U nga maha zo engeteleka kasi u tlharihisa vanwani ke?

A filimu go tsakisa nguvu gi nga hiko na magezu gi nga ni hloko ya mhaka A Trip Down Market Street gi koka mahlo ya vahlaleli hi ku kombisa lezi a vanhu va nga hanyisa zona le San Francisco, Estados Unidos, kusanguleni ka zana ga malembe ga wu 20. A vamahi va gona va wa fasele a muchini wa ku filimara wa ku gwedla hi mandla laha mahlweni ka mova wo famba ka lingoti, na va vuxetile ntiro lowu hi kutsutsuma nguvu laha ruweni kala va pasa na masiku ma nga se chikela. A zilo zi nga kombiswa ka filimu legi ku wa hi mahaxi na ma koka tikareta ni mimova ya yiswa ya xikhatini lexo, zinwe ni vaxavisi va maphepha-hungu na va khomekile mitirweni ya siku ni siku.

Lexi xi mahako lezaku a filimu legi gi vangisa wusiwana hi lezaku ko khwatsi gi filimarilwe hi Abril wa 1906, xikhatanyana mahlweni ka kutsekatseka ka hombe ka misava ni nzilo zi nga humelela hi 18 ka Abril. A makhombo lawa ya mambiri ma lo hihirita makume ya mazana ya vanhu ma tlhela ma hahlula a xipanze xo kari xa doropa. Kuzilava, a vanhu vo kari va kombiswako ka filimu legi na va tsakile nguvu va lo hanya masiku matsongwani ntsena anzhako ka ku filimariwa. Scott Miles, a zukulu wa munwe wa vamahi va filimu legi i ngalo: “Loku nzi wona a vanhu va nga ka gona, nzi tlhela nziku, ne va wa nga zi tivi lezi zi nga lava ku va humelela zalezo, a nzo ku va zwela.”

A mhaka leyi yi hi komba nchumu wo kari wo fana ni kutsekatseka loko ka misava, lowu wu to humelela masikwini ya hina. Hinawu a ho ku va zwela a vaakelani va hina. Siku ni siku gi cako, va ti mahela mitiro yabye na va nga zi tivi ne ni kutsongwani lezaku ku na ni khombo ga hombe gi tako, gi nga kwalaha nyongeni  —  ku nga kuloviswa ka tiko legi ga kubiha ni mahanyela ya gona. Hambulezo, a ku hambana ni kutsekatseka ka misava loku ku nga woniwiko na ka ha hi mahlweni, ka ha sele xikhatana xi tsongwani xa ku tlharihisa a vaakelani va hina xungetano hi siku ga Jehova ga kulamula. A zi kanakanisi lezaku wa ti siyela xikhati xa ku xumayela hi muti ni muti viki ni viki. Hambulezo, xana a wu nge mahi zo hunza lezo kasi u tlharihisa vanwani ke?

A xikombiso xa Jesu xa koka kupima hakuva a nga zangi a ti nyika maferiya ntirweni wa kuxumayela. I wa xumayela ni wihi a nga mu kuma, kani muhlengisi a nga mu kuma ruweni, kutani wasati loyi a nga ta mu kuma laha hlobyeni na a ti humulela ni mumu. (Luka 19:1-5; Joh. 4:5-10, 21-24) Hambu ka xikhati lexi a nga lava ku kokanyana moya, i lo zi wona na zi hi chukwana a ku ti tsona kuhumula kasi a gonzisa vanhu na a nga kurumetwi. Hi kota ya ku va zwela wusiwana a vaakelani vakwe, i lo va nyika wukustumunyu go tala. (Mar. 6:30-34) Hi nga mu pimanyisisa kuyini Jesu mhakeni ya ku tiva a lisima la xikhati lexi hi hanyako ka xona nyamutlha ke?

Melika i hanya ka prediyu go vikelwa nguvu. A kutala ka vaakelani vakwe zigonzani zi tako hi matiko-wundle zi tirisako tiselulari ti nga tsaliswangiko tinombora niku a mavito yabye kambe a ma xaxametiwangi ka bhuku legi gi tshamako laha nyangweni. I lonzowota ku nyika wukustumunyu ka vahanyi lavo a xikhati lexi va kumanako laha nyangweni ni lomu ka elevadori. I ngalo: “Hi ndlela yo kari, nzi wona wutshamu legi kota xipanze xa mina xo xumayela ka xona.” Melika i tolovela ku famba ni mabhuku hi tirimi to tala, niku a vanyingi va amukela ziphephana ni marevista. I va byela kambe lezaku va nghena ka Web saite ya hina, jw.org. I sangulile zigonzo zo hlaya za Biblia.

Sonia yenawu i tshama na a longile ku nyika wukustumunyu ni ka wihi a mu kumako. I tira ka xipitali xa dokodela wo kari niku i ti vekele mixuvo ya ku nyika wukustumunyu go mbhelela ka vatiri-kulobye vontlhe. A xo sangula, i lo ti nyika xikhati xa ku tiva zilaveko za munwe ni munwani ni lezi zi mu tsakisako. Hi kulanzela, i lo tirisa xikhati xakwe xa ku fihlula lezaku a bhula ni munwe ni munwani wabye hi zilo za moya. Kota mbhanzu wa lezo, Sonia i zi kotile ku sangula zigonzo zimbiri za Biblia. Ahandle ka lezo, i na ni makungo ya lezaku ka xikhati lexi xa kuhumula, aya laha nyangweni ya xipitali a ya bhula ni lava va ha rinzelako ku vitaniwa.

A wokari a ponileko kutsekatsekeni ka misava ka 1906, i te ngalo a kutsekatseka loko “ku’ve gona khombo ga hombe ka wontlhe ma weleko a doropa legiya.” Hambulezo, lokuloku ku ta chikela khombo ga hombe nguvu go hunza wontlhe ma tshukileko ma humelela laha misaveni. I siku ga kutiphotela gi to wela vontlhe “lava va nga mu tiviko Nungungulu.” (2 Tes. 1:8) Jehova i xuva nguvu lezaku a vanhu va cica maalakanyo ni timbilu tabye zonake va vumela mahungu ya xitlharihiso lawa ma nyikelwako hi Timboni takwe. — 2 Ped. 3:9; Kuv. 14:6, 7.

U na ni lungelo ga ku vulula mahlo ya vanhu kasi va wona lezaku hi hanya masikwini yo gumesa u tlhela u va vuna kasi va tsika ku khatalela zabye wutsumbu zonake va hlota Jehova. (Zef. 2:2, 3) Xana wa lonzowota xikhati xontlhe lezaku u xumayela vatiri-kuloni, vaakelani va wena, ni vontlhe lava u kumanako navo mitirweni ya wena ya siku ni siku? U ta maha zo engeteleka kasi ku tlharihisa vanwani ke?