Tihosi ta wumbiri

23 Hikwalaho, a hosi yi no rumela gezu, niku va no vitanisa a madhota wontlhe ya Judha ni ya Jerusalema.+ 2 Hi kulandzela, a hosi yi no kandziha yiya ndlwini ya Jehovha ni vontlhe vavanuna va ka Judha, ni vahanyi vontlhe va Jerusalema, ni vapristi, ni vaphrofeti — vontlhe vanhu, kusukela ka wamutsongwani kala ka wahombe. Yi no va lerela a magezu wontlhe ya bhuku+ ga civhumelwano+ legi gi nga thumbilwe lomu ndlwini ya Jehovha.+ 3 A hosi yi no yima kusuhani ni pilari yi maha civhumelwano* mahlweni ka Jehovha+ ca lezvaku yi ta landzela Jehovha, yi hlayisa a zvileletelo zvakwe, ni zvikhumbuxeto zvakwe, ni milayo yakwe hi mbilu ya yona yontlhe ni muhefemulo* wa yona wontlhe, hi ku hlayisa timhaka tontlhe ta civhumelwano leci, leti ti tsalilweko lomu bhukwini legi. Vontlhe a vanhu va no vhumelelana ni civhumelwano leco.+

4 A hosi yi no leletela Hilkiya,+ a mupristi wa hombe, ni vapristi lava van’wani, ni vagadhi va tinyangwa kasi va humesa lomu tempeleni ya Jehovha a zvibya zvontlhe zvi nga mahelwe Bhaali, ni sinya yo basa,*+ ni butho gontlhe ga matilo. Yi no zvi hisa lahandle ka Jerusalema matlhelweni ya Kidroni yi gumesa yi teka khuma ga kona yi famba nago Bheteli.+ 5 Hikwalaho, yi no fuvisa mabhindzu ya vapristi va vanungungulu va matiko, lava a tihosi ta Judha ti nga va yimisile kasi va tuvikisa a musi wa miphahlo lomu ka matshamu yo tlakuka madhoropeni ya Judha ni matlhelweni ya Jerusalema yi tlhela yi fuvisa lava va nga tuvikisa a musi wa miphahlo ka Bhaali, ni ka gambo, ni ka hweti, ni ka mitlawa ya tinyeleti ya zodíaco, ni ka butho gontlhe ga matilo.+ 6 Yi no humesa a sinya yo basa*+ lomu ndlwini ya Jehovha yi famba nayo le handle ka Jerusalema, Nkoveni wa Kidroni, yi ya yi hisa+ Nkoveni wa Kidroni yi yi sila yi maha tsutsungwani, yi wu xwanyela zvilahleni zva vanhu.+ 7 Yi no tlhela yi khungumulela a tiyindlu ta zvibhayi zva tempeli zva vavanuna,+ leti ti nga hi lomu ndlwini ya Jehovha, lomu a vavasati va nga lukela kona a matenda ya zvitempelana zva sinya yo basa.*

8 Yi no humesa a vapristi vontlhe madhoropeni ya Judha, yi nyenyezisa matshamu yo tlakuka, lomu a vapristi va nga tuvikisela kona a musi wa miphahlo, kasi va nga ha khozeli kona, kusukela Gebha+ kala Bherexebha.+ Yi no tlhela yi khungumulela a matshamu yo tlakuka ma nga hi laha mahlweni ka nyangwa ya Joxuwa, a hosana ya dhoropa, tlhelweni ga cibhabha loku u nghena hi nyangwa ya dhoropa. 9 A vapristi va matshamu yo tlakuka va wa nga tiri ka alati ga Jehovha le Jerusalema,+ kanilezvi va waga a tipawa to kala comelo zvin’we ni vamakabye vabye. 10 A hosi yi no nyenyezisa ni wutshamu go khozela kona ga Tofete+ legi gi nga hi Nkoveni wa Vana va Hinome,*+ kasi ku ngavi ni munhu a hundzisako a mufana wakwe kutani nhanyana wakwe hi lomu ndzilweni ka Moloki.+ 11 A cin’wani kambe, yi no betela ku a mahaxi lawa a tihosi ta Judha ti nga ma nyikele ka gambo ma nghena lomu ndlwini ya Jehovha hi laha saleni ya Natani-Meleki, a mutiri wa laha wuhosini, leyi yi nga hi laha ligumbagumbeni; yi no hisa laha ndzilweni a tikareta leti ti nga nyikelwe ka gambo.+ 12 A hosi yi no tlhela yi khungumulela a maalati lawa a tihosi ta Judha ti nga akile le langweni*+ la kwartu ya le hehla ya Ahaza, zvin’we ni maalati lawa Manase a nga ma yimisile lomu mitsendzeleni* yimbiri ya yindlu ya Jehovha.+ Yi no ma sila yi xwanyela a tsutsungwani wa kona Nkoveni wa Kidroni. 13 A hosi yi no nyenyezisa kambe ni matshamu yo tlakuka ya ku khozela ka wona ma nga cuwukene ni Jerusalema hi tlhelo ga le dzongeni* ga Citsunga ca Kuhahlula, lawa Solomoni, a hosi ya Izrayeli, a nga ma akele Axtarte, a nungungulu wa cisati wo nyenyeza wa vaSidhoni, na Kemoxe, a nungungulu wo nyenyeza wa Mowabhi, na Milkome,+ a nungungulu wo nyenyeza wa vaAmoni.+ 14 Yi no khungumulela a mapilari yo basa,* yi tsemelela tisinya to basa,*+ yi tata matshamu ya kona hi marambu ya vanhu. 15 Yi no khungumula ni alati legi gi nga hi Bheteli, ni wutshamu go tlakuka legi Jerobhowamu, a n’wana wa Nebhate, a nga mahile, legi gi wonhisileko a vaIzrayeli.+ Andzhako ka ku khungumula a alati ni wutshamu go tlakuka, yi no hisa a wutshamu go tlakuka yi gi sila gi maha tsutsungwani, yi tlhela yi hisa sinya yo basa.*+

16 Laha Josiya a nga hundzuluka a wona zvilahla lezvi zvi nga hi laha citsungeni i no laya lezvaku ku humesiwa a marambu lawa ma nga hi lomu zvilahleni lezvo a ma hisa laha alatini, a gi nyenyezisa kasi va nga ha khozeli ka gona, khwatsi hi gezu ga Jehovha legi gi huwelelweko hi munhu wa Nungungulu wa lisine, loyi a phrofetileko lezvaku a zvilo lezvi zvi ta maheka.+ 17 A hosi yi te: “Cilahla ca mani leciya ndzi ci wonako ke?” A vavanuna va dhoropa va no yi hlamula, vaku: “Cilahla ca munhu wa Nungungulu wa lisine wa le Judha+ loyi a phrofetileko a zvilo lezvi u mahileko a alati ga Bheteli.” 18 Makunu a hosi yi te: “Mu tsikeni a humula. Ku ngavi ni munhu a henyako a marambu yakwe.” Hikwalaho, a va henyangi a marambu yakwe zvin’we ni marambu ya muphrofeti loyi a nga tile hi Samariya.+

19 Josiya i no tlhela a susa a tiyindlu tontlhe ta ku khozela kona lomu matshan’wini yo tlakuka ti nga hi madhoropeni ya Samariya,+ leti a tihosi ta Izrayeli ti nga ti akile kasi ku zangarisa Nungungulu, a ti maha lezvi a nga maha a wutshamu go tlakuka le Bheteli.+ 20 I no daya hehla ka maalati a vapristi vontlhe va matshamu yo tlakuka lava va nga hi laho, a hisa marambu ya vanhu hehla ka wona.+ Andzhako ka lezvo, i no tlhela Jerusalema.

21 Makunu a hosi yi no leletela a vanhu vontlhe, yiku: “Mahani a Phasika+ ga Jehovha, a Nungungulu wa n’wina, a ku khwatsi hi lezvi zvi tsalilweko lomu bhukwini legi ga civhumelwano.”+ 22 Ku wa nga se tshuka ku mahiwa a Phasika go fana ni lego, kusukela masikwini lawa a valamuli va nga lamula Izrayeli, ne hambu masikwini wontlhe ya tihosi ta Izrayeli ni tihosi ta Judha.+ 23 Kanilezvi hi lembe ga wu 18 ga hosi Josiya, a Phasika legi ga Jehovha gi no mahiwa Jerusalema.

24 Josiya i no tlhela a fuvisa a tin’anga, ni vavhumbi,+ ni zvifananiso zva terafime,*+ ni zvifananiso zvo nyenyeza,* ni zvontlhe a zvilo zvo nyenyeza lezvi zvi nga humelele lomu tikweni ga Judha ni Jerusalema kasi a landza timhaka ta Nayo+ leti ti nga tsalilwe bhukwini legi mupristi Hilkiya a nga thumba lomu ndlwini ya Jehovha.+ 25 A ku vangi ni hosi yo fana naye mahlweni kakwe, leyi yi nga tlhelela ka Jehovha hi mbilu ya yona yontlhe, ni muhefemulo* wa yona wontlhe,+ ni ntamu wa yona wontlhe yi landzela a Nayo wontlhe wa Mosi; ne hambu andzhako kakwe a ku kumekangi mun’wani wo fana naye.

26 Hambulezvo, a zanga yi vhurako ya Jehovha leyi yi nga vhurela Judha hi kota ya zvontlhe a zvilo zvo biha lezvi Manase a nga maha kasi ku mu zangarisa, a yi bohlangi.+ 27 Jehovha i te: “Ndzi ta tlhela ndzi susa Judha mahlweni ka mina+ a ku khwatsi hi lezvi ndzi ga susa Izrayeli;+ ndzi ta ala Jerusalema, a dhoropa legi ndzi gi hlawulileko, ni yindlu leyi ndzi nga wula hi yona, ndziku: ‘A vito ga mina gi ta simama laho.’”+

28 A man’wani matimu ya Josiya, zvontlhe lezvi a nga maha, ma tsalilwe bhukwini ga matimu ya zvikhati zva tihosi ta Judha. 29 Masikwini yakwe, Faro Neko, a hosi ya Gibhite, i no suka a ya tlhangana ni hosi ya Asiriya Congweni wa Eufrate. Hosi Josiya i no huma kasi a yalwa naye, kanilezvi laha Neko a nga mu wona i no mu daya le Megidho.+ 30 Hikwalaho, a malandza yakwe ma no rwala a cirumbi cakwe lomu kareteni ma suka hi Megidho ma wuya naye Jerusalema ma ta mu lahla cilahleni cakwe. Andzhako ka lezvo, a vanhu va lomu tikweni va no teka Jehoahaza, a n’wana wa Josiya, va mu tota va mu maha hosi cikhundleni ca papayi wakwe.+

31 Jehoahaza+ i wa hi ni 23 wa malembe a cikhati leci a nga maha hosi, niku i no fuma tihweti tinharu le Jerusalema. A vito ga mamani wakwe ku wa hi Hamutali,+ a n’wana wa Jeremiya, wa le Libna. 32 I no sangula ku maha zvakubiha mahlweni ka Jehovha, a ku khwatsi hi zvontlhe lezvi a vakokwani vakwe va nga mahile.+ 33 Faro Neko+ i no mu vhalela le Ribla,+ tikweni ga Hamate, kasi a nga fumi Jerusalema, a gumesa a londza lezvaku a tiko gi humesa a ndzuvo* wa 100 wa titalenta* ta prata ni talenta yin’we ya ouro.+ 34 Ahandle ka lezvo, Faro Neko i no yimisa Eliyakimu, a n’wana wa Josiya, lezvaku ava hosi cikhundleni ca papayi wakwe Josiya, a gumesa a mu cica vito aku hi Jehoyakimu; kanilezvi i no teka Jehoahaza a famba naye Gibhite+ lomu a ngaya a ya fela kona.+ 35 Jehoyakimu i no nyikela a prata ni ouro ka Faro, kanilezvi zvi lavile ku a londza ndzuvo* ka tiko kasi a kuma mali leyi Faro a nga yi lava. I no hakhelisa a munhu ni munhu wa lomu tikweni a ntsengo lowu wu nga gemilwe wa prata ni ouro kasi a nyika Faro Neko.

36 Jehoyakimu+ i wa hi ni 25 wa malembe a cikhati leci a nga maha hosi, niku i no fuma a 11 wa malembe Jerusalema.+ A vito ga mamani wakwe ku wa hi Zebhidha, a n’wana wa Pedhaya, wa le Ruma. 37 I no simama ku maha zvakubiha mahlweni ka Jehovha,+ a landzela zvontlhe lezvi a vakokwani vakwe va nga mahile.+