Xana a kuwulawula ka wena — “I ‘Ina’ ni ‘Ahihi’”?

Wona xinwani xiyimo: A mamani wo kari a wundlako vana vambiri na a hi yece i rambiwa hi patswa wa laha bandleni gakwe lezaku aya mutini wabye ni gambo. Laha a nga byela vanana vakwe a mhaka leyi, a vanana va lo tala hi kutsaka. Va wa rinzela siku lego hi mahlo yo pswhuka. Kanilezi, na ka ha kiyela siku ginwe kasi vaya seyo, a patswa lowu wu lo byela mamani loyi lezaku ku humelele nchumu wo kari hi xitshuketi hikwalaho va kurumeteka ku thinda a xirambo lexi. Anzhako ka xikhati, a wasati loyi i lo tiva lexi xi nga va maha va mu thinda. Anzhako ka loku va rambile a wasati loyi, a patswa lowu wu lo rambiwa hi vanghana vo kari lezaku wuya mutini wabye ka siku gwalego ni gambo va su vumela.

Hakunene, kota maKristu, hi fanele ku wulawula lisine. A kuwulawula ka hina ku nga tshuki kuva ‘ina’ ni ‘ahihi.’ (2 Kor. 1:18) Hambulezo, khwatsi hi lezi zi kombiswako hi zimaho lezi za zimbiri, a hi zontlhe ziyimo zi fanako. Ku nga hava ni zikhati lezi zi wonekisako ku khwatsi a hi na xinwani xo maha ahandle ka ku thinda makungo lawa hi nga ma mahile. Mupostoli Paule i tshukile a ti wona ka xiyimo lexi.

Hi 55 Nguveni ya Hina, Paule na a hi Efesusi lipfhumbeni lakwe la wunharu la wurumiwa, i lo boha ku tsemakanya Bimbi ga Egeu aya Korinte a tlhela aya Makedonia na a suka hi laho. Na a wuya Jerusalema, i lo boha ku enzela bandla ga le Korinte hi khati ga wumbiri kasi ku ya hlengeleta a xinyikiwo xabye lexi va nga mahela vamakabye va le Jerusalema. (1 Kor. 16:3) A mhaka leyi ya dlunyateka ka 2 Va Le Korinte 1:15, 16, laha hi gonzako lezi: “Na nzi hi ni kutsumba loku nzi wa xuvile a kuta ka nwina kuranga, kasi ma fela kuva ni xinyikiwo xa wumbiri. Nzi wa lava ku hunza hi ka nwina nziya Makedonia, nzi tlhela nzi mu enzela kambe kuwuyeni ka mina hi le Makedonia, kasi ma nzi heleketa lwenzweni la mina la kuya Judia.”

Zi wonekisa ku khwatsi ka papilo go kari a nga sina a va tsalele, Paule i wa tivisile a vamakabye va le Korinte a kungo legi a nga hi nago. (1 Kor. 5:9) Hambulezo, xikhatanyana nzhako ka ku tsala papilo lego, Paule i lo bikelwa hi va ngango wa ka Kloe ni vanwani lezaku ku wa hi ni kukanetisana ka hombe lomu bandleni. (1 Kor. 1:10, 11) Paule i lo zi wona na zi hi chukwana a ku cica makungo yakwe yo ranga zonake a tsala papilo legi makunu hi gi vitanako ku i 1 Va Le Korinte. Ka papilo lego, Paule i lo va nyika wusungukati hi liranzo ni ku va kawuka. I lo wula kambe lezaku i wa cicile lezi a nga lava ku gi mahisa zona a pfhumba gakwe, a va tivisa ku i wa ta ranga hi kuya Makedonia anzhako ka lezo hi kona a nga wa taya Korinte. — 1 Kor. 16:5, 6.a

Zi wonekisa ku khwatsi a xikhati lexi a vamakabye le Korinte va nga amukela a papilo gakwe, a vo kari va “vapostoli lava va hombe” bandleni lego va lo mu lumbeta vaku a nga wulawuli lisine, ni ku nga tatisi a zitsumbiso zakwe. Na a ti yimela, Paule i lo wutisa aku: “Laha nzi nga xuva ku maha lezo, nzi lo maha wugangaganga ke? Kutani a zilo lezi nzi xuvako a ku zi maha, nzi xuva a ku maha zona khwatsi hi ka nyama ke? Loku nziku: Ina, ni Ahihi, zi kona ka mina khati ginwe ke?” — 2 Kor. 1:17; 11:5.

Hi nga ha wutisa lezi: Ka ziyimo lezi, xana mupostoli Paule ‘i wo maha wugangaganga ke?’ Ne ni kutsongwani! A gezu legi gi hunzuluselweko ku “wugangaganga” gi wula ku kanakana, ku khwatsi hi loku munhu a nga tsumbekangi, na a nga tatisi a zitsumbiso zakwe. A xiwutiso xa Paule xi nga laviko hlamulo xaku “nzi xuva a ku maha zona khwatsi hi ka nyama ke?” xi fanele ku ngha xi dlunyatisele maKristu ya le Korinte lezaku a xiboho xa Paule xa ku cica makungo yakwe ku wa nga hi lezaku i wa nga tsumbekangi.

Paule i lo ala hi kutiyileko a kulumbetwa loko hi ku tsala aku: “Kanilezi nza tiyisa hi kutsumbeka ka Nungungulu, lezaku a timhaka leti nzi ti wulako ka nwina a ti hunzukangi ti maha ta Ina ni Ahihi.” (2 Kor. 1:18) Handle ko kanakana Paule i wa hi ni mixuvo yi nene nguvu mbilwini xungetano hi vamakabye vakwe va xinuna ni va xisati le Korinte a xikhati lexi a nga cica a malulamiselo yakwe. Ka 2 Va Le Korinte 1:23 hi gonza lezaku ‘kuve ku va zwela wusiwana’ ku nga mu maha a cica a kungo gakwe go sangula ga kuya Korinte. Hakunene i lo va nyika xikhati xa ku lulamisa zilo na a nga se va enzela. Khwatsi hi lezi a nga zi rinzele, na a ha hi Makedonia, Paule i lo bikelwa hi Titusi lezaku a papilo gakwe handle ko kanakana gi va khumbile nguvu laha ka kuza va ti sola va hunzuluka. I lo tsaka nguvu hi kota ya lezo. — 2 Kor. 6:11; 7:5-7.

A xilumbeto lexi xaku i wa nga wulawuli lisine xi wa ta ngha xi nyikile maalakanyo yaku loku ku hi lezaku Paule i wa nga tatisi zitsumbiso zakwe wutomini ga siku ni siku, i wa nga ta tsumbeka kambe ntirweni wakwe wa kuxumayela. Hambulezo, Paule i lo alakanyisa va le Korinte lezaku i wa xumayele Jesu Kristu kabye. “A N’wana wa Nungungulu, yena Jesu Kristu, loyi a nga xumayelwa xikari ka nwina hi mina na Silvanusi na Timote, a nga mahangi wa Ina ni Ahihi, kanilezi a kakwe ku na ni Ina xontlhe xikhati.” (2 Kor. 1:19) Xana Jesu Kristu, a xiwonelo xa Paule, i wa nga tsumbekangi? Ahihi! Wutomini ni wutirelini gakwe gontlhe, Jesu i lo wulawula lisine xontlhe xikhati. (Joh. 14:6; 18:37) Loku ku hi lezaku lezi Jesu a nga zi xumayela zi wa hi lisine ni kuva zo tsumbeka ni loku Paule a xumayele a mahungu yalawo, makunu a kuxumayela ka mupostoli loyi konawu ku wa tsumbekile.

Kunene Jehova i “Nungungulu wa lisine.” (Tis. 31:5) Hi wona lezo ka magezu lawa Paule a nga ma tsala hi kulanzela aku: “Hambu loku a zitsumbiso za Nungungulu zi ngava zingani, a Ina wa zona ku kona ka yena,” ku nga lezaku wu kona ka Kristu. Lezi Jesu a hanyileko hi kutsumbeka laha misaveni a vumala xisolo zi fuvisa ni xihi xi nga wa ta vanga kukanakana xungetano hi zitsumbiso za Jehova. Paule i lo engeta aku: “Hi kota ya lezo hi wula Amen ha yena [Jesu], lezaku Nungungulu a dumiswa ha hina.” (2 Kor. 1:20) Jesu hi yena a xitiyisekiso xo woneka, kutani “Amen,” xa lezaku ni xihi lexi Jehova Nungungulu a xi tsumbisako xi ta tatiseka!

Khwatsi hi lezi Jehova na Jesu xontlhe xikhati va wulawulako lisine, Paule yenawu xontlhe xikhati i wa tatisa lezi a nga zi wula. (2 Kor. 1:19) I wa nga hi wa wugangaganga, wa ku tsumbisa zilo “hi ka nyama.” (2 Kor. 1:17) Kuhambana ni lezo, ‘i wa famba hi ka moya.’ (Gal. 5:16) Laha a nga tirisana ni vanwani, i wa va xuvela za zi nene mbilwini yakwe. A Ina wakwe i wa hi Ina!

Masikwini ya hina, zi tolovelekile ka vanhu lava va nga hanyiko hi matshinya ya milayo ya Biblia a ku maha zitsumbiso va gumesa va nga tatisi loku ku humelela xikarato xi tsongwani kutani ku tshuka ku humelela nchumu wo koka nguvu mahlo. Timhakeni ta mabhinzu, aku “ina” a hi xontlhe xikhati zi wulako ku “ina,” hambu loku a mhaka leyo va no yi tsala maphepheni. A votala a va ha woni wukati — gi nga xivumelwano xa vanhu vambiri — kota xiboho xa wutomi gontlhe. Wutshanwini ga lezo, a mitsengo yo tsema hlana ya wukati gi tlhatlhiwako siku ni siku yi komba lezaku a votala va wona wukati kota nchumu wo hlakana waku loku a manziko va nga ha gi lavi vo tlhatlha. — 2 Tim. 3:1, 2.

Ahati wena ke? A Ina wa wena i Ina hakunene? Lisine lezaku, khwatsi hi lezi hi nga zi wona ka xipanze xo sangula xa nzima leyi, ku nga tshuka ku humelela zilo zi ku kurumetako a ku thinda a makungo u nga ma mahile ni wokari, na ku nga hi lezaku wo kala u nga wulawuli lisine, kanilezi hi kota ya ziyimo zo kari u nga hiko ni ntamu wa ku zi vala. Kanilezi, kota muKristu, loku u tsumbisa zokari kutani ku maha makungo, u fanele ku maha zontlhe zi nga ntanwini wa wena kasi ku tatisa makungo lawo. (Tis. 15:4; Mat. 5:37) Loku u maha lezo, u ta tiviwa kota munhu wo tsumbeka, loyi xontlhe xikhati a wulawulako lisine. (Efe. 4:15, 25; Jak. 5:12) A xikhati lexi a vanhu va tivako lezaku u munhu wo tsumbeka zilweni za siku ni siku, kuzilava va ta demba ndleve va ku ingisela laha u va bhulelako a lisine xungetano hi Mufumo wa Nungungulu. Hikwalaho, a hi ti karateleni ku a Ina wa hina ava Ina hakunene!