A vapostoli va Jesu va lava kuva ni cikhundla kambe

Laha Jesu a nga kari aya Jerusalema ni vapizani vakwe, va no hundza hi lomu Pereya hi le Dzongeni, zvonake va ya tsemakanya a Congo wa Jordhani kusuhani ni Jeriko. Va wa hi ni van’wani kambe va ngaya Jerusalema va yaga Phasika ga 33 Nguveni ya Hina.

Jesu i wa hi le phambeni ka vapizani vakwe, hakuva i wa lava ku hatla a chikela le Jerusalema, kasi a nga celwi mubuzweni wa Phasika. Hambulezvo, a vapizani vakwe va wo chava laha va nga hi kona. Hakuva a cikhati leci Lazaru a ngafa Jesu na a hi le Pereya zvonake a lava ku famba, Tomasi i no byela lava van’wani aku: “A hi fambeniwo, hi yafa naye.” (Johani 11:16, 47-53) Makunu, a kuya Jerusalema zvi wa chavisa futsi.

Jesu i no vitana vapizani vakwe hi tlhelo, a va longisela ku lwisana ni lezvi zvi nga hata, aku: ‘Hiya Jerusalema, laha a N’wana wa munhu a ta nga nyikelwa ka vapristi va hombe ni vatsali; va ta mu konela kufa. Va ta mu nyikela mandleni ya vamatiko, kasi va mu tseketsela ni ku mu xupula, ni ku mu belela; kanilezvi hi siku ga wunharu i ta vhuka kambe.’ — Matewu 20:18, 19.

Lego give khati ga wunharu legi Jesu a nga byela vapizani vakwe lezvaku i ta dawa a tlhela a vhuxiwa. (Matewu 16:21; 17:22, 23) Kanilezvi ka khati lego, i va byelile lezvaku i ta belelwa laha mhandzeni. Va zvi zwile, kanilezvi a va zvi zwisisangi. Kuzvilava va wa rindzela ku a mufumo wa Izrayeli wu vhuxisiwa laha misaveni, kasi va ti buza hi kuva ni wudzundzo ga ku fuma na Kristu kwalaha misaveni.

Ka lava va nga kari vaya Jerusalema ku wa hi ni mamani wa mupostoli Jakobe na Johani, loyi zvi wonekisako ku hi Salome. A vapostoli lava va vambiri Jesu i wa va chulile vito gi wulako ku “vana va kudzindza”; handle ko kanakana hi kota ya tshamela gabye ku nga chavi ku ti phofula. (Marku 3:17; Luka 9:54) Ku wa hundza cikhati co kari a vapizani lava va vambiri na va navela cikhundla Mufun’weni wa Kristu, niku a mamani wa kona i wa zvi tiva. Makunu i no tshinelela Jesu, a mu khizamela, a kombela ku a va mahela wuxinji. Jesu aku: “U lava yini”? A hlamula, aku: Laya ‘lezvaku a vana va mina lava va vambiri a va tshame Mufun’weni wa wena, a mun’we reveni ga wena ga cinene ni mun’wani a reveni ga wena ga cibhabha.’ — Matewu 20:20, 21.

Hi lisine, loyi a nga kari a kombela lezvo hi Jakobe na Johani. Lezvi makunu a nga va byelile zvilo zva tingana lezvi zvi nga lava ku mu humelela, i no va byela lezvi: “A mu ci tivi leci mu ci kombelako. N’wina ma zvi kota a kunwa a gombe legi ndzi ta nganwa ha gona ke?” Vaku: “Ha zvi kota.” (Matewu 20:22) Zvi wonekisa ku khwatsi va wa nga se zvi zwisisa ku zvini lezvi hakunene va nga wa ta kumana nazvo.

Hambulezvo, Jesu i no va byela lezvi: “Hakunene a gombe ga mina mu ta ginwa; kanilezvi a ndzi na ntamu ku mu tshamisa reveni ga mina ga cinene ni ga cibhabha; zvi lumba lava ku longiselelweko vona hi . . . [Papayi].” — Matewu 20:23.

Laha va nga zvi tiva lava van’wani va 10, va no zangara. Ku ngava lezvaku Jakobe na Johani hi vona va nga vhuxa nguvhu vhunyi ka khati va nga holovisene hi ku lava ku tiva loyi a nga wa hombe cikari kabye? (Luka 9:46-48) Kani hi vona kani a hi vona, lezvi Jakobe na Johani va nga tlhela va lava cikhundla kambe, zvi komba lezvaku vontlhe va 12 va wa nga se zvi kota ku hanya hi wusungukati ga Jesu, ga ku ti wona kota wa mutsongwani ka vontlhe.

Jesu i no zvi wona zvi hi chukwana ku lulamisa cikarato leco ni zunga legi gi nga byalekile. I no vitana vontlhe va 12, a ta va nyika wusungukati hi lirandzo, aku: ‘Ma zvi tiva lezvaku lava va tibyiwako tihosi cikari ka vamatiko va va fumela, ni vahombe vabye va maha hi ntamu hehla ka vona. Kanilezvi a zvi nghaho cikari ka n’wina; kanilezvi loyi a . . . [lavako] ku maha wahombe cikari ka n’wina, . . . a mahe nandza ga n’wina. Ni loyi . . . [a lavako] ku maha wo ranga cikari ka n’wina a ave khumbi ya vontlhe.’ — Marku 10:42-44.

Jesu i no guma a wulawula hi cikombiso cakwe — leci va nga fanele ku ci landzela, aku: ‘A N’wana wa munhu a nga telangi ku ta tirelwa, kanilezvi a ku ta tirela, ni ku nyikela kuhanya kakwe a kuva ndzhiho wa ku tirula vanyingi.’ (Matewu 20:28) Ka cikhati leco, ku wa hundza cipimo ca malembe manharu Jesu na a tirela van’wani, niku i wa ha ta simama a va tirela laha ka kuza a nyikela wutomi gakwe. A vapizani vakwe va wa fanele kuva ni tshamela legi Kristu a nga hi nago, ga ku randza ku tirela van’wani, na ku nga hi ku tirelwa; va randza kuva vo ti koramisa, na ku nga hi ku ti lavela cikhundla.