Kombisa Moya Wo Rindza!

“Ndzi ta kombisa moya wo rindza eka Xikwembu lexi xi ndzi ponisaka. Xikwembu xanga xi ta ndzi yingisa.”—MIKIYA 7:7.

1, 2. (a) Xana langutelo leri hoxeke ri onhe Vaisrayele emananga hi ndlela yihi? (b) Xana ku nga humelela yini eka Mukreste loyi a nga hlakuleliki langutelo leri faneleke?

SWILO swo tala evuton’wini swi nga ha langutiwa hi ndlela leyinene kumbe yo biha, swi titshege hi langutelo ra hina. Loko Vaisrayele va ri emananga, va phameriwe manna hi ndlela ya singita. A va fanele va rhala-rhale emananga ivi va n’wi nkhensa swinene Yehovha hi ku va nyika swakudya. Sweswo a swi ta va swi kombise langutelo lerinene. Ku ri na sweswo, va tsundzuke swakudya swo hambana-hambana swa le Egipta ivi va vilela hi leswaku manna a yi nga nandzihi. Wa nga vona langutelo ro biha!—Tinhlayo 11:4-6.

² Langutelo ra Mukreste namuntlha hilaha ku fanaka na rona ri nga endla swilo swi vonaka swi tsakisa kumbe swi nga tsakisi. Loko Mukreste a nga ri na langutelo leri faneleke, a nga ha lahlekeriwa hi ntsako wa yena hi ku olova, naswona sweswo swi nga va ni khombo hikuva Nehemiya u te: “Ntsako wa Yehovha i khokholo ra [hina].” (Nehemiya 8:10) Langutelo lerinene ra ntsako ra hi pfuna leswaku hi tshama hi tiyile naswona ri kondletela ku rhula ni vun’we evandlheni.—Varhoma 15:13; Vafilipiya 1:25.

 3. Xana langutelo leri faneleke ri n’wi pfune njhani Yeremiya eminkarhini yo nonon’hwa?

³ Hambileswi a a hanya eminkarhini leyi nonon’hwaka, Yeremiya u kombise langutelo lerinene. Hambiloko a a vone swilo swo chavisa loko Yerusalema wu wa hi 607 B.C.E., u swi kotile ku vona swilo hi ndlela leyinene. Yehovha a a nga ta n’wi rivala Israyele, naswona tiko a ri ta pona. Yeremiya u tsale leswi landzelaka ebukwini ya Swirilo: “I swiendlo swa musa wa rirhandzu wa Yehovha leswi hi nga helangiki, hikuva tintswalo ta yena a ti nge heli hakunene. I tintshwa mixo wun’wana ni wun’wana. Ku tshembeka ka wena ku tele.” (Swirilo 3:22, 23) Ematin’wini hinkwawo, malandza ya Xikwembu loko ma ri eswiyin’weni leswi tikaka ngopfu ma hlayise langutelo lerinene ra ku tshama ma tsakile.—2 Vakorinto 7:4; 1 Vatesalonika 1:6; Yakobo 1:2.

 4. Xana Yesu u tshame a ri ni langutelo rihi, naswona ri n’wi pfune njhani?

⁴ Malembe ya 600 endzhaku ka Yeremiya, Yesu u pfuniwile leswaku a tiyisela hikwalaho ka langutelo ra yena lerinene. Ha hlaya: “Hikwalaho ka ntsako lowu a wu vekiwe emahlweni ka yena u tiyisele mhandzi ya nxaniso, a tsan’wa tingana, kutani a tshama evokweni ra xinene ra xiluvelo xa Xikwembu.” (Vaheveru 12:2) Ku nga khathariseki nkaneto kumbe nxaniso wihi ni wihi lowu Yesu a langutaneke na wona—hambi ku ri nhlomulo wa mhandzi ya nxaniso—miehleketo ya yena a yi ri eka “ntsako lowu a wu vekiwe emahlweni ka yena.” Ntsako wolowo a wu ri lunghelo ro twarisa vuhosi bya Yehovha ni ku kwetsimisa vito ra yena swin’we ni ntshembo wo tisa mikateko leyikulu eka vanhu lava yingisaka enkarhini lowu taka.

Tekelela Moya Wo Rindza

 5. Hi xihi xiyimo xa xiviri lexi moya wo rindza wu nga hi pfunaka leswaku hi tshama hi ri ni langutelo leri faneleke etimhakeni to karhi?

⁵ Minkarhi hinkwayo, loko hi hlakulela langutelo ra mianakanyo leri fanaka na leriya ra Yesu, a hi nge lahlekeriwi hi ntsako wa Yehovha hambiloko swilo swi nga endleki hi ndlela leyi hi swi languteleke ha yona ni hi nkarhi lowu hi wu languteleke. Muprofeta Mikiya u te: “Loko ku ri mina, ndzi ta tshama ndzi rindzele Yehovha. Ndzi ta kombisa moya wo rindza eka Xikwembu lexi xi ndzi ponisaka.” (Mikiya 7:7; Swirilo 3:21) Na hina hi nga kombisa moya wo rindza. Njhani? Hi tindlela to tala. Hi xikombiso, hi nga ha vona onge makwerhu la nga ni vulawuri u endle xihoxo kutani ku laveka leswaku ku endliwa ndzulamiso hi xihatla. Moya wo rindza wu ta hi pfuna ku kambisisa leswaku, ‘Xana u endle xihoxo hakunene, kumbe mina ndza swi hundzeleta? Loko a endle xihoxo, xana Yehovha u pfumelela leswaku ku hundza nkarhi hikuva wa swi vona leswaku munhu loyi u ta antswisa naswona a ku laveki mindzulamiso ya xihatla?’

 6. Xana moya wo rindza wu ta n’wi pfuna njhani munhu loyi a lwisanaka ni xiphiqo xa yena n’wini?

⁶ Moya wo rindza wu nga ha laveka loko hi dyiwa hi xiphiqo xa hina vini kumbe hi lwisana ni ku tsana loku hi nga na kona. A hi nge hi kombela mpfuno wa Yehovha, kambe xiphiqo xi tama xa ha ri kona. Xana hi fanele hi endla yini? Hi fanele hi hambeta hi endla leswi nga ematimbeni ya hina leswaku hi tlhantlha xiphiqo xa kona ivi hi va ni ripfumelo eka marito ya Yesu lama nge: “Hambetani mi kombela, mi ta nyikiwa; hambetani mi lava, mi ta swi kuma; hambetani mi gongondza, mi ta pfuleriwa.” (Luka 11:9) Tshama u ri karhi u khongela naswona u rindzela Yehovha. Yehovha u ta hlamula swikhongelo swa wena hi nkarhi lowu faneleke na hi ndlela ya yena.—1 Vatesalonika 5:17.

 7. Xana moya wo rindza wu ta hi pfuna njhani eka langutelo ra hina ra ku twisisiwa ka Bibele loku tisiwaka hakatsongo-tsongo?

⁷ Loko vuprofeta bya Bibele byi ri karhi byi hetiseka, ku twisisa ka hina Matsalwa ka antswisiwa. Kambe, minkarhi yin’wana hi nga ha ehleketa leswaku ku antswisiwa ko karhi ku hundzeriwe hi nkarhi. Loko ku fika hi nkarhi lowu hi nga laviki wona, xana ha swi navela ku rindza? Tsundzuka, Yehovha u vone swi fanerile ku paluxa “xihundla xo kwetsima xa Kreste” hakatsongo-tsongo naswona hi nkarhi lowu tlulaka malembe ya kwalomu ka 4 000. (Vaefesa 3:3-6) Kutani, xana hi ni xivangelo xo hela mbilu? Xana ha kanakana leswaku “hlonga ro tshembeka ni ro tlhariha” ri vekeriwe ku nyika vanhu va Yehovha “swakudya swa vona hi nkarhi lowu faneleke”? (Matewu 24:45) Ha yini hi titsona ntsako wa vukwembu hikwalaho ka leswi ku nga riki swilo hinkwaswo leswi twisisiwaka hi ku helela? Tsundzuka, i Yehovha la endlaka xiboho malunghana ni nkarhi ni ndlela leyi a nga ta paluxa ‘timhaka ta yena leti nga xihundla.’—Amosi 3:7.

 8. Xana ku lehisa mbilu ka Yehovha ku tikombe ku vuyerisa vo tala hi ndlela yihi?

⁸ Van’wana va nga ha hela matimba hikuva va vona onge endzhaku ko tirha hi ku tshembeka ku ringana malembe yo tala, va ta fa “siku lerikulu ni leri chavisaka ra Yehovha” ri nga si fika. (Yuwele 2:30, 31) Hambiswiritano, va nga ha khutazeka loko va languta timhaka hi ndlela leyinene. Petro u tsundzuxile: “Tekani ku lehisa mbilu ka Hosi ya hina ku ri ku mi ponisa.” (2 Petro 3:15) Ku lehisa mbilu ka Yehovha ku endle leswaku timiliyoni ta vanhu va timbilu letinene ti dyondza ntiyiso. Xana a swi tsakisi sweswo? Ku tlula kwalaho, loko Yehovha a ya a lehisa mbilu, hi va ni nkarhi lowu engetelekeke wo ‘hambeta hi tirhela ku ponisiwa ka hina hi ku chava ni ku rhurhumela.’—Vafilipiya 2:12; 2 Petro 3:11, 12.

 9. Loko hi nga swi koti ku endlela Yehovha ntirho wo tala, xana moya wo rindza wu ta hi pfuna njhani leswaku hi tiyisela xiyimo xexo?

⁹ Moya wo rindza wa hi pfuna leswaku hi nga heli matimba loko nkaneto, vuvabyi, ku dyuhala, kumbe swiphiqo swin’wana swi hi sivela entirhweni wa Mfumo. Yehovha u langutele leswaku hi n’wi tirhela hi mbilu hinkwayo. (Varhoma 12:1) Hambiswiritano, N’wana wa Xikwembu, loyi a nga ni “nsovo eka loyi a pfumalaka ni loyi a nga xisiwana,” a nga lavi leswi hi nga ta ka hi nga koti ku swi nyikela; na Yehovha na yena a nga lavi swo tlula sweswo. (Pisalema 72:13) Xisweswo, hi khutaziwa ku endla leswi hi nga swi kotaka, hi ku lehisa mbilu hi rindza kukondza swiyimo swi cinca—ku nga ha va emafambiselweni lawa ya swilo kumbe eka lawa ma taka. Tsundzuka: “Xikwembu a xi pfumali ku lulama lerova xi nga rivala ntirho wa n’wina ni rirhandzu leri mi ri kombiseke hikwalaho ka vito ra xona, hileswi mi tirheleke vakwetsimi naswona ma ha ya emahlweni mi va tirhela.”—Vaheveru 6:10.

 10. I mukhuva wihi wo biha lowu nga papalatiwaka hi munhu loyi a nga ni moya wo rindza? Hlamusela.

¹⁰ Moya wo rindza wu tlhela wu hi pfuna leswaku hi papalata ku tikukumuxa. Van’wana lava hundzukeke vagwinehi a va nga swi lavi ku rindza. Va nga ha va va vone onge a ku laveka mindzulamiso, ku nga ha va ya ku twisisa Bibele kumbe ya timhaka ta nhlengeletano. Kambe, va tsandzekile ku lemuka leswaku moya wa Yehovha wu susumetela hlonga ro tshembeka ni ro tlhariha leswaku ri endla mindzulamiso hi nkarhi wa Yena lowu faneleke, ku nga ri loko hina hi vona onge ku laveka mindzulamiso. Naswona ndzulamiso wun’wana ni wun’wana wu fanele wu pfumelelana ni ku rhandza ka Yehovha, ku nga ri mavonelo ya hina vini. Vagwinehi va pfumelela langutelo ra ku tikukumuxa ri hambukisa mianakanyo ya vona ivi ri va khunguvanyisa. Kambe loko va tekelele langutelo ra mianakanyo ra Kreste, a va ta va va hlayise ntsako wa vona kutani va tshama exikarhi ka vanhu va Yehovha.—Vafilipiya 2:5-8.

 11. Xana hi nga wu tirhisa njhani hi ndlela leyi vuyerisaka nkarhi lowu hi vaka hi rindzile ha wona, naswona hi ta va hi landzela swikombiso swa vamani?

¹¹ Ina, ku tshama hi ri ni moya wo rindza a swi vuli ku loloha kumbe ku tsana. Hi ni swilo swo swi endla. Hi xikombiso, hi fanele hi tshama hi khomekile hi dyondzo ya Bibele ya munhu hi xiyexe xisweswo hi kombisa ku tsakela lokukulu ka swilo swa moya ku fana ni loku kombisiweke hi vaprofeta vo tshembeka hambi ku ri tintsumi. Loko Petro a vulavula hi ku tsakela ko tano, u ri: “Malunghana na kona ku ponisiwa loku, vaprofeta . . . va vutisiseke ha kona hi rixaladza naswona va endleke ndzavisiso wa vukheta . . . Tintsumi ti navela ku nyangisisa swona swilo leswi.” (1 Petro 1:10-12) A hi fanelanga hi endla dyondzo ya munhu hi xiyexe ntsena kambe hi fanele hi tlhela hi va kona eminhlanganweni nkarhi hinkwawo hi tlhela hi khongela. (Yakobo 4:8) Lava va kombisaka ku xiya xilaveko xa vona xa moya hi ku va nkarhi hinkwawo va dya swakudya swa moya ni ku hlangana ni Vakreste-kulobye va kombisa leswaku va tekelele langutelo ra mianakanyo ra Kreste.—Matewu 5:3.

Vana Ni Langutelo Ra Xiviri

 12. (a) Xana Adamu na Evha a va lava vulawuri bya njhani? (b) Byi ve byihi vuyelo bya ku va vanhu va landzela ndlela ya Adamu na Evha?

¹² Loko Xikwembu xi vumbe mpatswa wo sungula wa vanhu, hi xona xi va vekeleke mimpimanyeto ya leswinene ni leswo biha. (Genesa 2:16, 17) Adamu na Evha va lave ku tilawula handle ka nkongomiso wa Xikwembu, kutani leswi swi vange leswaku ku va ni muxaka wa vanhu lava hi va vonaka namuntlha. Muapostola Pawulo u te: “Leswi xidyoho xi ngheneke emisaveni hi munhu un’we, ni rifu hikwalaho ka xidyoho, xisweswo rifu ri tlulele vanhu hinkwavo hikuva hinkwavo va dyohile.” (Varhoma 5:12) Malembe ya 6 000 ya matimu ya munhu ku sukela enkarhini wa Adamu ma kombise ntiyiso wa marito ya Yeremiya lama nge: “Oho Yehovha, ndzi swi tiva kahle leswaku ndlela ya munhu wa la misaveni a yi le ka yena. Munhu loyi a fambaka a nga ka a nga wu kongomisi nkondzo wa yena.” (Yeremiya 10:23) Ku pfumela leswaku marito ya Yeremiya i ntiyiso a hi ku hluriwa. I nchumu wa xiviri. Ma vulavula hi malembe-xidzana wolawo yo leha loko “munhu a fum[a] munhu ku n’wi endla swo biha” hikuva vanhu va fume handle ko lawuriwa hi Xikwembu.—Eklesiasta 8:9.

 13. Hi rihi langutelo ra xiviri leri Timbhoni ta Yehovha ti nga na rona malunghana ni leswi nga hetisisiwaka hi vanhu?

¹³ Hikwalaho ka xiyimo xa vanhu, Timbhoni ta Yehovha ta swi xiya leswaku ku ni swipimelo malunghana ni leswi nga fikeleriwaka eka mafambiselo lawa ya swilo. Langutelo lerinene ri nga hi pfuna ku hlayisa ntsako wa hina, kambe langutelo rolero a hi ntlhantlho wa swilo hinkwaswo. Eku sunguleni ka va-1950, mufundhisi un’wana wa le Amerika u humese buku leyi xaviweke swinene leyi vitaniwaka The Power of Positive Thinking. Buku leyi yi ringanyete leswaku swihinga swo tala swi nga hluriwa loko swo tlhantlhiwa hi langutelo lerinene. Mianakanyo leyinene ya bumabumeriwa hakunene. Kambe ntokoto wu kombisa leswaku vutivi, vutshila, swilo leswi vonakaka ni swilo swin’wana swo tala swa hi sivela ku hetisisa leswi hina hi nga swi kotaka. Naswona emisaveni hinkwayo, swiphiqo i swikulu ngopfu lerova vanhu a va nge swi koti ku swi tlhantlha hilaha ku humelelaka—hambiloko langutelo ra vona ri ri lerinene!

 14. Xana Timbhoni ta Yehovha ti ni langutelo ro biha? Hlamusela.

¹⁴ Hikwalaho ka langutelo ra tona etimhakeni to tano, Timbhoni ta Yehovha minkarhi yin’wana ti hehliwa hi ku va ni langutelo ro biha. Hambiswiritano, ti hisekela ku byela vanhu malunghana ni Munhu un’we ntsena loyi a nga lulamisaka xiyimo xa vanhu hi ku helela. Ni le mhakeni leyi ti tekelela langutelo ra mianakanyo ra Kreste. (Varhoma 15:2) Naswona ti khomekile hi ku pfuna vanhu leswaku va va ni vuxaka lebyinene ni Xikwembu. Ta swi tiva leswaku hi ku famba ka nkarhi, leswi swi ta humesa vuyelo lebyinene.—Matewu 28:19, 20; 1 Timotiya 4:16.

 15. Xana ntirho wa Timbhoni ta Yehovha wu va pfuna njhani vanhu?

¹⁵ Timbhoni ta Yehovha a ti swi honisi swiphiqo swa vanhu—ngopfu-ngopfu mikhuva leyi nyamisaka leyi nga riki ya Matsalwa—leyi nga kona laha ti tshamaka kona. Loko munhu loyi a tsakelaka a nga si va Mbhoni ya Yehovha, u endla mindzulamiso, hakanyingi u boheka ku tshika mikhuva leyi a hanyaka ha yona leyi nga xi tsakisiki Xikwembu. (1 Vakorinto 6:9-11) Xisweswo, Timbhoni ta Yehovha ti pfune vanhu lava twisisaka leswaku va tshika vudakwa, ku godzomberiwa hi swidzidzirisi, ku tikhoma loko biha ni ku gembula. Vanhu vo tano lava hundzukeke va dyondze ku va ni vutihlamuleri byo wundla mindyangu ya vona ni ku tshembeka. (1 Timotiya 5:8) Loko vanhu swin’we ni mindyangu va pfuniwa hi ndlela leyi, swiphiqo swa vanhu swa hunguteka—ku va ni vanhu va nga ri vangani lava godzomberiweke hi swidzidzirisi, madzolonga ya mindyangu ni swiphiqo swin’wana swa hunguteka. Hi ku va vaaki lava namarhelaka nawu swin’we ni ku pfuna van’wana leswaku va antswisa vutomi bya vona, Timbhoni ta Yehovha ti hunguta ndzhwalo wa vanhu lava ntirho wa vona ku nga ku tlhantlha swiphiqo swa vanhu.

 16. Ha yini Timbhoni ta Yehovha ti nga hlanganyeli eka minhlangano leyi ringetaka ku herisa ku xaniseka?

¹⁶ Xana Timbhoni ta Yehovha ti hundzule xiyimo xa mahanyelo xa misava leyi? Eka khume ra malembe lama hundzeke, nhlayo ya Timbhoni leti hisekaka yi tlakukile yi suka eka vanhu va 3 800 000 yi ya eka va kwalomu ka 6 000 000. Koloko i ku engeteleka ka vanhu va kwalomu ka 2 200 000, lava vo tala va vona loko va va Vakreste va tshikeke swiendlo swo biha. Vutomi bya vo tala byi antswile! Hambiswiritano, nhlayo leyi a yi nyawuli loko yi pimanisiwa ni ku andza ka vaaki va misava hi nkarhi lowu fanaka—va 875 000 000! Timbhoni ta Yehovha ti kume leswaku ku pfuna vanhu lava twisisaka, i xihlovo xa ntsako, hambileswi ti swi xiyaka leswaku a va talanga vanhu lava nga ta teka ndlela leyi yisaka evuton’wini. (Matewu 7:13, 14) Loko Timbhoni ta ha rindzele ku hundzuka ka swilo emisaveni hinkwayo leswaku swi va leswinene loku nga ta endliwa hi Xikwembu ntsena, a ti hlanganyeli eka minhlangano leyi ringetaka ku herisa ku xaniseka, leyi hakanyingi yi sungulaka hi swikongomelo leswinene kambe yi hetelela hi ku pfilunganyeka ni ku va ni madzolonga.—2 Petro 3:13.

 17. Xana Yesu u endle yini leswaku a pfuna vanhu va le nkarhini wa yena, kambe i yini lexi a nga xi endlangiki?

¹⁷ Loko Timbhoni ta Yehovha ti endla hi ndlela leyi, ti kombisa ku tshemba Yehovha loku fanaka ni loku Yesu a ku kombiseke loko a ha ri emisaveni. Le ndzhaku eka lembe-xidzana ro sungula, Yesu u endle masingita yo hanyisa. (Luka 6:17-19) U tlhele a pfuxa ni vafi. (Luka 7:11-15; 8:49-56) Kambe a nga xi herisanga xiphiqo xa vuvabyi kumbe a hlula nala, rifu. A a swi tiva leswaku a wu nga si va nkarhi lowu faneleke wa Xikwembu wa ku endla leswi. Leswi a a ri ni vuswikoti lebyikulu bya munhu la hetisekeke, Yesu a a ta va a endle swo tala leswaku a tlhantlha swiphiqo leswikulu swa politiki ni swa vanhu. Swi vonaka onge van’wana va vanhu va le nkarhini wa yena va lave leswaku a lawula hi ndlela yoleyo, kambe Yesu u arile. Ha hlaya: “Loko vanhu va vona masingita lawa a ma endleke, va ku: ‘Hakunene loyi hi yena muprofeta loyi a a fanele ku ta emisaveni.’ Hikokwalaho, hi ku tiva leswaku a va ri kusuhi ni ku ta va ta n’wi khoma va n’wi endla hosi, Yesu a tlhelela entshaveni a ri swakwe.”—Yohane 6:14, 15.

 18. (a) Xana Yesu u kombise langutelo ra ku rindza minkarhi hinkwayo hi ndlela yihi? (b) Xana ntirho wa Yesu wu cince hi ndlela yihi ku sukela hi 1914?

¹⁸ Yesu u arile ku nghenela tipolitiki kumbe ntirho wo pfuna vanhu hikuva a a swi tiva leswaku nkarhi wa yena wa leswaku a teka matimba ya vuhosi ni ku endla mintirho yo hanyisa munhu un’wana ni un’wana, kun’wana ni kun’wana a wu nga si fika. Ni le ndzhaku ka ku tlhandlukela ka yena ematilweni a ya va ni vutomi bya moya lebyi nga fiki, a a swi rhandza ku rindza nkarhi lowu vekiweke wa Yehovha emahlweni ka ku va a teka goza. (Pisalema 110:1; Mintirho 2:34, 35) Hambiswiritano, ku sukela loko a vekiwile tanihi Hosi ya Mfumo wa Xikwembu hi 1914, u ya emahlweni a “hlula, ni ku hetisa ku hlula ka yena.” (Nhlavutelo 6:2; 12:10) Swa hi tsakisa hakunene ku titsongahatela vuhosi bya yena, loko van’wana lava tivulaka Vakreste va hlawula ku honisa tidyondzo ta Bibele malunghana ni Mfumo!

Ku Rindza—Xana I Xihlovo Xa Gome Kumbe Xa Ntsako?

 19. Xana ku rindza ‘ku vabyisa mbilu’ loko swi endlise ku yini, naswona hi rini laha ku nga xihlovo xa ntsako?

¹⁹ Solomoni a a swi tiva leswaku ku rindza ku nga vanga gome. U tsarile: “Ku langutela loku tlheriseriwaka endzhaku ku vabyisa mbilu.” (Swivuriso 13:12) Entiyisweni, loko munhu a langutele swilo leswi nga sekeriwangiki helo, mbilu ya yena yi nga va ni gome loko swi nga hetiseki. Hambiswiritano, ku rindzela swiendlakalo leswi tsakisaka—kumbexana nkhuvo wa vukati, ku velekiwa ka n’wana, kumbe ku tlhela hi hlangana ni vanhu lava hi va rhandzaka—swi nga endla leswaku hi va ni ntsako wa ku langutela emahlweni swinene ka siku leri swi nga ta hetiseka hi rona. Ntsako wa kona wa kula loko hi tirhisa nkarhi lowu hi rindzeke ha wona hi vutlhari, hi tilunghiselela xiendlakalo lexi taka.

 20. (a) I swiendlakalo swihi leswi tsakisaka leswi hi languteleke ku swi vona hi ku tiyiseka? (b) Hi nga wu kuma njhani ntsako loko ha ha rindzele swikongomelo swa Yehovha leswaku swi hetiseka?

²⁰ Loko hi ri ni ntshembo lowu heleleke wa leswaku ku langutela ka hina ku ta hetiseka—hambiloko hi nga swi tivi leswaku ku ta hetiseka rini—nkarhi lowu hi rindzeke ha wona a wu nge ‘vabyisi mbilu.’ Vagandzeri va Xikwembu lava tshembekaka va swi tiva leswaku Ku Fuma Ka Kreste Ka Gidi Ra Malembe se ko va kwala nyongeni. Va tiyiseka leswaku va ta vona ku hela ka rifu ni vuvabyi. Hi ntshembo lowukulu va rindzele hi ntsako nkarhi lowu va nga ta amukela vanhu va magidi ya timiliyoni lava pfuxiweke, ku katsa ni varhandziwa va vona lava a va file. (Nhlavutelo 20:1-3, 6; 21:3, 4) Eminkarhini leyi swivumbiwa ni mbango swi nga le khombyeni, va lava ku vona xitiyisekiso xa ntshembo wo vona Paradeyisi yi simekiwa emisaveni. (Esaya 35:1, 2, 7) Hikwalaho, i vutlhari ku tirhisa nkarhi wo rindza hi vutlhari, “nkarhi hinkwawo mi va ni swo tala swo swi endla entirhweni wa Hosi”! (1 Vakorinto 15:58) Hambeta u dya swakudya swa moya. Aka vuxaka lebyikulu swinene na Yehovha. Lavisisa van’wana lava timbilu ta vona ti va susumetelaka ku tirhela Yehovha. Khutaza vapfumeri-kulobye. Wu tirhise hilaha ku faneleke nkarhi wun’wana ni wun’wana lowu Yehovha a ha wu pfumelelaka. Kutani, ku rindzela Yehovha a ku nge ‘vabyisi mbilu’ ya wena. Ku ri na sweswo, ku ta endla leswaku u tsaka!

Xana U Nga Hlamusela?

• Xana Yesu u wu kombise njhani moya wo rindza?

• Vakreste va lava moya wo rindza loko va ri eswiyin’weni swihi?

• Ha yini Timbhoni ta Yehovha ti eneriseka hi ku rindzela Yehovha?

• Xana ku rindzela Yehovha ku nga va xihlovo xa ntsako hi ndlela yihi?

[Swifaniso leswi nga eka tluka 12]

Yesu u tiyiserile hikwalaho ka ntsako lowu a wu vekiwe emahlweni ka yena

[Xifaniso lexi nga eka tluka 13]

Hambiloko se hi ri ni nkarhi wo leha ngopfu hi ri karhi hi tirha, hi nga tshama hi tsakile

[Swifaniso leswi nga eka tluka 15]

Timiliyoni ta vanhu ti hundzule vutomi bya tona hi ku va Timbhoni ta Yehovha