Hi kutsala ka Luka

12 Ka cikhati caleco, laha a citshungu ca makume ya mazana yo tala ci nga hlengeletene laha ka kuza ci kandzihelana, i no sangula ku wulawula ni vapizani vakwe, aku: “Ti woneleni ka comelo ga vaFarisi — ku nga kukhohlisa.+ 2 Hakuva a ku na nchumu wu tumbetilweko wu to kala ku wonekeliswa, ne hambu cihundla ci to kala ku tiviwa.+ 3 Hikwalaho, ni cihi leci mu wulako munyameni ci ta zwiwa kuwonekeleni, ni lezvi mu hlevako na mu hi lomu tikwartwini zvi ta chumayelwa hi le hehla ka tiyindlu. 4 A ku tsika lezvo, ndza mu byela n’wina mu nga vanghana va mina,+ ndziku: Mu nga chavi lava va dayako miri na va nga hi na ntamu wa ku maha zvin’wani andzhako ka lezvo.+ 5 Kanilezvi ndzi ta mu komba loyi mu faneleko ku mu chava: Chavani Loyi a nga ni ntamu wa ku hoxa Gehena* andzhako ka loku a dele.+ Ina, ndza mu byela, ndziku: Chavani Loye.+ 6 A ntlhanu wa zvinjingiri a zvi xavisiwi hi zvingerengere zvimbiri zva ntsengo wa wutsongwani* ke? Hambulezvo, ci hava ni cin’we ci rivakelwako* hi Nungungulu.+ 7 Kanilezvi hambu ni misisi ya hloko ya n’wina yi hlayilwe yontlhe.+ Mu nga chavi; n’wina mu va lisima nguvhu a ku hundza zvinjingiri zvo tala.+

8 “Ndza wula ka n’wina, ndziku: Ni wihi loyi a ndzi vhumelako mahlweni ka vanhu,+ a N’wana wa munhu yenawu i ta mu vhumela mahlweni ka tingilozi ta Nungungulu.+ 9 Kanilezvi loyi a ndzi alako mahlweni ka vanhu, yenawu i ta aliwa mahlweni ka tingilozi ta Nungungulu.+ 10 Ni wihi a wulawulako kubiha hi N’wana wa munhu i ta tsetselelwa; kanilezvi loyi a rukatelako a moya wo basa a nga ta tsetselelwa.+ 11 Loku va mu yisa mahlweni ka hlengeletano wa vanhu,* ni ka tihosi, ni ka vafumeli, mu nga karateki mu ku hi ta wulawulisa kuyini kutani hi ta wula yini kasi ku ti yimela,+ 12 hakuva a moya wo basa wu ta mu gondzisa ka cikhati caleco lezvi mu faneleko ku wula.”+

13 Hi kulandzela, a wokari cikari ka citshungu i te ngalo kakwe: “Mugondzisi, byela a makabye wa mina lezvaku a avana tshomba na mina.” 14 Jesu aku kakwe: “Hesa, himani a nga ndzi yimisa kuva mulamuli kutani muaveli wa tshomba cikari ka n’wina va vambiri?” 15 Aku kabye: “Vhulani mahlo, mu ti wonela ka tixaka tontlhe ta makangwa,*+ hakuva hambu loku munhu a hi ni zvilo zvo tala, a wutomi gakwe a giti hi ka lezvi a nga nazvo.”+ 16 Hi kota ya lezvo, i no va hlawutela mufananiso, aku: “A simu ga wanuna wo kari wo ganya gi no pfuna nguvhu. 17 Hikwalaho, i no sangula ku ti byela lezvi: ‘Ndzi ta kuyini lezvi ndzi nga hava wutshamu ga ku hlengeletela kona a timbewu ta mina?’ 18 Aku: ‘Ndzi ta maha lezvi:+ Ndzi ta hohlola a matshala ya mina ndzi aka ya hombe kasi ndzi chela lomo a timbewu ta mina tontlhe ni zvilo zva mina zvontlhe. 19 Ndzi ta byela muhefemulo* wa mina, ndziku: “U* hlengeletele zvilo zvo tala zva zvinene zvi ringanako malembe yo tala; humula, uga, unwa, u ti buza.”’ 20 Kanilezvi Nungungulu aku kakwe: ‘Cipumbu ndziwena, ka wusiku galegi, va ta londza a wutomi* ga wena. Makunu, himani a to sala ni zvilo lezvi u hlengeleteleko?’+ 21 Ku maheka zvalezvo ka munhu loyi a ti hlengeletelelako titshomba kanilezvi na a nga ganyangi mahlweni ka Nungungulu.”+

22 Hi kulandzela, i no byela vapizani vakwe, aku: “Hi caleco ci ndzi mahako ndzi mu byela, ndziku tsikani ku karateka hi wutomi* ga n’wina, muku hi taga yini kutani hi mimiri ya n’wina muku hi ta boha yini.+ 23 Hakuva a wutomi* ga lisima nguvhu a ku hundza zvakuga, ni miri wa hundza nguvhu a tinguwo. 24 Cuwukani zvikunguwa: a zvi byali ne a zvi tshoveli; a zvi na matshala ne zvihlangala, hambulezvo Nungungulu wa zvi wundla.+ N’wina a mu va lisima nguvhu a ku hundza zvinyanyani ke?+ 25 Himani cikari ka n’wina, loyi hi ku karateka, a zvi kotako ku engetela a nkono* ka kuleha ka wutomi gakwe ke? 26 Hikwalaho, loku mu nga zvi koti a ku maha nchumu lowu wa wutsongwani, hikuyini mu karatekako hi lezvi zvin’wani?+ 27 Cuwukani lezvi a makhon’wa ma kulisako zvona: a ma tiri, ne a ma swuli; kanilezvi ndza mu byela, ndziku: Hambu Solomoni kungangameleni kakwe kontlhe a nga zangi a bohisa ku khwatsi gin’we ga wona.+ 28 Makunu loku Nungungulu a gi bohisisa lezvo a byanyi ga khwati, legi gi nga kona nyamutlha kuveni a mandziko gi ta hoxiwa ndzilweni, a nga ta mu bohisa a ku hundza lezvo, n’wina va kukholwa kutsongwani ke? 29 Hikwalaho, tsikani ku lavetela lezvi mu toga kutani mu tonwa. Tsikani ku karateka ku hundza mpimo;+ 30 hakuva a zvilo lezvi zvontlhe hi lezvi a vanhu va tiko va ti karatelako ku zvi kuma, kanilezvi a Papayi wa n’wina wa zvi tiva lezvaku ma zvi lava a zvilo lezvi.+ 31 Simamani ku lava a Mufumo wakwe, zvontlhe a zvilo lezvi zvi ta engetelwa ka n’wina.+

32 “Mu nga chavi n’wina ntlhambi wu tsongwani,+ hakuva kurandza ka Papayi wa n’wina a ku mu nyika Mufumo.+ 33 Xavisani lezvi mu nga nazvo, mu nyika zvisiwana.+ Ti maheleni zvipachi zvi nga hlakaliko, yi nga tshomba le tilweni leyi yi nga mbheliko,+ laha a khamba gi nga tshineliko kusuhani ni laha a muhlwa wu nga giko. 34 Hakuva laha a tshomba ya n’wina yi nga kona, ni mbilu ya n’wina yi tava kwalaho.

35 “Bohani tibhandi ti tiya zviwunwini zva n’wina,*+ ni tikandiya ta n’wina ti vhura,+ 36 mu fana ni vanhu va rindzelako a hosi yabye lezvaku yi wuya+ hi muchadhweni,+ kasi loku yi chikela yi gongondza va tekela ku yi vhululela. 37 Ma tsaka a malandza lawa a hosi ya wona yi to wuya yi ta ma kuma na ma ha rindzela! Ndza tiyisa ka n’wina, ndziku: Yi ta boha libhandi li tiya ciwunwini yi ma tshamisa mezeni yi ma tirela. 38 Ni loku yi chikela cikari ka wusiku* hambu kubeni ka nkuku* yi ta ma kuma na ma longile, ma tsaka a malandza lawo! 39 Kanilezvi tivani lezvi: Loku a n’winyi wa muti i wa no ci tiva a cikhati leci a khamba gi nga wa tata hi cona, na a nga tsikangi a yindlu yakwe yi pandziwa.+ 40 N’winawu tshamani na mu longile hakuva a N’wana wa munhu wata hi cikhati mu nga ci alakanyiko.”+

41 Makunu Pedro i no wutisa, aku: “Hosi, a mufananiso lowu u byela hina hoce kutani u byela vontlhe ke?” 42 A Hosi yiku: “Himani loyi hakunene a nga nandza go tsumbeka,* legi go tlhariha, legi a n’winyi wa gona a to gi yimisa hehla ka malandza* yakwe, kasi gi simama ku ma phamela zvakuga hi cikhati ca kona ke?+ 43 Ga tsaka a nandza lego loku a n’winyi wa gona a wuya a ta gi kuma na gi maha lezvo! 44 Ndza tiyisa ka n’wina, ndziku: I ta gi nyika ntiro wa ku wonelela zvontlhe a nga nazvo. 45 Kanilezvi loku a nandza lego go tshuka gi ti byela lezvi mbilwini ya gona: ‘A n’winyi wa mina wa hlwela ku wuya’, gi sangula kuba malandza ya cinuna ni ya cisati, giga ni kunwa gi popiwa,+ 46 a n’winyi wa nandza lego i ta wuya hi siku legi gi nga mu rindzelangiko ni cikhati leci gi nga ci tiviko, a ta gi tsayisa zva xapi, a gi nyika ciavelo ca gona zvin’we ni vanhu vo kala ku tsumbeka. 47 A nandza legi gi ku tivileko a kurandza ka n’winyi wa gona kanilezvi gi nga ti longiseli kutani ku maha lezvi a nga gi byela,* gi ta biwa timhika to tala.+ 48 Kanilezvi, legi gi nga kala ku ku tiva hambulezvo gi maha zvilo zvi ringanako ku gi biwa, gi ta biwa timhika ti tsongwani. Kunene, ni wihi loyi a nyikilweko zvotala, ku ta londziwa zvotala kakwe; ni loyi a yimisilweko hehla ka zvotala, i ta londziwa zvotala nguvhu.+

49 “Ndzi tele ku ta lumeka ndzilo misaveni, ndza ha lava yini kambe loku makunu wu vhura? 50 Ina, ku na ni kubhabhatisa loku ndzi faneleko ku bhabhatiswa hi kona, niku ndza karateka nguvhu kala ku tatiseka!+ 51 Mu alakanya ku ndzi tele ku ta neha kurula laha misaveni? Ndza mu byela, ndziku: Ahihi, ndzi tele ku ta neha kuhambana.+ 52 Hakuva kusukela lezvi ku tava ni kuhambana laha ngangweni. Loku ku hi ni ntlhanu wa vanhu ka wona, a vanharu va ta vhukela vambiri, ni vambiri va vhukela vanharu. 53 Va ta hambana: a papayi i ta vhukela mufana, a mufana a vhukela papayi; a mamani i ta vhukela nhanyana, a nhanyana a vhukela mamani; a n’wingi i ta vhukela katamwane, ni katamwane a vhukela n’wingi.”+

54 I no tlhela a byela zvitshungu, aku: “Loku mu wona a refu na gi huma hi mupela-gambo mu tekela ku: ‘Kuta cingulo’, zvi maheka. 55 Loku mu wona a moya na wuba wuta hi dzongeni,* mu ngalo: ‘Ku ta hisa’, zvi maheka. 56 Vakanganyisi ndzin’wina, ma zvi tiva ku tlhamusela a matshamela ya misava ni tilo, kanilezvi hikuyini mu nga zvi tiviko ku tlhamusela a cikhati leci hi nga ka cona ke?+ 57 Hikuyini mu nga zvi tiviko ha n’wece lezvi zvi lulamileko? 58 Loku loyi a ku kecarako a famba na wena wuhosini, zama ku lulamisa timhaka naye na ma ha hi ndleleni, kasi a nga ku yisi ka mulamuli, a mulamuli a ku nyikela ka mugadhi wa paxo, ni mugadhi wa paxo a ku vhalela paxweni.+ 59 Ndza ku byela, ndziku: Cima u nga ta huma kala u riha a cingerengerana ca wena co gumesa.”*