“Ka lava va nyikilweko ku maha ntiro”

ANZHAKO ka masiku ya moya ni vula, hi Muvulo wa 1 ka Setembro wa 1919 ku lo huma gambo ku sangula ku kufumela. Ka gambo lego, ku lo tlhangana vanhu vo kala ni ku chikela 1.000 lomu ka salawu ya 2.500 wa zitulo kasi kuzwa a nzima yo sangula ya gotsovanyano wa Cedar Point, Ohio, Estados Unidos. Laha gi nga kari gi pswitela ku lo chikela 2.000 wa vanhu, na vata hi ngalava, mova, ni zitimela zo hlawuleka. Hi Wazibili, a vanhu va lo tala nguvu laha ka kuza ku laveka lezaku a xipanze lexi xi nga sele xa gotsovanyano xi mahelwa lahandle nzhutini wa tisinya.

Ka nzhuti lowo wa tisinya, a gambo gi lo tlhava hi lomu xikari ka matluka gi maha a mabhaji ya vavanuna ma ku khwatsi mova ni mavalavala. A moyana wa Tiva ga Erie wu lo swahutela mawoya ya zihuku za vavasati. A makabye wo kari i lo bika lezi: “Ka wutshamu lego go saseka ku khwatsi i parki, kule ni guwa ga tiko lego ga kale, hi wa hi paradiseni hakunene.”

A kusaseka ka wutshamu ku lo paliwa hi litsako la hombe leli li nga woneka tinghoheni ta lava va nga hi kona. A jornali go kari gi lo wula lezi: “Vontlhe va woneka na va hi vanhu va ti nyiketeleko nguvu, kanilezi na va xalele ku hunza mpimo.” A Zigonzani za Biblia zi wa tsakile nguvu hi kuva zinwe ni maKristu-kulobye anzhako ka minzhingo ya hombe ya malembana lawa ma nga ha hi ku hunza: a kuvukelwa ka xikhati xa yimpi; kungazwanani lomu mabandleni; kuvaliwa ka Beteli ya Brooklyn; kuvalelwa ka votala hi kota ya Mufumo, a ku patsa ni ntlhanu wa vamakabye ni vanharu va nga rangela ntiro lava va nga nyikilwe 20 wa malembe yo tshama paxweni.a

Hi ku mbhela ntamu va tlhela va nga ha tivi xo maha ka malembe lawo ya zikarato, a Zigonzani zo kari za Biblia zi wa tsikile a ntiro wa kuxumayela. Kanilezi, a kutala kabye va wa maha zontlhe zi nga hi ntanwini wabye kasi ku timisela tixanisa leto ta wuhosi. Ka ginwe ga makhati, a muhloli wo kari wa timhaka i lo bika ku hambu lezi zi nga nyikwa zitlharihiso za hombe, a Zigonzani za Biblia lezi a nga zi wutisela zi yimile ziku nde ziku zi ta “simama ku xumayela a mhaka ya Nungungulu kala kugumeseni.”

Nzeni ka xikhati lexo xa kuringwa, a Zigonzani za Biblia zi wa “cuwukela a kongomiso wa Hosi, . . . na zi khongela xontlhe xikhati zi kombela wurangeli ga Dadani.” Makunu zi wa tlhelile zi tlhangana ka mutlhangano wo tsakisa laha Cedar Point. A makabye wo kari i lo phofula lezi a votala va nga ti zwisa zona, lava va nga ti wutisa ku va ta zi kotisa kuyini ku tlhela va ‘sangulisa a ntiro wabye ni ku xumayela hi ndlela yi xaxametilweko.’ Lexi va nga xi lava nguvu ku hunza zontlhe ku wa hi ku sangula ku tira!

Viki gontlhe, lava va nga hi laho va wa ti wutisa lezaku ma wula yini a maletela lawa yaku “GA” ma nga tsalilwe ka longoloko wa gotsovanyano, makartawu va nyikilweko a xikhati va nga chikela, ni ka matshamu manwani laha gotsovanyanweni. Hi Wazihlanu, loyi a nga vitaniwa lezaku i “Siku ga vatiri-kulori,” Joseph F. Rutherford i lo bhoxa fihlakalo lowo mahlweni ka 6.000 wa vatsombani. A ku “GA” zi wa yimela revista giswa ga ku gi tirisa kuxumayeleni gaku The Golden Age (A nguva ya nzalama).b

Na a wulawula hi maKristu-kulobye ma totilweko, Makabye Rutherford i te: “Hi mahlo ya kukholwa, kuxanisekeni kabye va wona nguva ya nzalama ya kufuma ko ngangamela ka Messia. . . . Va zi wona kota wutihlamuleli ni lungelo ga hombe a ku huwelela a nguva ya nzalama leyi yi tako. Zi maha xipanze xa ntiro lowu va nyikilweko hi Nungungulu.”

A revista lego gi nga tsalilwe ku “Jornali ga timhaka, ni kutsumba, ni kukholwa” laha ka kapa, gi wa ta tiriswa kasi ku sangula ndlela yiswa ya ku hangalasa a lisine — ku nga tsima ga muti ni muti ga xitsalela xa lava va gi lavako. Laha ku nga wutisiwa lezaku hi vamani va tsakelako ku nghena ka ntiro lowo, vontlhe va nga hi kona va lo suka va yima. Hi kulanzela, va lo yimbelela “hi kuhiseka ku tiviwako ntsena hi lava va lanzelako nkonzo wa Jesu,” vaku: “O Hosi, rumela a kuwonekela ni lisine.” J. M. Norris i lo alakanya siku lego aku: “Nzi nga ta tshuka nzi rivala lezi a tisinya ti nga ninginikisa zona.”

Anzhako ka xipanze lexo, lava va nga hi kona va lo fola bhixa yi tekileko tihora kasi vava vo ranga ku ti tsalela ku amukela revista lego. A votala va ti zwisile ku khwatsi hi Mabel Philbrick, loyi a ngaku: “Zi wo ngo ku tsakisa a ku tiva lezaku hi ta tlhela hiva ni ntiro wa ku wu maha!”

A xipimo xa 7.000 wa Zigonzani za Biblia zi lo ti longisela kasi ku tira. A xiphephana Organization Method (Mahela ga hlengeletano) ni xibhukwana To Whom the Work Is Entrusted (Ka lava va nyikilweko ku maha ntiro) zi lo tlhamusela mhaka: A ntiro wu wa ta rangelwa hi Xipanze xa Ntiro xa xiswa xa le tsinza ga misava yontlhe. Ku wa fanele ku yimiswa Kometi ya Ntiro lomu bandleni ni murangeli kasi ku nyika zileletelo. A zipanze za simu zi wa fanele ku avanyiselwa hi mitlawa ya 150 kuya ka 200 wa miti. Ku wa fanele ku mahiwa Mutlhangano wa Ntiro viki ni viki hi Wazina ni gambo kasi a vamakabye va bika matshango ni ku nyikela mibiko ya ntiro wa simu.

Herman Philbrick i te: “Laha hi nga tlhelile mitini ya hina, hontlheni hi lo khomeka hi tsima ga xitsalela.” Va lo kuma vanhu vo demba ndleve ka matlhelo wontlhe. Beulah Covey i wula lezi: “Zi wa wonekisa ku khwatsi anzhako ka yimpi ni hlomulo wa hombe, a vanhu vontlhe va wa tsakela ni mahungu ya nguva ya nzalama.” Arthur Claus i lo tsala lezi: “A bandla gontlhe gi lo hlamaliswa nguvu hi ntsengo wa hombe wa lava va tsalisileko revista lego.” Anzhako ka tihweti timbiri basi na ku humile le’go ranga, ku wa sina ku nyikelwe xipimo xa 500.000 wa tikopiya ta gona, niku ku wa hi ni 50.000 wa vanhu va nga ti tsalisile.

A nzima “Ivangeli ya Mufumo,” ka Murinzeli (hi xiNgiza) wa 1 ka Julho wa 1920, yi lova lexi A. H. Macmillan a xi wulileko lezaku “xikombiso xo sangula xa nayo xa ku maha ntiro wa kuxumayela misaveni hi ndlela leyi wu mahiwako hi yona zezi.” A nzima leyo yi lo kuca maKristu wontlhe ma totilweko lezaku ma “nyika wukustumunyu tikweni lezaku a mufumo wa le tilweni wa fuma.” Inyamutlha, a vamakabye va Kristu “lava va nyikilweko ku maha ntiro” va patsene ni timiliyoni ta vanhu va xumayelako a mhaka na va rinzela a nguva ya nzalama ya Messia.