixaka hinkwayo ni vulema bya mixaka hinkwayo.” (Matewu 9:35, 36; 15:30, 31; Marka 1:40-42) A a kombisa leswi Mfumo wakwe wu nga ta swi endla. Yesu u pfuxe ni vanhu vo hlayanyana lava a va file. (Luka 7:11-17; Yohane 11:38-44) Hi ku endla tano, a a tiyisekisa xitshembiso xakwe xa leswaku ‘hinkwavo lava nga eka masirha-bako ya xitsundzuxo va ta twa rito ra yena kutani va huma.’—Yohane 5:28, 29; Mintirho 24:15.

Anakanya u ri eParadeyisini u pfuka u ri ni miri lowuntshwa, u vona kahle, u twa miloti ya swinyanyana ni marito lama tsakeke, mavoko ni milenge swi nga vavi naswona u ri ni mianakanyo leyi hanyeke kahle. “Masiku ya khombo” lama vangiwaka hi ku dyuhala ma ta va ma nga ha ri kona. (Eklesiasta 12:1-7; Esaya 35:5, 6) Hambi ku ri rifu ri “ta herisiwa”—ri ta “miteriwa makumu.”—1 Vakorinto 15:26, 54.

Swiendlakalo swa misava leswi fambisanaka ni vuprofeta bya Bibele swi kombisa leswaku ku dyuhala ku le kusuhi ni ku hela hilaha hi swi tivaka hakona. (Matewu 24:7, 12, 14; Luka 21:11; 2 Timotiya 3:1-5) Nkarhi wu le kusuhi wa leswaku lava kombiseke ripfumelo eka Xikwembu ni lava va xi tirheleke va nga ta tlhela va kuma matimba ya le vuntshweni bya vona—kambe enkarhini wolowo, va ta va na wona hilaha ku nga heriki!

[Bokisi/Xifaniso lexi nga eka tluka 9]

Tirhisa Byongo Bya Wena!

Tanihi leswi vutiolori byi tiyisaka misiha, ku tirhisa miehleketo swi xalamukisa byongo. Leswaku hi kondletela byongo, hi fanele hi endla swilo leswintshwa. Swilo leswi landzelaka hi tin’wana ta tindlela to tiyisa tisele ta byongo.

◼ Dyondza swilo leswintshwa swo kota ku vumba swilo hi vumba, ku endla swivulwa hi marito lama kayivelaka, ku vumba swifaniso hi swipetlu-petlu ni ku vatla; dyondza ririmi rin’wana.

◼ Tirhisana ni vanhu vo hambana-hambana; ku tihlanganisa ni van’wana ni ku vulavula swi susa xivundza naswona swi xalamukisa miehleketo.

◼ Hlakulela swilo swa moya. “Mi nga vileli ha nchumu, kambe eka hinkwaswo tivisani Xikwembu swikombelo swa n’wina hi xikhongelo ni xikombelo swin’we ni ku nkhensa; kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo ha Kreste Yesu.”—Vafilipiya 4:6, 7.

◼ Hlaya rungula leri pfunaka; kutani u byela un’wana leswi u swi hlayeke.

◼ Tsundzuka u tlhela u hlamusela mahungu lama u ma tweke eka xiya-ni-moya kumbe TV ku vona loko wa ha swi kota ku tsundzuka kumbe loko se u rivala hi ku hatlisa.

◼ Tirhisa voko leri u nga taliki ku ri tirhisa loko u pfula TV, u tirhisa riqingho kumbe u hlamba meno.

◼ Tirhisa switwi swa wena hinkwaswo hilaha u nga kotaka hakona hi siku.

◼ Dyondza hi tindhawu leti tsakisaka ta le kusuhi ni ta le kule u tlhela u ti endzela.

[Xifaniso lexi nga eka tluka 8, 9]

Yesu u tshembise leswaku ku vava loku vanhu lava dyuhaleke va ku twaka ku ta hela ku nga ri khale naswona ku ta siviwa hi matimba ya vuntshwa hilaha ku nga heriki