Hanya hi kuyelana ni mukhongelo wa Jesu wa liranzo

1, 2. Tlhamusela lezi Jesu a maheleko vapostoli vakwe vo tsumbeka anzhako ka kuga Pasika hi 33 Nguveni ya Hina.

Ku’ve ni wusiku ga 14 ka Nisani wa 33 Nguveni ya Hina. Jesu ni vanghana vakwe va wa ha hi kuga Pasika, legi gi nga va alakanyisa lezi Nungungulu a nga tlhatlhisisa zona a vakokwani vabye wukhumbini ga le Gipite. Kanilezi, a vapizani vakwe vo tsumbeka va wa ta kuma a kutlhatlhiswa ka hombe ko hunza loko, ku nga “kutirulwa ka pinzukelwa.” Hi manziko wa kona, a Hosi yabye yi nga hiko na xionho yi wa ta dawa hi valala va yona. Kanilezi, a ximaho xo biha xi wa ta hunzulwa xiva makatekwa. A nkhata wa Jesu wu halatilweko wu wa tava xiseketelo xa lezaku a vanhu va tlhatlhiswa ka xionho ni kufa. — Maheb. 9:12-14.

² Kasi hi nga rivali a lulamiselo legi ga liranzo, Jesu i lo yimisa a ximaho xiswa xa lembe ni lembe xo valeta Pasika. I lo maha lezo hi ku khema xibaba xi nga hiko na comelo, a nyika vapostoli vakwe va 11 vo tsumbeka, aku: “Lexi hi miri wa mina, lowu wu nyikelwako nwina; mahani lezo, mu nzi alakanya ha zona.” I lo maha lezo kambe hi gombe ga vinya go pswhuka, aku kabye: “Legi gombe hi xivumelwano xiswa nkhateni wa mina, lowu wu halatelwako nwina.” — Luka 22:19, 20.

 3. (a) Kucica muni ku nga humelela anzhako ka kufa ka Jesu? (b) Zini hi faneleko ku ti wutisa xungetano hi mukhongelo wa Jesu wu nga ka Johani xipimo 17?

³ A xivumelwano xa Nayo xa Nungungulu ni vaIsraeli va mabeleko xi wa hi kusuhani ni ku mbhela. Xi wa ta valetwa hi xivumelwano xiswa xa Jehova ni valanzeli va Jesu va totilweko. Jesu i wa karatekela nguvu a kutshamiseka ka tiko legi ga giswa ga moya. A vaIsraeli va mabeleko va wa hambene nguvu kupima hi tlhelo ga wukhongeli ni mahanyela ya vanhu, lezi zi nga neha xiruko ka vito go basa ga Nungungulu. (Joh. 7:45-49; Miti. 23:6-9) A kuhambana ni lezo, Jesu i wa xuva lezaku a valanzeli vakwe va simama va bohene hi kumbhelela, kasi va tira zinwe hi kuzwanana lezaku va neha wudzunzo ka vito ga Nungungulu. Makunu, zini lezi Jesu a nga maha? I lo maha mukhongelo wa wu nene nguvu ni wo kufumela, lowu ni wihi loyi a nga ni lungelo ga ku wu gonza. (Joh. 17:1-26; wona mufota kusanguleni ka nzima.) A xikhati lexi hi wulawulako hi mukhongelo lowu, i chukwana hi ti wutisa lezi: “Xana Nungungulu i hlamulile a mukhongelo wa Jesu? Xana nza hanya hi kuyelana ni mukhongelo lowu?”

4, 5. (a) Hi gonza yini ka magezu yo sangula ya mukhongelo wa Jesu? (b) Xana Jehova i xi hlamulisile kuyini a xikombelo xa Jesu wutsumbu xungetano hi xikhati lexi xi nga wa hata?

⁴ Jesu i lo simama ku wulawula kala a wusiku gi tiyela, na a gonzisa vapizani vakwe a zilo zo hlamalisa xungetano hi Nungungulu. Anzhako ka lezo i lo tlakusa mahlo yakwe a cuwuka tilweni, a khongela aku: “Dadani, a xikhati xi chikele; dumisa N’wana wa wena, kasi a N’wana wa wena a fela ku ku dumisa; kota lezi u mu nyikileko ntamu hehla ka nyama yontlhe, lezaku vontlhe lava u mu nyikileko vona, a fela ku va nyika wutomi ga pinzukelwa. . . . Nzi ku dumisile misaveni, hi ku mbheta a ntiro lowu u nzi nyikileko wona a ku wu tira. Makunu, Dadani, nzi dumise le ka wena hi wudumo legi nzi ngha nga nzi hi nago ka wena, a misava na yi nga seva kona.” — Joh. 17:1-5.

⁵ Wona lezi Jesu a zi rangisako ka magezu yo sangula ya mukhongelo wakwe. A nchumu wa lisima wu mu karatako kudumiswa ka vito ga Dadani wakwe wa le tilweni, niku lezo zi yelana ni xikombelo xo sangula ka mukhongelo wa Jesu wa xikombiso, laha a ngaku: “Dada, a vito ga wena a gi basisiwe.” (Luka 11:2, Tradução do Novo Mundo) A xilo xinwani xi karatako Jesu zilaveko za vapizani vakwe, ku nga “ku va nyika wutomi ga pinzukelwa.” Anzhako ka lezo, Jesu i maha xikombelo xakwe wutsumbu aku: “Dadani, nzi dumise le ka wena hi wudumo legi nzi ngha nga nzi hi nago ka wena, a misava na yi nga seva kona.” Jehova i lo chachazela a N’wana wakwe wa kutsumbeka hi zo hunza lezi a zi kombelileko hi ku nyika Jesu “a vito ga hombe ku hunza ga” tingelosi tontlhe. — Maheb. 1:4.

 6. Zini lezi a vapostoli va nga fanele ku maha kasi va kuma wutomi ga pinzukelwa, niku hi zi tivisa kuyini lezaku va zi kotile ke?

⁶ Jesu i tlhela a khongela hi lezi hina kota vaonhi hi faneleko ku maha kasi hi ringanelwa hi ku kuma xinyikiwo xa lisima nguvu xaku ne a xi hi ringani xa wutomi ga pinzukelwa. (Gonza Johani 17:3.) I te ngalo hi fanele “ku tiva” Nungungulu na Kristu. A yinwe ya tindlela ta ku maha lezo ku tirisa a mahlo ni tindleve ta hina lezaku hi gonza zotala xungetano hi Jehova ni N’wana wakwe. A ndlela yinwani ya lisima ya ku kuma wutivi ga Nungungulu kuzwa litsako li tako hi ku hanya hi lezi hi zi gonzako ha yena. A vapostoli va mahile lezo, hakuva Jesu i lo engeta a khongela aku: “Nzi va nyikile a timhaka leti u nzi nyikileko tona; va ti amukele.” (Joh. 17:8) Kanilezi, kasi va kuma wutomi ga pinzukelwa, va wa fanele ku simama va ehleketa hi timhaka ta Nungungulu va tlhela va hanya hi tona siku ni siku. Xana a vapostoli lavo vo tsumbeka va zi kotile a ku maha lezo kala kugumeseni ka wutomi gabye laha misaveni ke? Handle ko kanakana. Hi wula lezo hakuva a vito ga munwe ni munwani wabye gi tsalilwe ka khume ga ziseketelo ni zimbiri za Jerusalema Giswa ga le tilweni lezaku gi tshama kala kupinzuka. — Kuv. 21:14.

 7. Zi wula yini a “ku tiva” Nungungulu, niku hikuyini zi nga za lisima?

⁷ Hi kuwula ka titlhari to hlola lirimi la xiGreki, a gezu ga xiGreki gi hunzuluselweko ku “ku tiva” gi nga hunzuluselwa kambe giku “u fanele ku simama ku tiva” kutani ku “u fanele kuya mahlweni u tiva.” A mitlhamuselo leyi ya yimbiri a yi siyani niku yontlhe nja lisima. Hikwalaho, a “ku tiva” loku ku kumbukiwako ka vesi legi, ku wula a ku ti karata ko simama, ni koya mahlweni, loku ku mahako munhu a “tiva” Nungungulu. Hambulezo, a ku tiva Loyi a hunzeleleko kutlakuka wuakweni gontlhe zi patsa zotala a ku hunza ku tiva matshamela ya Nungungulu ni kungo gakwe hi hloko. A ku tiva Jehova zi patsa a ku bohana naye hi liranzo zinwe ni maKristu-kuloni. A Biblia gi tlhamusela lezi: “Loyi a nga ranziko a nga mu tivi Nungungulu.” (1 Joh. 4:8) Hikwalaho, a ku tiva Nungungulu zi patsa a ku mu ingisa. (Gonza 1 Johani 2:3-5.) Hi nga wona a lungelo legi go hlamalisa ga ku hlayiwa kota loyi a tivako Jehova! Kanilezi, khwatsi hi lezi zi nga maheka ka Judasi Iskarioti, a kuzwanana loko ko hlawuleka ku nga lahleka. A hi ti karateleni a ku ku hlayisa. Hi kugumesa, hi ta ringanelwa hi ku kuma a xinyikiwo lexi xo kala xi nga hi ringani xa wutomi ga pinzukelwa. — Mat. 24:13.

8, 9. Ku’ve wihi nchumu wa hombe ka yontlhe lowu Jesu a nga karatekela wona wutirelini gakwe laha misaveni, niku hi wihi a mukhuwo wa wukhongeli lowu a wu alileko?

⁸ Anzhako ka ku gonza a mukhongelo wa Jesu wu nga ka Johani xipimo 17, himani a nga wa ta kanakana hi liranzo lo eta la Jesu, na ku nga hi ka vapostoli vakwe ntsena lava va nga hi kona laho, kanilezi ni ka vontlhe lava va nga wa tava vapizani vakwe xikhatini xi nga hata ke? (Joh. 17:20) Hi fanele ku zi tiva kambe lezaku, a kuponiswa ka hina, a hi wona nchumu wo ranga lowu Jesu a nga karatekela wona. A kungo gakwe ga hombe ka wontlhe kusukela kusanguleni kala kugumeseni ka wutireli gakwe laha misaveni ku wa hi kubasiswa ni kudumiswa ka vito ga Dadani wakwe. Hi xikombiso, a xikhati lexi a nga tivisa a ntiro wakwe na a hi lomu sinagogeni ga Nazareta, Jesu i lo gonza a bhuku ga Isaya aku: “A moya wa [Jehova] wu le hehla ka mina, hakuva [i] nzi totile a kuva nzi kanela a mahungu yo saseka ka lava va vumalako.” Handle ko kanakana, Jesu i fanele ku ngha a wulile a vito ga Nungungulu giku dlunya a xikhati lexi a nga lera a mutsalo lowu wu nga komba ntiro wakwe. — Luka 4:16-21.

⁹ Hi kuya hi mukhuwo wa vaJuda, na ka ha kiyela malembe yo tala kasi Jesu ata laha misaveni, a varangeli va wukhongeli va wa beletela vanhu a ku tirisa vito ga Nungungulu. A hi kanakani lezaku Jesu i alile hi kutiya a mukhuwo lowo wu nga zwananiko ni Mitsalo. I lo byela a valala vakwe aku: “Nzi tile hi vito ga Dadani, a mu nzi amukeli; kasi loku ata munwani hi vito gakwe yena nwinyi, yena mu ta mu amukela.” (Joh. 5:43) Anzhako ka lezo, xikhatanyana mahlweni ka kufa kakwe, Jesu i lo kombisa a nchumu wa hombe lowu a nga karatekela wona wutomini gakwe hi ku khongela aku: “Dadani, dumisa a vito ga wena.” (Joh. 12:28) Hikwalaho, hi nga hlamali lezi Jesu a kombisileko a kukarateka loku hi vito ga Dadani wakwe mukhongelweni wontlhe lowu hi gonzako ha wona zalezi.

10, 11. (a) Zini zi nga patseka ka kuva Jesu a tivekisa a vito ga Dadani wakwe? (b) Xana a vapizani va Jesu va fanele ku tirela kungo muni?

¹⁰ Jesu i lo khongela aku: “Nzi wonekelisile a vito ga wena ka vanhu lava u va tekileko tikweni u nzi nyika vona; va wa hi va wena, zonake u nzi nyikile vona; va yi hlayisile a mhaka ya wena. A nza ha hi tikweni, kanilezi vona va ha hi tikweni; mina nzita ka wena. Dadani wa ku Basa, va hlayise vitweni ga wena legi u nzi nyikileko gona, kasi va fela ku tshama munwe, khwatsi hi hina hi nga munwe.” — Joh. 17:6, 11.

¹¹ A ku tivekisa a vito ga Dadani wakwe ka vapizani vakwe zi wa patsa zotala a ku hunza a ku gi wula hi nomu ntsena. Jesu i va vunile kambe a ku tiva lezi a vito ga Nungungulu gi zi yimelako, ku nga matshamela yo hlamalisa ya Nungungulu ni lezi a tirisanisako zona na hina. (Ekso. 34:5-7) Tlhatakumbiri, na a hi xikhundleni xakwe xo dzunzeka le tilweni, Jesu wa ha simama ku vuna vapizani vakwe lezaku va tivekisa a vito ga Jehova misaveni yontlhe. Na a hi ni kungo muni ke? I lava lezaku ku hlengeletwa vapizani votala na kugumesa ka tiko legi ga kubiha ku nga se chikela. Hi nga wona a vito go hlamalisa legi Jehova a to ti mahela xikhatini lexo, laha a ta nga tlhatlhisa a timboni takwe to tsumbeka! — Ezek. 36:23.

12. Zilo muni za zinharu zi lavekako ka hina lezaku hi humelela ntirweni lowu wu ponisako wutomi ke?

¹² Na a ha hi laha misaveni, Jesu i lo ti karata nguvu kasi ku vuna vapizani vakwe lezaku va hlula a gome gabye. Kunene, va wa fanele ku hlula gome kasi va zi kota ku mbhetisa ntiro lowu Jesu a nga wu sangulile. Jesu i lo khongela aku: “Kota lezi u nga nzi ruma tikweni, hizalezo nzi va rumile tikweni.” Jesu i khanyisa a zilo zinharu za lisima kasi va zi kota ku humelela ntirweni lowu wu ponisako wutomi. A xo sangula, i khongelela lezaku a vapizani vakwe va ngavi va tiko ga Satani gi nga basangiko. Xa wumbiri, i khongelela lezaku va basiswa, kutani ku tshama na va basile, hi ku hanya hi lisine la Mhaka ya Nungungulu. Xa wunharu, i kombela hi kuphindaphinda lezaku a vapizani vakwe va bohana hi xiboho xa liranzo lexi xi nga kona xikari ka Jesu ni Dadani wakwe. Lezo zi lava ku hi ti hlola. A munwe ni munwani wa hina i fanele ku ti wutisa lezi: ‘Xana nza hanya hi kuyelana ni zikombelo lezi za Jesu za zinharu ke?’ Loku hi veka kupima ka hina ka zilo lezi, Jesu i kombisa kutsumba kakwe hi ku wula magezu lawa yaku, “a tiko gi ta kholwa lezaku u nzi rumile.” — Gonza Johani 17:15-21.

13. Xana a mukhongelo wa Jesu wu hlamulisilwe kuyini ka zana ga malembe go sangula Nguveni ya Hina?

¹³ Hi nga zi wona lezaku a mukhongelo wa Jesu wu hlamulilwe hi ku gonza a bhuku ga Mitiro ya Vapostoli. A maKristu ya zana ga malembe go sangula ma wa wumbiwa hi vaJuda ni Vamatiko, vanhu va fumileko ni zisiwana, tikhumbi ni vanhu va nga hi ni tikhumbi. Ehleketa hi kuhambana loku ku nga wa ta ngha ku humelele hi kota ya kuhambana loku ka ziyimo! Hambulezo, vontlhe va lo bohana nguvu laha ka kuza va fananiswa ni ziro zo tsalangana za miri wa munhu na Jesu kota hloko yabye. (Efe. 4:15, 16) Kunene, a kubohana loku xihlamaliso xa hombe tikweni legi ga Satani gi nga hiko na kuzwanana! A wudzunzo gontlhe gi fanele kuya ka Jehova, loyi a tirisako a moya wakwe wa ku basa wa ntamu lezaku kuva ni kubohana loku. — 1 Kor. 3:5-7.

14. A mukhongelo wa Jesu wu hlamuliswa kuyini masikwini ya hina ke?

¹⁴ Lexi xi nga tsakisiko hi lezaku zalezo a vapostoli va ngafa, a zilo zi lo onheka. Kota lezi zi nga sina zi profetilwe, ku lo nghena wuhluwuki, legi gi nga pswala a mitlawa yo tsalangana ya wuKristu ga mawunwa. (Miti. 20:29, 30) Kanilezi hi 1919, Jesu i lo tlhatlhisa a valanzeli vakwe va totilweko wukhumbini ga wukhongeli ga mawunwa zonake a va tlhanganyisa ka “xiboho xa kumbhelela.” (Kol. 3:14) Xana a ntiro wabye wa kuxumayela wu’ve ni wuyelo muni misaveni yontlhe ke? A ku hunza 7.000.000 ta lava va “tiyivu tinwani” va humako ka “matiko wontlhe, ni tixaka, ni mifumo, ni tirimi” va tlhanganyiswa ni vatotilweko va Nungungulu ka ntlhambi munwe wu nga ni kubohana. (Joh. 10:16; Kuv. 7:9) Hi nga wona a hlamulo lowu wa sasekela ga cima wa mukhongelo wa Jesu wa lezaku, “kasi a tiko gi fela ku zi tiva lezaku [wena Jehova] u nzi rumile, niku, u va ranzile kota lezi u nzi ranzileko”! — Joh. 17:23.

15. Xikombelo muni xo hlawuleka lexi Jesu a mahelako a vapizani vakwe va totilweko?

¹⁵ Zalezo a wusiku ga 14 ka Nisani na ga ha sangula, Jesu i lo dzunza a vapostoli hi ku maha navo a xivumelwano xa ku fuma zinwe navo Mufunweni wakwe. (Luka 22:28-30; Joh. 17:22) Na a karatekela lava va nga wa tava valanzeli vakwe va totilweko, Jesu i khongela aku: “Dadani, nzi ranza lezaku lava u nzi nyikileko vona, na vonawu va fela ku tshama na mina laha nzi nga kona; kasi va fela ku wona a kungangamela ka mina loku u nzi nyikileko kona; hakuva u nzi ranzile na yi nga se ku vangiwa misava.” (Joh. 17:24) Lezi zi vanga litsako, na ku nga hi xiluse, ka tiyivu leti tinwani ta Jesu ni kuva xikombiso xinwani xa kubohana ku nga kona xikari ka maKristu wontlhe ya lisine ma nga laha misaveni nyamutlha.

16, 17. (a) Kutiyimisela muni loku Jesu a ku kombisileko kugumeseni ka mukhongelo wakwe? (b) Xini hi faneleko ku ti yimisela ku maha?

¹⁶ Hi ku kucetelwa hi varangeli vabye va wukhongeli, a kutala ka vanhu nyamutlha tikweni va kanyisa ha womu a xikombiso xo dlunyateka xa lezaku Jehova i na ni vanhu vo bohana ni kuzwanana lava hakunene va mu tivako. Ni masikwini ya Jesu zi wa tshamisile zalezo. Hikwalaho, i gumesa mukhongelo wakwe hi magezu lawa yo kufumela ni yo tsakisa yaku: “Dadani wa nongameto, a tiko a gi ku tivangi, kanilezi mina nzi ku tivile; na vona lava va zi tivile lezaku u nzi rumile. Nzi va tivisile a vito ga wena, nza ha ta gi tivekisa; kasi a liranzo leli u nzi ranzileko ha lona li fela ku tshama ka vona, na mina nzi hi ka vona.” — Joh. 17:25, 26.

¹⁷ Himani a nga xinyatako a kaneta lezaku Jesu i hanyile hi kuyelana ni mukhongelo wakwe ke? Kota Hloko ya bandla, yena i simama ku hi vuna ku tivekisa a vito ni kungo ga Dadani wakwe. Ngha hi simama ku ti koramisa ka wuhloko gakwe hi ku ingisa a xileletelo xakwe xa ku xumayela ni ku maha vapizani hi kuhiseka. (Mat. 28:19, 20; Miti. 10:42) Ngha hi ti karatela kambe a ku hlayisa a kubohana ka hina ka lisima. Loku hi maha lezo, hi ta ngha hi hanya hi kuyelana ni mukhongelo wa Jesu, kasi ku dumiswa a vito ga Jehova hi tlhela hi kuma litsako la pinzukelwa.