Ku Ta Ka Kreste—Xana Hi Fanele Hi Ku Chava?

U ANAKANYA leswaku ku ta va njhani ku ta ka Yesu Kreste? Xana ku ta va xiendlakalo lexi nga ta tisa khombo, nhlomulo ni ku xupuriwa ka vanhu? Kumbe u rindzele leswaku ku ta herisa swiphiqo swa hina hinkwaswo? Xana ku ta ka Kreste i nchumu lowu hi faneleke hi wu chava? Kumbe hi fanele hi ku langutela hi mahlo-ngati?

Malunghana ni ku ta ka Kreste, Bibele yi ri: “Maswivo! Wa ta hi mapapa, naswona tihlo rin’wana ni rin’wana ri ta n’wi vona, . . . kutani tinyimba hinkwato ta misava ti ta tiba hi gome hikwalaho ka yena.” (Nhlavutelo 1:7) Ku ta koloko i ku humelela ka Yesu enkarhini lowu taka leswaku a ta hakela lavo lulama ni ku xupula lavo homboloka.

Ematshan’weni ya ku chava ku ta ka Kreste, muapostola Yohane a a ku langutele hi mahlo-ngati. Endzhaku ko kuma nhlavutelo leyi vulavulaka hi ku ta koloko swin’we ni ndlela leyi misava yi nga ta khumbeka ha yona, Yohane u khongele hi mbilu hinkwayo a ku: “Tana, Hosi Yesu.” (Nhlavutelo 22:20) Kambe ha yini “tinyimba hinkwato ta misava ti . . . tiba hi gome hikwalaho ka yena”? “Tihlo rin’wana ni rin’wana” ri ta n’wi vona hi ndlela yihi? I yini leswi nga ta hetisisiwa hi ku ta ka Kreste? Ku va ni ripfumelo eku teni ka Kreste swi nga hi vuyerisa njhani sweswi? Xihloko lexi landzelaka xi ta hlamula swivutiso leswi.