Hi vamani a vamakabye va hina?

KA KHATI go kari Mugonzisi wa Hombe i lo maha xiwutiso xo hlamalisa. Xi waku: “Himani mamani, ni vamakabye va mina?” (Mateu 12:48, NM) Wa wu tiva a hlamulo wa kona? — Kuzilava wa zi tiva a ku a mamani wa Jesu ku wa hi Maria. Kanilezi, wa ma tiva a mavito ya vamakabye vakwe va vavanuna? — Xana i wa hi ni vamakabye va vavasati kambe? —

A Biblia gi wula lezaku a vamakabye va Jesu ku wa hi “Jakobe, na Josefa, na Simoni, na Juda.” Niku a vamakabye va Jesu va vavasati va wa hanya a xikhati lexi a nga kari a xumayela. Kota lezi Jesu a nga hi matewula, lava vanwani va wa hi tinzisana takwe. — Mateu 13:55, 56; Luka 1:34, 35.

A vamakabye va Jesu vonawu va wa hi vapizani vakwe ke? —A Biblia gi wula lezaku kusanguleni “va wa nga kholwi kakwe.” (Johani 7:5) Hambulezo, hi nzhako ka xikhati Jakobe na Juda va mahile vapizani vakwe, niku va tlhelile va tsala mabhuku yo kari ya Biblia. Wa ma tiva a mabhuku lawa va nga tsala? — Hi zona, i papilo ga Jakobe ni ga Juda.

Hambu lezi a mavito ya vamakabye va Jesu va xisati ma kalako ma nga kumbukiwi lomu ka Biblia, ha zi tiva lezaku i wa hi ni vambiri hi kutsongwani ka kona. Hambulezo, kuzilava ku wa ni vanwani. Xana ni vamakabye va Jesu va xisati vonawu va mahile vapizani vakwe? — A Biblia a gi wuli nchumu, hikwalaho a hi zi tivi. Kanilezi, wa zi tiva a ku hikuyini Jesu a nga maha a xiwutiso lexi xaku: “Himani mamani, ni vamakabye va mina?” — A hi zi wone.

Jesu i wa hi lomu ka ku gonzisa a vapizani vakwe a xikhati lexi a wokari a nga mu tsemarisa aku: “A mamani wa wena ni vamakabye va wena va yimile lahandle, va lava ku wulawula na wena.” Makunu Jesu i lo kuma lungelo ga ku gonzisa nchumu wa lisima hi ku maha xiwutiso lexi xo hlamalisa aku: “Himani mamani, ni vamakabye va mina?” I lo nawuluta woko a xungeta a vapizani vakwe aku: “A Mamani ni vamakabye va mina hi valava!”

Jesu i lo gumesa a tlhamusela aku: “Kani hi wihi loyi a mahako a kuranza ka Papai wa mina loyi a nga le tilweni, hi yena a makabye wa mina ni mamani wa mina.” (Mateu 12:47-50, NM) Lezo zi komba lezaku Jesu i wa va ranza nguvu a vapizani vakwe. Jesu i wo hi gonzisa lezaku a vapizani vakwe va xinuna ni va xisati i wa va wonisa ku khwatsi vamakabye vakwe a nga pswaliwa navo mamani munwe ni papai munwe. A tlhela a va wonisa ku khwatsi vamamani vakwe.

Ka xikhati lexo a vamakabye va Jesu — Jakobe, Josefa, Simoni, na Juda — va wa nga kholwi lezaku Jesu i N’wana wa Nungungulu. Va wa nga kholwi lezi a ngelosi, Gabrieli, yi nga byelile a mamani wabye. (Luka 1:30-33) Hikwalaho, kuzilava va wa mu xanisa Jesu. Ni wihi a mahako zilo zo fana ni lezo a hi makabye wa lisine. I kona u mu tivako a tolovelako ku xanisa makabye wakwe? —

A Biblia gi wulawula hi Esau na Jakobe ni lezi Esau a nga zangarisa zona laha ka kuza a wula lezi: “Nzi lava ku daya a makabye wa mina Jakobe.” A mamani wabye Rebeka, i lo chava nguvu laha ka kuza a rumela Jakobe ka wutshamu ga le kule kasi Esau a nga mu dayi. (Genesisi 27:41-46, NM) Hambulezo, loku ku hunzile malembe yo tala, Esau i lo cica. I zile a angarela a tlhela a pswopswa Jakobe. — Genesisi 33:4.

Hi kufamba ka xikhati, Jakobe i lo pswala a 12 wa vana. Kanilezi, a vana va Jakobe lava va hombe va wa nga yi ranzi a nzisana yabye Josefa. Va wa mu venga nguvu hi kota ya lezi a nga kari a ranziwa nguvu hi papai wabye. Hikwalaho, va lo mu xavisa ka vaxavisi va zitiri va ngaya Gipite. Va lo gumesa va byela a papai wabye lezaku Josefa i delwe hi zihari za khwati. (Genesisi 37:23-36) Lezo zi bihile nguvu, a hi zona? —

Hi nzhako ka xikhati, a vamakabye va Josefa va lo ti sola nguvu hi lezi va nga zi mahile. Hikwalaho, Josefa i lo va tsetselela. Wa zi wona a ku Josefa i wa fana na Jesu? — A xikhati lexi Jesu a nga hi zikaratweni, a vapostoli vakwe va lo mu tsutsuma, niku Pedro i zile a kaneta lezaku i wa mu tiva Jesu. Hambulezo, a ku fana na Josefa, Jesu i lo va tsetselela vontlhe.

A mahungu manwani ma wulawula hi Kana na Abeli. Hi nga gonza nchumu wa lisima ka vonawu. Nungungulu i lo wona lomu mbilwini ya Kana lezaku i wa nga mu ranzi a makabye wakwe. Hikwalaho, Nungungulu i lo byela Kana lezaku i wa fanele ku cica maalakanyo yakwe. Loku hakunene Kana i wa mu ranza Nungungulu, na a mu ingisile. Kanilezi i wa nga mu ranzi Nungungulu. Ka siku go kari, Kana i lo byela Abeli aku: “A hi fambe masinwini.” Abeli i lo famba na Kana. Kanilezi, laha va nga hi voce kwaseyo masinwini, Kana i loba a makabye wakwe laha ka kuza a mu daya. — Genesisi 4:2-8, NM.

A Biblia gi hi byela lezaku hi gonza zilo za lisima nguvu ka mahungu lawa. Wa zi tiva a ku zini hi zi gonzako? — A Biblia gi wula lezi: “A mhaka leyi mu yi zwileko hi le kusanguleni hi leyi, lezaku hi ranzana; hi nga koti Kana, loyi a nga hi n’wana wa loyi wa kubiha.” Hikwalaho, a vakamakabye va fanele ku ranzana. A va faneli ku fana na Kana. — 1 Johani 3:11, 12.

Hikuyini zi nga wa tava zi bihile a ku fana na Kana? — Hi ku a Biblia gi wula lezaku Kana ‘i wata hi ka loyi wa kubiha,’ ku nga Satani Diabolusi. Kota lezi Kana a nga maha zilo a ku khwatsi hi Satani, zi wa ku khwatsi Satani hi yena a papai wakwe.

Wa zi wona a ku hikuyini zi nga za lisima a ku ranza vamakabye va wena? — Loku u nga va ranzi, u ta fana ni vanana va mani? — Ni vanana va Satani. A wu zi lavi a ku fana navo, a hi zona? — Makunu u nga zi kombisa kuyini lezaku u lava kuva n’wana wa Nungungulu? — Hi zona, hi ku ranza a vamakabye va wena hi mbilu yontlhe.

Kanilezi xini a liranzo? — A liranzo kutizwa ko eta ka lomu mbilwini ya hina ku hi mahako hi lava ku va mahela za zi nene vanwani ni ku va vuna. Hi komba lezaku ha va ranza vanwani loku hi tsaka hi vona ni loku hi va mahela za zi nene. Makunu, hi vamani a vamakabye va hina lava hi faneleko ku va ranza? — Alakanya lezaku Jesu i gonzisile lezaku hi lava va wumbako a ngango wa hombe wa maKristu.

Xana za lisima futsi a ku ranza vamakabye lavo va maKristu? — A Biblia gi wula lezi: “Loyi a nga ranziko makabye wakwe [wa xinuna ni wa xisati] loyi a mu wonako, a nga zi koti ku ranza Nungungulu loyi a nga mu woniko.” (1 Johani 4:20) Hikwalaho, a hi faneli ku ranza vokari ntsena xikari ka lava va wumbako a ngango wa wuKristu. Kanilezi, hi fanele ku ranza vontlhe. Jesu ite: “Loku mu ranzana, a vanhu vontlhe va ta zi tiva lezaku mu vapizani va mina.” (Johani 13:35) Wa va ranza a vamakabye vontlhe? — Alakanya lezi: Loku u nga va ranzi a vamakabye vontlhe, a wu mu ranzi Nungungulu hi mbilu yontlhe.

Hi nga zi kombisa kuyini lezaku hakunene ha va ranza a vamakabye va hina? — Loku hi va ranza hi nga ta va potsa, hi ku nyenya ku wulawula navo. Vontlhe va tava vanghana va hina. Xontlhe xikhati hi ta va mahela za zi nene hi tlhela hi avelana navo lezi hi nga nazo. Niku loku va tshuka va kumana ni zikarato, hi ta va vuna hakuva hontlheni hi va ngango wunwe.

Loku hakunene hi ranza a vamakabye va hina vontlhe, hi komba yini hi lezo? — Hi komba lezaku hi vapizani va Jesu, Mugonzisi wa Hombe. A hi zalezo hi zi lavako ke? —