Kronekele wo sangula

11 Hi kufamba ka cikhati, a vaIzrayeli vontlhe va no hlengeletana ka Dhavhidha le Hebroni,+ vaku: “Hina na wena hi nkhata wun’we.*+ 2 A kale, laha Sawule a nga hi hosi ya hina, hi wena u nga kari u rangela Izrayeli tiyimpini takwe.*+ Niku Jehovha, a Nungungulu wa wena, i te ngalo ka wena: ‘U ta risa a vanhu va mina, a vaIzrayeli, niku u tava murangeli wa vanhu va mina, a vaIzrayeli.’”+ 3 Hikwalaho, a madhota wontlhe ya ka Izrayeli ma noya ka hosi Dhavhidha le Hebroni, niku Dhavhidha i no maha nawo civhumelwano le Hebroni mahlweni ka Jehovha. Andzhako ka lezvo, ma no tota Dhavhidha kota hosi ya Izrayeli,+ a ku khwatsi hi lezvi Jehovha a nga layile hi ku tirisa Samuweli.+

4 Andzhako ka lezvo, Dhavhidha ni vaIzrayeli vontlhe va noya Jerusalema, ku nga le Jebhusi,+ lomu a vaJebhusi+ va nga hanya kona. 5 A vahanyi va le Jebhusi va no poyila Dhavhidha, vaku: “U nga ta tshuka u ku nghena lomu!”+ Hambulezvo, Dhavhidha i no teka a khokhola ga Ziyoni,+ legi zvezvi gi nga Dhoropa ga Dhavhidha.+ 6 Hikwalaho, Dhavhidha i te: “Ni wihi loyi a to ranga a hihirita a vaJebhusi i tava murangeli* ni hosana.” Jowabe,+ a n’wana wa Zeruya, i no ranga hi yena a kandziha, a seva murangeli. 7 Makunu Dhavhidha i no ya hanya khokholeni. Hi cigelo leco, va no gi vitana ku i Dhoropa ga Dhavhidha. 8 I no sangula ku aka dhoropa matlhelweni wontlhe, kusukela Milo* kala ka zvipandze lezvi zvi nga gi randzele; Jowabe i no aketa a zvipandze lezvi zvin’wani zva dhoropa. 9 Hikwalaho, Dhavhidha i no simama ku endzeleka ava ni ntamu+ niku Jehovha wa mabutho i wa hi zvin’we naye.

10 Leti hi tihloko ta masochwa ya Dhavhidha lawa ya tinhenha, leti zvin’we ni Izrayeli yentlhe, ti nga mu seketela nguvhu mufun’weni wakwe ni ku mu vhunetela lezvaku ava hosi, a ku khwatsi hi lezvi Jehovha a wulileko xungetano hi Izrayeli.+ 11 Lowu i xaxameto wa masochwa ya Dhavhidha lawa ya tinhenha: Jaxobheyamu,+ a n’wana wa muHakmoni, a hloko ya tinhenha tinharu.+ Ka khati go kari, i no daya a 300 wa vavanuna hi tlhari gakwe.+ 12 Andzhako kakwe ku wa gamela Eleyazari,+ a n’wana wa Dhodho, a muAhohe.+ I wa hi mun’we wa masochwa manharu lawa ya tinhenha. 13 I wa hi na Dhavhidha le Pas-Dhamime,+ laha a vaFilistiya va nga hlengeletene kona kasi kulwa yimpi. Kwalaho ku wa hi ni simu go tala hi sevhadha niku a vanhu va wa tsutsumile hi kota ya vaFilistiya. 14 Kanilezvi yena i no yima cikari ka simu a gi vhikela, a simama ku hihirita a vaFilistiya. Hikwalaho, Jehovha i no va nyika a kuhlula* ka hombe.+

15 A tinhenha tinharu ka leti ta 30 ti no relela ribyeni, tiya ka Dhavhidha mhakweni ya Adhulamu;+ ka cikhati caleco, a butho ga vaFilistiya gi wa govile Nkoveni wa Refayime.+ 16 Cikhatini leco, Dhavhidha i wa hi khokholeni, niku ku wa hi ni ntlawa wa masochwa ya vaFilistiya le Bhetlehema. 17 Dhavhidha i no wula kuxuva kakwe, aku: “Mayiwako loku ndzi wo kuma mati ya hlowo ya le nyangweni ya Bhetlehema ndzinwa!”+ 18 Hi kota ya lezvo, lava va vanharu va noya va ya nghena hi kani wugovelweni ga vaFilistiya, vakha mati hloweni ya le nyangweni ya Bhetlehema va wuya nawo ka Dhavhidha; kanilezvi Dhavhidha i no ala kunwa mati lawo, a ma halata mahlweni ka Jehovha. 19 I te ngalo: “A zvive kule na mina a kuva ndzi maha lezvi, hakuva ndzi na ni cichavo hi Nungungulu! Ndzi nganwa a nkhata wa vavanuna lava va vekileko a wutomi* gabye mhangweni ke?+ Hakuva va vekile wutomi* gabye mhangweni kasi va wuya ni mati lawa.” Hikwalaho, i no ala kunwa. Lezvi zvilo zvi mahilweko hi masochwa yakwe ya manharu ya tinhenha.

20 Abhixayi,+ a makabye wa Jowabe,+ i nova hloko ya tin’wani tinhenha ta tinharu. I no daya a 300 wa vavanuna hi tlhari gakwe niku ive ni nduma yo fana ni ya leti ta tinharu.+ 21 Ka leti tin’wani ta tinharu, hi yena a nga hlawulekile a ku hundza lava va vambiri niku i wa hi yena a hosana yabye; hambulezvo a nga chikelangi ka cikhundla ca lava va vanharu vo sangula.

22 Bhenaya,+ a n’wana wa Jehoyadha, i wa hi wanuna wo tiya hlanha, loyi a nga maha zvilo zvo tala zvo hlamalisa le Kabzeeli.+ I no daya vana vambiri va Ariyeli, wa le Mowabhi niku i no relela hloweni hi siku ga gapongo, a ya daya a nghala.+ 23 Ahandle ka lezvo, i no daya a muGibhite wa kulela go hlamalisa, wa ntlhanu wa mikono* a ku leha.+ Hambu lezvi a muGibhite a nga hi ni tlhari canjeni gakwe, go khwatsi i nhonga ya valuki,+ i noya kakwe ni nhonga a ya wutla a tlhari canjeni ga muGibhite a gumesa a mu daya hi tlhari ga yena n’winyi.+ 24 Lezvi zvi mahilwe hi Bhenaya, a n’wana wa Jehoyadha, niku i wa hi ni nduma yo fana ni masochwa lawa ya manharu ya tinhenha. 25 Hambu lezvi a nga hlawulekile nguvhu a ku hundza lava va 30, a nga chikelangi ka cikhundla ca lava va vanharu.+ Hambulezvo, Dhavhidha i no mu yimisa a kuva murangeli wa vagadhi vakwe.

26 A masochwa lawa ya tinhenha ya butho ga yimpi kuve Asaheli,+ a makabye wa Jowabe; na Elhanana, a n’wana wa Dhodho, wa le Bhetlehema;+ 27 na Xamote, a muHarore; na Helezi, a muPeloni; 28 na Ira,+ a n’wana wa Ikexa, a muTekowa; na Abhiyezeri,+ a muAnatote; 29 na Sibhekayi,+ a muHuxate; na Ilayi, a muAhohe; 30 na Maharayi,+ a muNetofate; na Heledhe,+ a n’wana wa Bhaana, a muNetofate; 31 na Itayi, a n’wana wa Ribhayi, a muGibheya wa va ka Bhenjamini;+ na Bhenaya, a muPiratoni; 32 na Hurayi wa le mikoveni ya Gaaxa;+ na Abhiyeli, a muArabha; 33 na Azmavhete, a muBhahurima; na Eliyabha, a muXaalbhoni; 34 ni vana va Haxema, a muGizoni; na Jonatani, a n’wana wa Xage, a muHarare; 35 na Ahiyamu, a n’wana wa Sakare, a muHarare; na Elifali, a n’wana wa Ure; 36 na Heferi, a muMekerate; na Ahija, a muPeloni; 37 na Hezro, a muKarmeli; na Naarayi, a n’wana wa Ezbhayi; 38 na Joyeli, a makabye wa Natani; na Mibhara, a n’wana wa Hagri; 39 na Zeleke, a muAmoni; na Naharayi, a muBherote, a muweleli wa matlhari ya Jowabe, a n’wana wa Zeruya; 40 na Ira, a muItri; na Garebhe, a muItri; 41 na Uriya,+ a muHiti; na Zabhadha, a n’wana wa Alayi; 42 na Adhina, a n’wana wa Xiza, a muRubheni, a hosana ya va ka Rubheni, loyi a nga hi zvin’we ni 30 wa vavanuna; 43 na Hanani, a n’wana wa Maaka; na Joxafate, a muMitini; 44 na Uziya, a muAxtarote; na Xama na Jeyeli, a vana va Hotamu, a muArowera; 45 na Jedhiyayeli, a n’wana wa Ximri, ni makabye wakwe Joha, a muTizi; 46 na Eliyeli, a muMahavi; na Jeribhayi na Joxavhayi, a vana va Elnaamu; na Itma, a muMowabhi; 47 na Eliyeli; na Obhedhi; na Jaasiyeli, a muMezobhayi.