Ma Amukeriwa Eka Mintsombano Ya Muganga Ya “Varhandzi Va Ntshunxeko”!
NTSHUNXEKO! Mawaku mpfumawulo wo tsakisaka lowu rito rero ri nga na wona! Ku hava la tsakelaka ku va evuhlongeni kumbe evukhumbini. Malembe ya sweswinyana ma vone ku tshineleriwa ka ntshunxeko wa politiki lowu languteriweke, wahi na wahi man’wana lama nga tsundzukiwaka.
Hambi swi ri tano, tanihi leswi ku navela ka ntshunxeko wa politiki ku nga xiswona, ku na ntshunxeko lowu nga wa nkoka ngopfu ni lowu naveriwaka. I ntshunxeko lowu Yesu Kriste, N’wana wa Xikwembu, a vulavuleke ha wona eka vadyondzisiwa vakwe loko a ku: “Loko mi tiyisela eritweni ra mina, mi vadyondzisiwa va mina hakunene; naswona mi ta tiva ntiyiso, kutani ntiyiso wu ta mi ntshunxa.” (Yohane 8:31, 32) Loku i ku ntshunxeka eka tidyondzo ta vukhongeri bya mavunwa, ntshunxeko eku chaveni ka munhu, ntshunxeko evuhlongeni ni xidyoho lexi godzombeleke, ni swin’wana swo tala.
Hi wona ntshunxeko lowu nga nhloko-mhaka ya Mintsombano ya Muganga ya “Varhandzi Va Ntshunxeko” leyi nga ta khomiwa hi Timbhoni ta Yehova emisaveni hinkwayo leyi sungulaka hi ximumu xa 1991. Ku sukela hi lembe ra 1919, leri funghiweke hi ku humesiwa ka minsivelo ya hulumendhe eka lava va rhangelaka exikarhi ka vona, vanhu va Xikwembu va tsakele ku andza ka ntshunxeko malunghana ni vugandzeri bya vona lebyi tengeke.
Swa fanela swonghasi leswi dyondzo ya ntshunxeko yi kandziyisiweke emalembeni lama hundzeke eka mintsombano ya le tilweni, hi tinhloko-mhaka to tanihi “Nhlengeletano Ya Le Tilweni Ya ‘Matiko Lama Ntshunxekeke’” na “Tinhlengeletano Ta Muganga Ta ‘Vana Va Xikwembu Va Ntshunxeko.’” Ntshunxeko nakambe wu hlamuseriwa hi laha ku anameke eka tibuku to tanihi “The Truth Shall Make You Free” na Life Everlasting—In Freedom of the Sons of God.
Ntshunxeko lowu nyikiweke hi Xikwembu lowu malandza ya Yehova ma nga na wona a hi wa vahlayiseki ni ku tiphina ka wona ntsena. Tanihi loko hi hlaya eka Vagalatiya 5:13: “Loko a ri n’wina vamakwerhu, mi vitaniwile leswaku mi va lava ntshunxekeke; kambe mi nga teki ku ntshunxeka ka n’wina, mi ku hundzula mpfumelelo wo endla leswi ntumbuluko wa n’wina wa laha misaveni wu swi navelaka; ematshan’wini ya sweswo, tirhelanani hi rirhandzu.” Ntsombano wa Muganga wa “Varhandzi Va Ntshunxeko” wu ta hi pfuna ku tlangela xikongomelo xa ntshunxeko wa hina, wu hi pfumelela ku khomelela eka ntshunxeko wa hina wa nkoka, naswona wu hi komba ndlela leyi hi nga wu tirhisaka kahle ha yona.
Ntsombano wu ta sungula hi Ravuntlhanu ni mixo hi 10:20 hi nongonoko wa vuyimbeleri lebyi nga ta hi veka emianakanyweni leyinene ya swakudya swa moya leswi nga ta landzela. Nhloko-mhaka ya siku ro sungula i “Ku Tiva Ntiyiso Lowu Hi Ntshunxaka,” leyi sekeriweke eka Yohane 8:32. Ndzenga wu ta va na marito ya mutshami wa xitulu ya ku amukela ni nkulumo-nkulu ya, “Xikongomelo Na Ku Tirhisa Ntshunxeko Wa Hina Lowu Hi Nyikiweke Hi Xikwembu.” Nkulumo leyi yi ta kandziyisa ku hambana exikarhi ka ntshunxeko wa Yehova lowu hetisekeke ni ntshunxeko wutsongo lowu Xikwembu xi hi nyikaka wona. Nakambe yi ta hi khutaza ku tirhisa ntshunxeko lowu hi nga na wona kahle hi laha ku kotekaka. Nongonoko wa ni ndzhenga wu ta vulavula hi malangutelo yo hambana-hambana ya ntshunxeko wa hina ni vutirheli bya hina naswona wu ta hetelela hi drama leyi nge, Ku Ntshunxekela Ku Kondletela Vugandzeri Bya Ntiyiso.
Nhloko-mhaka ya siku ra vumbirhi i “Ku Yima Hi Tiyile Eka Ntshunxeko Wa Hina Lowu Hi Nyikiweke Hi Xikwembu” leyi sekeriweke eka Vagalatiya 5:1. Nongonoko wa ni mixo wu ta va na nxaxamelo lowu kombaka ndlela leyi swirho swa ndyangu swi nga tsakelaka ntshunxeko lowu hi nyikiweke hi Xikwembu endyangwini ha yona. Lava lunghekeleke ku ya khuvuriwa va ta ma tlangela hi laha ku hlawulekeke marito ya ndlela leyi ntshunxeko wu kumekaka ha yona hi ku tinyiketela ni nkhuvulo. Lexi katsekaka eka nongonoko wa ni ndzhenga ku ta va bulo leri tsakisaka ra loko vukati byi ri xilotlelo xa ntsako kumbe e-e. Nakambe ku ta va na nxaxamelo ehenhleni ka malangutelo yo hambana-hambana ya ntshunxeko naswona endzhaku nkulumo yo hetelela leyi kombetelaka eka Mutirhi Lonkulu wa Xikwembu la nyikaka ntshunxeko ni vutomi lebyi nga heriki.
Sonto yi na nhloko-mhaka leyi nge “Ku Tirhisa Ntshunxeko Wa Hina Hi Ku Fambisana Ni Moya Wa Xikwembu,” leyi sekeriweke eka 2 Vakorinto 3:17. Nongonoko wu ta va na nxaxamelo lowu tsakisaka ngopfu wa xifaniso xa Yesu lexi rhekhodiweke eka Matewu 13:47-50, lexi paluxaka ndlela leyi Timbhoni ta Yehova ti tirhaka tanihi hi vaphasi va vanhu ha yona. Nkulumo ya le rivaleni hi ndzhenga yi ri “Ku Twarisa Misava Leyintshwa Ya Xikwembu Ya Ntshunxeko!” Yi ta landzeriwa hi xiendlakalo lexintshwa ya ntsombano wa muganga: nkatsakanyo wa dyondzo ya Xihondzo xo Rindza ya vhiki rolero. Naswona nongonoko wu ta pfala hi xikhutazo xa Matsalwa eka hina hinkwerhu ku tshama hi ri karhi hi ya emahlweni eku tirhiseni lokunene ka ntshunxeko wa hina lowu hi nyikiweke hi Xikwembu emahanyelweni ya hina ni le ku chumayeleni ka hina.
Eka varhandzi va ntshunxeko hinkwavo, hi marito ya mupisalema Davhida hi ri: “Nantŝwani, mi v̌a mi v̌ona leŝaku Yehova i lo’nene ŝonghasi!” (Psalma 34:8) Endla matshalatshala hinkwawo leswaku u ya entsombanweni lowu. Tiyiseka leswaku u va kona ku sukela eka nongonoko wa Ravuntlhanu ni mixo ku fikela eka nkulumo yo pfala hi Sonto ni ndzhenga. Loko u ta u ri ni ku navela lokunene ka moya, u khathalela swinene xilaveko xa wena xa moya, hakunene u ta tsaka! (Matewu 5:3) Kutani hi nga wu honisi nsinya wa nawu lowu nge, “Loyi a byalaka swo tala, ú ta tshovela swo tala.” Nakambe leswi swa tirha eka ndlela leyi hi tiyisekaka ha yona ku lunghiselela ka ha ri ni nkarhi ku va kona, ndlela leyi hi tikarhataka ha yona ku yingisela nongonoko loko wu ri karhi wu nyikeriwa, ni ndlela leyi hi hisekaka ha yona ku teka malunghelo wahi na wahi ya ntirho wo tirhandzela lama hi pfulekeleke mayelana ni Ntsombano wa Muganga wa “Varhandzi Va Ntshunxeko.”—2 Vakorinto 9:6.