Ku Tirhela Kreste Hosi Hi Ku Tshembeka

“[U nyikiwe] ku fuma ni xindzhuti ni mfumo, leswaku vanhu, vanhu va matiko ni tindzimi hinkwato va n’wi tirhela.”—DANIYELE 7:14.

 1, 2. Hi swi tivisa ku yini leswaku Kreste a nga amukelanga vulawuri hinkwabyo bya Mfumo hi 33 C.E.?

HI WIHI mufumi loyi a nga nyikelaka vutomi byakwe hikwalaho ka malandza yakwe kutani a tlhela a hanya leswaku a va hosi? Hi yihi hosi leyi nga hanyaka emisaveni, yi tshembiwa hi malandza ya yona, endzhaku yi fuma yi ri etilweni? Munhu loyi a endleke sweswo ni swo tlula swona i Yesu Kreste. (Luka 1:32, 33) Hi Pentekosta ya 33 C.E., loko Kreste a file a tlhela a pfuxiwa ivi endzhaku a tlhandlukela etilweni, Xikwembu “xi n’wi endl[e] nhloko ya swilo hinkwaswo evandlheni.” (Vaefesa 1:20-22; Mintirho 2:32-36) Hikwalaho, Kreste u sungule ku fuma hambileswi vulawuri byakwe a byi hikiwile. Malandza yakwe yo sungula a ku ri Vakreste lava totiweke hi moya, lava a va vumba Israyele wa moya, “ku nga Israyele wa Xikwembu.”—Vagalatiya 6:16; Vakolosa 1:13.

² Kwalomu ka malembe ya 30 endzhaku ka Pentekosta ya 33 C.E., muapostola Pawulo u tiyisekise leswaku Kreste a a nga si amukela vulawuri hinkwabyo bya Mfumo, kambe a a ri “evokweni ra xinene ra Xikwembu, ku sukela kwalaho u rindzile, kukondza valala vakwe va va vunavelo bya milenge yakwe.” (Vaheveru 10:12, 13) Kutani, eku heleni ka lembe-xidzana ro sungula C.E., muapostola Yohane la dyuhaleke u vone xivono xa loko Hosi ya Vuako Hinkwabyo, Yehovha, a veka Kreste Yesu a va Hosi ya Mfumo wa le tilweni lowu wa ha ku simekiwaka. (Nhlavutelo 11:15; 12:1-5) Namuntlha swa olova ku kumisisa vumbhoni lebyi tiyeke bya leswaku Kreste u sungule ku fuma tanihi Hosi Mesiya etilweni hi 1914.a

 3. (a) Hi yihi mhaka leyi mahungu lamanene ya Mfumo ma katseke na yona ku sukela hi 1914? (b) Hi swihi swivutiso leswi hi nga tivutisaka swona?

³ Ina, ku sukela hi 1914 mahungu lamanene ya Mfumo ma katse mhaka yin’wana yo tsakisa hakunene. Kreste se wa fuma tanihi Hosi ya Mfumo wa Xikwembu wa le tilweni, hambileswi a fumaka “exikarhi ka valala va [y]ena.” (Pisalema 110:1, 2; Matewu 24:14; Nhlavutelo 12:7-12) Ku tlula kwalaho, emisaveni hinkwayo, malandza yakwe yo tshembeka ma titsongahatela vulawuri byakwe hi ku hlanganyela eka tsima lerikulu ku tlula hinkwawo ro dyondzisa Bibele. (Daniyele 7:13, 14; Matewu 28:18) Vakreste lava totiweke hi moya, “vana va mfumo,” va tirha tanihi “vayimeri lava khomelaka Kreste.” Va seketeriwa hi ntshungu lowukulu wa “tinyimpfu tin’wana” ta Kreste, leti nga vachumayeri va Mfumo wa Xikwembu. (Matewu 13:38; 2 Vakorinto 5:20; Yohane 10:16) Hambiswiritano, hi fanele hi kambisisa loko hina vini hi byi xixima hakunene vulawuri bya Kreste. Xana ha tshembeka hakunene eka yena? Xana hi nga swi kombisa njhani leswaku ha tshembeka eka Hosi leyi fumaka yi ri etilweni? A hi sunguleni hi tlhuvutsa swivangelo swa ku tshembeka ka hina eka Kreste.

Hosi Leyi Khutazaka Ku Tshembeka

 4. Yesu u kote ku endla yini hi nkarhi wa vutirheli byakwe bya laha misaveni tanihi Hosi leyi Hlawuriweke?

⁴ Ku tshembeka ka hina eka Kreste ku titshege hi ku tlangela ka hina leswi a swi endleke swin’we ni timfanelo ta yena leti hlamarisaka. (1 Petro 1:8) Loko a ha ri emisaveni, Yesu tanihi Hosi leyi Hlawuriweke u swi kombise katsongo leswi a nga ta swi endla loko a ri Hosi leyi fumaka misava hinkwayo hi nkarhi lowu faneleke wa Xikwembu. U phamele lava nga ni ndlala. U hanyise lava vabyaka, mabofu, swilema, lava nga twiki ni timbheveve. Nakambe u pfuxe lava feke. (Matewu 15:30, 31; Luka 7:11-16; Yohane 6:5-13) Ku engetela kwalaho, ku va ni vutivi hi vutomi bya Yesu bya laha misaveni swi hi pfuna ku tiva timfanelo ta yena tanihi Mufumi wa nkarhi lowu taka wa misava—ngopfu-ngopfu rirhandzu rakwe ra ku pfumala vutianakanyi. (Marka 1:40-45) Malunghana ni mhaka leyi, hi ku ya hi xiviko xin’wana Napoléon Bonaparte u te: “Alekzanda, Khezari, Charlemagne na mina hi simeke mimfumo ya matimba, kambe hi tirhise yini leswaku hi simeka mimfumo yo tano? Hi tirhise matimba. I Yesu Kreste ntsena loyi a simekeke mfumo wa yena hi ku tirhisa rirhandzu, naswona ninamuntlha a nga feriwa hi vanhu va timiliyoni.”

 5. Ha yini vumunhu bya Yesu a byi koka vanhu van’wana?

⁵ Leswi Yesu a a ri ni moya wo rhula naswona a titsongahata, lava a va tshikilelekile a va phyuphyisiwa hi tidyondzo ta yena leti akaka na hi vumunhu byakwe lebyinene. (Matewu 11:28-30) Vana a va titwa va ntshunxekile loko va ri na yena. Vanhu lava titsongahataka ni lava twisisaka va hisekele ku va vadyondzisiwa va yena. (Matewu 4:18-22; Marka 10:13-16) Ku anakanyela ni xichavo xa yena swi endle leswaku a tshembiwa ni hi vavasati vo tala lava chavaka Xikwembu, laha vunyingi bya vona va nyikeleke hi nkarhi wa vona, mavoko ya vona ni swilo swa vona leswaku va n’wi khathalela loko a ri karhi a endla vutirheli bya yena.—Luka 8:1-3.

 6. I mintlhaveko yihi leyi Yesu a yi kombiseke loko Lazaro a file?

⁶ Kreste u kombise ku khumbeka ka yena hi vanhu van’wana loko munghana wa yena lonkulu Lazaro a file. Mariya na Marta va n’wi hlomule mbilu swinene lerova a kala a tlhaveka a “humesa mihloti.” U ‘karhatekile’ swinene, hambileswi a a swi tiva leswaku ku nga ri khale a a ta pfuxa Lazaro eku feni. Kutani hi ku susumetiwa hi rirhandzu ni ntwela-vusiwana, Yesu u tirhise matimba lawa a nyikiweke hi Xikwembu kutani a pfuxa Lazaro eka lava feke.—Yohane 11:11-15, 33-35, 38-44.

 7. Ha yini swi fanela leswaku hi tshembeka eka Yesu? (Nakambe vona bokisi leri nga eka tluka 31.)

⁷ Leswi endlaka leswaku hi n’wi xixima swinene Yesu hileswi a a rhandza vululami, a a venga vukanganyisi ni vuhomboloki. U teke goza ra vukarhi kambirhi a humesa vaxavisi lava nga ni makwanga etempeleni. (Matewu 21:12, 13; Yohane 2:14-17) Ku engetela kwalaho, leswi a a ri munhu wa nyama emisaveni, u langutane ni maxangu ya mixaka hinkwayo, a tokota mintlhontlho ni swiphiqo leswi hi langutanaka na swona. (Vaheveru 5:7-9) Nakambe Yesu a a swi tiva leswaku swi njhani ku vengiwa ni ku khomiwa hi ndlela yo biha. (Yohane 5:15-18; 11:53, 54; 18:38–19:16) Eku heteleleni, hi xivindzi u pfumele ku fa hi ndlela ya tihanyi leswaku a hetisisa ku rhandza ka Tata wa yena ni ku nyika malandza yakwe vutomi lebyi nga heriki. (Yohane 3:16) Xana timfanelo to tano ta Kreste a ti ku susumeteli ku hambeta u n’wi tirhela hi ku tshembeka? (Vaheveru 13:8; Nhlavutelo 5:6-10) Kambe, xana ku laveka yini leswaku munhu a va nandza wa Kreste Hosi?

Ku Fanelekela Ku Va Nandza

 8. I yini leswi languteriweke eka malandza ya Kreste?

⁸ Anakanya hi xifananiso lexi: Ku va muaki wa tiko rin’wana hi ntolovelo swi lava leswaku u fikelela swilaveko swo karhi swa xisekelo. Vanhu lava lavaka ku va vaaki va tiko rero va nga languteriwa ku va ni ndhuma leyinene naswona va fikelela swilaveko swo karhi swa rihanyo. Hilaha ku fanaka, malandza ya Kreste ma fanele ku hlayisa mimpimanyeto leyi tlakukeke ya mahanyelo ni ku va lama hanyeke kahle emoyeni.—1 Vakorinto 6:9-11; Vagalatiya 5:19-23.

 9. Hi nga swi kombisa njhani leswaku ha tshembeka eka Kreste?

⁹ Nakambe Yesu Kreste u lava leswaku malandza yakwe ma tshembeka eka yena ni le ka Mfumo wakwe. Ma kombisa vutshembeki bya wona hi ku hanya hi ku pfumelelana ni leswi a swi dyondziseke loko a ha ri emisaveni a ri Hosi leyi Hlawuriweke. Hi xikombiso, ma rhangisa timhaka ta Mfumo ni ku rhandza ka Xikwembu ematshan’weni yo hlongorisa swilo leswi vonakaka. (Matewu 6:31-34) Nakambe ma tikarhatela ku kombisa vumunhu byo fana ni bya Kreste, hambiloko ma langutane ni swiyimo swo tika swinene. (1 Petro 2:21-23) Ku tlula kwalaho, malandza ya Kreste ma landzela xikombiso xa yena hi ku teka goza ma endlela van’wana leswinene.—Matewu 7:12; Yohane 13:3-17.

10. Ku tshembeka eka Kreste ku nga kombisiwa njhani (a) endyangwini ni le (b) vandlheni?

¹⁰ Nakambe valandzeri va Yesu va kombisa ku tshembeka eka yena hi ku kombisa timfanelo ta yena endyangwini. Hi xikombiso, vavanuna va kombisa ku tshembeka ka vona eka Hosi ya vona ya le tilweni hi ku tekelela timfanelo ta Kreste eka ndlela leyi va hanyisanaka ha yona ni vasati ni vana va vona. (Vaefesa 5:25, 28-30; 6:4; 1 Petro 3:7) Vavasati va kombisa ku tshembeka ka vona eka Kreste hi mahanyelo lamanene ni hi ku kombisa “moya wo rhula ni wo olova.” (1 Petro 3:1-4; Vaefesa 5:22-24) Vana va kombisa ku tshembeka ka vona eka Kreste loko va tekelela xikombiso xa yena xa ku yingisa. Loko a ha ri muntshwa, Yesu a a titsongahata eka vatswari va yena, hambileswi a va nga hetisekanga. (Luka 2:51, 52; Vaefesa 6:1) Malandza ya Kreste ma tikarhatela ku n’wi tekelela hi ku “kombisa ntlhaveko wa xinakulobye, xinakulobye xa vumakwerhu” ni ku va ni “ntsetselelo lowukulu.” Va lwela ku fana na Kreste, va “titsongahata emianakanyweni, [va] nga tlheriseli swo biha hi swo biha kumbe ku tseketsela hi ku tseketsela.”—1 Petro 3:8, 9; 1 Vakorinto 11:1.

Malandza Lama Yingisaka Nawu

11. Hi yihi milawu leyi malandza ya Kreste ma yi yingisaka?

¹¹ Tanihi leswi vanhu lava va lavaka ku va vaaki va tiko rin’wana va yingisaka milawu ya tiko ra vona lerintshwa, malandza ya Kreste ma yingisa “nawu wa Kreste” hi ku twananisa vutomi bya wona ni hinkwaswo leswi Yesu a swi dyondziseke ni ku swi lerisa. (Vagalatiya 6:2) Ngopfu-ngopfu, ma hanya hi ku landza “nawu wa vuhosi” wa rirhandzu. (Yakobo 2:8) Xana milawu yoleyo yi katsa yini?

12, 13. Xana hi yingisa “nawu wa Kreste” hi ku tshembeka hi ndlela yihi?

¹² Malandza ya Kreste a ma hetisekanga naswona ma endla swihoxo. (Varhoma 3:23) Hikwalaho, ma fanele ma hambeta ma hlakulela ku va ni “xinakulobye xa vumakwerhu lexi nga riki na vukanganyisi” leswaku ma “[rhandzana] swinene ku suka embilwini.” (1 Petro 1:22) “Loko un’wana a ri ni xivangelo xa ku vilerisiwa hi un’wanyana,” Vakreste hi ku tshembeka va tirhisa nawu wa Kreste hi ku “lehiselana mbilu ni ku rivalelana hi ku ntshunxeka.” Ku yingisa nawu lowu swi va pfuna leswaku va hambeta va honisa swihoxo swa van’wana ni ku kuma swivangelo swo rhandzana. Xana a wu swi tlangeli ku va exikarhi ka lava va titsongahataka eka Hosi ya hina leyi nga ni rirhandzu lava tiambexaka rirhandzu, ku nga “xiboho lexi hetisekeke xa vun’we”?—Vakolosa 3:13, 14.

¹³ Ku tlula kwalaho, Yesu u hlamusele leswaku rirhandzu leri a ri kombiseke ri tlula leri vanhu hi ntolovelo va ri kombisaka van’wana. (Yohane 13:34, 35) Loko hi rhandza lava hi rhandzaka ntsena, ku ta va ku nga ri na ‘nchumu wo hlawuleka’ lowu hi wu endlaka. Hi ndlela yoleyo rirhandzu ra hina ri ta va ri kayivela swinene. Yesu u hi khutaze ku tekelela rirhandzu ra Tata wa yena hi ku va ni rirhandzu leri fambisanaka ni misinya ya milawu hambi ku ri eka valala lava hi vengaka ni ku hi xanisa. (Matewu 5:46-48) Nakambe rirhandzu leri ri susumetela lava tivekaka ehansi ka Mfumo leswaku va phikelela hi ku tshembeka entirhweni wa vona lowukulu. Xana hi wihi ntirho wolowo lowukulu?

Ku Ringiwa Ka Vutshembeki Bya Malandza Ya Kreste

14. Ha yini ntirho wo chumayela wu ri wa nkoka swinene?

¹⁴ Lava nga ehansi ka Mfumo wa Xikwembu sweswi va ni ntirho wa nkoka wa “ku nyikela vumbhoni bya rixaladza malunghana ni mfumo wa Xikwembu.” (Mintirho 28:23) Ku endla ntirho lowu i swa nkoka hikuva Mfumo wa Mesiya wu ta lwela vuhosi bya Yehovha evuakweni hinkwabyo. (1 Vakorinto 15:24-28) Loko hi chumayela mahungu lamanene, lava va ma yingisaka va va ni lunghelo ro va ehansi ka Mfumo wa Xikwembu. Ku tlula kwalaho, ndlela leyi vanhu va angulaka ha yona eka rungula rero yi veka xisekelo kumbe mpimanyeto lowu Kreste Hosi a nga ta avanyisa vanhu ha wona. (Matewu 24:14; 2 Vatesalonika 1:6-10) Kutani ndlela ya nkoka leyi hi kombisaka ha yona leswaku ha tshembeka eka Kreste i ku yingisa xileriso xa yena xo byela van’wana hi timhaka ta Mfumo.—Matewu 28:18-20.

15. Ha yini vutshembeki bya Vakreste byi ringiwa?

¹⁵ Entiyisweni, Sathana u lwisana ni ntirho wo chumayela hilaha a nga kotaka hakona, naswona vafumi va vanhu a va byi xiximi vulawuri lebyi Kreste a nyikiweke byona hi Xikwembu. (Pisalema 2:1-3, 6-8) Kutani Yesu u tsundzuxe vadyondzisiwa va yena a ku: “Hlonga a ri n’wi tluli n’wini wa rona hi vukulu. Loko va ndzi xanisile, na n’wina va ta mi xanisa.” (Yohane 15:20) Hikwalaho, valandzeri va Kreste va le ku lweni ka nyimpi ya moya leyi ringaka vutshembeki bya vona.—2 Vakorinto 10:3-5; Vaefesa 6:10-12.

16. Xana lava tivekaka ehansi ka Mfumo va swi tlherisela njhani “swilo swa Xikwembu eka Xikwembu”?

¹⁶ Nilokoswiritano, lava nga ehansi ka Mfumo wa Xikwembu va tshama va tshembekile eka Hosi ya vona leyi nga vonakiki kambe va nga byi honisi vulawuri bya vanhu va nyama. (Tito 3:1, 2) Yesu u te: “Tlheriselani swilo swa Khezari eka Khezari, kambe swilo swa Xikwembu eka Xikwembu.” (Marka 12:13-17) Hikwalaho, malandza ya Kreste ma yingisa milawu ya hulumendhe leyi nga lwisaniki ni milawu ya Xikwembu. (Varhoma 13:1-7) Hambiswiritano, loko huvo leyikulu ya Vayuda yi tlula milawu ya Xikwembu hi ku lerisa vadyondzisiwa va Yesu leswaku va tshika ku chumayela, va hlamule hi xivindzi kambe hi xichavo va vula leswaku va ta “yingisa Xikwembu tanihi mufumi ku tlula vanhu.”—Mintirho 1:8; 5:27-32.

17. Hikwalaho ka yini hi nga swi kotaka ku langutana ni miringo ya vutshembeki hi xivindzi?

¹⁷ Entiyisweni, malandza ya Kreste ma fanele ku va ni xivindzi swinene leswaku ma tshama ma tshembekile eka Hosi ya wona loko ma langutane ni nxaniso. Nilokoswiritano, Yesu u te: “Ma tsaka n’wina loko vanhu va mi rhukana ni ku mi xanisa ni ku mi hembela hi swilo hinkwaswo swo homboloka hikwalaho ka mina. Tsakani mi khana, hikuva hakelo ya n’wina i yikulu ematilweni.” (Matewu 5:11, 12) Valandzeri va Kreste vo sungula va vone ku hetiseka ka marito wolawo eka vona vini. Hambiloko va bukuteriwa hikwalaho ko chumayela hi Mfumo, va tsakile “hikuva va hlayiwe lava faneriwaka hi ku khomisiwa tingana hikwalaho ka vito ra yena. Naswona siku ni siku etempeleni ni hi yindlu ni yindlu a va hambeta va nga rhuteli ku dyondzisa ni ku vula mahungu lamanene hi ta Kreste, Yesu.” (Mintirho 5:41, 42) Swa fanela leswaku u bumabumeriwa, loko u ri karhi u kombisa moya lowu fanaka wa ku tshembeka loko u langutane ni maxangu, mavabyi, ku feriwa ni ku kanetiwa.—Varhoma 5:3-5; Vaheveru 13:6.

18. Xana marito lawa Yesu a ma byeleke Pontiyo Pilato ma kombisa yini?

¹⁸ Loko a ha ri Hosi leyi Hlawuriweke, Yesu u hlamusele Ndhuna-nkulu ya Murhoma, Pontiyo Pilato a ku: “Mfumo wa mina a hi xiphemu xa misava leyi. Loko mfumo wa mina a wu ri xiphemu xa misava leyi, valanguteri va mina a va ta va va lwile leswaku ndzi nga nyiketiwi eka Vayuda. Kambe, hilaha swi nga hakona, mfumo wa mina a wu humi exihlobyeni lexi.” (Yohane 18:36) Hikwalaho, lava tivekaka ehansi ka Mfumo wa le tilweni, a va lwi na munhu hi matlhari kumbe ku hlanganyela etinyimpini ta vanhu va nyama. Leswaku va kombisa ku tshembeka eka “Hosana ya Ku Rhula” va swi papalata hi ku helela ku hlanganyela eka timhaka ta misava leti vangaka ku avana.—Esaya 2:2-4; 9:6, 7.

Hakelo Leyi Nga Heriki Ya Malandza Yo Tshembeka

19. Ha yini malandza ya Kreste ma nga langutelaka vumundzuku ma ri ni ntshembo?

¹⁹ Malandza yo tshembeka ya Kreste, loyi a nga “Hosi ya tihosi,” ma langutela vumundzuku ma ri ni ntshembo. Ma swi langutele hi mahlo-ngati ku vona loko a kombisa matimba lamakulu ya vuhosi bya yena ku nga ri khale. (Nhlavutelo 19:11–20:3; Matewu 24:30) Masalela yo tshembeka ya “vana va mfumo” lava totiweke hi moya, ma yi langutele hi mahlo-ngati ndzhaka ya ku va tihosi na Kreste etilweni. (Matewu 13:38; Luka 12:32) “Tinyimpfu tin’wana” ta Kreste to tshembeka ti swi langutele hi mahlo-ngati ku amukeriwa hi Hosi ya tona hi marito lama nge: “Tanani, n’wina lava katekisiweke hi Tatana, dyanani ndzhaka ya mfumo [Paradeyisi ya laha misaveni] lowu mi lunghiseriweke wona hi mpfhuka misava yi va kona.” (Yohane 10:16; Matewu 25:34) Kutani, onge hinkwavo lava tivekaka ehansi ka Mfumo va nga tiyimisela ku hambeta va tirhela Kreste Hosi hi ku tshembeka.

[Nhlamuselo ya le hansi]

U Nga Hlamusela Xana?

• Ha yini swi fanela leswaku hi tshembeka eka Kreste?

• Xana malandza ya Kreste ma swi kombisa njhani leswaku ma tshembekile eka yena?

• Hikwalaho ka yini hi lava ku tshembeka eka Kreste Hosi?

[Bokisi leri nga eka tluka 31]

TIMFANELO TIN’WANA TA KRESTE LETI XIYEKAKA

Ku nga yi hi nghohe—Yohane 4:7-30.

Ntwela-vusiwana—Matewu 9:35-38; 12:18-21; Marka 6:30-34.

Rirhandzu ro pfumala vutianakanyi—Yohane 13:1; 15:12-15.

Ku tshembeka—Matewu 4:1-11; 28:20; Marka 11:15-18.

Ku twisisa—Marka 7:32-35; Luka 7:11-15; Vaheveru 4:15, 16.

Ku anakanyela—Matewu 15:21-28.

[Xifaniso lexi nga eka tluka 29]

Loko hi rhandza van’wana, hi va hi yingisa “nawu wa Kreste” hi ku tshembeka

[Swifaniso leswi nga eka tluka 31]

Xana timfanelo ta Kreste ti ku susumetela ku n’wi tirhela hi ku tshembeka?