Hi kutsala ka Luka

14 Ka khati gin’wani, i noya a yaga zvakuga hi sabhadho mutini wa mun’we wa varangeli va vaFarisi, niku va wa kari va mu cuwukisela khwatsi. 2 Makunu ku wa hi ni wanuna mahlweni kakwe a nga babya hi mababyi ya ku tala mati lomu mirini. 3 Hikwalaho, Jesu i no wutisa titlhari ta Nayo ni vaFarisi, aku: “Zva vhumelelwa hi nayo a ku hanyisa hi sabhadho kutani a zvi vhumelelwi?”+ 4 Va no miyela. Hikwalaho, i no khoma a wanuna loye a mu hanyisa a gumesa a mu tsika a famba. 5 Aku kabye: “Himani cikari ka n’wina wa ku loku a n’wana wakwe kutani homu yakwe yi wela lomu hloweni+ hi sabhadho a nga tekeliko ku yi humesa ke?”+ 6 A va zvi kotangi ku mu hlamula.

7 Hi kulandzela, i no hlawutela mufananiso ka lava va nga rambilwe laha a nga wona lezvaku vo hlawula a zvitshamu zvo hlawuleka nguvhu.+ I te ngalo kabye: 8 “Loku a wokari a ku ramba mubuzweni wa muchadho, u ngayi u ya tshama ka wutshamu go hlawuleka nguvhu.+ Kuzvilava a mun’wani munhu wo chaviseka ku hundza wena i rambilwewo. 9 Makunu loyi a rambileko n’wina va vambiri i tata ka wena, a taku: ‘Suka laha, ku tshama inaloyi.’ Kwalaho u ta suka na u dhana uya ka wutshamu ga lendzhako. 10 Kanilezvi loku u rambiwa, famba u ya tshama lendzhako kasi loku loyi a nga ku ramba ata, aku ka wena: ‘Munghana, famba hi le phambeni.’ Makunu u tava ni wudzundzo mahlweni ka vapfhumba vontlhe.+ 11 Hakuva ni wihi loyi a ti tlakusako i ta koramiswa, ni loyi a ti koramisako i ta tlakuswa.”+

12 Hi kulandzela, i no byela loyi a nga mu ramba, aku: “Loku u ramba vanhu lezvaku va ta fihlula kutani ku lalela, u nga vitani vanghana va wena, kutani vamakabye va wena, kutani maxaka ya wena, ne vaakelani va wena lava vo ganya. Hakuva va nga tshuka va ku rambawu, zviva ku ku tlhelisela. 13 Kanilezvi loku u maha mubuzo, ramba zvisiwana, ni zvikhurubu, ni zvilima, ni zvikhumu;+ 14 u ta tsaka hakuva lavo a va na ca ku ku tlhelisela hi cona. Hakuva u ta tlheliselwa kuvhukeni+ ka valulamileko.”

15 Laha a mun’we wa lava va nga rambilwe a ngazwa lezvo, i te: “Wa tsaka loyi a gako* Mufun’weni wa Nungungulu.”

16 Jesu aku ngalo kakwe: “A wanuna wo kari i no maha mubuzo wa hombe,+ a ramba vanhu vo tala. 17 I no ruma nandza gakwe hi cikhati ca mubuzo lezvaku gi ya byela lava va rambilweko, giku: ‘Tanani, hakuva zvontlhe zvi mbhelele.’ 18 Kanilezvi, vontlhe va no sangula ku ti lavela zvigelo zva ku ti yimelela.+ Loyi wo ranga i no byela nandza lego, aku: ‘Ndzi xavile petso, makunu ndzi lava ku ya wu wona; ndzi tsetselele sawena, ndzi nga ta zvi kota.’ 19 A mun’wani aku: ‘Ndzi xavile a ntlhanu wa zvipani zva tihomu, ndzi lava ku ya ti ringisa; ndzi tsetselele sawena, ndzi nga ta zvi kota.’+ 20 Ni mun’wani kambe i te ngalo: ‘Ndza hi ku chadha, hi cigelo leco ndzi nga ta zvi kota kuta.’ 21 Hikwalaho, a nandza gi no wuya gi ta byela hosi ya gona a timhaka leti. A n’winyi wa muti i no zangara a byela nandza gakwe, aku: ‘Hatlisa u famba maruweni ya hombe ni ka zvindlelana zva lomu dhoropeni u ya vitana zvisiwana, ni zvikhurubu, ni zvikhumu, ni zvilima u wuya nazvo.’ 22 A cikhati leci a nandza gi nga wuya, gi te: ‘Hosi, lezvi u nga laya zvi mahilwe, kanilezvi ka ha hi ni wutshamu.’ 23 A hosi yi no byela nandza, yiku: ‘Famba maruweni ni lomu tindleleni, u ya kurumeta vanhu kuta kasi a muti wa mina wu tala.+ 24 Hakuva ndza ku byela, ndziku: I hava ni mun’we wa lava va rambilweko a to ringa a zvakuga zva mina.’”+

25 Makunu ku wa hi ni zvitshungu zva hombe zvi nga famba zvin’we naye; i no hundzuluka, aku ka zvona: 26 “Loku a munhu ata ka mina na a nga vengi* a papayi wakwe, ni mamani wakwe, ni sati wakwe, ni vana vakwe, ni vamakabye vakwe, hambu ni wutomi* gakwe,+ a nge mahi mupizani wa mina.+ 27 Ni wihi loyi a nga rwaliko a mhandze yakwe ya hlomulo* a ndzi landzela, a nge mahi mupizani wa mina.+ 28 Himani cikari ka n’wina wa ku loku a lava ku aka likhokhola* a nga rangiko hi ku tshama hasi a hlayela ntsengo, kasi ku wona lezvaku i nazvo zvontlhe zvi lavekako kasi ku yi mbheta ke? 29 Loku a nga mahi lezvo, a nga tshuka a zima ciseketelo* kanilezvi a nga zvi koti ku yi mbheta. Makunu vontlhe a vahundzi va ndlela va ta mu hleka, 30 vaku: ‘A munhu loyi i sangulile ku aka kanilezvi a nga zvi kotangi ku mbheta.’ 31 Kona hi yihi hosi leyi yi fambako yi yalwa ni yin’wani hosi na yi nga rangangi hi ku tshama hasi yi lava wusungukati, kasi ku tiva lezvaku yi nga zvi kota hi 10 000 wa masochwa a kulwa ni leyi yi tako ka yona ni 20 000 wa masochwa ke? 32 Loku yi wona lezvaku yi nga ta zvi kota, yi ta rumela vaembaxadhori* kasi ku ya kombela kurula ni hosi leyi yin’wani na ya ha hi kule. 33 Makunu n’winawu zvi tiveni lezvaku ni wihi cikari ka n’wina a nga tsikiko zvilo zvakwe zvontlhe, a nge mahi mupizani wa mina.”+

34 “A munyu wu nene. Kanilezvi loku a munyu wu pswhama wu ta lungiwa hi yini ke?+ 35 A wa ha vhuni nchumu, ne ka misava ne ku maha citromu, wo hoxiwa. Loyi a nga ni tindleve ta kuzwa, i wazwe.”+