Hi kutsala ka Marku

9 I no va byela kambe, aku: “Ndza tiyisa ka n’wina, ndziku: Ku na ni vokari va yimileko laha va to kala ku ringa kufa kala va wona a Mufumo wa Nungungulu na wuta hi ntamu.”+ 2 Andzhako ka 6 wa masiku, Jesu i no teka Pedro, na Jakobe na Johani a famba navo citsungeni co leha na va hi voce. I no hundzuka mahlweni kabye;+ 3 a tinguwo takwe ti no sangula ku phatima, ti basa ti ku pa a ku hundza ni tihi tinguwo ti basisilweko hi muhlazvi wa laha misaveni. 4 Ku no woneka kabye Elija na Mosi na va bhula na Jesu. 5 Pedro i no byela Jesu, aku: “Rabi, zva hi tsakisa a ku tshama laha. Hikwalaho, hi tsike hi gwimba matenda manharu: a gin’we ga wena, a gin’we ga Mosi ni gin’wani ga Elija.” 6 Kunene, i wa nga zvi tivi ni ku i ta kuyini hakuva va wa chava nguvhu. 7 Ku nota refu gi ta va fenengeta, ku zwala gezu+ hi lomu refini, giku: “Loyi i N’wana wa mina ndzi mu randzako.+ Mu ingiseni.”+ 8 Zvalezvo, va no cuwuka matlhelweni va wona ku a va ha hi na munhu mun’wani ahandle ka Jesu.

9 Laha va nga kari va relela hi citsungeni, i no va laya nguvhu lezvaku va nga byeli munhu lezvi va nga zvi wonile+ kala a N’wana wa munhu a vhuka hi ka vafileko.+ 10 Va no hlayisa timhaka leto mbilwini,* kanilezvi va wa wutisana ku a kuvhuka loko hi ka vafileko ku wula yini. 11 Makunu va no mu wutisa ku: “Hikuyini a vatsali va nge ku ta ranga hi Elija+ ata?”+ 12 Aku kabye: “Kunene, Elija i ranga hi yena ata, a ta vhuxeta zvilo zvontlhe;+ kanilezvi hikuyini ku tsalilweko lezvaku a N’wana wa munhu i fanele ku xaniseka+ nguvhu a tlhela a chepetiwa?+ 13 Kanilezvi ndza mu byela, ndziku: Elija+ i tile va ta maha ni cihi va nga ci lava laha kakwe, kota lezvi zvi tsalilweko xungetano hi yena.”+

14 A cikhati leci va nga kari va chikela laha ku nga hi ni vapizani lava van’wani, va no wona a citshungu ca hombe na ci va randzele, ni vatsali na va kanetisana navo.+ 15 Kanilezvi zvalezvi a citshungu contlhe ci nga mu wona, ci no hlamala ci tsutsuma ciya kakwe ci ya mu losa. 16 Hikwalaho, i no va wutisa aku: “Mu kanetisana hi yini ni vapizani?” 17 A mun’we cikari ka citshungu i no mu hlamula, aku: “Mugondzisi, ndzi ku tele ni mufana wa mina hakuva i na ni moya wa mbeveve.+ 18 Ni kwihi laha wu mu khomako, wo mu tlatlalata lahasi, a pupuma khuvi ni ku getsela matino a mbhela ntamu. Ndzi kombele a vapizani va wena lezvaku va wu hlongola, kanilezvi a va wu kotangi.” 19 I no va hlamula, aku: “N’wina cizukulwana ci nga kholwiko,+ ndzi ta simama na n’wina kala rini? Ndzi ta mu timisela kala rini? Tanani naye ka mina.”+ 20 Va nota ni mufana loye, kanilezvi laha a moya wu nga mu wona, wu no tekela ku mu chanukisa, awa lahasi, a puluwundza na a pupuma khuvi. 21 Makunu Jesu i no wutisa a papayi wa kona aku: “Zvi mu sangulile rini zvalezvi?” Aku: “Kusukela wun’wananeni gakwe. 22 Wu tala ku mu wisela laha ndzilweni ni lomu matini kasi wu mu daya. Kanilezvi loku wena u zvi kota ku maha cokari, hi zwele wusiwana u hi vhuna.” 23 Jesu aku kakwe: “A wulela lego gaku: ‘Loku u zvi kota!’ Zvontlhe zva koteka ka loyi a nga ni kukholwa.”+ 24 Zvalezvo a papayi wa n’wanana i no banguleka, aku: “Ndza kholwa! Ndzi vhune laha ndzi kiyelelwako hi kukholwa!”+

25 Makunu a cikhati leci Jesu a nga wona lezvaku a citshungu ci tsutsumela kakwe, i no kawuka a moya wa kubiha, aku: “Moya ndziwena wa mbeveve ni wofa tindleve, ndza ku laya: Huma ka yena, u nga ha ngheni kambe kakwe!”+ 26 Andzhako ka loku wu bile huwa wu tlhela wu mu chanukisa nguvhu, wu no huma, a n’wanana a sala na a ku khwatsi i nofa laha ka kuza a kutala ka vanhu vaku: “I file!” 27 Kanilezvi Jesu i no mu khoma hi woko a mu vhuxa, a se yima. 28 Andzhako ka ku nghena lomu ndlwini, a vapizani vakwe va no mu wutisa na va hi voce, vaku: “Hikuyini hina hi nga zvi tsandzeka ku wu hlongola?”+ 29 Aku kabye: “A moya wa lixaka leli wu huma ntsena hi mukhongelo.”

30 Va no suka hi laho va tsemakanya Galileya, kanilezvi i wa nga lavi lezvaku zvi tiviwa hi munhu. 31 Hakuva i wa gondzisa vapizani vakwe ni ku va byela lezvi: “A N’wana wa munhu i ta nyikelwa mandleni ya vanhu, va mu daya,+ kanilezvi, hambu lezvi a to dawa, i ta vhuka andzhako ka masiku manharu.”+ 32 Hambulezvo, a va yi zwisisangi a mhaka leyi, kanilezvi va wa chava ku mu wutisa.

33 Makunu va no chikela Kapernawume. Laha a nga hi lomu ndlwini, i no va wutisa, aku: “Mu wa kanetisana hi yini lomu ndleleni?”+ 34 Va no miyela, hakuva lomu ndleleni va wa kanetisana hi lezvaku hi mani wahombe cikari kabye. 35 I no tshama, a vitana lava va 12, aku kabye: “Loku a wokari a lava kuva wo sangula, i fanele kuva wo gumesa ka vontlhe ni citiri ca vontlhe.”+ 36 Makunu i no teka cin’wanana a ci yimisa cikari kabye, a ci angarela, aku kabye: 37 “Ni wihi loyi a amukelako a cin’we ca zvivanana+ lezvi hi kota ya vito ga mina i amukela na minawu; ni loyi a ndzi amukelako a nga amukeli mina ndzoce kanilezvi i amukela ni Loyi a ndzi rumileko.”+

38 Johani aku kakwe: “Mugondzisi, hi wonile munhu na a hlongola madhimoni hi vito ga wena hi se zama ku mu betela hakuva i wa nga hi landzeli.”+ 39 Kanilezvi Jesu aku: “Mu nga mu beteli, hakuva a ku na munhu a to maha zvihlamaliso hi vito ga mina a to tekela ku wulawula zvahava hi mina. 40 Hakuva loyi a nga hi vhukeliko, i yima na hina.+ 41 Ni wihi loyi a mu nyikako a kopo ya mati ya kunwa hi lezvi mu nga va Kristu,+ ndza tiyisa ka n’wina, ndziku: A nga ta lahlekelwa hi nchachazelo wakwe.+ 42 Kanilezvi loyi a khunguvanyisako a mun’we wa lava va vatsongwani va kholwako, zvi wa tava chukwana ku a bohelelwa ribye ga cigayo nhan’wini yakwe a hoxelwa bimbini.+

43 “Loku a canja ga wena go tshuka gi ku maha u wonha,* gi tseme. I chukwana a ku nghena wutomini na u hi cilima a ku hundza ku hoxiwa ni mandla mambiri Gehena* ga ndzilo wu nga timekiko.+ 44 *—— 45 Ni loku a nkondzo wa wena wu ku maha u wonha,* wu tseme. I chukwana a ku nghena wutomini na u khwita a ku hundza ku hoxiwa ni mikondzo yimbiri Gehena.*+ 46 *—— 47 Ni loku a tihlo ga wena gi ku maha u wonha,* gi hoxe kule.+ Hakuva i chukwana a ku nghena Mufun’weni wa Nungungulu ni tihlo gin’we a ku hundza ku hoxiwa Gehena*+ na u hi ni matihlo mambiri 48 laha a zviwungwani zvi nga fiko ni ndzilo wa kona wu nga timekiko.+

49 “Hakuva vontlhe va fanele ku lungiwa hi ndzilo.+ 50 A munyu wu nene, kanilezvi loku a munyu wo tshuka wu pswhama wu ta lungiwa hi yini ke?+ Tshamani ni munyu ndzeni ka n’wina,+ mu hlayisa kurula cikari ka n’wina.”+