Jesu a woneka kambe ka vapizani vakwe

Loku Jesu a wonekile ka vapostoli vakwe, zvonake ku hundza cikhati co kari, Pedro i no zvi wona zvi hi chukwana ku ya kukuta tinjhanjhi le Bimbini ga Galileya. Tomasi na Jakobe na Johani ni vapizani van’wani va Jesu, vonawu va no famba. Va no kukuta wusiku gontlhe, kanilezvi a va kumangi nchumu.

Ni mixo nguvhu, va no wona wanuna wo kari na a yimile lehandle ka bimbi. I no va angula na a hi kwale handle, a va wutisa lezvi: ‘Mu phasile cokari ke’? Vaku: ‘Ahihi’! A wanuna loye aku: ‘Hoxelani likoka seno tlhelweni ga cinene ga ngalava’. Loku va hoxele, va no phasa tinjhanjhi to tala nguvhu laha ka kuza va tsandzeka ni ku humesa ngalava. Johani i no tekela ku zvi tiva lezvaku a wanuna loye hi Jesu, zvonake aku: ‘Hi Hosi’! Pedro i no tekela ku tlula a nghena lomu matini, a hlambela a ya le handle. A vapizani lava van’wani va Jesu, va no landza Pedro hi ngalava.

Loku va chikele le handle, va no wona tinjhanjhi ni pawa na zvi wociwa laha ndzilweni. Jesu i no va vitana ni tinjhanjhi to kari lezvaku va ta engetela ka leti ti nga wociwa kasi vaga. A va byela lezvi: ‘Nghoneni hi ta fihlula’.

Loku va mbhetile ku fihlula, Jesu i no wutisa Pedro aku: ‘Wa ndzi randza ku hundza ntiro wa ku kukuta tinjhanjhi’? Pedro aku: ‘Ina Hosi. Wa zvi tiva a ku ndza ku randza.’ Jesu aku: ‘Gisa tiyivhu ta mina’. Jesu i no mu wutisa kambe aku: ‘Pedro, wa ndzi randza ke’? Pedro aku: ‘Hosi, wa zvi tiva a ku ndza ku randza.’ Jesu aku: ‘Risa tiyivhana ta mina’. Jesu i no mu wutisa hi khati ga wunharu, zvonake Pedro a swireka nguvhu aku: ‘Hosi, wena wa zvi tiva zvontlhe. Wa zvi tiva a ku ndza ku randza’. Jesu aku: ‘Gisa tiyivhana ta mina’. I no gumesa a mu byela lezvi: ‘Simama ku ndzi landzela’.