‘Ku laveka mu timisela’

ANZHAKO ka loku Anitaa a bapatizilwe kota Mboni ya Jehova, a nuna wakwe i lo kombisa tihanyi ta hombe. Anita i ngalo: “I lo nzi valela kuya mitlhanganweni, a nzi beletela ni ku kumbuka a vito ga Nungungulu. A ku wula ku Jehova basi zi wa maha nuna wa mina a zangara nguvu.”

A ku gonzisa vana vakwe xungetano hi Jehova xi wa hi xikarato xinwani xa hombe ka Anita. “A wukhozeli ga Jehova gi wa beletelwa laha kaya ka mina wutsumbu. Nzi wa nga gonzi ni vana va mina laha kubaseni, ge hambu ku famba navo mitlhanganweni.”

Kota lezi a tshango ga Anita gi kombako, a ku vukelwa hi ziro za ngango ku ngava xiringo xa hombe xa kutsumbeka ka muKristu. A xiringo xinwani xa hombe zikarato za lihanyo, ku felwa hi n’wana, ku felwa hi nuna kutani sati, kutani kuva a xiro xa ngango xi fularela Jehova. Makunu, xini xi nga vunako muKristu lezaku a simama a tsumbekile ka Jehova ke?

U nga maha yini loku wo kumana ni zikarato lezo? Mupostoli Paule i te ngalo: “Za laveka lezaku mu hi ni kutimisela.” (Maheb. 10:36) Kanilezi xini xi nga ku vunako ku timisela?

A yinwe ya tindlela to sangula leti hi kumako hi tona a ntamu wa ku timisela minzhingo ku kombela xivuno ka Nungungulu hi mukhongelo. Wona xikombiso xinwe. A ngango wa Ana wu lo welwa hi makhombo hi Muvulo wo kari ni gambo. A nuna wakwe, loyi va nga hi ni 30 wa malembe na va chadile, i lofa hi xitshuketi. Ana i ngalo: “A nga ha wuyangi kambe hi ntirweni, kuveni i wova ni 52 wa malembe basi.”

Ana i zi kotisile kuyini ku timisela? I wa fanele kuya ntirweni, lezi zi mu vunileko hakuva a ntiro wakwe wu wa lava kupima kakwe kontlhe, kanilezi a wu susangi kubayisa loku a nga hi nako. I ngalo: “Nzi lo chulula mbilu ya mina ka Jehova, nzi mu khongotela lezaku a nzi vuna ku timisela a kufelwa ka mina ko bayisa.” Xana Jehova i hlamulile a mikhongelo yakwe? Ana i kholwa lezaku yi hlamulilwe. I ngalo: “A kurula loku ku tako hi ka Nungungulu yece ku lo nzi tangalisa ku tlhela ku nzi vuna ku hlayisa mapimo ya mina. A nzi kanakani lezaku Jehova i ta wuyisa nuna wa mina kuvukeni ka vafileko.” — Fil. 4:6, 7.

A ‘Muzwi wa mikhongelo’ i tsumbisa ku nyika malanza yakwe ni xihi xi lavekako kasi ma simama ku tsumbeka ka yena. (Tis. 65:2) Xana a wu kholwi lezaku a xitsumbiso lexi xa tiyisa kukholwa? Xana a zi ku vuni ku wona a ku hikuyini u nga zi kotako ku timisela na wenawu ke?

Jehova wa seketela vanhu vakwe hi ku tirisa bandla ga wuKristu. Hi xikombiso, a xikhati lexi a bandla ga le Tesalonika gi nga kari gi lwisana ni tixanisa to tshisa, Paule i lo khongotela maKristu lawo lezaku ma ‘tiyisetana, ma akana, kota lezi ma nga kari ma zi maha.’ (1 Tes. 2:14; 5:11) Hi ku bohana hi liranzo ni ku vunana, a maKristu ya le Tesalonika ma lo zi kota ku huluka ka xiringo lexo ka kukholwa kabye. A matimu yabye ya kutimisela xikombiso xi nene ka hina nyamutlha niku ma komba nchumu wu nga hi vunako ku timisela.

A ku wumba wunghana go tiya ni ziro za bandla zi nga hi vuna ku bhulelana a “zilo lezi hi ta nga akana ha zona.” (Rom. 14:19) Lezi za lisima nguvunguvu zikhatini za zikarato. Paule wutsumbu i kumene ni zikarato zo tala, niku Jehova i lo mu nyika ntamu wa ku zi timisela. Ka zikhati zo kari, Nungungulu i tirisile makholwa-kulobye kasi ku tiyisa Paule. Hi xikombiso, a xikhati lexi Paule a nga rungulela a ziro za bandla ga le Kolosi, i te ngalo ha vona: “Madota ma nzi tangalisileko.” (Kol. 4:10, 11) Kunene, a liranzo labye hi Paule li va kucile ku mu chavelela ni ku mu tiyisa a xikhati a nga lava xivuno. Za koteka ku ngha wenawo u tshukile u tiyisiwa ni ku seketelwa hi ziro za bandla ga wena a ku fana na Paule.

Nungungulu i hi nyika xivuno xinwani kambe hi ku tirisa madota lomu bandla ga wuKristu. A vavanuna lavo vo buva hi tlhelo ga moya va nga ha ‘kota wuchavelo loku moya wu bhubhutsa, va kotisa wuponelo ka xingulo; va kotisa a congo wa mati wutshanwini gi womileko; ni nzhuti wa ribye ga hombe tikweni gi nga ni tora.’ (Isa. 32:2) A zo ku tiyisa-hlana! Xana wa lonzowota a lulamiselo legi ga liranzo? A magezu yo tiyisa hlana ni xivuno xa madota zi nga ku vuna ku timisela.

Kanilezi, a madota a hi vamahi va zihlamaliso. Mbanhu va nga mbhelelangiko, lava va nga ni “tshamela ginwe na [hina].” Hambulezo, a mikhongelo leyi va hi mahelako yi nga nyika xivuno xa hombe. (Jak. 5:14, 15) A makabye wo kari wa xinuna le Italia, loyi a nga ni malembe na a timisela mababyi ma yako ma mu mbheta ntamu lomu ka mawoko ni milenge (distrofia muscular), i te ngalo: “A liranzo leli a vamakabye lava va nzi kombisako ni lezi va nzi enzelako hi kukhanzakanya za nzi vuna ku timisela.” Xana u nga lonzowota khwatsi a lulamiselo legi ga liranzo ga Jehova — ku nga madota ke?

Ku na ni zilo zinwani lezi hi nga mahako kasi hi timisela. A xinwe xa zona ku ti mahela longoloko wu nene wa moya. Wona a xikombiso xa John, wa 39 wa malembe, loyi a nga ni mababyi ya kankro. I ngalo: “Nzi lo bayiseka nguvu hakuva nzi wa ha hi muswa.” Ka xikhati lexo, a n’wana wa John i wova ni malembe manharu ntsena. John i ngalo: “Zi wa lava ku a sati wa mina a khatalela n’wana wa hina a tlhela a khatalela mina, zinwe ni ku nzi vuna ku lanzela zileletelo zontlhe za xipitali.” A quimioterapia yi wa maha John a mbhela ntamu a tlhela a hlamuka timbilu. Niku a hi zona zoce. A papai wa John i lo kuma mababyi ya mahati, zonake a lava ku khatalelwa hi ngango.

John ni ngango wakwe va xi pfinyanisile kuyini ni xikarato lexi? I ngalo: “Hambu lezi nzi nga kala nzi nga hi na ntamu, nzi wa maha zontlhe kasi a ngango wa hina wu simama kuva ni longoloko wu nene wa moya. Hi waya mitlhanganweni yontlhe, hiya wutirelini kumbheleni ka viki, hi tlhela hi maha wukhozeli ga ngango hi kukhanzakanya hambu loku zi karata.” Kunene, John i zi wonile lezaku a xinwe xa zilo zi lavekako nguvu kasi ku timisela xi xihi xikarato ku hlayisa wumoya gakwe. Xana i na ni wusungukati go nyika lava va yimisanako ni minzhingo? I ngalo: “Neti a kudzuka loku ko sangula ku hunza, a maalakanyo ya kukarateka ma ta valetwa hi ntamu wa Jehova ni liranzo lakwe. Jehova a nga ku tiyisa a ku fana ni lezi a nzi tiyisileko.”

Handle ko kanakana, hi ku vuniwa hi Nungungulu hi nga zi kota ku timisela minzhingo kutani zikarato lezi hi nga kumanako nazo — zalezi kutani xikhatini xi tako. Ngha hi kombela xivuno ka Jehova hi mukhongelo, hi wumba wunghana go tiya ni lava hi nga navo bandleni ga hina, hi kombela xivuno ka madota ya maKristu hi tlhela hi simama ku lanzela longoloko wu nene wa moya. Hi ku maha lezo, hi ta ngha hi lanzela a magezu ya Paule yaku: “Za laveka lezaku mu hi ni kutimisela.”