Vaswa mu longile ku bapatizwa ke?

1, 2. a) Xini xi nyikako litsako ka vanhu va Nungungulu nyamutlha? b) A vapswali ni madota ya wuKristu va nga vunisa kuyini vaswa a ku zwisisa lezaku a ku bapatizwa zi wula yini?

“NZI ku wonile ni kupswaliwa, niku nza tsaka hi kuzwa lezaku u lava ku bapatizwa. Nzi na ni xiwutiso: ‘Hikuyini u lavako ku bapatizwa?’” A magezu lawa ma wulilwe hi dota go kari na gi bhula na Christopher, wa 12 wa malembe. Lexo xiwutiso xo zwala. Hikuyini? Lisine ku za hi tsakisa nguvu hontlheni a ku wona makume ya mazana ya vaswa lembe ni lembe na va bapatizwa misaveni yontlhe. (Mutsh. 12:1) Hambulezo, a vapswali ni madota ya maKristu lomu bandleni va lava ku tiyiseka lezaku a vaswa lavo va mahile xiboho lexo hi kuziranza niku xi na ni xiseketelo xo tiya ke.

² A Mhaka ya Nungungulu yi komba lezaku a kutihendleleta ni kubapatizwa zigava zo sangula za wutomi ga muKristu, laha a to kuma makatekwa ya Jehova, a tlhela a vukelwa hi Satani. (Mav. 10:22; 1 Ped. 5:8) Hikwalaho, a vapswali va maKristu va ti nyika xikhati xa ku gonzisa vana vabye lezi a kuva mupizani wa Kristu zi wulako zona. Xungetano hi vaswa lava va nga hava vapswali va maKristu, a madota lomu bandleni ma ta va vuna hi liranzo lezaku va hlayela a ntsengo kutani ku zwisisa lezi a kuva mupizani zi wulako zona. (Gonza Luka 14:27-30.) A ku fana ni yindlu yi lavako ku mahelwa makungo kasi ku yi aka yi mbhela, loku u lava ku tirela Jehova hi kutsumbeka ‘kala magumo,’ u fanele ku ti longisela. (Mat. 24:13) Kanilezi, zini lezi a vaswa va nga mahako kasi va ti yimisela ku tirela Jehova wutomini gabye gontlhe ke? A hi zi woneni.

 3. a) A magezu ya Jesu na Pedro ma hi gonzisa yini xungetano hi lisima la kubapatizwa? (Mat. 28:19, 20; 1 Ped. 3:21) b) Ziwutiso muni hi to zi kambisisa, niku hikuyini?

³ U muswa a alakanyelako ku bapatizwa ke? Loku zi hi nghaho, za dzunzeka! I lungelo ga hombe a ku bapatizwa kota Mboni ya Jehova. Tlhatakumbiri, a ku bapatizwa xilaveko ka maKristu, niku i zambo ga lisima kasi ku hanyiswa. (Mat. 28:19, 20; 1 Ped. 3:21) Kota lezi u ti yimiseleko ku tatisa a xitsumbiso lexi u lavako ku xi maha ka Jehova, u fanele kuba zambo lego na u longile khwatsi. Hikwalaho, zi nene kuva u ehleketa hi ziwutiso zinharu lezi zi to ku vuna ku wona lezaku u longile ku bapatizwa hakunene ke. 1) Nzi buvile khwatsi kasi ku maha xiboho lexo? 2) Nzi maha lezo hi kuziranza? 3) Nza zi zwisisa lezaku a ku ti hendleleta ka Jehova zi wula yini ke? A hi kambisiseni a ziwutiso lezi hi xinwe xinwe.

4, 5. a) Hikuyini ku nga hiko vanhu va hombe ntsena va ringanako ku bapatizwa? b) Zi wula a kubuva?

⁴ A Biblia a gi wuli lezaku a vanhu va hombe kutani lava va chikeleko ka tanga yo ringana ku kuma tifanelo to kari hi kuya hi nayo wa tiko hi vona voce va faneleko ku bapatizwa. Ka Mavingu 20:11, hi gonza lezi: “Hambu a nwanana i ta tibyiwa hi zimaho zakwe, loku mitiro yakwe yi basile, kutani yi lulamile.” A munhu a nga zi zwisisa na a ha hi mu tsongwani lezaku a ku maha za zi nene ni ku ti hendleleta ka Muvangi wakwe zi wula yini. Hikwalaho, a ku bapatizwa i zambo ga lisima legi a muswa a nga gi tekako loku a kombisa kubuva ko kari a tlhela a ti hendleleta ka Jehova. — Mav. 20:7.

⁵ A ku buva zi wula yini? A ku buva a zi wuli ku kula miri ntsena. A Biblia gi wula lezaku a vanhu va buvileko ‘va tolovele ku tirisa a kupima kabye va kala va zi kota ku hambanyisa a kusaseka ni kubiha.’ (Maheb. 5:14) Hikwalaho, a vanhu vo buva va zi tiva lezi zi nga zi nene kuwoneni ka Jehova niku mbilwini yabye va ti yimisele ku hanya hi zona. Kota wuyelo ga kona, a va vumeli ku petiwa kubiheni; ne a vazi va lava ku tshama hi ku alakanyisiwa kasi ku maha za zi nene. Hakunene, hi na ni xigelo xo zwala xa ku tsumba lezaku a muswa a bapatizwako i ta namarela ka matshinya ya milayo ya Nungungulu hambu loku a vapswali vakwe kutani vanhu vanwani va kulileko va nga hi kona laha kusuhani. — Ringanisa ni Va Le Filipi 2:12.

6, 7. a) Hlawutela a mitlhamu leyi Danieli a nga dembelwe le Babuloni. b) Danieli i kombisile kuyini lezaku i wa buvile?

⁶ Xana a vaswa va nga kombisa kubuva loko hakunene? Ehleketa hi xikombiso xa Danieli. A xikhati lexi a nga wutliwa ka vapswali vakwe a yiswa wukhumbini le Babuloni, kuzilava i wa ha hi ku nghena tangeni yo sangula ku ti tshotshota. Hi kutsopeta ka tihlo, Danieli i lo sangula ku hanya xikari ka vanhu va nga hi ni mawonela yo hambana nguvu xungetano hi lezi zi nga zi nene ni lezi zi bihileko. A ku hunza lezo, Danieli i wa dembelwe ntlhamu wunwani kambe: I wa woniwa kota munhu wo hlawuleka le Babuloni. I wa hi munwe wa majaha ma nga hlawulilwe kasi ku tira lomu ndlwini ya hosi! (Dan. 1:3-5, 13) Zi wonekisa ku khwatsi le Babuloni, Danieli i wa nyikilwe malungelo yaku i wa nga ta tshuka a ma kuma le Israeli.

⁷ Danieli i zi khomisile kuyini zontlhe lezo? Xana i vumele ku xengiwa hi ziphatiphati ni wudzunzo ga Babuloni? I tsikile ziyimo lezo za ziswa zi cica wumunhu gakwe kutani ku daya kukholwa kakwe ke? Kokwihi! A Biblia gi wula lezaku le Babuloni, Danieli “i lo funga mbilwini yakwe lezaku a nga ta ti nyenyezisa” hi ni wihi nchumu wu yelanako ni wukhozeli ga mawunwa. (Dan. 1:8) Danieli i kombisile kubuva ka hombe nguvu!

 8. U nga gonza yini ka xikombiso xa Danieli?

⁸ U nga gonza yini ka xikombiso xa Danieli? A munhu wo buva i tiyile ka lezi a zi kholwako. A nga fani ni luvani, leyi yi cicacicako mivala kasi ku ti zwananisa ni laha yi nga kona. A nga mahi munghana wa Nungungulu Salawini ya Mufumo, a tlhela a maha munghana wa tiko loku a hi xikoleni. Wutshanwini ga ku vumela ku ndlengandlengiswa, i yima a tiya loku a ringwa. — Gonza Va Le Efesusi 4:14, 15.

9, 10. a) A muswa a nga vunekisa kuyini hi ku ehleketa hi lezi a mahileko ka ziringo a kumeneko nazo ka masikwana lawa ke? b) A ku bapatizwa zi wula yini?

⁹ Hakunene, hontlheni a hi mbhelelangi; kani hi vaswa, kani hi vanhu va hombe, hontlheni ha tshuka hi maha zihoxo. (Mutsh. 7:20) Hambulezo, a xikhati lexi u alakanyelako ku bapatizwa, zi wa tava wutlhari a ku ti hlola mbilwini ya wena kasi ku wona lezaku hakunene u ti yimisele ku hanya hi matshinya ya milayo ya Jehova ke. U nga zi mahisa kuyini? Ti wutise lezi, ‘Hi xihi xiyimo xa mina loku zita mhakeni ya ku namarela ka matshinya ya milayo ya Nungungulu?’ Ehleketa hi lezi u nga maha ka ziringo za kukholwa u kumeneko nazo ka masikwana lawa. U kombisile lezaku u nago wutlhari legi gi lavekako kasi ku hambanisa a kusaseka ni kubiha? Ahati loku u woniwa kota munhu wo hlawuleka tikweni ga Satani, a ku fana na Danieli? Wa zi kota ku simama u ‘pima lezaku xini a kuranza’ ka Jehova hambu loku ku hambene ni lezi u ringwako ku maha ke? — Efe. 5:17.

¹⁰ Hikuyini hi mahako ziwutiso lezi? Zi mahelwa ku ku vuna ku zwisisa lezaku a ku bapatizwa a hi xiboho xo hlakana hi xona. Kota lezi hi zi wonileko kusanguleni, a kubapatizwa xikombiso xa lezaku u mahile xitsumbiso ka Jehova wutsumbu. U mu tsumbisa ku mu ranza ni ku mu tirela kala kupinzuka hi mbilu ya wena yontlhe. (Mar. 12:30) Ni wihi loyi a bapatizwako i fanele ku ngha a ti yimisele ku tatisa xitsumbiso xakwe. — Gonza Mutshawuteli 5:4, 5.

11, 12. a) Zini lezi a munhu a alakanyelako ku bapatizwa a faneleko ku tiyiseka hi zona? b) Xini xi to ku vuna ku simama uva ni wonela gi nene hi lulamiselo ga Jehova ga kubapatizwa?

¹¹ A Biblia gi wula lezaku a vanhu va Jehova, a ku patsa ni vaswa, va ta ti hendleleta “hi litsako” kasi ku mu tirela. (Tis. 110:3) Hikwalaho, a munhu a alakanyelako ku bapatizwa i fanele ku tiyiseka lezaku zi sukela mbilwini. Lezo zi lava kuva u ti hlola khwatsi. Hikuyini? Kuzilava u muswa a nga ka xiyimo xo hlawuleka hi ndlela yo kari. Hi xikombiso, za koteka ku ngha u kulele lisineni.

¹² Kukuleni ka wena, kuzilava u wonile vanhu vo tala na va bapatizwa — a ku patsa ni vaswa-kuloni kutani vamakabye va wena. Loku zi tshamisile lezo, ti wonele ku tshuka u alakanya lezaku a ku bapatizwa xipanze xa kukula lexi a vaswa vontlhe va to hunza hi ka xona. U nga maha yini kasi u tiyiseka lezaku u ta simama kuva ni wonela gi nene hi lulamiselo ga Jehova ga kubapatizwa? Tolovela ku ti nyika xikhati xa ku nyima u ehleketa hi zigelo za kuva a kubapatizwa ku hi ka lisima nguvu. Kunene, a nzima leyi ni leyi yi lanzelako ti komba zigelo zo tala za zi nene.

13. U nga zi tivisa kuyini lezaku a xiboho xa wena xo lava ku bapatizwa xi huma mbilwini?

¹³ Ku na ni tindlela to tala ta ku wona lezaku a xiboho xa wena xa ku lava ku bapatizwa xi huma mbilwini ke. Hi xikombiso, a kuxuva ka wena ko lava ku tirela Jehova ku ta woneka ka mikhongelo ya wena. A ntsengo wa zikhati u khongelako ni lezi u wulako ka mikhongelo ya wena zi ta komba lezaku a wunghana ga wena na Jehova gi tiyile ku kota kwihi. (Tis. 25:4) A yinwe ya tindlela ta lisima leti Jehova a hlamulako hi tona a mikhongelo ya hina ku hi kongomisa Mhakeni yakwe. Hikwalaho, a kutikarata loku hi ku mahako kasi ku gonza Biblia xikombiso xinwani xa lezaku hakunene ha zi lava ku tshinela ka Jehova ni ku mu tirela hi mbilu yontlhe. (Jox. 1:8) Hi xigelo lexo, ti wutise lezi: ‘Xana nza wulawula zilo zo kongoma ka mikhongelo ya mina? Nza maha xigonzo xa Biblia hi kukhanzakanya ke?’ Niku loku mu hi ni longoloko wa Wukhozeli ga Ngango laha kaya, ti wutise lezi: ‘Nza seketela lulamiselo lego hi kuziranza ke?’ A mihlamulo ya wena ka ziwutiso lezi yi ta ku vuna ku wona lezaku a xiboho xa wena xo lava ku bapatizwa xi huma mbilwini ke.

14. Tlhamusela a kuhambana ku nga kona xikari ka kutihendleleta ni kubapatizwa.

¹⁴ A vokari a va ku woni kuhambana xikari ka kutihendleleta ni kubapatizwa. Hi xikombiso, a vaswa vo kari va wula lezaku va ti hendleletile ka Jehova kanilezi a va se longa ku bapatizwa. Za wulawula lezo? A ku ti hendleleta zi wula ku byela Jehova lezaku u ta mu tirela kala kupinzuka. A xikhati a bapatizwako, a munhu i komba vanwani lezaku i ti hendleletile. Hikwalaho, a ku bapatizwa ku komba vanwani a kutihendleleta loku u sinako u ku mahile wece ka Jehova hi mukhongelo. Na u nga se bapatizwa, u fanele ku tiyiseka lezaku wa zi zwisisa lezi a kutihendleleta zi wulako zona.

15. A ku ti hendleleta zi wula yini?

¹⁵ Hi magezu ma tsongwani, a ku hendleleta wutomi ga wena ka Jehova zi wula ku ti tsika mandleni yakwe. U tsumbisa Jehova lezaku u ta rangisa kuranza kakwe mahlweni ka zilo zontlhe wutomini ga wena. (Gonza Mateu 16:24.) Kova ni xihi lexi munhu a tsumbisako i fanele ku chela kota hi xona, kanilezi a ha ha wuli hi lezi a tsumbisako Jehova Nungungulu! (Mat. 5:33) Kanilezi, u nga kombisa kuyini lezaku hakunene u ti tsikile niku zalezi u lumba Jehova? — Rom. 14:8.

16, 17. a) Kombisa lezi a ku ti nyikela ka Jehova zi wulako zona. b) Loku a munhu a ti hendleleta zi fana ni loku aku yini?

¹⁶ Kasi ku kombisa, hi nga ti alakanyela na u nyikiwa mova hi munghana wa wena. I ku nyika a maphepha ya wona aku: “A mova lowu wa wena.” Hambulezo, ahati loku a gumesa aku: “A tipfhungulo nzi ta tshama nato. Hi mina nzi to fambisa mova lowu, a hi wena.” U wa ta xi wonisa kuyini a “xinyikiwo” lexo? Kona u wa ta mu wonisa kuyini loyi a ku nyikako?

¹⁷ Makunu ehleketa hi lezi Jehova a zi rinzelako ka munhu a ti hendleletako kakwe, aku: “Nza ku nyika wutomi ga mina. Nzi wa wena.” Ahati loku a munhu loye o sangula ku hanya wutomi gimbiri, kuzilava a ranzana ni munhu a nga kholwiko xihundleni? Ahati loku o vumela ntiro wu hungulako ntiro wakwe wa kuxumayela kutani wu mu valelako kuya mitlhanganweni ya wuKristu? Xana lezo a zi fani ni ku tshama ni tipfhungulo ta mova? Phela a ku ti hendleleta ka Jehova zi fana ni ku mu byela ku: “A wutomi ga mina gi lumba wena a ku hunza mina nwinyi. Loku lezi u zi lavako zi tshuka zi hambana ni lezi mina nzi zi lavako, nzi ta maha lezi wena u zi lavako — xontlhe xikhati.” Lezo zi zwanana khwatsi ni lezi Jesu a nga wula a xikhati a nga hi laha misaveni, aku: “Nzi relele hi le tilweni, na ku nga hi lezaku nzi maha kuranza ka mina, kanilezi ku maha kuranza ka loyi a nzi rumileko.” — Joh. 6:38.

18, 19. a) A magezu ya Rose na Christopher ma kombisa kuyini lezaku a ku bapatizwa i lungelo gi nehako makatekwa? b) U gi wonisa kuyini a lungelo ga kubapatizwa?

¹⁸ Zi te dlunya lezaku a kubapatizwa xiboho xa lisima nguvu; a nga kona a faneleko ku xi wona kota nchumu wo hlakana hi wona. Hambulezo, i lungelo ga hombe a ku ti hendleleta ni ku bapatizwa. A vaswa lava va ranzako Jehova va tlhela va zwisisa lezi a ku ti hendleleta zi wulako zona a va chavi ku bapatizwa; a va tshuki va ti laya kambe hi xiboho lexo. A muswa wo kari a bapatizilweko, a vitwako Rose, i ngalo: “Nza mu ranza Jehova niku a ku na nchumu wunwani wu nga wa ta nzi tsakisa ku hunza ku mu tirela. A ku na nchumu wunwani nzi nga tshuka nzi wu maha na nzi tiyiseka khwatsi a ku fana ni xiboho xa mina xa ku bapatizwa.”

¹⁹ Ahati Christopher, loyi a kumbukilweko le kusanguleni ka nzima? Xana a xiboho xo lava ku bapatizwa lexi a xi mahileko na a hi ni 12 wa malembe xi wa hi ni tshinya go tiya? Christopher i tsaka nguvu loku a ehleketa hi kutihendleleta kakwe ni kubapatizwa. I sangulile ku tira kota phayona ga xikhati xontlhe na a hi ni 17 wa malembe, niku laha a nga hi ni 18 wa malembe i lo yimisiwa kota nanza ga wutireli. Zalezi i tira Beteli. I ngalo: “A ku bapatizwa xive xona xiboho xa xi nene. A wutomi ga mina gi tele hi mitiro yo tsakisa nzi mahelako Jehova ni hlengeletano yakwe.” Loku u alakanyela ku bapatizwa, u nga ti longiselisa kuyini? A nzima yi lanzelako yi ta hlamula xiwutiso lexi.