Swivutiso Swa Vahlayi

I yini lexi vangelaka “swilo leswi navelekaka swa matiko hinkwawo” ku nghena ‘endlwini’ ya vugandzeri bya ntiyiso?—Hagayi 2:7.

Hi ku tirhisa muprofeta Hagayi, Yehovha u profetile a ku: “Ndzi ta ninginisa matiko hinkwawo, kutani swilo leswi navelekaka swa matiko hinkwawo swi fanele swi nghena; ndzi ta tata yindlu leyi hi ku vangama.” (Hagayi 2:7) Xana ku ninginisiwa ka “matiko hinkwawo” ku vangela “swilo leswi navelekaka” swa matiko—ku nga vanhu va timbilu letinene—leswaku swi amukela vugandzeri bya ntiyiso? Doo!

Xiya leswaku i yini lexi ninginisaka matiko swin’we ni vuyelo bya ku ninginisiwa ka wona. Bibele yi vula leswaku “matiko [a] ma ri ni nkitsikitsi ni vanhu va matiko va hambete va gungulela swa hava.” (Pisalema 2:1) Swilo “swa hava” leswi va hambetaka va “gungulela” swona kumbe ku anakanyisisa ha swona, hileswaku vuhosi bya vona byi ya emahlweni byi ri kona. Lexi va ninginisaka ngopfu i nchumu wun’wana ni wun’wana lowu xungetaka vuhosi bya vona.

Ntirho wa misava hinkwayo wa ku chumayela hi ta Mfumo wa Xikwembu lowu simekiweke, lowu endliwaka hi Timbhoni ta Yehovha hi wona lowu xungetaka matiko. Entiyisweni, Mfumo wa Xikwembu lowu nga ehansi ka vulawuri bya Yesu Kreste wu ta “pfotlosa kutani wu herisa mimfumo [ya vanhu] hinkwayo.” (Daniyele 2:44) Rungula ro avanyisa leri katsiweke entirhweni wa hina wo chumayela ri ninginisa matiko. (Esaya 61:2) Naswona ku ninginika loku ku va kukulu ngopfu loko ntirho wa ku chumayela wu ya wu endliwa etindhawini to tala hi ku hiseka lokukulu. Xana ku ninginisiwa loku profetiweke eka Hagayi 2:7 ku fanekisela yini?

Eka Hagayi 2:6 ha hlaya: “Yehovha wa mavuthu u te, ‘Kan’we ntsena—hi nkarhinyana—ndzi ta ninginisa matilo ni misava ni lwandle ni misava leyi omeke.’” Loko a tshaha ndzimana leyi, muapostola Pawulo u tsarile a ku: “U tshembisile, a ku: ‘Nakambe ndzi ta ninginisa ni tilo, ku nga ri misava ntsena.’ Kutani rito leri nge, ‘Nakambe’ ri kombisa ku susiwa ka swilo leswi ninginisiwaka ku fana ni swilo leswi endliweke, leswaku ku sala swilo leswi nga ninginisiwangiki [ku nga Mfumo].” (Vaheveru 12:26, 27) Ina, mafambiselo hinkwawo ya swilo ya sweswi ma ta herisiwa leswaku ma nyizela misava leyintshwa ya Xikwembu.

Vanhu va timbilu letinene va nghena evugandzerini bya ntiyiso ku nga ri hileswi matiko ma ninginisiwaka. Nchumu lowu va tshinetaka eka Yehovha swin’we ni le vugandzerini bya yena bya ntiyiso hi wona lowu tlhelaka wu vangela matiko leswaku ma ninginika, ku nga ntirho wa misava hinkwayo wa ku chumayela hi Mfumo wa Xikwembu lowu simekiweke. Ku twarisiwa ka ‘marungula lama tsakisaka ya mahungu lamanene lama nga heriki’ swi kokela vanhu lava nga ni mboyamelo lowunene evugandzerini bya Xikwembu xa ntiyiso.—Nhlavutelo 14:6, 7.

Rungula ra Mfumo i rungula ra ku avanyisa ni ra ku ponisiwa. (Esaya 61:1, 2) Vuyelo bya ku chumayela rungula leri emisaveni hinkwayo i byimbirhi: ku ninginisiwa ka matiko ni ku nghena ka swilo leswi navelekaka swa matiko eku vangameni ka Yehovha.