A wulawula hi ku tlhatlha wukati, a tlhela a komba ku wa va randza vanana

Jesu ni vapizani vakwe va no suka Galileya va tsemakanya Congo wa Jordhani, va kongoma Pereya le Dzongeni wa Mutsuwuka-gambo. Ka khati go gumesa legi Jesu a nga hi le Pereya, i wa wulawulile ni vaFarisi xungetano hi mhaka ya ku tlhatlha wukati. (Luka 16:18) Makunu a cikhati a nga tlhela, va no yi tlhotlha kambe kasi va mu ringa.

Mosi i wa tsalile lezvaku a wanuna a nga tlhatlha wukati ni sati wakwe loku a wona nchumu wo kari wo “nyenyeza” ka yena. (Dhewuteronome 24:1) Makunu, a vanhu va wa banana tihloko hi mhaka leyi. A vokari va wa kholwa lezvaku a vanhu va nga tlhatlha wukati hambu loku a zvigelo zva kona zvi nga vhuni nchumu. Hikwalaho, a vaFarisi va no wutisa Jesu vaku: “A wanuna a nga tlhatlha wukati ni sati wakwe hi ni yihi mhaka ke?” — Matewu 19:3, NM.

Wutshan’wini go ti seketela ka mawonela ya vanhu, Jesu i no komba lezvi zvi nga kungo ga Nungungulu hi wukati. I te: ‘Xana a mu gondzangi, lezvaku loyi a nga va maha kusanguleni i no va maha a wanuna ni wasati? Aku ngalo: Hikwalaho a wanuna i ta siya a . . . [papayi] wakwe ni . . . [mamani] wakwe, a namarela ka sati wakwe; lava vambiri va ta maha nyama yin’we. Lezvo a va ha hi vambiri, va hi nyama yin’we. Hikwalaho leci Nungungulu a ci tlhanganyisileko, ci nga hambanyisiwi hi munhu.’ (Matewu 19:4-6) A cikhati leci Nungungulu a nga tlhanganisa Adhamu na Evha a nga va byelangi ku loku ku maheka le’co kari, tlhatlhani wukati.

A vaFarisi a va vhumelangi lezvi Jesu a nga wula. Va te: “Loku zvi hi lezvo, hi yini Mosi a nga laya ku nyika a papilo ga kuhambana ni ku mu hlongola ke?” (Matewu 19:7) Jesu i no va hlamula aku: ‘Mosi i mu vhumelele ku mu hlongola vasati va n’wina hi kota ya kunonoha ka timbilu ta n’wina; kanilezvi a kusanguleni zvi wa nga hi lezvo.’ (Matewu 19:8) Loku Jesu a ku “a kusanguleni”, i wa nga wuli masikwini ya Mosi. I wa wula cikhati leci Nungungulu a nga vanga wukati le sin’wini ga Edheni.

Jesu i no guma a tlhamusela mhaka ya lisima, aku: “Kani hi wihi a ta nga hlongola a sati wakwe ahandle ka kubhaya, [ku nga por·neiʹa hi ciGreki] a teka mun’wani, wa bhaya”. (Matewu 19:9) Hikwalaho, a Mitsalo yi vhumela ku a vanhu va tlhatlha wukati loku ku mahekile wubhayi basi.

Laha a vapizani va ngazwa lezvi Jesu a nga wula va te: “Loku zvi hi lezvo a mhaka ya wanuna ni sati wakwe, a hi zvinene ku teka.” (Matewu 19:10) Zvi te dlunya lezvaku loyi a alakanyelako ku chadha, i fanele ku zvi tiva ku a nga faneli ku tlhatlha wukati!

Xungetano hi wugwendza, Jesu i te a vokari va tshama va hi magwendza hi ku na va no pswaliswa zvezvo, hi ku kala zvi nga koteki ku va hlengela masango. A van’wani vo ya hi ku mahiwa mithenwa, va nga zvi koti ku hlengela masango. Kanilezvi i tlhelile a komba lezvaku ku na ni lava va ti khomako ka manyawunyawu yabye ya masango, va tshama va hi magwendza. Va maha lezvo hi ku fela ku rangisa Mufumo wa Nungungulu. Jesu i no guma a kuca lava a nga hi navo aku: “Loyi a zvi kotako ku maha lezvo [a ku tshama a hi gwendza] i wa mahe.” — Matewu 19:12, NM.

A vanhu va no sangula kuta ni vanana vabye ka Jesu. Kanilezvi a vapizani vakwe va no va betela, hakuva va wa nga lavi ku a vanana va colopetela Jesu. Laha Jesu a nga zvi wona, i no swireka, aku: Tsikani ‘vanana vata ka mina, mu nga va beteli; hakuva a Mufumo wa Nungungulu wa va kunghahi. Hizvinene ndziku ka n’wina: Loyi a nga amukeliko a Mufumo wa Nungungulu kota n’wanana, cima a nga ta nghena ka wona.’ — Marku 10:14, 15; Luka 18:15.

Hi nga wona zvilo zva lisima lezvi hi gondzako! Kasi hi nghena Mufun’weni wa Nungungulu hi fanele ku ti koramisa hi fana ni vanana hi vhumela ku gondzisiwa. Jesu i no guma a komba lezvaku i wa va randza vanana hi ku va teka a tlhela a va katekisa. Niku vontlhe lava va ‘amukelako Mufumo wa Nungungulu’ a ku fana ni vanana, i va randzisa zvezvo. — Luka 18:17.