Nungungulu i lo vuxa N’wana wakwe hi ka vafileko

A XIKHATI lexi a munghana wakwe Lazaru a ngafa, Jesu i lo rila. Hi mawonela ya wena, Jehova i bayisekile a xikhati lexi Jesu a nga xanisiwa a tlhela afa ke? — A Biblia gi wula lezaku Nungungulu wazwa “kubayisa” hambu ku swireka hi zilo lezi zi mahekako. — Tisimu 78:40, 41; Johani 11:35.

U alakanya lezaku Jehova i bayisekile ku chikela kwihi a xikhati lexi a nga wona N’wana wakwe na a dawa? — Jesu i wa nga kanakani lezaku Nungungulu i wa ta mu alakanya. Hi zalezo zi nga mu maha a wula lezi ka magezu yakwe yo gumesa: ‘Papai, nza nyikela wutomi ga mina mandleni ya wena.’ — Luka 23:46.

Jesu i wa tiyiseka lezaku i wa ta vuxiwa hi ka vafileko, ni lezaku i wa nga ta tsikiwa “Hayidesi,” kutani lomu xilahleni. Anzhako ka kuva Jesu a vuxilwe hi ka vafileko, mupostoli Pedro i lo wula lezi zi nga sina zi tsalilwe lomu ka Biblia xungetano hi Jesu, aku: Jesu ‘a nga tsikiwangi Hayidesi, hambu a nyama yakwe a yi wonangi kubola.’ (Mitiro 2:31; Tisimu 16:10) A miri wa Jesu a wu zangi wuva ni xikhati xo ringana kuza wu bola ni ku nuha lomu xilahleni.

A xikhati lexi Jesu a nga hi laha misaveni, i lo byela vapostoli vakwe lezaku i wa nga ta mbheta xikhati xo leha na a file. I lo va tlhamusela lezaku i wa ta ‘dawa, a tlhela a vuka hi siku ga wunharu.’ (Luka 9:22) Hikwalaho, a vapizani vakwe va wa nga faneli ku hlamala a xikhati lexi Jesu a nga wa ta vuxiwa hi ka vafileko. Kanilezi, xana va hlamalile? — A hi zi wone.

A xikhati lexi Mugonzisi wa Hombe a nga dawa laha mhanzeni ya xanisa ku wa hi ma 15 ya Wazihlanu. Josefa, a wanuna wo ganya a nga hi xiro xa Hubye ya vaJuda, yenawu i wa kholwa ka Jesu kanilezi i wa nga zi kombisi kubaseni. A xikhati lexi a ngazwa lezaku Jesu i file, i loya ka Pilatu a mufumeli wa muRoma. I lo ya kombela ku susa a xirumbi xa Jesu laha mhanzeni kasi a ya xi lahla. Anzhako ka lezo, Josefa i lo teka xirumbi xa Jesu a famba naxo ka simu legi gi nga hi ni xilahla, ku nga wutshamu legi ku vekiwako kona a vanhu va kufa.

Anzhako ka kuva a xirumbi xakwe xi vekilwe lomu xilahleni, ku lo wumbulutiwa a ribye ga hombe gi vala a xilahla lexo. Makunu ku lo chikela a siku ga wunharu, ku nga hi Sonto. A gambo gi wa nga se huma, hikwalaho ku wa ha hi ni munyama. Ku wa hi ni vavanuna va nga kari va wonelela xilahla. Va wa rumilwe hi varangeli va vapristi lezaku va maha lezo. Wa zi tiva a ku hikuyini? —

A vapristi vonawu va wa zwile lezaku Jesu i wa wulile a ku i ta vuxiwa hi ka vafileko. A vapristi va lo veka a varinzeli laha xilahleni, na va mahela ku a vapizani va nga yivi a xirumbi xa Jesu va gumesa va wula lezaku i vukile hi ka vafileko. Hi xitshuketi a misava yi lo sangula ku tsekatseka. Ku lova ni kuhatima ka hombe xikari ka munyama lowo. Ku wa hi ngelosi ya Jehova! A masochwa ma lo chava nguvu laha ka kuza ma nga ti ninginizi laha ma nga hi kona. A ngelosi yi loya laha xilahleni yi ya wumbuluta ribye gi suka. A xilahla xi wa nga ha hi na nchumu!

Ina, zi fana ni lezi mupostoli Pedro a nga gumesa a zi wula aku: “Jesu loyi, Nungungulu i lo mu vuxa.” (Mitiro 2:32) Nungungulu i lo vuxa Jesu na a hi ni miri lowu a nga hi nawo na a nga seta laha misaveni. I vuxilwe ni miri wa moya wo fana ni lowu wu nga ni tingelosi. (1 Pedro 3:18) Hikwalaho kasi a vanhu va mu wona, Jesu i wa fanele ku ambala a miri wa nyama. I zi mahile lezo ke? — A hi zi wone.

Makunu a gambo gi wa huma. A masochwa ma wa fambile. Maria wa le Magdala ni vapizani vanwani va Jesu va vavasati va wa kari vaya laha xilahleni, na va wutisana vaku: ‘Himani a to hi wumbulutela a ribye gi suka nyangweni ya nkele ke?’ (Marku 16:3) Kanilezi, a xikhati lexi va nga chikela laha nkeleni, a ribye gi wa sina gi wumbulutilwe. Lomu nkeleni ku wa nga hi na nchumu! A xirumbi xa Jesu xi wa nyamalele! Maria wa le Magdala i lo tekela ku tsutsuma aya ka vapostoli vo kari va Jesu.

A vavasati lava vanwani va lo yima laha kusuhani ni nkele. Va lo ti wutisa lezi: ‘Xi kwihi a xirumbi xa Jesu?’ Ku lo humelela a vavanuna vambiri hi xitshuketi na va bohile tinguwo to hatima. Ti wa hi tingelosi! Ti lo byela a vavasati lavo tiku: ‘Hikuyini mu lavako Jesu laha ke? I vuxilwe. Fambani hi kuhatlisa mu ya byela vapizani vakwe.’ Hi nga alakanyela lezi a vavasati lavo va nga tsutsumisa zona! Lomu ndleleni, va lo tlhangana ni wanuna. Wa zi tiva a ku ku wa himani? —

Ku wa hi Jesu a nga ambalile a miri wa nyama! Yenawu i lo byela a vavasati lavo aku: ‘Fambani mu ya byela vapizani va mina.’ A vavasati lavo va lo tsaka nguvu. Va lo ya kuma a vapizani va Jesu, va va byela lezi: ‘Jesu wa hanya! Hi mu wonile!’ Maria i wa sina a byelile Pedro na Johani lezaku a nkele wu wa nga ha hi na nchumu. Va lo tekela ku ya zi wona hi laha kusuhani, kota lezi u zi wonako laha ka mufota. Va lo wona tinguwo ta wukene leti ti nga phutsele Jesu, kanilezi va wa kanakana. Va wa zi lava ku kholwa lezaku Jesu wa hanya, kanilezi zi wa nga va kholwisi a ku hakunene i vukile.

Hi nzhako ka xikhati ka Sonto leyo, Jesu i lo woneka ka vapizani vakwe va vambiri va nga kari va famba hi ndlela ya ku ya ka xidoropana xa Emausi. Jesu i lo longoloka navo na va bhula, kanilezi va wa nga mu tivi hakuva i wa nga hi na miri lowu a nga hi nawo na a nga sefa. Va mu tivile a xikhati lexi a nga maha mukhongelo a tlhela aga navo. A vapizani vakwe va lo tsaka nguvu laha ka kuza va famba tikilometro to tala nguvu hi kutsutsuma va tlhela Jerusalema! Kuzilava, ku lo hunza xikhatanyana zonake a woneka ka Pedro kasi ku mu komba lezaku wa hanya.

Ni wusiku ga Sonto leyo, a vapizani vo tala va wa tlhangene lomu ka yindlu yo kari. A livati li wa valilwe. Hi xitshuketi, Jesu i lo nghena lomu ka yindlu leyo! Makunu va lo tiva lezaku Mugonzisi wa Hombe wa hanya futsi. Hi nga alakanya lezi va nga tsakisa zona! — Mateu 28:1-15; Luka 24:1-49; Johani 19:38–20:21.

Hi xipimo xa 40 wa masiku, Jesu i lo woneka na a hi ni mimiri yo hambanahambana kasi ku komba a vapizani vakwe lezaku wa hanya. Zonake i lo suka laha misaveni a tlhela ka Papai wakwe le tilweni. (Mitiro 1:9-11) Na ku nga se hunza xikhati xo leha, a vapizani vakwe va lo sangula ku byela a vanhu vontlhe lezaku Nungungulu i vuxile Jesu hi ka vafileko. Hambu a xikhati lexi a vapristi va nga vaba va tlhela va daya a vapizani vo kari, va lo simama ku xumayela. Va wa zi tiva lezaku hambu loku vafa, Nungungulu i wa ta va vuxa a kufana ni lezi a nga vuxa N’wana wakwe.

A vapizani lavo vo sangula va Jesu va wa hambene nguvu ni vanhu vo tala inyamutlha. Ka matiko yo kari inyamutlha, loku ku chikela a xikhati lexi Jesu a nga vuxiwa hi xona, a vanhu vo tala va alakanya a zigwaja ni manza yo pendiwa zi mahelwako Pasika. Kanilezi, a Biblia a gi wuli nchumu xungetano hi zigwaja ni manza zi mahelwako Pasika. Gi wulawula hi ku tirela Nungungulu.

Hi nga fana ni vapostoli va Jesu hi ku byela vanwani lezaku Nungungulu i mahile a zilo zo hlamalisa a xikhati lexi a nga vuxa a N’wana wakwe hi ka vafileko. A hi faneli ku tshuka hi chava, hambu loku a vanhu va wula lezaku va ta hi daya. Loku hi tshuka hifa, Jehova i ta hi alakanya a hi vuxa hi ka vafileko, a ku fana ni lezi a nga vuxa Jesu.

A zi tsakisi a ku tiva lezaku Nungungulu wa alakanya a vanhu lava va mu tirelako ni lezaku i ta va vuxa hi ka vafileko ke? — A ku tiva lezo zi fanele ku hi kuca ku lava ku tiva lezaku hi nga mu tsakisisa kuyini Nungungulu. U wa zi tiva lezaku za koteka ku tsakisa Nungungulu? — Hi ta wulawula hi zona ka xipimo xi lanzelako.