ZIWUTISO ZA VAGONZI

Ka zana ga malembe go sangula Nguveni ya Hina, mupostoli Paule i byelile a madota lawa ma nga tira bandleni ga le Efesusi aku: “Ti woneleni nwina, ni ka ntlhambi wontlhe, lowu a moya wa ku basa [wu] nga mu veka vahlayisi va wona, a ku gisa a bandla ga Hosi, legi yi gi xavileko hi nkhata wa yona.” (Miti. 20:28) I ntiro muni lowu a moya wa ku basa wu mahako nyamutlha kuyimiseni ka madota ni malanza ya wutireli ke?

Xo sangula, a moya wa ku basa wu susumetile a vatsali va Biblia lezaku va tsala lezi zi lavekako ka madota ni malanza ya wutireli. Ka 1 Timote 3:1-7 ku xaxametilwe a 16 wa matshamela yo hambana ma lavekako ka madota. A matshamela manwani ma lavekako ma kumeka ka mitsalo yo kota Titusi 1:5-9 na Jakobe 3:17, 18. A matshamela ma lavekako ka malanza ya wutireli ma tsalilwe ka 1 Timote 3:8-10, 12, 13. Xa wumbiri, lava va nyikako mawonela ni ku yimisa, va kombela a moya wa Jehova kasi wu va kongomisa a xikhati lexi va hlolako lezaku a makabye loye wa kombisa hi ndlela yo woneka a matshamela lawa ma lavekako hi kuya hi Mitsalo ke. Xa wunharu, a munhu loyi a alakanyelwako i fanele ku kombisa mbhanzu wa moya wa ku basa wa Nungungulu wutomini gakwe. (Gal. 5:22, 23) Hikwalaho, a moya wa Nungungulu wa patseka ka zilo zontlhe zi mahiwako ntirweni lowu.

Kanilezi hi mani hakunene a yimisako a vamakabye lavo ke? Xikhatini xi hunzileko, a mawonela wontlhe xungetano hi kuva a wokari a yimiswa kota dota kutani nanza ga wutireli ma wa rumelwa ka hofisa ya ravi ya tiko lego. Le hofiseni ya ravi, a vamakabye va yimisilweko hi Hubye yi Fumako va wa hlola a mawonela lawo va tlhela va yimisa lava va ringanelwako. Hi kulanzela, a hofisa ya ravi yi wa tivisa a hubye ya madota. A madota wonawu ma wa tivisa a vavanuna lavo va ha hi ku yimiswako, ma va wutisa lezaku va vumela niku hakunene va ringanelwa hi ku amukela a xiavelo lexo ke. Hi kugumesa, ku wa tivisiwa bandla.

Kanilezi va wa yimisiswa kuyini ka zana ga malembe go sangula? Ka zikhati zo kari, a vapostoli va wa yimisa vanhu hi kukongoma, a ku khwatsi hi xikhati va nga yimisa ntlhanu wa vavanuna ni vambiri kasi ku wonelela a kuphakelwa ka zakuga ka tinoni siku ni siku. (Miti. 6:1-6) Hambulezo, a vavanuna lavo kuzilava va wa sina va tira kota madota, na va nga se nyikiwa a xiavelo lexo xo engeteleka.

Hambu lezi a Mitsalo yi nga tlhamuseliko zontlhe xungetano hi lezi a vavanuna va nga yimisiswa zona xikhatini lexo, ku na ni kuvululelwa kutsongwani ka lezi va nga mahisa zona. Hi byeliwa lezaku a xikhati lexi Paule na Barnabasi va nga kari va tlhela kaya lipfhumbeni labye lo sangula la wurumiwa, “va hlawulele a masingalakati [madota] mabandleni wontlhe, hi kukhongela ni kuyila, va lo va nyikela Hosini, leyi va nga kholwa ka yona.” (Miti. 14:23) Loku ku hunzile malembe, Paule i lo tsalela mutiri-kulobye Titusi aku: “Nzi ku siyile le Kreta lezaku u fela ku lulamisa a timhaka leti ti seleko, u yimisa masingalakati [madota] mitini yontlhe, kota lezi nzi nga ku laya.” (Titusi 1:5) Timote, loyi a enzileko nguvu na mupostoli Paule, zi wonekisa ku khwatsi yenawu i wa nyikilwe ntiro wo fana. (1 Tim. 5:22) Zi la su dlunya lezaku a kuyimiswa loko ku wa mahiwa hi vawoneleli va fambafambako, na ku nga hi vapostoli ni masingalakati le Jerusalema.

Hi ku lanza zikombiso lezi za lomu ka Biblia, a Hubye yi Fumako ya Timboni ta Jehova yi cicile lezi a madota ni malanza ya wutireli ma yimisiswako zona. Kusukela 1 ka Setembro wa 2014, a madota ni malanza ya wutireli ma yimisiswa lezi: A muwoneleli munwe ni munwani wa xipanze i hlola hi wukheta a mawonela ma nyikwako xungetano hi vanhu va nga yimiswako xipanzeni xakwe. Ka maenzo lawa a ma mahako mabandleni, i ta ti karatela ku tiva lava va alakanyelwako, a tira navo wutirelini loku zi koteka. Anzhako ka ku bhulisana ni madota ya bandla hi mhaka leyo, a muwoneleli wa xipanze i sala ni wutihlamuleli ga ku yimisa madota ni malanza ya wutireli ka mabandla ma nga xipanzeni xakwe. Hi ndlela leyo, a lulamiselo legi gi ta yelana nguvu ni lezi zi nga mahiswa zona ka zana ga malembe go sangula.

Himani a mahako a mitiro yontlhe leyo mhakeni leyi ke? Kota lezi zi nga tano xontlhe xikhati, a “nanza gi tsumbekileko ni go tlhariha” hi gona gi nga ni wutihlamuleli go ranga ga ku gisa a malanza ya Jehova. (Mat. 24:45-47) Lezi zi patsa ku hlola a Mitsalo, na va vuniwa hi moya wa ku basa, kasi ku nyika wurangeli ka matirisela ya matshinya ya milayo ya Biblia ma yelanako ni ndlela leyi a mabandla misaveni yontlhe ma nga xaxametwa ha yona. A nanza gi tsumbekileko hi gona kambe gi yimisako a vawoneleli va xipanze ni ziro za Kometi ya Ravi. A hofisa yinwe ni yinwani ya ravi yi nyika xivuno xi lavekako ka matirisela ya wukongomisi legi gi nyikwako. A hubye yinwe ni yinwani ya madota yi na ni ntiro wa ku hlola khwatsi a kuringanelwa hi kuya hi Mitsalo ka vamakabye lava yi va wulako lezaku va nga yimisiwa bandleni ga Nungungulu. A muwoneleli munwe ni munwani i na ni wutihlamuleli go karata ga ku hlola khwatsi ni ku khongelela a mawonela lawa ma nyikwako hi madota, a tlhela a yimisa a vavanuna lava va ringanelwako.

A ku zwisisa lezi a vamakabye va rangelako va yimisiswako zona, zi hi maha hi zwisisa a ntiro wa moya wa ku basa mhakeni leyi. Kota wuyelo ga kona, hi tsumba nguvu hi tlhela hiva ni xichawo xa hombe hi lava va yimisilweko bandleni ga wuKristu. — Maheb. 13:7, 17.

A bhuku ga Kuvululelwa 11:3 gi wulawula hi vakustumunyu vambiri lava va wa nga ta profeta hi 1.260 wa masiku. Hi kulanzela, a matimu lawo ma wula lezaku a xihari xi wa ta “va hlula, xi va daya.” Kanilezi anzhako ka “masiku manharu ni khihlanya,” a vakustumunyu lavo va vambiri va wa ta vuxiwa, zi vanga kuchava ka hombe ka lava va nga wa ta zi wona. — Kuv. 11:7, 11.

Hi vamani a vakustumunyu lavo va vambiri? A mitlhamuselo yi nga ka mahungu lawo ya hi vuna ku va tiva. Xo sangula, hi byeliwa lezaku va yimelwa hi “tisinya timbiri ta maoliva ni timeza timbiri to veka tikandiya leti ti yimileko mahlweni ka Hosi ya misava.” (Kuv. 11:4) Lezo zi hi alakanyisa a meza ya tikandiya ni tisinya timbiri ta maoliva zi tlhamuselwako ka wuprofeti ga Zakaria. A tisinya leto ta maoliva ti wuliwa lezaku ti yimela a ‘vatotiwa vambiri,’ ku nga Mwamangulu Zerubabeli ni Mupristi wa Hombe Joxua, “va yimileko mahlweni ka Hosi ya misava yontlhe.” (Zak. 4:1-3, 14) Xa wumbiri, a vakustumunyu lava va vambiri va tlhamuselwa na va maha zirewukiso zo fana ni lezi zi nga mahiwa hi Mosi na Elija. — Ringanisa na Kuvululelwa 11:5, 6, Mitsengo 16:1-7, 28-35 ni 1 Tihosi 17:1; 18:41-45.

Hi wihi a nchumu wu kotlanisako mabhuku lawa? A ginwe ni ginwani gi wulawula hi vatotilweko va Nungungulu lava va rangeleko xikhatini xa kuringwa ka hombe. Hikwalaho, kota kutatiseka ka xipimo 11 xa bhuku ga Kuvululelwa, a vatotilweko lava va nga sangula ku rangela xikhatini xa kuyimiswa ka Mufumo wa Nungungulu le tilweni hi 1914, va xumayele hi malembe manharu ni khihlanya “na va ambele tinguwo ta tisakwa.”

Kumbheleni ka ntiro wabye wa kuxumayela na va ambele tinguwo ta tisakwa, a vatotilweko lavo va lo dawa hi ndlela yo fananisa a xikhati lexi va nga yisiwa paxweni hi xikhati xo koma, lezi zi yimelako a masiku manharu ni khihlanya. Kuwoneni ka valala va vanhu va Nungungulu, a ntiro wabye wu wa fuvile, lezi zi nga va maha vaba ni mikulungwani hi kutsaka ka hombe. — Kuv. 11:8-10.

Hambulezo, kota lezi a magezu ya wuprofeti ma nga sina ma wulile, kumbheleni ka masiku manharu ni khihlanya, a vakustumunyu lavo va vambiri va lo vuxiwa. A vatotilweko lavo a va humesiwangi paxweni ntsena, kanilezi lava va nga simama va tsumbekile va lo amukela a xiavelo xo hlawuleka hi ka Nungungulu hi ku tirisa a Hosi ya vona, Jesu Kristu. Hi 1919 va lo maha xipanze xa lava va nga yimiswa kota “nanza gi tsumbekileko ni go tlhariha” kasi ku khatalela a zilaveko za moya za vanhu va Nungungulu masikwini yo gumesa. — Mat. 24:45-47; Kuv. 11:11, 12.

A bhuku ga Kuvululelwa 11:1, 2 gi zwananisa zimaho lezi ni xikhati lexi a tempeli ya moya yi nga wa ta pimiwa, kutani ku hloliwa. A xipimo 3 xa Malaki xonawu xi wulawula hi kuhloliwa ka tempeli ya moya, loku ku lanzelwako hi xikhati xa kubasiswa. (Mal. 3:1-4) A ntiro lowo wa ku hlola ni ku basisa wu tekile xikhati muni? Wu sukele 1914 kala kusanguleni ka 1919. A xikhati lexi xi patsa a masiku lawa ya 1.260 (42 wa tihweti) ni masiku manharu ni khihlanya yo fananisa lawa ma kumbukilweko ka xipimo 11 xa Kuvululelwa.

A ho ku tsaka hi lezi Jehova a lulamiseleko ntiro lowu wa kubasisa ka moya kasi a ti basisela vanhu vo hlawuleka kasi ku maha mitiro yo saseka! (Titusi 2:14) Ha bonga kambe a xikombiso lexi xi vekilweko hi vatotilweko vo tsumbeka lava va rangeleko xikhatini lexo xa kuringwa, hi ndlela leyo va tira kota vakustumunyu vambiri vo fananisa.a