I Mani Loyi A Kongomisaka Vanhu Va Xikwembu Namuntlha?

1, 2. Vaapostola va nga ha va va tivutise yini endzhaku ka loko Yesu a tlhelele tilweni?

VAAPOSTOLA va Yesu a va yime eNtshaveni ya Mitlhwari va honolele xibakabaka. A va ha ku vona murhangeri swin’we ni munghana wa vona Yesu a tlhandlukela etilweni. (Mint. 1:9, 10) Ku ringana malembe mambirhi, Yesu u va dyondzisile, a va khutaza ni ku va rhangela. Kambe sweswi se a fambile. Xana a va ta endla yini?

² Yesu u nyike valandzeri vakwe xileriso lexi nge: “Mi ta va timbhoni ta mina eYerusalema swin’we ni le tikweni hinkwaro ra Yudiya ni le Samariya ni ku ya fika endhawini ya le kule swinene ya misava.” (Mint. 1:8) A va ta swi kotisa ku yini ku hetisisa ntirho lowu Yesu a va nyikeke wona? Yesu a a va tiyisekisile leswaku a va ta amukela moya lowo kwetsima hi nkarhi lowu nga hetiki mbilu. (Mint. 1:5) Nilokoswiritano ntirho wo chumayela emisaveni hinkwayo a wu ta lava nkongomiso ni nhlengeletano. Leswaku a kongomisa ni ku hlengeleta vanhu vakwe enkarhini lowu hundzeke, Yehovha u tirhise vanhu lava a va ta n’wi yimela. Hikwalaho vaapostola va nga ha va va tivutise leswi: ‘Xana Yehovha u ta hlawula murhangeri lontshwa?’

 3. (a) Endzhaku ka loko Yesu a tlhelele etilweni, hi xihi xiboho xa nkoka lexi vaapostola vo tshembeka va xi endleke? (b) Hi ta kambisisa yini exihlokweni lexi?

³ Ku nga si hela mavhiki mambirhi vadyondzisiwa va Yesu va kambisise Matsalwa ni ku khongelela nkongomiso kutani va hlawule Matiyasi leswaku a siva Yudasi Iskariyota leswaku a va muapostola wa vu-12. (Mint. 1:15-26) Ha yini a swi ri swa nkoka eka vona ni le ka Yehovha? Matiyasi u hetisise ntirho wa nkoka enhlengeletanweni ya Yehovha.a Yesu a nga hlengeletanga vaapostola vakwe ntsena leswaku va famba na yena ensin’wini kambe leswaku va endlela vanhu va Xikwembu ntirho wa nkoka swinene. A ku ri wihi ntirho wa kona naswona Yehovha u va letele njhani leswaku va wu hetisisa hi ku tirhisa Yesu? Hi rihi lunghiselelo leri nga kona leri fanaka na rona exikarhi ka vanhu va Xikwembu namuntlha? Naswona hi nga va tsundzuka njhani “lava rhangelaka” exikarhi ka hina ngopfungopfu lava nga xiphemu xa “hlonga ro tshembeka ni ro tlhariha”?—Hev. 13:7; Mat. 24:45.

 4. A ku ri wihi ntirho wa vaapostola swin’we ni vakulu van’wana va le Yerusalema?

⁴ Hi Pentekosta ya 33 C.E vaapostola va sungule ku rhangela vandlha ra Vukreste. Bibele yi vula leswaku “Petro a suka a yima ni lava va 11” kutani a vula mahungu lamanene eka ntshungu lowukulu wa Vayuda swin’we ni lava nga riki Vayuda. (Mint. 2:14, 15) Vo tala va vona va ve Vakreste. Kutani Vakreste lava, lava hundzukeke va “[hambete] va tinyiketela edyondzweni ya vaapostola.” (Mint. 2:42) Vaapostola lava a va langutela mali ya vandlha. (Mint. 4:34, 35) Va tlhele va va dyondzisa ni ku va khongelela va ku: “Hi ta tinyiketela exikhongelweni ni le vutirhelini bya rito.” (Mint. 6:4) Va hlawule Vakreste lava nga ni ntokoto leswaku va chumayela mahungu lamanene etindhawini tin’wana. (Mint. 8:14, 15) Hi ku famba ka nkarhi, vakulu van’wana lava totiweke va tirhe ni vaapostola leswaku va langutela mavandlha. Tanihi leswi a va ri huvo leyi fumaka, a va nyika nkongomiso eka mavandlha hinkwawo.—Mint. 15:2.

5, 6. (a) Moya lowo kwetsima wu yi kongomise njhani huvo leyi fumaka? (Vona xifaniso lexi nga eku sunguleni ka xihloko lexi.) (b) Tintsumi ti yi pfune njhani huvo leyi fumaka? (c) Rito ra Xikwembu ri yi kongomise njhani huvo leyi fumaka?

⁵ Vakreste va le nkarhini wa vaapostola va swi xiyile leswaku huvo leyi fumaka a yi kongomisiwa hi Yehovha Xikwembu hi ku tirhisa Murhangeri wa vona Yesu. Kambe a va ta tiyiseka njhani hi mhaka leyi? Xo sungula, moya lowo kwetsima wu kongomise huvo leyi fumaka. (Yoh. 16:13) Vakreste hinkwavo lava totiweke va chululeriwe moya lowo kwetsima, kambe wu pfune ngopfu vaapostola swin’we ni vakulu van’wana va le Yerusalema leswaku va hetisisa xiavelo xa vona tanihi varhangeri. Hi xikombiso, hi 49 C.E., moya lowo kwetsima wu kongomise huvo leyi fumaka leswaku yi endla xiboho emhakeni yo yimba. Mavandlha ma yingise nkongomiso wa yona naswona ma ye “ma tiyisiwa eripfumelweni ni ku andza hi nhlayo siku rin’wana ni rin’wana.” (Mint. 16:4, 5) Xiboho lexi yi xi endleke xi kombise leswaku huvo leyi fumaka yi kombisa timfanelo ta mihandzu ya moya ku nga rirhandzu ni ripfumelo.—Mint. 15:11, 25-29; Gal. 5:22, 23.

⁶ Xa vumbirhi, tintsumi ti pfune huvo leyi fumaka. Loko Korneliyo a nga si khuvuriwa a va Mukreste wo sungula la nga riki Muyuda naswona a nga yimbangiki, ntsumi yi n’wi rhume leswaku a ya eka muapostola Petro. Endzhaku ka loko Petro a chumayele Korneliyo swin’we ni maxaka yakwe, va amukele moya lowo kwetsima hambileswi a va nga yimbanga. Leswi swi endle leswaku vaapostola swin’we ni vamakwerhu van’wana va endla ku rhandza ka Xikwembu ni ku amukela vanhu lava nga riki Vayuda ni lava nga yimbangiki evandlheni ra Vukreste. (Mint. 11:13-18) Ku tlula kwalaho, tintsumi ti seketele ni ku tlhela ti hatlisisa ntirho wo chumayela lowu a wu languteriwa hi huvo leyi fumaka. (Mint. 5:19, 20) Xa vunharhu, Rito ra Xikwembu ri kongomise huvo leyi fumaka. Ku nga khathariseki leswaku a va lulamisa tidyondzo to karhi kumbe a va nyika nkongomiso wo karhi, vakulu volavo lava totiweke a va kongomisiwa hi Matsalwa.—Mint. 1:20-22; 15:15-20.

 7. Ha yini hi nga vulaka leswaku Yesu a a rhangela huvo leyi fumaka ya le nkarhini wa vaapostola?

⁷ Hambileswi huvo leyi fumaka ya le nkarhini wa vaapostola a yi ri ni vulawuri emavandlheni, a yi swi xiya leswaku Murhangeri wa yona i Yesu. Muapostola Pawulo u tsale a ku: “[Kreste] U nyike van’wana ku va vaapostola.” U tlhele a ku: “A hi kuleni hi rirhandzu eka swilo hinkwaswo eka loyi a nga nhloko, Kreste.” (Efe. 4:11, 15) Ematshan’weni, yo tivitana hi vito ra muapostola loyi, “vadyondzisiwa va [vitaniwe] Vakreste hi nkongomiso wa Xikwembu.” (Mint. 11:26) I ntiyiso leswaku Pawulo a a swi tiva leswaku i swa nkoka ku yingisa nkongomiso lowu humaka eMatsalweni lowu a wu nyikeriwa hi vaapostola ni vakulu van’wana lava a va rhangela. Nilokoswiritano, u tlhele a ku: “Kambe ndzi lava mi tiva leswaku nhloko ya wanuna un’wana ni un’wana [ku katsa ni xirho xin’wana ni xin’wana xa huvo leyi fumaka] i Kreste; . . . kasi nhloko ya Kreste i Xikwembu.” (1 Kor. 11:2, 3) Swi le rivaleni leswaku Yehovha u hlawule Yesu Kreste, N’wana wakwe leswaku a rhangela mavandlha.

8, 9. Hi wihi ntirho lowukulu lowu Makwerhu Russell a wu endleke ku sukela hi 1870?

⁸ Ku sukela hi 1870, Charles Taze Russell swin’we ni vanghana vakwe a va tiyimisele ku pfuxeta vugandzeri bya ntiyiso. Leswaku va kota ku hangalasa ntiyiso hi tindzimi to hambanahambana, Makwerhu Russell loyi a ri murhangeri wa nhlengeletano, u simeke nhlangano wa Zion’s Watch Tower Tract Society hi 1884 hi nawu.b A a ri xichudeni lexinene xa Bibele naswona hi xivindzi u paluxe tidyondzo ta vukhongeri ta mavunwa to tanihi vunharhuun’we ni ya leswaku moya a wu fi. A a swi twisisa leswaku Kreste a ta vuya hi ndlela leyi nga vonakiki ni leswaku “nkarhi lowu vekiweke wa matiko” a wu ta hela hi 1914. (Luka 21:24) Makwerhu Russell u tirhise nkarhi, matimba ni mali yakwe leswaku a byela van’wana ntiyiso lowu a wu kumeke. Swi le rivaleni leswaku hi nkarhi wolowo Yehovha na Yesu la nga nhloko ya vandlha a va tirhisa Makwerhu Russell.

⁹ Makwerhu Russell a a nga lavi ku dzunisiwa hi vanhu. Hi 1896, u tsale a ku: “A hi lavi leswaku vanhu va hi xixima kumbe va xixima swilo leswi hi swi tsaleke; naswona a hi lavi leswaku va hi vitana Mufundhisi kumbe Rabi. Nakambe a hi lavi leswaku nhlengeletano leyi yi vitaniwa hi mavito ya hina.” Hi ku famba ka nkarhi u tlhele a ku: “Lowu a hi ntirho wa munhu.”

10. (a) Yesu u ri hlawule rini “hlonga ro tshembeka ni ro tlhariha”? (b) Hlamusela ndlela leyi Huvo leyi Fumaka yi hambanisiweke ha yona ni nhlangano wa Watch Tower Society.

¹⁰ Hi 1919, endzhaku ka malembe manharhu Makwerhu Russell a file, Yesu u hlawule “hlonga ro tshembeka ni ro tlhariha.” Ha yini? Leswaku ri nyika malandza yakwe “swakudya . . . hi nkarhi lowu faneleke.” (Mat. 24:45) Hambi hi nkarhi wolowo, ntlawa lowutsongo wa vamakwerhu lava a va tirha entsindza wa misava hinkwayo eBrooklyn le New York, a wu lunghiselela ni ku phamela valandzeri va Yesu swakudya swa moya. Xiga lexi nge “huvo leyi fumaka” xi sungule ku tsariwa eka minkandziyiso ya hina hi va-1940 loko se swi twisisiwa leswaku xi fambisana swinene ni nhlangano wa Watch Tower Bible and Tract Society. Hambiswiritano, hi 1971, swi ve erivaleni leswaku Huvo leyi Fumaka a yi hambanile na Watch Tower Society, leyi a yi langutela timhaka leti khumbaka swa nawu ntsena. Ku sukela kwalaho, a ku ri vamakwerhu lava totiweke ntsena lava a va ta va xiphemu xa Huvo leyi Fumaka naswona vamakwerhu lava, a va nga ta va varhangeri va komiti ya Watch Tower Society. Emalembeni ya sweswinyana, vamakwerhu lava rhangelaka va “tinyimpfu tin’wana” va tirhe tanihi vakongomisi eka vandla ra nawu ra Watch Tower Society ni mavandla man’wana lama tirhisiwaka hi vanhu va Xikwembu. Kutani leswi swi endla leswaku Huvo leyi Fumaka yi kota ku va ni nkarhi wo phamela swakudya swa moya ni ku kongomisa nhlengeletano ya Xikwembu. (Yoh. 10:16; Mint. 6:4) Xihondzo xo Rindza xa July 15, 2013, xi hlamusele leswaku “hlonga ro tshembeka ni ro tlhariha” i ntlawa lowutsongo wa vamakwerhu lava totiweke lava vumbaka Huvo leyi Fumaka.

11. Huvo leyi Fumaka yi tirha njhani?

¹¹ Huvo leyi Fumaka yi endla swiboho swa nkoka. Njhani? Vamakwerhu va Huvo leyi Fumaka va hlangana vhiki ni vhiki naswona sweswo swi endla leswaku va vulavurisana ni ku va ni vun’we. (Swiv. 20:18) Tanihi leswi ku nga riki na loyi a tlakukeke ku tlula un’wana, lembe ni lembe va cincana ku va mutshamaxitulu eka minhlangano yoleyo. (1 Pet. 5:1) Komiti ha yin’we eka leta tsevu ta Huvo leyi Fumaka na tona ti endla hilaha ku fanaka. Nakambe makwerhu ha un’we a nga titeki a ri murhangeri wa vamakwerhu lavan’wana kambe u titeka a ri loyi a phameriwaka swakudya swa moya hi hlonga ro tshembeka ni ro tlhariha naswona wa titsongahata eka rona.

12. Leswi vamakwerhu va Huvo leyi Fumaka va nga hetisekangiki ku va ni swivutiso swihi?

¹² Vamakwerhu va Huvo leyi Fumaka a va hetisekanga. Kutani minkarhi yin’wana va nga ha twisisa tidyondzo to karhi hi ndlela leyi hoxeke kumbe ku nyikela nkongomiso lowu hoxeke. Watch Tower Publications Index yi ni nhlokomhaka leyi nge “Ku Antswisiwa Ka Tidyondzo Ta Hina” leyi xaxametaka minkandziyiso leyi hlamuselaka ku antswisiwa ka ndlela leyi a hi titwisisa ha yona tidyondzo tin’wana ta le Matsalweni ku sukela hi 1870. I ntiyiso leswaku Yesu a nga hi tshembisanga leswaku hlonga ro tshembeka a ri ta hi phamela swakudya swa moya leswi hetisekeke. Kutani hi nga xi hlamula njhani xivutiso xa Yesu lexi nge: “Kahle-kahle i mani hlonga ro tshembeka ni ro tlhariha?” (Mat. 24:45) Hi byihi vumbhoni lebyi kombisaka leswaku Huvo leyi Fumaka i hlonga ro tshembeka ni ro tlhariha? A hi kambisiseni swilo swinharhu leswi kongomiseke huvo leyi fumaka ya le nkarhini wa vaapostola.

13. Xana moya lowo kwetsima wu yi pfune njhani Huvo leyi Fumaka?

¹³ Vumbhoni bya leswaku yi kongomisiwa hi moya lowo kwetsima. Moya lowo kwetsima wu pfune Huvo leyi Fumaka ku twisisa ntiyiso wa le Matsalweni lowu a wu nga twisisiwi enkarhini lowu hundzeke. Hi xikombiso, ehleketa hi ndlela leyi tidyondzo to karhi ti antswisiweke ha yona leti kumekaka eka Watch Tower Publications Index. Hakunene, a ku na munhu la nga kotaka ku twisisa ni ku hlamusela swilo leswi “enteke swa Xikwembu” hi ku twisisa ka yena n’wini. (Hlaya 1 Vakorinto 2:10.) Huvo leyi Fumaka yi titwa ku fana na muapostola loyi a tsaleke a ku: “Swilo leswi a hi swi vulavuli hi marito lawa hi dyondzisiweke hi vutlhari bya munhu, kambe hi marito lawa hi dyondzisiweke hi moya.” (1 Kor. 2:13) Endzhaku ka loko ku ve ni vugwinehi ni ku va Vakreste va ri emunyameni ku ringana malembe yo tala, swi kotekise ku yini leswaku vanhu va Xikwembu se va twisisa ntiyiso? Hikuva Xikwembu xi pfune Huvo leyi Fumaka hi ku tirhisa moya lowo kwetsima!

14. Hi ku ya hi Nhlavutelo 14:6, 7, tintsumi ti va pfuna njhani vanhu va Xikwembu namuntlha?

¹⁴ Vumbhoni bya leswaku yi pfuniwa hi tintsumi. Namuntlha Huvo leyi Fumaka yi ni ntirho lowukulu wo langutela ntirho wa misava hinkwayo lowu endliwaka hi vachumayeri vo tlula timiliyoni ta nhungu. Ha yini ntirho lowu wu endliwa hi ndlela leyi humelelaka? Xivangelo xin’wana, hileswaku tintsumi ta katseka. (Hlaya Nhlavutelo 14:6, 7.) Minkarhi yo tala, tintsumi ti kongomisa vahuweleri eka vanhu lava a va ri eku khongeleleni ka leswaku Xikwembu xi va pfuna!c Ku nga khathariseki nkaneto lowukulu ematikweni man’wana, ntirho wo chumayela ni wo endla vadyondzisiwa wu ya wu andza hileswi hi pfuniwaka hi tintsumi.

15. Hi kwihi ku hambana loku nga kona exikarhi ka Huvo leyi Fumaka ni vafundhisi? Vula xikombiso.

¹⁵ Ku titshega hi Rito ra Xikwembu. (Hlaya Yohane 17:17.) Anakanya hi leswi endlekeke hi 1973. Xihondzo xo Rindza xa June 1 xi vutise xi ku: “Xana . . . munhu la yaka emahlweni a dzaha wa faneleka ku khuvuriwa?” Nhlamulo yi te: “Matsalwa ma kombisa leswaku a nga faneleki.” Endzhaku ko kombisa matsalwa yo hlayanyana lama fambisanaka ni mhaka leyi, Xihondzo xo Rindza xi hlamusele leswaku ha yini munhu loyi a alaka ku tshika ku dzaha a fanele a susiwa. (1 Kor. 5:7; 2 Kor. 7:1) Xi te: “Munhu wo tano u kombisa leswaku a nga lavi ku hanya hi ku pfumelelana ni leswi Matsalwa ma swi vulaka. Naswona milawu leyi, leyi tlakukeke yi huma eka Xikwembu lexi hi byelaka yona hi ku tirhisa Rito ra xona.” Xana ku ve ni vukhongeri byin’wana lebyi endleke hilaha ku heleleke leswi Rito ra Xikwembu ri swi vulaka, hambiloko ku endla tano a swi ta vula leswaku ku ta susiwa swirho leswi alaka ku endla leswi Matsalwa ma swi vulaka? Buku ya sweswinyana leyi vulavulaka hi vukhongeri ya le United States yi te: “Nkarhi ni nkarhi vafundhisi va cinca tidyondzo ta vona leswaku ti fambisana ni mavonelo ya swirho swa tikereke ta vona kumbe vanhu vo karhi.” Loko Huvo leyi Fumaka yi endla leswi Rito ra Xikwembu ri swi vulaka ku nga ri ku endla swilo hi ku ya hi leswi vanhu va swi vulaka, xana sweswo swi kombisa leswaku i mani loyi a kongomisaka vanhu va Xikwembu namuntlha?

16. Hi yihi ndlela yin’wana leyi hi nga tsundzukaka Huvo leyi Fumaka ha yona?

¹⁶ Hlaya Vaheveru 13:7. Rito leri nge “tsundzukani” ri nga tlhela ri hundzuluxeriwa ri va “ku katsa.” Kutani, ndlela yin’wana leyi u nga “[tsundzukaka] lava rhangelaka” i ku katsa Huvo leyi Fumaka eswikhongelweni swa wena. (Efe. 6:18) Anakanyisisa hi vutihlamuleri lebyi yi nga na byona byo phamela swakudya swa moya, byo langutela ntirho wo chumayela emisaveni hinkwayo ni byo langutela mali leyi nyikeriwaka. Swi le rivaleni leswaku hi fanele hi katsa Huvo leyi Fumaka eswikhongelweni swa hina nkarhi ni nkarhi!

17, 18. (a) Hi nga wu landzela njhani nkongomiso wa Huvo leyi Fumaka? (b) Loko hi chumayela hi seketela hlonga ro tshembeka na Yesu hi ndlela yihi?

¹⁷ Ku tsundzuka Huvo leyi Fumaka a swi katsi ntsena ku yi katsa eswikhongelweni, kambe swi katsa ni ku yingisa nkongomiso wa yona. Huvo leyi Fumaka yi hi kongomisa hi ku tirhisa minkandziyiso ya hina, minhlangano ni tinhlengeletano. Nakambe yi hlawula valanguteri va miganga, lava na vona va hlawulaka vakulu va vandlha. Valanguteri va miganga swin’we ni vakulu va tsundzuka Huvo leyi Fumaka hi ku yingisa nkongomiso lowu yi va nyikaka wona. Hinkwerhu ka hina hi xixima Murhangeri wa hina Yesu, hi ku yingisa ni hi ku titsongahata eka vavanuna lava a va tirhisaka leswaku va hi kongomisa.—Hev. 13:17.

¹⁸ Ndlela yin’wana leyi hi tsundzukaka Huvo leyi Fumaka i ku tinyiketela entirhweni wo chumayela. Pawulo u khutaze Vakreste leswaku va tekelela ripfumelo ra lava rhangelaka. Hlonga ro tshembeka ri kombisa ripfumelo lerikulu hi ku yisa ntirho wo chumayela mahungu lamanene emahlweni hi ku hiseka. Xana u un’wana wa lava seketelaka vatotiwa eka ntirho lowu wa nkoka swinene? U ta tsaka swinene loko Murhangeri wa hina, Yesu a ku: “Mpimo lowu mi swi endleke ha wona eka un’wana wa vamakwerhu lava lavatsongo, mi swi endle ha wona ni le ka mina.”—Mat. 25:34-40.

19. Ha yini u lava ku yingisa Yesu Murhangeri wa hina?

¹⁹ Loko Yesu a tlhelela etilweni, a nga va tshikanga valandzeri vakwe. (Mat. 28:20) A a swi tiva leswaku moya lowo kwetsima, tintsumi ni Rito ra Xikwembu swi n’wi pfune ku fikela kwihi leswaku a rhangela loko a ha ri laha misaveni. Kutani u nyike hlonga ro tshembeka mpfuno lowu fanaka. Vakreste lava totiweke, lava nga swirho swa hlonga rero “[va hambeta] va landzela Xinyimpfana ku nga khathariseki leswaku xi ya kwihi.” (Nhlav. 14:4) Hikwalaho loko hi yingisa nkongomiso wa vona, hi va hi yingisa Murhangeri wa hina Yesu. Ku nga ri khale, u ta hi kongomisa evuton’wini lebyi nga heriki. (Nhlav. 7:14-17) Ku hava murhangeri la nga hetisekangiki la nga kotaka ku hi endlela sweswo!