“Tshinelani Eka Xikwembu”
“Tshinelani eka Xikwembu, kutani xi ta tshinela eka n’wina.”—YAKOBO 4:8.
1, 2. (a) I yini leswi hakanyingi vanhu va swi vulaka? (b) Yakobo u nyikele xikhutazo xihi naswona ha yini a xi laveka?
“XIKWEMBU xi na hina.” Marito lawa ma tsariwe eka mimfungho leyi yimelaka tiko ni le ka tiyunifomo ta masocha. Marito lama nge “Ntshembo wa hina wu le ka Xikwembu” ma tsariwe eka mali yo tala ya manguva lawa, ya nsimbi ni ya phepha. Vanhu va swi toloverile ku vula leswaku va ni vuxaka lebyikulu ni Xikwembu. Kambe, xana a wu pfumelelani na swona leswaku ku va ni vuxaka byo tano, entiyisweni swi lava leswaku munhu a endla leswi engetelekeke ku tlula ku vulavula hi swona ntsena kumbe ku tsala marito yo karhi leswaku ma voniwa hi vanhu?
2 Bibele yi kombisa leswaku swa koteka ku va ni vuxaka ni Xikwembu. Kambe ku laveka matshalatshala. Ni Vakreste van’wana lava totiweke va lembe-xidzana ro sungula a va fanele va tiyisa vuxaka bya vona na Yehovha Xikwembu. Yakobo mulanguteri la nga Mukreste u boheke ku tsundzuxa van’wana hi mimboyamelo ya vona ya nyama ni ku thyaka ka vona hi tlhelo ra moya. Loko a ri karhi a nyikela ndzayo yoleyo, u va khutaze hi marito lama nge: “Tshinelani eka Xikwembu, kutani xi ta tshinela eka n’wina.” (Yakobo 4:1-12) Xana Yakobo a a vula yini loko a ku “tshinelani”?
3, 4. (a) Xana xiga lexi nge “tshinelani eka Xikwembu” xi nga ha va xi va tsundzuxe yini vahlayi van’wana va papila ra Yakobo va lembe-xidzana ro sungula? (b) Ha yini hi nga tiyisekaka leswaku swa koteka ku tshinela eka Xikwembu?
3 Yakobo u tirhise xiga lexi a xi tolovelekile eka vo tala lava a va ta hlaya papila ra yena. Nawu wa Muxe wu nyike vaprista swileriso swo karhi malunghana ni ndlela yo ‘tshinela’ eka Yehovha, loko va yimela vanhu. (Eksoda 19:22) Xisweswo, vahlayi va papila ra Yakobo va tsundzuxiwe leswaku ku tshinela eka Yehovha a hi nchumu lowu faneleke wu tekeriwa ehansi. Yehovha i munhu wo xiximeka ku tlula munhu wihi na wihi evuakweni hinkwabyo.
4 Hi hala tlhelo, xidyondzi xin’wana xa Bibele xi vula leswaku “xikhutazo [lexi nga eka Yakobo 4:8] xi paluxa ntshembo lowukulu.” Yakobo a a swi tiva leswaku hikwalaho ka rirhandzu, minkarhi hinkwayo Yehovha u rhamba vanhu lava nga hetisekangiki leswaku va tshinela eka Yena. (2 Tikronika 15:2) Gandzelo ra Yesu ri endle leswaku vanhu va kota ku tshinela swinene eka Yehovha. (Vaefesa 3:11, 12) Namuntlha, ndlela yo tshinela eka Xikwembu yi pfulekele vanhu va timiliyoni. Kambe, hi nga ri tirhisa njhani lunghelo leri lerikulu swonghasi? Hi ta kambisisanyana tindlela tinharhu, leti hi nga tshinelaka eka Yehovha Xikwembu ha tona.
Hambetani Mi ‘Nghenisa Vutivi’ Bya Xikwembu
5, 6. Xikombiso xa Samuwele lontsongo xi swi kombisa njhani leswi katsekaka eku ‘ngheniseni ka vutivi’ bya Xikwembu?
5 Hi ku ya hi Yohane 17:3, Yesu u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.” ETibibeleni to tala, ndzimana leyi yi hundzuluxeriwe hi ndlela leyi hambanakanyana ni Vuhundzuluxeri Bya Misava Leyintshwa. Ematshan’weni ya leswaku byi ku, ‘ku nghenisa vutivi’ bya Xikwembu, byi hundzuluxela ntsena riendli leri nge “ku tiva” Xikwembu. Hambiswiritano, swidyondzi swo tala swi vula leswaku ndlela leyi rito leri ri tirhisiweke ha yona eka Xigriki xo sungula yi katsa swo tala—ri vula xiendlo lexi yaka emahlweni, lexi nga ha endlaka leswaku munhu a va ni vuxaka lebyikulu ni munhu wa kona.
6 Mhaka ya ku tiva Xikwembu swinene a ku nga ri nchumu lowuntshwa esikwini ra Yesu. Hi xikombiso, eMatsalweni ya Xiheveru, hi twa leswaku loko Samuwele a ha ri xifanyetana, “a a nga si n’wi tiva Yehovha.” (1 Samuwele 3:7) Xana leswi a swi vula leswaku Samuwele a a nga tivi to tala hi Xikwembu xa yena? Doo! Vatswari vakwe ni vaprista va fanele va n’wi dyondzise swo tala. Hambiswiritano, hi ku ya hi xidyondzi xin’wana, rito ra Xiheveru leri tirhisiweke eka ndzimana yoleyo ri nga “tirhisiwa eka munhu loyi u n’wi toloveleke ngopfu.” Samuwele a a nga si n’wi tiva swinene Yehovha, hilaha a ta n’wi tiva hakona loko se a ri muvulavuleri wa Yehovha. Loko Samuwele a ri karhi a kula, u n’wi tivile Yehovha, a va ni vuxaka lebyikulu na yena.—1 Samuwele 3:19, 20.
7, 8. (a) Ha yini hi nga fanelanga hi hetiwa matimba hi tidyondzo leti enteke ta Bibele? (b) Hi yihi mintiyiso yin’wana leyi enteke ya Rito ra Xikwembu leyi hi faneleke hi yi dyondza?
7 Xana wa byi nghenisa vutivi bya Yehovha leswaku u ta n’wi tiva swinene? Leswaku u kota ku endla sweswo, u fanele u ‘hlakulela ku navela’ swakudya swa moya leswi Xikwembu xi hi nyikaka swona. (1 Petro 2:2) U nga eneriseki ntsena hi tidyondzo ta xisekelo. Endla matshalatshala yo dyondza tidyondzo tin’wana leti enteke ta le Bibeleni. (Vaheveru 5:12-14) Xana tidyondzo to tano ti ku heta matimba, ivi u tibyela leswaku ti tika ngopfu? Loko swi ri tano, tsundzuka leswaku Yehovha i ‘Muleteri Lonkulu.’ (Esaya 30:20) Wa swi kota ku hundzisela mintiyiso leyi enteke emianakanyweni ya vanhu lava nga hetisekangiki. Naswona u ta ma katekisa matshalatshala ya wena lama humaka embilwini ya ku lava ku twisisa leswi a ku dyondzisaka swona.—Pisalema 25:4.
8 Ha yini u nga tikambeli hi ku tirhisa swin’wana swa “swilo leswi enteke swa Xikwembu”? (1 Vakorinto 2:10) Swilo leswi a hi tinhloko-mhaka leti phirhaka leti vafundhisi va phikizanaka ha tona. I tidyondzo leti pfunaka, leti endlaka u twisisa mianakanyo ni mbilu ya Tata wa hina wa rirhandzu. Hi xikombiso, dyondzo ya nkutsulo, “xihundla xo kwetsima” ni mintwanano yo hambana-hambana leyi Yehovha a yi tirhiseke leswaku a sirhelela vanhu va yena ni ku hetisisa swikongomelo swa yena—ni tidyondzo tin’wana to fana na tona ta tsakisa ti tlhela ti vuyerisa loko u tiendlela ndzavisiso ni ku dyondza ha tona.—1 Vakorinto 2:7.
9, 10. (a) Ha yini ku tikurisa swi ri ni khombo, naswona i yini leswi nga ta hi pfuna ku ku papalata? (b) Ha yini hi fanele hi tikarhatela ku va lava titsongahataka loko swi ta emhakeni ya vutivi bya Yehovha?
9 Loko vutivi bya wena bya swilo leswi enteke swa moya byi ri karhi byi kula, u fanele u tivonela eka khombo leri nga ha vaka kona loko u ri ni vutivi byebyo—ku nga ku tikurisa. (1 Vakorinto 8:1) Ku tikurisa ku ni khombo hikuva ku hambukisa vanhu eka Xikwembu. (Swivuriso 16:5; Yakobo 4:6) Tsundzuka, a ku na munhu la nga ni xivangelo xo tibuma hi vutivi bya yena. Hi xikombiso, xiya marito ya xingheniso xa buku leyi kambisisaka nhluvuko wa sweswinyana lowu vanhu va wu endleke etimhakeni ta sayense: “Loko hi ya hi va ni vutivi, hi ya hi swi xiya leswaku a hi tivi nchumu. . . . Hinkwaswo leswi hi swi dyondzeke a hi nchumu loko hi swi ringanisa ni leswi ha ha faneleke hi swi dyondza.” Ku titsongahata ka muxaka lowu i kunene. Loko swi ta eka vutivi lebyi enteke—ku nga vutivi bya Yehovha Xikwembu—hi ni xivangelo lexikulu xo tshama hi ri karhi hi titsongahata. Ha yini?
10 Xiya swiga swin’wana swa le Bibeleni leswi vulavulaka hi Yehovha. “Miehleketo ya wena yi entile swinene.” (Pisalema 92:5) “Ku twisisa ka [Yehovha] a ku runguleki.” (Pisalema 147:5) “Ku twisisa ka [Yehovha] a ku lavisiseki.” (Esaya 40:28) “Mawaku ku enta ka rifuwo ni vutlhari ni vutivi bya Xikwembu!” (Varhoma 11:33) Swi le rivaleni leswaku Yehovha a hi nge n’wi tivi hi n’wi heta. (Eklesiasta 3:11) U hi dyondzise swilo swo tala swo hlamarisa, kambe minkarhi hinkwayo ku ta tshama ku ri ni xilaveko xo dyondza swo tala. Xana mhaka leyi a yi tsakisi yi tlhela yi hi endla hi vona leswaku hi vanhu va xiyimo xa le hansi? Kutani ke, minkarhi hinkwayo loko hi ri karhi hi dyondza, a hi tirhiseni vutivi bya hina tanihi xisekelo xo tshinela eka Yehovha ni xo pfuna van’wana leswaku na vona va tshinela eka yena—hi nga byi tirhiseli ku tikurisa eka van’wana.—Matewu 23:12; Luka 9:48.
Kombisa Rirhandzu Ra Wena Eka Yehovha
11, 12. (a) Vutivi lebyi hi byi nghenisaka ha Yehovha byi fanele byi hi khumba njhani? (b) I yini lexi kombisaka leswaku munhu u rhandza Xikwembu hi mbilu hinkwayo?
11 Hilaha ku faneleke, muapostola Pawulo u kombise leswaku vutivi ni rirhandzu swa fambisana. U tsarile: “Leswi ndzi hambetaka ndzi swi khongelela hi leswi, leswaku rirhandzu ra n’wina ri ya ri andza ngopfu hi vutivi lebyi kongomeke ni ku twisisa loku heleleke.” (Vafilipiya 1:9) Ematshan’weni ya leswaku wu hi endla hi tikukumuxa hi ku tinyungubyisa, ntiyiso wihi ni wihi wa risima lowu hi wu dyondzaka ha Yehovha swin’we ni swikongomelo swa yena wu fanele wu hi endla hi n’wi rhandza swinene Tata wa hina wa le tilweni.
12 Kambe, vo tala lava va vulaka leswaku va xi rhandza Xikwembu, entiyisweni va va va nga xi rhandzi. Swi nga ha endleka va titwa va xi rhandza hi mbilu hinkwayo. Ku titwa hi ndlela yoleyo i swinene, naswona ka bumabumeriwa, ntsena loko ku fambisana ni vutivi lebyi kongomeke. Kambe vona hi voxe va va va nga xi rhandzi hi xiviri Xikwembu. Ha yini? Xiya ndlela leyi Rito ra Xikwembu ri hlamuselaka rirhandzu ro tano ha yona: “Hikuva ku rhandza Xikwembu, hi kona ku hlayisa swileriso swa xona.” (1 Yohane 5:3) Kutani ke, loko munhu a yingisa Yehovha u va a n’wi rhandza hi mbilu hinkwayo.
13. Xana ku chava Xikwembu ku nga hi pfuna njhani ku kombisa leswaku ha n’wi rhandza Yehovha?
13 Ku chava Yehovha swi ta hi pfuna leswaku hi n’wi yingisa. Loko hi nghenisa vutivi ha Yehovha, hi dyondza hi ku kwetsima ka yena loku nga riki na makumu, ku vangama, matimba, vululami, vutlhari ni rirhandzu ra yena swi hi endla leswaku hi n’wi chava hi tlhela hi n’wi xixima swinene. Ku n’wi chava hi ndlela yoleyo i swa nkoka leswaku hi ta tshinela eka yena. Xiya leswi Pisalema 25:14 yi swi vulaka: “Lava va vaka ni xinakulobye na Yehovha hi lava va n’wi chavaka.” Kutani ke, loko hi chava ku khunguvanyisa Tata wa hina wa le tilweni la nga ni rirhandzu, hi ta tshinela eka yena. Ku chava Xikwembu ku ta hi pfuna leswaku hi yingisa ndzayo ya xona ya vutlharhi leyi tsariweke eka Swivuriso 3:6 leyi nge: “N’wi tivise tindlela ta wena hinkwato, kutani yena u ta lulamisa tindlela ta wena.” Xana swi vula yini sweswo?
14, 15. (a) Hi swihi swiboho leswi hi faneleke hi swi endla siku na siku? (b) Hi nga swi endla njhani swiboho hi ndlela leyi kombisaka leswaku hi chava Xikwembu?
14 Siku na siku u fanele u endla swiboho leswikulu ni leswitsongo. Hi xikombiso, xana u ta bula hi yini ni vatirhi-kuloni, lava u nghenaka na vona xikolo ni vaakelani va wena? (Luka 6:45) Xana u ta tirha ntirho wa wena hi matimba, kumbe u to tirhela ku hetisisa nawu? (Vakolosa 3:23) Xana u ta namarhela lava va nga n’wi rhandziki Yehovha, kumbe u ta tsakela ku tiyisa vuxaka bya wena ni vanhu lava wupfeke emoyeni? (Swivuriso 13:20) Xana u ta endla yini, leswaku u yisa timhaka ta Mfumo wa Xikwembu emahlweni, hambi ku ri hi tindlela titsongo? (Matewu 6:33) Loko u endla swiboho swa siku na siku u landzela misinya ya milawu ya Matsalwa leyi tshahiweke laha, kunene u ta va u tivisa Yehovha “tindlela ta wena hinkwato.”
15 Entiyisweni, loko hi endla xiboho xin’wana ni xin’wana, hi fanele hi kongomisiwa hi swivutiso leswi: ‘Xana Yehovha a a ta lava leswaku ndzi endla yini? Hi yihi ndlela leyi ndzi nga yi tekaka leyi nga ta n’wi tsakisa swinene?’ (Swivuriso 27:11) Ndlela leyinene ngopfu yo kombisa ku rhandza Yehovha i ku n’wi chava hi ndlela yoleyo. Ku chava Xikwembu swi ta tlhela swi hi susumetela ku tshama hi basile—emoyeni, emahanyelweni ni le mirini. Tsundzuka leswaku endzimaneni leyi Yakobo a khutazaka Vakreste leswaku va ‘tshinela eka Xikwembu,’ u tlhela a va khongotela a ku: “Basisani mavoko ya n’wina, n’wina vadyohi, mi tengisa timbilu ta n’wina, n’wina lava nga tiyisekiki.”—Yakobo 4:8.
16. Xana leswi hi swi nyikaka Yehovha a swi nge swi koti ku hetisisa yini, kambe i yini leswi hi faneleke hi n’wi nyika swona?
16 Ina, ku kombisa rirhandzu ra hina eka Yehovha a swi vuli ku papalata leswo biha ntsena. Nakambe rirhandzu ri hi susumetela ku endla leswinene. Hi xikombiso, xana hi ma tekisa ku yini malwandla ya Yehovha lama hlamarisaka? Yakobo u tsarile: “Nyiko yin’wana ni yin’wana leyinene ni nyiko yin’wana ni yin’wana leyi hetisekeke yi huma ehenhla, hikuva yi xika hi le ka Tata wa mavoningo ya le xibakabakeni.” (Yakobo 1:17) I ntiyiso leswaku loko hi nyika Yehovha swilo swa hina a hi n’wi fuwisi. Swilo hinkwaswo ni rifuwo leri nga kona ana se i swa yena. (Pisalema 50:12) Naswona loko hi nyika Yehovha nkarhi ni matimba ya hina, a hi hetisisi xilaveko lexi a nga ta tsandzeka ku xi hetisisa. Loko a ho ala ku chumayela mahungu lamanene ya Mfumo wa Xikwembu, a a ta endla leswaku maribye ma huwelela! Kutani, ha yini hi fanele hi nyika Yehovha rifuwo ra hina, nkarhi wa hina ni matimba ya hina? Xa nkoka swinene hileswaku loko hi endla sweswo hi kombisa leswaku hi n’wi rhandza hi timbilu ta hina hinkwato, mimoya-xiviri ya hina hinkwayo, mianakanyo ya hina hinkwayo ni matimba ya hina hinkwawo.—Marka 12:29, 30.
17. I yini leswi nga ta hi susumetela ku nyika Yehovha hi tsakile?
17 Loko hi nyika Yehovha, hi fanele hi n’wi nyika hi tsakile, “hikuva Xikwembu xi rhandza munyiki la tsakeke.” (2 Vakorinto 9:7) Nsinya wa nawu lowu tsariweke eka Deteronoma 16:17 wu nga hi pfuna ku nyika hi tsakile: “Nyiko ya voko ra un’wana ni un’wana yi fanele yi ringana ni nkateko lowu Yehovha Xikwembu xa wena a ku nyikeke wona.” Loko hi anakanyisisa hi ndlela leyi Yehovha a hi nyikeke ha yona, hi navela ku n’wi nyika hi tsakile. Ku nyika ko tano ku endla leswaku mbilu ya yena yi tsaka, ku fana ni ndlela leyi nyiko leyitsongo leyi humaka eka n’wana loyi a rhandzekaka yi tsakisaka vatswari va yena ha yona. Loko hi kombisa rirhandzu ra hina hi ndlela leyi swi ta hi pfuna ku tshinela eka Yehovha.
Aka Xinakulobye Hi Ku Tirhisa Xikhongelo
18. Ha yini swi ri swa nkoka ku kambisisa ndlela leyi hi nga antswisaka swikhongelo swa hina ha yona?
18 Loko hi khongela hi va ni lunghelo ra risima—hi va ni nkarhi wo phofula ta le mbilwini eka Tata wa hina la nga le tilweni. (Vafilipiya 4:6) Leswi xikhongelo xi nga ndlela ya risima yo tshinela eka Xikwembu, i swa nkoka ku yimanyana hi kambisisa leswi hi swi vulaka eswikhongelweni swa hina. A swi bohi leswaku hi tirhisa marito yo hlamarisa kumbe hi tata marito, kambe hi fanele hi khongela swi huma embilwini. Xana hi nga swi antswisa njhani swikhongelo swa hina?
19, 20. Ha yini hi fanele hi anakanyisisa loko hi nga si khongela, naswona hi tihi timhaka tin’wana leti faneleke leti hi nga anakanyisisaka ha tona?
19 Hi nga ha ringeta ku anakanyisisa loko hi nga si khongela. Loko hi anakanyisisa ka ha ri emahlweni, swikhongelo swa hina swi nga va leswi kongomeke swi tlhela swi twala, hi ndlela yoleyo hi papalata mukhuva wa ku phindha-phindha swiga leswi hi swi toloveleke ni leswi hatlaka swi ta emianakanyweni. (Swivuriso 15:28, 29) Kumbexana swi nga pfuna loko ho anakanyisisa hi tinhla leti Yesu a ti boxeke eka xikhongelo xa xikombiso, kutani hi kambisisa ndlela leyi ti fambelanaka ha yona ni swiyimo swa hina. (Matewu 6:9-13) Hi xikombiso, hi nga ha tivutisa leswaku i yini leswi hi anakanyaka leswaku hi nga hoxa xandla eka swona leswaku hi endla ku rhandza ka Yehovha laha misaveni. Xana hi nga phofula ku navela ka hina eka Yehovha leswaku hi va lava pfunaka swinene hi tlhela hi n’wi kombela leswaku a hi pfuna loko hi endla swiavelo swin’wana ni swin’wana leswi a hi nyikeke swona? Xana hi tikeriwa hi ku vilela hi swilaveko swa hina swa swilo leswi vonakaka? Xana hi swihi swidyoho leswi hi faneleke hi rivaleriwa swona, naswona i vamani lava hi faneleke hi va rivalela swinene? I miringo yihi leyi hi karhataka, naswona xana ha swi xiya leswaku hi lava nsirhelelo wa Yehovha emhakeni yoleyo hi xihatla?
20 Ku engetela kwalaho, hi nga ha anakanya hi vanhu lava hi va tivaka lava lavaka mpfuno wa Yehovha. (2 Vakorinto 1:11) Kambe, a hi fanelanga hi rivala mhaka ya ku nkhensa. Loko ho yimanyana hi anakanyisisa ha yona, hi nga va ni swivangelo swo nkhensa Yehovha hi tlhela hi n’wi dzunisa siku na siku hikwalaho ka vunene bya yena lebyikulu. (Deteronoma 8:10; Luka 10:21) Ku endla tano swi ta hi vuyerisa swinene—swi nga hi pfuna leswaku hi va ni langutelo lerinene evuton’wini.
21. Hi swihi swikombiso leswi hi nga swi dyondzaka eMatsalweni leswi nga hi pfunaka loko hi tshinela eka Yehovha hi xikhongelo?
21 Ku dyondza na kona ku nga endla leswaku hi antswisa swikhongelo swa hina. Ku ni swikhongelo swo hlawuleka leswi endliweke hi vavanuna ni vavasati vo tshembeka leswi tsariweke eRitweni ra Xikwembu. Hi xikombiso, loko ku ri ni xiphiqo lexikulu lexi nga endleleni, lexi nga hi dyisiki byi rhelela xi tlhela xi hi endla hi vilerisiwa swinene hikwalaho ka vuhlayiseki bya hina kumbe bya vanhu lava hi va rhandzaka, hi nga ha xi hlaya hi ku phindha-phindha xikhongelo xa Yakobe, loko a ta hlangana ni makwavo Esawu, loyi a a hlundzukile. (Genesa 32:9-12) Kumbe hi nga ha hlaya xikhongelo xa Hosi Asa loko vuthu ra Vaetiyopiya va kwalomu ka miliyoni ri xungeta vanhu va Xikwembu. (2 Tikronika 14:11, 12) Loko hi karhatiwa hi xiphiqo lexi tikombaka onge xi ta tisa xisandzu evitweni lerinene ra Yehovha, kutani hi nga kambisisa xikhongelo lexi endliweke hi Eliya emahlweni ka vagandzeri va Bali eNtshaveni ya Karimeli, swin’we ni xikhongelo xa Nehemiya loko a khongelela muti wa Yerusalema lowu a wu ri exiyin’weni lexi nga tsakisiki. (1 Tihosi 18:36, 37; Nehemiya 1:4-11) Ku hlaya ni ku anakanyisisa hi swikhongelo swo tano swi nga tiyisa ripfumelo ra hina swi tlhela swi hi endla hi va ni tindlela to antswa to byela Yehovha swiphiqo leswi hi karhataka.
22. Xana hi yihi ndzimana ya lembe ra 2003, naswona hi nga tshamela ku tivutisa yini lembe hinkwaro?
22 Kahle-kahle a ku na xo antswa ku tlula ku yingisa ndzayo ya Yakobo ya ku ‘tshinela eka Xikwembu.’ (Yakobo 4:8) Onge hi nga tshinela eka xona hi ku kurisa vutivi bya hina hi Xikwembu, hi ku lava ku kombisa rirhandzu ra hina swinene eka xona ni hi ku kurisa xinakulobye xa hina na xona eswikhongelweni swa hina. Eka lembe hinkwaro ra 2003 loko hi ri karhi hi tsundzuka Yakobo 4:8 tanihi ndzimana ya lembe, a hi hambeteni hi tikambisisa loko hakunene hi tshinela eka Yehovha. Kambe, xana ku vuriwa yini hi xiphemu xo hetelela xa xiga xolexo? Yehovha u ta ‘tshinela eka wena’ hi ndlela yihi naswona wena u ta vuyeriwa njhani? Ku ta vulavuriwa hi mhaka leyi exihlokweni lexi landzelaka.
Wa Tsundzuka Xana?
• Ha yini ku tshinela eka Yehovha ku ri mhaka leyi hi faneleke hi yi tekela enhlokweni?
• Hi tihi tipakani tin’wana leti hi nga ha tivekelaka tona malunghana ni ku nghenisa vutivi bya Yehovha?
• Hi nga swi kombisa njhani leswaku hi rhandza Yehovha hi mbilu hinkwayo?
• Hi nga khongela njhani leswaku hi aka vuxaka lebyikulu na Yehovha?
[Marito lama tshahiweke exihlokweni lama nga eka 12]
Ndzimana ya lembe ra 2003 yi ta ku: “Tshinelani eka Xikwembu, kutani xi ta tshinela eka n’wina.”—Yakobo 4:8.
[Xifaniso lexi nga eka tluka 8, 9]
Loko Samuwele a ri karhi a kula, u sungule ku tiva Yehovha swinene
[Xifaniso lexi nga eka tluka 12]
Xikhongelo xa Eliya loko a ri eNtshaveni ya Karimeli i xikombiso lexinene eka hina